1, 2. (a) Fa Yehovah Kotoigi e si Bijbel? (b) Sortu pisi fu Bijbel yu lobi?

YEHOVAH KOTOIGI lobi Bijbel. Wi e frutrow den sani di skrifi na ini èn te wi e leisi en wi e kisi trowstu nanga howpu (Rom. 15:4). Wi no e si Bijbel leki wan buku fu libisma, ma wi e si en „leki a wortu fu Gado èn na dati a de trutru”.​—1 Tes. 2:13.

² Wi de seiker taki ibriwan fu wi abi wan pisi na ini Bijbel di a lobi. Son sma lobi den tori di e taki fu a libi nanga a wroko fu Yesus. Den pisi disi e leri wi fa Yesus de èn na so wi e leri sabi sortu moi fasi Yehovah abi (Yoh. 14:9). Tra sma lobi den pisi fu Bijbel di e taki fu profeititori. Kande den lobi a buku Openbaring di e sori wi „den sani di musu pasa dyonsro” (Openb. 1:1). Èn suma fu wi no lobi den Psalm di e trowstu wi noso a buku Odo di e leri wi moi sani di wi kan gebroiki na ini wi libi? A de krin taki Bijbel na wan buku gi ala sma.

3, 4. (a) Fa wi e si den buku nanga den tijdschrift di wi e kisi? (b) Sortu buku nanga tijdschrift wi abi gi spesrutu grupu sma?

³ Fu di wi lobi Bijbel, meki wi lobi den buku nanga tijdschrift tu di e fruklari sani fu Bijbel. Fu eksempre, wi lobi  den sani di wi e leri na ini den buku, brochure, tijdschrift nanga tra sani. Wi sabi taki den sani disi di Yehovah seti gi wi, e yepi wi fu tan na ai èn fu tan abi „wan tranga bribi”.​—Tit. 2:2.

⁴ Boiti taki wi abi buku di de gi ala Kotoigi fu Yehovah, wi e kisi buku nanga tijdschrift tu di de gi spesrutu grupu sma. Son sani meki spesrutu gi yonguwan èn tra sani de gi papa nanga mama. Furu fu den artikel fu wi na ini tijdschrift noso tapu a website fu wi de gi sma di no de Kotoigi. Ala den sani di wi e kisi, e memre wi na san Yehovah pramisi wi di a taki dati a o „sreka wan bigi nyanyan gi ala . . . pipel”.​—Yes. 25:6.

5. Nanga sortu sani Yehovah breiti?

⁵ Kande furu fu wi ben sa wani abi moro ten fu leisi Bijbel nanga den tra sani di wi e kisi. Wi kan de seiker taki Yehovah breiti te wi e „gebroiki a ten fu [wi] na wan koni fasi”, fu di wi e leisi èn e studeri Bijbel (Ef. 5:15, 16). A tru taki a no ala den sani di wi e kisi, wi man studeri finifini, ma toku wi musu luku bun nanga wan sani. San na dati?

6. Sortu denki kan meki taki wi no o kisi wini fu den sani di Yehovah seti gi wi?

⁶ Efu wi ben o denki taki son sani di Yehovah seti no de gi wi, dan a kan taki wi no o kisi wini fu ala den sani disi. Fu eksempre, kande yu leisi wan pisi fu Bijbel, ma yu feni taki a no de gi yu. Noso kande a buku noso tijdschrift no skrifi spesrutu gi wi. San wi e du te wi e kisi den sortu buku disi? Wi e leisi den frafra noso wi no e leisi den srefisrefi? Efu na dati wi e du, dan kande wi no o kisi so furu wini fu den sani di Yehovah seti gi wi. Fa wi kan sorgu taki a sani disi no pasa? We, ibriwan fu wi musu hori na prakseri taki den Bijbel leri di wi e kisi e kon fu Gado. A profeiti Yesaya ben taki: „Mi, Yehovah, na yu Gado. Mi na a sma di e leri yu fu kisi wini” (Yes. 48:17). Dati meki a bun fu go luku dri sani di kan yepi wi fu kisi wini fu ala pisi fu Bijbel èn fu den difrenti sani di Yehovah seti gi wi.

7. Fu san ede wi musu opo wi ati gi den sani di wi e leisi na ini Bijbel?

⁷ Opo yu ati gi den sani di yu e leisi. Bijbel e taki krin dati „na Gado srefi ben meki sma skrifi ala den sani di de na ini Gado Buku” (2 Tim. 3:16). A tru taki son pisi fu Bijbel ben skrifi gi wán sma noso gi wán grupu sma nomo. Dati meki te wi e leisi Bijbel, wi musu opo wi ati fu luku san wi kan leri fu en. Wan brada e taki: „Te mi e leisi Bijbel, mi e pruberi fu hori na prakseri taki mi kan leri wan sani fu a pisi di mi e leisi.” A e taki moro fara: „Disi e yepi mi fu no leisi frafra nomo, ma fu luku a tori moro fini.” Fosi yu leisi Gado Wortu, begi Yehovah fu a opo yu ati gi den sani di yu e leisi èn aksi en fu si san a wani taki yu musu leri.​—Esra 7:10; leisi Yakobus 1:5.

8, 9. (a) Te wi e leisi Bijbel, dan san wi kan aksi wisrefi? (b) San den Bijbeltekst di e sori san de fanowdu gi brada di wani tron owruman, e fruteri wi fu Yehovah?

⁸ Poti aksi. Te yu e leisi wan pisi na ini Bijbel, dan teki ten fu prakseri pikinso fu a tori èn aksi yusrefi: ’San disi e fruteri mi fu Yehovah? Fa mi kan gebroiki a sani di mi leisi na ini mi libi? Fa mi kan gebroiki en fu yepi trawan?’ Te wi e denki dipi fu den aksi disi, dan wi o kisi moro wini fu a leisi di wi e leisi Bijbel. Luku wan eksempre. Na ini Bijbel yu abi  tekst di e sori san de fanowdu gi brada di wani tron owruman. (Leisi 1 Timoteyus 3:2-7.) Fu di furu fu wi no de owruman, meki wi kan denki taki den Bijbeltekst disi no de gi wi. Ma wi o luku wan tu aksi di o yepi wi fu si taki den Bijbeltekst disi kan abi wini gi wi tu.

⁹ San disi e fruteri mi fu Yehovah? Den Bijbeltekst di e taki san de fanowdu gi brada di wani tron owruman, e sori taki Yehovah e si en leki wan seryusu sani te wan brada kisi a frantwortu disi. Yehovah wani taki den musu de bun eksempre èn a e fruwakti fu den taki den e sorgu bun gi a gemeente „di a bai nanga a brudu fu en eigi Manpikin” (Tori 20:28). Yehovah wani taki wi no musu frede fu go na den brada di a poti leki skapuman (Yes. 32:1, 2). Sobun, den Bijbeltekst disi e sori taki Yehovah lobi wi trutru.

10, 11. (a) Te wi e leisi den Bijbeltekst di de spesrutu gi brada di wani tron owruman, dan fa wi kan gebroiki dati na ini wi eigi libi? (b) Fa wi kan gebroiki den Bijbeltekst disi fu yepi trawan?

¹⁰ Fa mi kan gebroiki a sani di mi leisi na ini mi libi? Son leisi a de fanowdu taki wan brada di abi a frantwortu fu sorgu gi a gemeente musu luku den Bijbeltekst disi baka fu si sortu sani a kan du moro bun. Wan brada di wani „teki fesi na ini a gemeente”, musu poti prakseri na den Bijbeltekst disi tu fu di a musu meki muiti fu du den sani di skrifi drape (1 Tim. 3:1). Te yu luku en bun, dan ala Kresten kan leri wan sani fu den Bijbeltekst di de spesrutu gi brada, fu di furu fu den sani di skrifi na ini den tekst disi na san Yehovah e aksi fu ala Kresten. Fu eksempre, wi alamala musu de klariklari fu fiti densrefi na ala fasi èn den musu de nanga krin frustan (Fil. 4:5; 1 Petr. 4:7). Te owruman e meki muiti fu de bun „eksempre gi den skapu”, dan wi kan leri fu den èn wi kan „teki wan eksempre na a bribi fu den”.​—1 Petr. 5:3; Hebr. 13:7.

¹¹ Fa mi kan gebroiki en fu yepi trawan? Wi kan gebroiki den Bijbeltekst disi tu fu sori Bijbelstudenti noso sma di wani sabi moro fu Bijbel, fa den owruman fu Yehovah Kotoigi e difrenti fu den kerki fesiman. Wan tra sani na taki  te wi e leisi den Bijbeltekst disi, dan wi kan si sortu muiti den owruman na ini wi gemeente e du gi wi. Na so wi o kisi moro ’lespeki gi den brada disi di e wroko tranga’ na wi mindri (1 Tes. 5:12). O moro wi e sori lespeki gi den brada disi di e wroko tranga, o moro den o prisiri.​—Hebr. 13:17.

12, 13. (a) Fa wi kan gebroiki den sani di wi e kisi fu ondrosuku Bijbel moro fini? (b) Gi wan eksempre di e sori taki wi kan leri moro te wi e ondrosuku Bijbeltekst moro fini.

¹² Ondrosuku den sani di yu e leisi. Te wi e gebroiki den sani di wi e kisi fu studeri Bijbel moro bun, dan wi kan pruberi fu feni a piki tapu den aksi di e kon now:

• Suma skrifi a pisi disi fu Bijbel?

• Pe èn o ten a skrifi?

• Sortu prenspari sani pasa di a Bijbel buku disi skrifi?

Te wi ondrosuku den aksi disi, dan wi o si sani di kande wi no ben sabi ete.

¹³ Fu eksempre, luku Esekièl 14:13, 14 pe wi e leisi: „Efu den sma fu wan kondre sondu teige mi fu di den drai baka gi mi, dan mi o langa mi anu fu naki den èn mi o broko den tiki di den e gebroiki fu anga lingakuku. Mi o meki angriten de na ini a kondre èn mi o kiri den libisma nanga den osometi na ini a kondre. ’Efu den dri man disi, Noa, Danièl nanga Yob ben de na ini a kondre, dan den wawan ben o kisi frulusu fu di den ben de reti-ati sma’, na so a Moro Hei Masra Yehovah taki.” Te wi e ondrosuku a pisi disi fu a buku Esekièl, dan wi o si taki a skrifi wan sani fu 612 Fosi Krestes. Na a ten dati, Noa nanga Yob ben dede hondrohondro yari kaba èn Gado no ben frigiti taki den reti-ati man disi ben sori bribi na ini en. Ma Danièl ben de na libi ete. A kan taki a ben abi sowan 20 yari di Yehovah taki dati a ben de wan reti-ati man neleki Noa nanga Yob. San wi kan leri fu disi? Yehovah e si ala den futuboi fu en di e sori bribi na ini en èn a e warderi den alamala, srefi te den yongu ete.​—Ps. 148:12-14.

14. Fa den buku di tyari kon na doro gi yonguwan e yepi den èn fa trawan kan kisi wini fu dati tu? (Luku a prenki na a bigin fu na artikel.)

¹⁴ Sani di skrifi gi yonguwan. Neleki fa wi e kisi wini fu ala den pisi fu Bijbel di wi e studeri, na so wi kan kisi wini tu fu ala den difrenti buku nanga tijdschrift di wi abi. Luku wan tu eksempre. Na ini den yari di pasa, furu buku kon na doro gi den yonguwan. ^[1] Sonwan fu den buku disi meki spesrutu fu yepi den te den e gro kon bigi noso den e sori san den kan du te den e kisi tesi na skoro. Fa wi alamala kan kisi wini te wi e leisi den buku disi? We, den e memre wi sortu problema nanga tesi den yonguwan fu wi e kisi. Disi o meki taki wi man yepi den èn gi den deki-ati.

15. Fu san ede Kresten di de bigisma kaba musu leisi den tori tu di skrifi spesrutu gi yonguwan?

¹⁵ Ma furu fu den sani di skrifi gi den yonguwan no de gi den wawan. Wi alamala musu opo taki gi a bribi fu wi, wi musu dwengi den firi fu wi, wi no musu meki trawan dwengi wi fu du san den wani, wi musu luku bun nanga takru mati èn wi musu wai pasi gi prisiri di no fiti gi wan Kresten. Den tori disi èn furu trawan de fu feni na ini den buku di skrifi spesrutu gi yonguwan. A de so taki Kresten di de bigisma kaba no abi fu leisi den buku disi? Kwetikweti! Aladi  den buku skrifi na wan fasi di yonguwan lobi, toku den tori na ini komoto fu Bijbel èn wi alamala kan kisi wini fu den.

16. Nanga sortu tra sani den buku fu wi e yepi yonguwan?

¹⁶ Boiti taki den buku fu wi e sori yonguwan san den musu du te den e kisi tesi, den e yepi den tu fu kisi wan moro tranga bribi èn fu kon krosibei na Yehovah. (Leisi Preikiman 12:1, 13.) Kresten di de bigisma kaba kan kisi wini fu disi tu. Fu eksempre, na ini april 2009 wan Ontwaakt! kon na doro di ben abi na artikel di nen „Jonge mensen vragen . . . Hoe maak ik Bijbellezen leuker?” Na artikel disi ben abi wan tu moi rai èn a ben abi wan faki tu di den yonguwan ben kan koti puru èn kibri dati fu gebroiki en te den e studeri Bijbel. Bigisma kisi wini fu na artikel disi tu? Wan mama ben skrifi: „A ben tranga gi mi fu leisi Bijbel. Ma mi fiti den rai na ini na artikel disi, mi koti a faki puru èn mi e gebroiki en bun. Now mi e prisiri fu leisi Bijbel. Mi kan si fa den buku fu Bijbel e kruderi nanga makandra na wan heri moi fasi. Noiti ete mi ben e prisiri so fu leisi Bijbel.”

17, 18. Fa wi kan kisi wini fu den sani di skrifi spesrutu gi sma di wi e miti na ini a preikiwroko? Gi wan eksempre.

¹⁷ Sani di skrifi spesrutu gi sma di wi e miti na ini a preikiwroko. Sensi 2008 wi breiti taki wi e kisi a studie-Waktitoren di de spesrutu gi Yehovah Kotoigi. Ma fa a de nanga den tijdschrift di skrifi spesrutu gi sma di wi e miti na ini a preikiwroko? Wi e kisi wini fu den tijdschrift disi tu? Luku wan eksempre. Kon meki wi taki dati wan dei yu e sidon na ini a Kownukondre zaal fu arki wan Bijbel-lezing èn fosi a lezing bigin, yu e si wan sma di yu ben kari kon na den konmakandra fu wi. Wi de seiker taki yu o breiti. Kande te a brada e hori a lezing, yu e denki a sma. A kan taki yu e aksi yusrefi fa a e firi te a e yere san a brada e taki èn efu den sani di a e yere o kenki en libi. A bakapisi de taki yu e kon abi moro warderi gi den tori di a brada e taki fu en.

¹⁸ Na so wi kan firi tu te wi e leisi den tijdschrift di skrifi spesrutu gi sma di wi e miti na ini a preikiwroko. Fu eksempre, A Waktitoren gi a preikiwroko e taki sani na wan fasi di sma di no de Kotoigi kan frustan moro krin. Na so a de tu nanga furu fu den artikel di de tapu a website fu wi. Wan tu fu den artikel disi di yu kan feni tapu jw.org/nl na „Vragen over de Bijbel” nanga „Veelgestelde vragen”. Te wi e leisi den artikel disi, dan wi e kisi moro warderi gi den tru tori fu Bijbel di wi ben sabi kaba. Boiti dati, wi kan leri moro fasi fa wi kan taki nanga sma fu a bribi fu wi te wi de na ini a preikiwroko. Na Ontwaakt! e tranga a bribi fu wi tu èn a e sori taki wan tru Gado de. A e leri wi tu fa wi kan opo taki gi a bribi fu wi.​—Leisi 1 Petrus 3:15.

19. Fa wi kan sori warderi gi den sani di Yehovah seti gi wi?

¹⁹ A de krin taki Yehovah seti furu sani gi wi di o yepi wi fu kisi wan moro tranga bribi (Mat. 5:3). Meki wi tan gebroiki ala den sani di a gi wi. Na so wi o sori warderi gi a Gado di e leri wi fu kisi wini.​—Yes. 48:17.