1, 2. (a) Testemuña ba Jeová sente oinsá kona-ba Bíblia? (b) Ita rasik gosta liu parte neʼebé husi Bíblia?

ITA Testemuña ba Jeová gosta tebes Bíblia, tanba Bíblia fó matadalan neʼebé loos no mós fó kmaan no esperansa ba ita. (Roma 15:4) Ita la haree Bíblia hanesan ema nia livru, maibé “Maromak nia Liafuan”.—1 Tesalónika 2:13.

² Karik ita ida-idak gosta parte neʼebé la hanesan husi Bíblia. Balu gosta lee evanjellu sira tanba ita bele aprende kona-ba Jeová nia hahalok furak neʼebé Jesus hatudu. (João 14:9) Balu seluk gosta lee kona-ba profesia sira, hanesan lee livru Apokalipse neʼebé koʼalia kona-ba buat neʼebé atu “mosu lakleur tan”. (Apokalipse 1:1) Balu tan gosta lee Salmo no Provérbios tanba Salmo fó kmaan sira no Provérbios fó matadalan neʼebé kapás. Tan neʼe mak ita hatete katak Bíblia mak livru ba ema hotu, loos ka lae?

3, 4. (a) Ita sente oinsá kona-ba ita-nia livru sira? (b) Ita-nia livru hakerek ba sé deʼit?

³ Tanba ita gosta Bíblia, ita mós gosta ita-nia livru sira, tanba livru sira-neʼe bazeia hotu ba Bíblia. Livru, broxura, revista, no buat sira seluk neʼebé ita iha, sira hotu mai husi  Jeová. Ajuda sira-neʼe Jeová fó mai ita atu ita bele besik nafatin ba nia no “iha fiar neʼebé metin”.—Tito 2:2.

⁴ Ita-nia livru barak mak hakerek informasaun atu fó ba Testemuña ba Jeová hotu. Maibé dala ruma informasaun balu hakerek liuliu kona-ba joven ka inan-aman sira-nia presiza. Informasaun no vídeo sira neʼebé hetan husi ita-nia sítiu hakerek liuliu ba públiku. Husi neʼe ita bele haree katak Jeová kumpre duni ninia promesa hodi fó matadalan ba ninia povu.—Isaías (Yesaya) 25:6.

5. Jeová kontente haree ita halo saida?

⁵ Ita barak gosta atu iha tempu barak liután hodi bele lee Bíblia no livru sira. Ita bele fiar katak Jeová kontente tebes bainhira nia haree ita uza didiʼak tempu atu lee Bíblia no estuda. (Éfeso 5:15, 16) Maibé realidade mak ita gosta lee informasaun balu liu fali informasaun seluk. Se nuneʼe, ita presiza kuidadu kona-ba perigu ida. Perigu kona-ba saida?

6. Saida mak bele halo ita lakon informasaun importante balu husi Jeová nia ajuda?

⁶ Se ita la kuidadu, ita bele hakat liu deʼit informasaun balu husi Bíblia ka husi ita-nia livru sira tanba ita hanoin katak informasaun sira-neʼe la kona ita-nia situasaun. Porezemplu, oinsá se iha eskritura balu ladún kona ita-nia situasaun? Ka oinsá se informasaun husi ita-nia livru balu hakerek liuliu ba ema seluk deʼit? Ita lee liu ka hakat liu deʼit ka lae? Se ita mak halo nuneʼe, karik ita bele lakon informasaun importante balu neʼebé diʼak ba ita. Entaun, oinsá mak ita bele hasees an husi perigu neʼe? Ita tenke hanoin-hetan katak informasaun sira-neʼe hotu mai husi Jeová. Jeová dehan: “Haʼu, Jeová, mak imi-nia Maromak, Ida neʼebé hanorin imi kona-ba buat neʼebé diʼak liu ba imi.” (Isaías [Yesaya] 48:17) Iha lisaun neʼe ita sei koʼalia kona-ba sujestaun tolu neʼebé bele ajuda ita atu aproveita didiʼak hahán espirituál hotu neʼebé Jeová fó mai ita.

7. Tanbasá mak ita presiza loke ita-nia neon bainhira lee Bíblia?

⁷ Loke ita-nia neon bainhira lee. Eskritura balu hakerek duni ba ema ka grupu espesífiku ruma. Maibé Bíblia hatete: “Maromak mak leno Eskritura hotu no neʼe diʼak.” (2 Timóteo 3:16) Tan neʼe mak diʼak atu loke ita-nia neon bainhira lee Bíblia. Irmaun ida hatete katak bainhira nia lee Bíblia, nia koko atu hanoin nafatin katak nia bele aprende buat barak husi istória ida deʼit husi Bíblia. Halo hanesan neʼe ajuda nia atu buka-hatene informasaun furak neʼebé subar hela. Neʼe duni, bainhira ita atu lee Bíblia, halo orasaun ba Jeová atu loke ita-nia neon hodi ita bele komprende kona-ba informasaun neʼebé nia hakarak ita atu aprende.—Esdras (Ezra) 7:10; lee Tiago 1:5.

8, 9. (a) Iha tempu lee Bíblia, ita bele husu pergunta saida deʼit ba ita-nia an? (b) Ita bele aprende saida kona-ba Jeová liuhusi kritériu ba katuas nian?

⁸ Uza Pergunta. Bainhira ita lee Bíblia, husu ba ita-nia an pergunta sira tuirmai neʼe: ‘Haʼu aprende saida kona-ba Jeová? Oinsá mak haʼu bele uza informasaun neʼe iha haʼu-nia moris? Oinsá mak haʼu bele uza informasaun neʼe atu ajuda ema seluk?’ Se ita mak hanoin kona-ba pergunta sira-neʼe iha tempu ita lee Bíblia, neʼe sei ajuda ita aprende buat barak liután husi Bíblia. Porezemplu,  Bíblia koʼalia kona-ba kritériu atu sai katuas iha kongregasaun. (Lee 1 Timóteo 3:2-7.) Se ita laʼós katuas ba kongregasaun, karik ita bele hanoin katak lee informasaun sira-neʼe laiha folin ba ita rasik nia moris. Maibé se ita uza pergunta tolu iha leten bainhira lee eskritura sira-neʼe, ita bele haree katak informasaun sira-neʼe iha folin boot tebes ba ita.

⁹ Porezemplu, Haʼu aprende saida kona-ba Jeová? Jeová fó lista kona-ba kritériu ba katuas sira, neʼe hatudu katak nia hakarak mane sira neʼebé tau matan ba kongregasaun tenkesér iha morál neʼebé aas. Jeová hakarak sira atu hatudu ezemplu neʼebé diʼak, no sira sei hatán ba Jeová tuir dalan neʼebé sira trata ema ida-idak iha kongregasaun. Ba Jeová, kongregasaun iha folin boot tebes, tanba Bíblia hatete katak nia sosa kongregasaun, “ho ninia Oan rasik nia raan”. (Apóstolu 20:28) Jeová hakarak ita atu sente seguru iha katuas sira-nia liman. (Isaías [Yesaya] 32:1, 2) Tan neʼe mak bainhira ita lee kona-ba kritériu ba katuas sira, neʼe fó-hanoin ita katak Jeová hakarak tebes atu tau matan ita.

10, 11. (a) Bainhira ita lee kona-ba kritériu ba katuas sira, oinsá mak ita bele uza informasaun neʼe iha ita-nia moris? (b) Oinsá mak ita bele uza informasaun neʼe atu ajuda ema seluk?

¹⁰ Oinsá mak haʼu bele uza informasaun neʼe iha haʼu-nia moris? Se ita mak serbí daudaun nuʼudar katuas, ita tenke haree beibeik ba kritériu sira-neʼe hodi haree ita presiza hadiʼa saida tan ba ita-nia an. Irmaun neʼebé hakarak “atu sai nuʼudar katuas”, nia tenkesér fó atensaun didiʼak hodi hakaʼas an halo tuir kritériu ba katuas sira-neʼe. (1 Timóteo 3:1) Maibé ema hotu mós bele aprende buat ruma husi kritériu sira-neʼe. Porezemplu, Jeová hakarak ema hotu atu haraik an no iha hanoin neʼebé loos, laʼós deʼit katuas sira. (Filipe 4:5; 1 Pedro 4:7) Loos duni, bainhira ita haree katuas sira hatudu ezemplu neʼebé diʼak, ita mós “bele banati-tuir sira-nia fiar”.—1 Pedro 5:3; Ebreu 13:7.

¹¹ Oinsá mak haʼu bele uza informasaun neʼe atu ajuda ema seluk? Ita bele uza kritériu sira-neʼe atu ajuda ita-nia estudante Bíblia ka ema neʼebé iha interese  ba Bíblia hodi hatene katak ita-nia katuas la hanesan duni ho ulun-naʼin relijiaun sira. Kritériu sira-neʼe mós bele fó-hanoin ita katak katuas sira serbisu makaʼas ba ita, tan neʼe ita tenke hatudu respeitu neʼebé kleʼan ba sira. (1 Tesalónika 5:12) Se ita mak hatudu respeitu ba sira, sira mós sei halaʼo sira-nia knaar ho solok.—Ebreu 13:17.

12, 13. (a) Ita bele halo riset kona-ba saida deʼit? (b) Fó toʼok ezemplu kona-ba saida mak ita bele aprende husi informasaun neʼebé la hakerek sai iha eskritura sira.

¹² Halo riset. Iha tempu ita estuda Bíblia, buka-hatene resposta ba pergunta sira tuirmai neʼe:

• Sé mak hakerek eskritura sira-neʼe?

• Sira hakerek husi neʼebé no horibainhira?

• Bainhira sira hakerek eskritura sira, akontesimentu saida mak akontese daudauk iha tempu neʼebá?

Informasaun sira hanesan neʼe bele ajuda ita buka-hatene buat sira neʼebé la hakerek sai iha eskritura sira-neʼe.

¹³ Porezemplu, Ezequiel (Yehezkiel) 14:13, 14 hatete katak: “Sé nasaun ida halo sala hasoru haʼu hodi la hatudu laran-metin, haʼu sei lolo haʼu-nia liman hasoru rai neʼe no halakon ninia hahán hotu no haʼu sei haruka rai-hamlaha ba rai neʼe no halakon ema no animál husi nia. ^‘No se karik mane naʼin-tolu, Noé, Daniel no Job mak iha rai neʼe, sira sei salva deʼit sira-nia an tanba sira-nia hahalok loos,’ neʼe mak Ukun-Naʼin Boot Liu Hotu Jeová hatete.” Se ita mak halo riset liután, ita bele hatene katak Ezequiel hakerek liafuan sira-neʼe iha tinan 612 molok Kristu. Iha tempu neʼebá, Noé no Job mate tiha ba tinan atus hirak ona, maibé Jeová hanoin hela nafatin sira-nia laran-metin. Daniel sei moris hela iha tempu neʼebá, karik nia foin tinan 20 hanesan neʼe no Jeová hatete katak nia mós iha laran-loos hanesan Noé no Job. Ita bele aprende saida husi neʼe? Ita aprende katak Jeová nota no hafolin tebes ninia atan sira-nia laran-metin ba nia, inklui mós joven sira.—Salmo (Mazmur) 148:12-14.

14. Informasaun neʼebé hakerek liuliu ba joven sira ajuda sira iha dalan saida? Oinsá mak neʼe bele mós ajuda ema seluk? (Haree foto iha pájina 23.)

¹⁴ Laʼós husi eskritura deʼit mak ita bele aprende buat oioin. Ita mós bele aprende husi ita-nia livru sira. Porezemplu, livru ba joven. Jeová fó ona informasaun barak atu ajuda joven sira. ^[1] (Haree nota husi lisaun.) Informasaun sira-neʼe ajuda tebes sira atu tahan hasoru problema husi eskola no tempu foin-saʼe nian. Maibé oinsá mak informasaun no livru sira-neʼe mós bele ajuda ita hotu? Bainhira ita lee informasaun sira-neʼe, neʼe bele ajuda ita buka-hatene joven sira hasoru problema saida no oinsá hodi ajuda ka fó anima sira.

15. Tanbasá diʼak ba ema kristaun sira neʼebé boot ona atu lee informasaun neʼebé hakerek ba joven sira?

¹⁵ Tuir loloos, informasaun neʼebé hakerek ba joven sira mós bele kona ita neʼebé laʼós joven. Tanba ita hotu presiza defende ita-nia fiar, kontrola ita-nia hirus, tahan hasoru tentasaun husi kolega, no hasees an husi atividade halimar nian neʼebé ladiʼak no ransu neʼebé ladiʼak. Tan neʼe, maski informasaun sira-neʼe hakerek liuliu atu ajuda joven  sira, maibé informasaun neʼe bazeia ba prinsípiu sira husi Bíblia neʼebé ita hotu presiza atu halo tuir.

16. Ita-nia livru sira bele ajuda joven sira atu halo saida tan?

¹⁶ Ita-nia livru sira mós ajuda joven atu hametin sira-nia relasaun ho Jeová. (Lee Eclesiastes [Pengkhotbah] 12:1, 13. ^[2]) Maibé neʼe mós bele ajuda ema boot sira. Porezemplu, iha Sedarlah! husi Abríl 2009 iha informasaun ho títulu “Kaum Muda Bertanya . . . Bagaimana Aku Bisa Menikmati Pembacaan Alkitab?” Informasaun neʼe fó sujestaun barak neʼebé ita bele tesi no rai hodi lee bainhira atu estuda Bíblia. Neʼe diʼak mós ba ema boot sira ka lae? Inan ida dehan katak ba nia, sempre susar atu lee Bíblia. Maibé uza tiha sujestaun sira-neʼe, nia dehan: “Haʼu bele haree oinsá livru sira iha Bíblia laran liga malu hanesan kabas neʼebé soru hamutuk hodi kria buat furak ida. Agora haʼu gosta tebes lee Bíblia, la hanesan ho uluk.”

17, 18. Tanbasá diʼak atu lee informasaun neʼebé hakerek ba públiku? Fó toʼok ezemplu.

¹⁷ Livru ba públiku nian. Hahú husi tinan 2008, ita komesa uza Livru Haklaken edisaun estudu nian. Informasaun husi livru sira-neʼe hakerek liuliu ba Testemuña ba Jeová. Maibé ita mós iha livru neʼebé hakerek liuliu ba públiku nian. Ita aproveita didiʼak livru sira-neʼe ka lae? Karik bele hanoin kona-ba situasaun neʼe. Loron ida ita tuir hela reuniaun, no ita haree ema neʼebé ita konvida atu tuir reuniaun mós ba tuir reuniaun neʼe. Ita sente kontente tebes. Nuʼudar ita rona hela ba diskursu, iha ita-nia laran, ita hanoin beibeik kona-ba ema neʼebé ita konvida neʼe. Karik ita hanoin, ema neʼe sente oinsá kona-ba informasaun neʼebé nia rona daudauk, karik informasaun neʼe bele ajuda troka ninia hahalok sira. Tan neʼe, ita mós rona didiʼak ba informasaun husi diskursu neʼe no diskursu hotu tiha, ita rasik mós aprende buat barak husi diskursu neʼe.

¹⁸ Informasaun neʼebé hakerek ba públiku mós diʼak ba ita. Porezemplu, Livru Haklaken ba públiku nian, no informasaun sira husi jw.org esplika tópiku sira husi Bíblia hodi uza liafuan sira neʼebé fasil atu komprende. Se ita mak lee informasaun sira-neʼe, ita halo kleʼan liután ita-nia matenek kona-ba Bíblia nia hanorin sira neʼebé ita hatene tiha ona. Ita mós aprende dalan foun oinsá atu esplika ita-nia fiar bainhira ita ba haklaken. Hanesan neʼe mós, Matan-moris bá! hametin ita-nia fiar katak iha duni Kriadór ida no ajuda ita oinsá atu defende ita-nia fiar.—Lee 1 Pedro 3:15.

19. Oinsá mak ita bele hatudu agradese ba hahán espirituál neʼebé Jeová fó mai ita?

¹⁹ Husi lisaun neʼe ita haree katak Jeová fó buat barak atu hanorin ita. (Mateus 5:3) Mai ita kontinua atu aproveita buat hotu neʼe hodi hatudu agradese ba Ida neʼebé hanorin ita atu hetan buat neʼebé diʼak.—Isaías (Yesaya) 48:17.