1, 2. (a) Hao nao tingting bilong Olketa Jehovah’s Witness abaotem Bible? (b) Wanem nao samfala buk long Bible wea iu laekem tumas?

IUMI Olketa Jehovah’s Witness barava tinghae long Bible. Toktok insaed long Bible hem comfortim iumi, givim iumi hope, and teachim iumi. (Rome 15:4) Iumi luksavve Bible hem no storyim tingting bilong olketa man, bat hem “toktok bilong God.”—1 Thess. 2:13.

² Iumi evriwan garem samfala favorite buk long Bible. Samfala laekem olketa Gospel bikos example bilong Jesus helpem olketa for savve long olketa nambawan wei bilong Jehovah. (John 14:9) Olketa narawan laekem olketa buk wea storyim profesi. Wanfala nao hem Revelation, wea storyim “olketa samting wea no longtaem nomoa mas happen.” (Rev. 1:1) Samfala kasem comfort taem olketa readim Psalms, and olketa narawan laekem gudfala advaes wea stap long Proverbs. Tru tumas, iumi evriwan savve kasem gudfala samting from Bible.

3, 4. (a) Hao nao tingting bilong iumi abaotem olketa pablikeson bilong iumi? (b) Samfala pablikeson bilong iumi hem for olketa wanem grup?

³ From iumi barava tinghae long Bible, iumi barava tinghae tu long olketa pablikeson bilong iumi wea story abaotem Bible.  Jehovah nao provaedem evri buk, brochure, magasin, and olketa nara pablikeson wea iumi kasem. Evri samting hia helpem iumi for fren gud witim God and mekem iumi “garem strongfala faith.”—Titus 2:2.

⁴ Staka long olketa pablikeson bilong iumi hem for evri Jehovah’s Witness. Bat samfala pablikeson bilong iumi hem for wanfala sekson or grup, example nao, for olketa young wan or dadi and mami. Staka article and video long website bilong iumi hem for pipol wea no Jehovah’s Witness. Diswan showimaot Jehovah duim wanem hem promisim, wea hem nao for provaedem staka spiritual kaikai for pipol evriwea long world.—Isa. 25:6.

5. Jehovah hapi long iumi taem iumi duim wanem samting?

⁵ Staka long iumi laek for garem moa taem for readim Bible and olketa pablikeson bilong iumi. Maet iumi no garem taem for studyim gud evri pablikeson wea iumi kasem. Jehovah hapi long iumi taem iumi ‘iusim gud taem bilong iumi’ for readim and studyim Bible and olketa pablikeson bilong iumi. (Eph. 5:15, 16) Nomata olsem, iumi mas careful long wanfala samting. Wanem nao datwan?

6. Wanem kaen tingting nao maet mekem iumi no kasem gud samting from evri spiritual kaikai wea Jehovah givim?

⁶ Sapos iumi no careful, maet iumi tingse samfala part bilong Bible or samfala pablikeson bilong iumi hem no fitim iumi. Olsem example, waswe sapos iumi tingse wanfala samting wea iumi readim long Bible hem fitim olketa narawan and no iumi? Waswe, iumi readim datwan kwiktaem or iumi no readim nomoa? Sapos olsem, maet iumi no kasem important information wea savve helpem iumi. Wanem nao savve helpem iumi for no garem kaen tingting olsem? Iumi mas no forget, evri spiritual kaikai wea iumi kasem hem kam from Jehovah. Bible sei: “Mi, Jehovah, mi nao God bilong iufala. Mi nao teachim iufala mekem iufala kasem gud samting.” (Isa. 48:17) Long disfala study, bae iumi storyim thrifala idea wea savve helpem iumi for kasem gud samting from evri spiritual kaikai wea Jehovah givim.

7. Why nao iumi mas no satem tingting bilong iumi taem iumi readim Bible?

⁷ No satem tingting bilong iu. Hem tru, olketa man wea raetem Bible raetem samfala verse for wanfala man or wanfala grup. Bat Bible sei “evri toktok insaed long olketa Holy Raeting hem kam from God” and hem savve teachim iumi. (2 Tim. 3:16) Dastawe iumi mas no satem tingting bilong iumi taem iumi readim Bible. Wanfala brata sei: “Taem mi readim Bible, mi trae for tingim hao mi savve lanem plande samting from olketa verse wea mi readim.” Datwan helpem hem for luksavve long olketa gudfala point wea firstaem maet hem no tingim. So bifor iumi readim Bible, iumi shud askem Jehovah for helpem iumi mekem iumi no satem tingting bilong iumi, and for iumi minim wanem hem laekem iumi for lanem.—Ezra 7:10; readim James 1:5.

8, 9. (a) Taem iumi readim Bible, wanem nao olketa kwestin wea hem gud for iumi ting raonem? (b) Wanem nao iumi lanem abaotem Jehovah taem iumi readim olketa spiritual mark wea olketa elder mas kasem?

⁸ Askem olketa kwestin. Taem iu readim Bible, iusim lelebet taem for ting raonem olketa kwestin hia: ‘Wanem nao mi lanem abaotem Jehovah from diswan? Hao nao mi savve iusim disfala information long laef bilong mi? Hao nao mi savve iusim disfala  information for helpem olketa narawan?’ Taem iumi ting raonem olketa kwestin hia, bae iumi kasem gudfala samting from Bible reading bilong iumi. Tingim wanfala example. Bible storyim olketa spiritual mark wea olketa elder mas kasem. (Readim 1 Timothy 3:2-7.) From staka long iumi no elder, maet iumi tingse olketa verse hia no fitim iumi. Bat sapos iumi ting raonem thrifala kwestin long antap, bae iumi luksavve iumi evriwan savve kasem gudfala samting from olketa verse hia.

⁹ Wanem nao mi lanem abaotem Jehovah from diswan? Jehovah nao storyim olketa spiritual mark hia wea olketa elder mas kasem. Jehovah expectim olketa brata wea lukaftarem kongregeson for garem olketa gudfala wei. Diswan showimaot Jehovah lovem olketa brata and sista long kongregeson. Bible sei hem baem kongregeson “long blood bilong Son bilong hem.” (Acts 20:28) So Jehovah expectim olketa elder for showimaot gudfala example, and bae olketa givim ansa long Jehovah for wei wea olketa lukaftarem kongregeson. Jehovah laekem iumi for hapi and stap gud insaed long kongregeson. (Isa. 32:1, 2) Taem iumi read abaotem olketa spiritual mark hia, iumi luksavve Jehovah barava lovem iumi.

10, 11. (a) Taem iumi readim olketa spiritual mark bilong olketa elder, hao nao iumi savve iusim datfala information long laef bilong iumi? (b) Hao nao iumi savve iusim datfala information for helpem olketa narawan?

¹⁰ Hao nao mi savve iusim disfala information long laef bilong mi? Sapos iu elder distaem, samfala taem iu shud readim datfala list bilong olketa spiritual mark hia and ting raonem olketa samting wea iu savve kamap gud long hem. Sapos iu wanfala brata wea “laek for elder,” iu shud waka hard for kasem olketa spiritual mark hia. (1 Tim. 3:1) Bat evri Christian savve lanem samting from olketa spiritual mark hia. Olsem example, Jehovah expectim iumi evriwan for no ova tumas and for garem gudfala tingting. (Phil. 4:5; 1 Pet. 4:7) Taem olketa elder “showimaot gudfala example for olketa sheepsheep,” iumi savve lane from example bilong olketa and “garem sem faith olsem olketa.”—1 Pet. 5:3; Heb. 13:7.

¹¹ Hao nao mi savve iusim disfala information for helpem olketa narawan? Iumi savve storyim olketa spiritual mark hia long  olketa Bible study and olketa narawan wea interest, for helpem olketa luksavve olketa elder long kongregeson difren from olketa bigman bilong religion. Disfala list savve mekem iumi tingim tu bigfala waka wea olketa elder duim long kongregeson, and diswan bae helpem iumi for respectim olketa. (1 Thess. 5:12) Taem iumi respectim olketa, bae olketa hapi long waka bilong olketa.—Heb. 13:17.

12, 13. (a) Wanem kaen research nao iumi savve duim taem iumi studyim Bible? (b) Storyim example wea showimaot hao wei for duim research savve helpem iumi for lanem olketa samting wea firstaem maet iumi no tingim.

¹² Duim research. Taem iumi studyim Bible, iumi savve duim research for ansarem olketa kwestin hia:

• Hu nao raetem disfala part long Bible?

• Wea nao hem raetem, and long wanem taem?

• Wanem nao samfala important samting wea happen long semtaem wea hem raetem datfala buk?

Taem iumi ting raonem olketa kwestin hia, bae iumi lanem olketa samting wea firstaem maet iumi no tingim.

¹³ Olsem example, Ezekiel 14:13, 14 sei: “Sapos wanfala kantri no faithful and sin againstim mi, bae mi duim samting for againstim olketa and bae mi distroem kaikai bilong olketa. Bae mi mekem olketa kasem bigfala hangre and killim dae olketa man and animal long datfala kantri. Jehovah, wea hem Lord bilong evri samting, hem sei ‘nomata sapos Noah, Daniel, and Job, thrifala stap long datfala kantri, bae olketa fit for sevem olketa seleva nomoa bikos long wei wea olketa raeteous.’” Sapos iumi duim research long disfala scripture, bae iumi faendaot Ezekiel hem raetem toktok hia long samting olsem 612 B.C.E. Long datfala taem, Noah and Job dae staka handred year finis, bat Jehovah still tingim wei wea tufala faithful. Bat Daniel hem laef yet long datfala taem. Maet hem samting olsem 20 year long disfala taem wea Jehovah sei hem raeteous olsem Noah and Job. Wanem nao iumi lanem from diswan? Jehovah luksavve and tinghae long evriwan wea faithful long hem, nomata olketa young wan tu.—Ps. 148:12-14.

14. Hao nao olketa pablikeson for young pipol savve helpem olketa, and hao nao iumi evriwan tu savve kasem gud samting from olketa pablikeson hia? (Lukim piksa long start bilong study.)

¹⁴ Olketa pablikeson for young pipol. Iumi savve kasem gud samting from full Bible. Olsem tu, iumi savve kasem gud samting from evri pablikeson bilong iumi. Tingim samfala example. Long olketa year wea go pas, Jehovah provaedem staka spiritual kaikai for olketa young wan. ^[1] Diswan helpem olketa for deal witim olketa hevi long skul and olketa hard taem wea kasem young pipol. Bat sapos iumi evriwan readim olketa article and pablikeson hia, wanem gud samting nao bae iumi savve kasem? Bae iumi savve long olketa problem wea kasem young pipol, and bae iumi fit for helpem and encouragem olketa.

15. Why nao evri Christian shud readim olketa pablikeson for young pipol?

¹⁵ Nomata iumi no young, bat iumi shud no tingse information wea organization provaedem for young pipol hem no fitim iumi. Staka problem wea olketa article hia storyim hem affectim evri Christian. Olsem example, iumi evriwan mas kontrolem feeling bilong iumi, rejectim hevi for duim nogud samting, stap klia long nogud hapitaem, no associate witim pipol wea duim nogud samting, and mas no fraet for storyim  wanem iumi bilivim. So nomata olketa pablikeson hia hem for young pipol, information wea stap insaed hem kam from Bible, and evri Christian savve kasem gud samting from datwan.

16. Wanem nao narafala wei wea olketa pablikeson bilong iumi helpem young pipol?

¹⁶ Olketa pablikeson wea organization provaedem for young pipol savve helpem olketa for strongim wei wea olketa fren witim Jehovah. (Readim Ecclesiastes 12:1, 13.) Iumi evriwan savve kasem gud samting from olketa pablikeson hia. Olsem example, April 2009 Awake! hem garem disfala article “Young People Ask . . . How Can I Make Bible Reading Enjoyable?” Article hia garem olketa gudfala idea for duim diswan, and hem garem wanfala box tu wea iu savve katem and keepim insaed Bible bilong iu and iusim taem iu duim Bible reading. Waswe, olketa wea no young tu kasem gud samting from disfala article? Wanfala sista wea marit and garem olketa pikinini sei hem faendem hem no isi for duim Bible reading. Bat hem followim olketa idea long disfala article, and distaem hem barava tinghae long wei wea evri buk long Bible sapotim each other. Hem sei: “Distaem mi barava luk forward for duim Bible reading.”

17, 18. Wanem gud samting nao iumi savve kasem taem iumi readim olketa pablikeson for pipol long pablik? Storyim example.

¹⁷ Olketa pablikeson for pipol long pablik. Start kam long 2008 iumi kasem Wastaoa study magasin, wea hem for iumi Olketa Jehovah’s Witness. Iumi garem tu olketa nara magasin wea iumi savve givim long pipol wea no Witness. Hao nao iumi savve kasem gud samting from olketa magasin hia tu? Tingim diswan. Taem iumi invaetem samwan for kam long Kingdom Hall and hem kam, iumi hapi fogud. Taem speaker gohed givim tok bilong hem, maet iu tingting abaotem datfala visitor. Maet iu ting, sapos iu nao datfala visitor, hao nao bae tingting bilong iu abaotem datfala tok. From iu lisin gud long datfala tok, iu bae barava tinghae long subject wea speaker hem story abaotem.

¹⁸ Semsem tu, taem iumi readim olketa pablikeson for pipol long pablik. Olsem example, pablik Wastaoa magasin and olketa article long jw.org story abaotem Bible long wei wea isi for pipol long pablik minim. Taem iumi readim disfala information, datwan helpem iumi for minim gud olketa tru teaching insaed Bible, and for barava tinghae long olketa. And tu, iumi savve lanem olketa niu wei for explainim wanem iumi bilivim long ministry. Semsem tu, taem iumi readim Awake! magasin, datwan strongim faith bilong iumi long trufala God, and hem garem information wea iumi savve iusim long ministry.—Readim 1 Peter 3:15.

19. Hao nao iumi savve showimaot long Jehovah iumi tinghae long evri spiritual kaikai wea hem provaedem?

¹⁹ Tru nao, Jehovah provaedem staka spiritual kaikai for helpem iumi. (Matt. 5:3) Iumi shud gohed for readim and followim evri instruction and advaes wea hem givim long iumi. Sapos iumi duim datwan, bae iumi kasem gudfala samting and iumi showimaot long Jehovah iumi tinghae long evri spiritual kaikai wea hem provaedem.—Isa. 48:17.