1, 2. (a) Anamoona a Yehova animoonela sai Biibiliya? (b) Epantta xeeni ya Biibiliya enoosivelani vanceene?

ANAMOONA A YEHOVA annimuttittimiha Biibiliya. Onninivaha malakiheryo oororomeleya ni nlipelelo. (aRom. 15:4) Hiyo ninnimuthokorerya Biibiliya ohiya ntoko eliivuru ya miyuupuwelo sa apinaatamu, masi ntoko “masú a Muluku”.​—1 aTes. 2:13.

² Tthiri, otheene ahu nookhalana ipantte sa Biibiliya sinnisivela vanceene. Akina annisiveliwa vanceene ni Ivangelyo, seiyo sinitthokiherya moota Yesu ooniherya awe mikhalelo sooloka sa Yehova. (Yoh. 14:9) Akina annisiveliwa ni iliivuru sa Biibiliya sinilavula sa iprofesia, ntoko eliivuru ya Wisupulula, yeeyo enitthokiherya “itthu sinrowa wiraneya vohilekela”. (Wis. 1:1) Akina a hiyo ninnilipihiwa ni Masalmo wala ninniixuttihiwa ni eliivuru ya Miruku. Tthiri Biibiliya, eliivuru enaakhaliherya atthu otheene.

3, 4.(a) Nnoonela sai iliivuru sahu? (b) Iliivuru xeeni sikina sinaakhela ahu wira naakhaliherye atthu akina?

³ Okhala wira ninnisiveliwa vanceene ni Biibiliya, nto ninnisiveliwa ni iliivuru sahu sinimutthokiherya Biibiliya. Mwa  ntakiheryo, ninnisiveliwa waakhela yoolya yomunepani enikumiheriwa, ntoko iliivuru, ibroxura, irevista ni sikina. Ninnisuwela wira itthu iya sotheene sinivahiwa ni Yehova wira sinikhaliheryeke okhala oowehaweha momunepani ni olipiha waamini wahu.​—Tito 2:2.

⁴ Iliivuru sahu sinceene sinilepeliwa ale akhanle Anamoona a Yehova, masi iliivuru sikina sinilepeliwa atthu a vameekhaaya, ntoko amiravo wala anamuyari. Iliivuru sahu sikina ni ipantte sikina sa websaite ahu sipakeliwe atthu ahikhanle Anamoona. Iliivuru iyo sotheene sinnuupuxerya wira Yehova onnaakhwaniherya moolumo awe ani: “Apwiya òwerya sothene animwalikanyiherya atthu a maloko othene omwako Siyoni, efesta ya yolya yowunkhela”.​—Yes. 25:6.

5. Nikupaliki wira Yehova onnixukhurela exeeni?

⁵ Anamunceene a hiyo naaniphavela nrineene okathi wira nisomeke iliivuru sahu sotheene sinimutthokiherya Biibiliya. Nikupaliki wira Yehova onnixukhurela wiimananiha onipaka ahu wira ‘niphwanye murerelo w’okathi ahu’, nisukaka okathi wira nimusomeke ni omwiixutta Biibiliya. (aÉf. 5:15, 16) Tthiri ikwaha sikina khivanikhweya osoma iliivuru sahu sotheene. Masi yookhala etthu yoohiloka enitthuneya ahu osyaka. Etthu xeeni?

6. Muupuwelo xeeni waarowa oniiriha wooceela ottottela mureerelo soovaha sikina sa Yehova?

⁶ Ikwaha sikina pooti woonaka wira ipantte sikina sa Biibiliya wala iliivuru sahu sikina khasilepeliwe hiyo, nto nnahiya ottottela mureerelo. Mwa ntakiheryo, sai akhala wira nnoona wira epantte emosa ya Biibiliya khenivareleya muteko ni makhalelo arina ahu? Aahiiso, sai akhala wira nnoona wira mwaha mmosa okumiheriwe eliivuru ahu khonnivara? Niireke khaninthokorerya oratteene, hata khaninsoma-tho? Niira siiso, pooti oyeleela soohimmwa saarowa oniphwanyiha mireerelo sinceene. Nto exeeni enirowa onikhaliherya osyaka etthu eyo? Nihiliyaleke wira itthu sotheene somunepani sinaakhela ahu, sinikumiheriwa ni Yehova. MBiibiliyani, Yehova onihimya so: “Ti miyo Apwiya Muluku anyu, kiniwixuttihani wira mphwanyeke sorera”. (Yes. 48:17) Mwaha ola ninrowa othokorerya itthu tthaaru sinrowa onikhaliherya ottottelaka mureerelo soovaha sotheene sinikhuma wa Yehova.

7. Xeeni vanireerela aya omusomaka Biibiliya ni muupuwelo wooloka?

⁷ Mmusomeke ni muupuwelo wooloka. Ekeekhai wira ipantte sikina sa Biibiliya saalepeliwa mutthu mmosa wala egrupu emosa ya atthu. Masi Biibiliya onnihimya oratteene wira “Solempwa sothene supuxeriwé ni Muluku” ni sinniphwanyiha mureerelo. (2 Tim. 3:16) Tivonto vanireerela aya omusomaka Biibiliya ni muupuwelo wooloka. Munna mmosa onihimya so: “Okathi kinimusoma aka Biibiliya, kinneererya wuupuwela wira yoolepa emosa wala mpantta mmosa pooti okiixuttiha itthu sinceene soovirikana”. Owo onnincererya oriki: “Wuupuwela eyo, onnikikhaliherya oweha itthu sihinooneya mowaakuveya”. Nto, nihinatthi omusoma Biibiliya, nihaana toko onvekela Yehova wira nikhalane muupuwelo wooloka ni ankhili wira niweryeke oweha etthu Yehova oniphavela awe oniixuttiha.​—Ézi. 7:10; mmusome Yakobo 1:5.

8, 9. (a) Makoho xeeni anireerela ahu wiikoha okathi onimusoma ahu Biibiliya? (b) Othokorerya mikhalelo Yehova onivekela awe wira munna okhale mutokweene, ennooniherya exeeni?

⁸ Mwiikoheke. Okathi onisoma anyu epantte emosa ya Biibiliya, mweemeleke vakhaani ni mwiikoheke so: ‘Etthu ela enikiixuttiha  exeeni voohimya sa Yehova? Kinrowa ovarihela sai muteko mookumini mwaka? Kinrowa orumeela sai wira kaakhaliherye akina?’ Wuupuwelela makoho awo, onoonikhaliherya ottottela mureerelo okathi onimusoma ahu Biibiliya. Mwa ntakiheryo, nrowe nthokorerye mikhalelo sinivekeliwa mBiibiliyani wira munna okhale mutokweene. (Mmusome 1 Timótheyo 3:2-7.) Okhala wira anceene a hiyo khanihiyo axitokweene, nto pooti wuupuwelaka wira mpantta ola wa Biibiliya khonnivara. Masi narumeela makoho ale mararu aromonle ahu osulu iwe, nnooweha wira pooti ottottela mureerelo epantte ela ya Biibiliya.

⁹ Etthu ela enikiixuttiha exeeni voohimya sa Yehova? Yehova onnooniherya wira ale anihoolela mmulokoni ahaana okhalana mikhalelo soolokexa, tivonto onisuweliha awe itthu sinivekela awe. Yehova onilipelela wira axitokweene avaheke ntakiheryo nooloka, ni awo animwaakhula mwaha wa enamuna aneettiha aya muloko, yoowo Muluku othumme awe “n’ukhwa wa Mwan’awe mmosene”. (Mit. 20:28) Yehova oniphavela wira awo anikhapeleleke saana. (Yes. 32:1, 2) Nto okathi onisoma ahu mikhalelo Yehova sinivekela awe, ninniweha wira yena tthiri onninithokorerya.

10, 11. (a) Okathi onisoma ahu mikhalelo sinivekeliwa axitokweene, ninrowa ovarihela sai muteko mookumini mwahu? (b) Nave-tho ninrowa orumeela sai wira naakhaliherye akina?

¹⁰ Kinrowa ovarihela sai muteko mookumini mwaka? Akhala wira munirumeela ntoko mutokweene a mmulokoni, nto muhaana ovareryaka elista eyo ya mikhalelo sinivekeliwa, wira nwehe mapuro anitthuneya olokiherya. Munna oniphavela okhala mutokweene ohaana othokorerya oratteene itthu iya sinivekeliwa, okhala wira ohaana okhalana mikhalelo sooloka. (1 Tim. 3:1) Masi maKristau otheene animwiixutta etthu ni soovekela iyo, maana sikina sinnaavara maKristau otheene. Mwa ntakiheryo, maKristau ahaana okhala ooreera murima ni okhalana muupuwelo wooloka. (aFil. 4:5; 1 Ped. 4:7) Nto vaavo axitokweene aniimananiha aya ‘wetta vophwanela’, hiyo nnimwiixutta etthu, nuumala vo, ‘nitthariheke wamini’ waya.​—1 Ped. 5:3; aHéb. 13:7.

¹¹ Kinrowa orumeela sai wira kaakhaliherye akina? Hiyo pooti orumeela elista eyo ya mikhalelo sinivekeliwa axitokweene, wira nimukhaliherye ole onimusomiha ahu Biibiliya wala mutthu mukina onisiveliwa ekeekhai, oweha ovirikana okhanle eriyari ya  axitokweene ari Anamoona a Yehova ni ahooleli a eKristau yoowootha. Nave-tho okathi onisoma ahu elista eyo, pooti wuupuwelelaka wiimananiha axitokweene a muloko ahu anipaka aya mmureerelo ahu. Nto eyo enoonikhaliherya ‘wattittimihaka ale annihawela mmutekoni mw’Apwiya’, eyo piiyo, axitokweene a mmulokoni. (1 aTes. 5:12) Nto naatepaka waattittimiha, awo anootepaka otteeliwa murima ni muteko anivara aya.​—aHéb. 13:17.

12, 13. (a) Itthu xeeni sinireerela ahu otokosa? (b) Nvahe ntakiheryo nnooniherya wira otokosa itthu kamosa-kamosa onoonikhaliherya wiixutta itthu sihinooneya mowaakuveya?

¹² Mutokoseke. Okathi onimusoma ahu Biibiliya, pooti ophavela waakhuliwa wa makoho ala anittharelana:

• Ti pani olempe epantte ela ya Biibiliya?

• Elempwale woowi ni silini?

• Itthu xeeni sootthuneya siiraneyale okathi eliivuru ela yaalempwe aya?

Waakhuliwa wa makoho ala pooti onikhaliherya wiixutta itthu sihinooneya mowaakuveya.

¹³ Mwa ntakiheryo, mmuthokorerye Ezekiyeli 14:13, 14, yoowo onihimya so: “Atthu èlapo emosá yakitthekelaka, khuhiyàkìwelela, miyo kinimwarukunuwela, kihononaka solya saya, karoihelaka etala: siso kinowivakasa atthu n’inama. Elapo ele yakhanle atthu ala araru àxariya pahi: Nowé ni Daniyeli ni Yobi, animopowa mekhaya pahi mwaha w’orera waya murima. Anihimya t’Apwiya Muluku”. Natokosa, nnooweha wira masu ala yaalempwale ni Ezekiyeli, waattamela mwaakha wa 612 AEC. Okathi owo, Nowe ni Yobi, yaahikhwa khalai, masi Muluku nlelo aanuupuwela ororomeleya waya. Daniyeli nlelo aari mukumi. Woonasa wene, okathi Yehova aalikanyiha awe nroromelo nawe ni na Nowe ni Yobi, Daniyeli owo aarina iyaakha 20. Exeeni eniixutta ahu? Yehova onniweha ni onnivaha efaita ororomeleya wa arumeyi awe ootheene, waahela muhina ale nlelo ari amiravo.​—Esal. 148:12-14.

14. Moota xeeni myaha sinlepeliwa amiravo sinaakhaliherya aya, nto sinaakhaliherya-tho sai atthu akina? (Nwehe elatarato yoopacerya.)

¹⁴ Nihiixutta wira vanniweryaneya ottottela mureerelo ipantte sotheene sa Biibiliya. Vamosaru, nnoowerya ottottela mureerelo iliivuru sahu sotheene. Nrowe nthokorerye matakiheryo vakhaani. Iliivuru sirina myaha sinilepeliwa amiravo. Mahiku ala, sinnikumiheriwa myaha sinceene sinilepeliwa amiravo. ^[1] Myaha iyo sinnaakhaliherya amiravo weettiherya saana mixankiho sinaaphwanya oxikola, ni iye sikina sinikhumelela okathi wa omiravo. Nto otheene ahu ninrowa ottottela sai mureerelo myaha iyo? Okathi onisoma ahu, ninnuupuwela mixankiho sinaaphwanya amiravo ahu oororomeleya. Nto osuwela itthu iyo, onooniiriha osuwela moota wowaakhaliherya ni waalipiha.

15. Xeeni maKristau oowunnuwa anitthuneya aya othokorerya myaha sinilepeliwa amiravo?

¹⁵ Mixankiho sinceene sinilepeliwa amiravo, nave-tho sinnaaphwanya maKristau otheene. Mwa ntakiheryo, otheene ahu nohaana waakiherya waamini wahu, wiikasoopa, osyaka opatthani ni itthekulelo soohiloka. Myaha iya, ni myaha sikina sinnithokoreriwa ni iliivuru silepeliwe amiravo. Tivonto, maKristau oowunnuwa ahiixooneke wira khaniphwanela osoma iliivuru silepeliwe amiravo. Nto, nnaamwi myaha iyo silepeliwe ene amiravo, miruku saya sinikhuma mBiibiliyani, tivo, otheene  ahu nnoottottela mureerelo soovaha iyo somunepani.

16. Iliivuru sahu sinaakhaliherya amiravo opaka-tho exeeni?

¹⁶ Myaha sinilepeliwa amiravo sinnaakhaliherya olipiha ompatthani aya ni Yehova, ohiya paahi osuwela weettiherya mixankiho saya. (Mmusome Musuweli 12:1, 13.) MaKristau oowunnuwa anoowerya-tho ottottela mureerelo. Mwa ntakiheryo, erevista Despertai! ya Abril 2009, yaahikhalana mwaha oni : “Os Jovens Perguntam . . . Como tornar a leitura da Bíblia agradável?” Mwaha ola waahivaha malakiheryo manceene ni waahikhalana ekaaxa ni eprograma, yeeyo mutthu aawerya awe othikila khupweha mBiibiliyani mwawe wira orumeeleke. Niireke wira aakhala atthu oowunnuwa attottenle mureerelo mwaha ole? Murokora mmosa ootheliwa ni orina mwaana, onihimya so: “Kaanivelavela moota woomusoma saana Biibiliya. Kaahirumeela malakiheryo anivahiwa mwaha ole, nto vano kinnirumeela eprograma ele. Mahiku ala vannikisivela vanceene omusoma Biibiliya. Kinniwerya oweha moota iliivuru sotheene sa Biibiliya sinivarihana aya oratteene. Kinnitepa ohakalala okathi kinimusoma aka Biibiliya”.

17, 18. Ninrowa ottottela sai mureerelo osoma myaha sinlepeliwa atthu otheene? Nvahe ntakiheryo.

¹⁷ Myaha sinilepeliwa atthu otheene. Okhuma mwaakha wa 2008, ennikumiheriwa erevista yoosoma ya Owehaweha, enipakeliwa Anamoona a Yehova. Nto, sai voohimya sa iye sinilepeliwa atthu otheene? Niireke nnoottottela mureerelo osoma irevista iyo? Muthokorerye ntakiheryo nimosa. Nihiku nimosa, ohinatthi opacerya mwaha wa atthu otheene, nyuwo munninweha mutthu mmosa mwaamulattunle anyu orweela mithukumano. Tthiri nyuwo munnihakalala vanceene. Okathi onilavuliwa aya mwaha ole, munniwiriyana oratteene, mmuupuwelaka mutthu ole omulattunle anyu. Munnuupuwelela moota mwaha owo onrowa aya omukhaliherya mutthu ole. Nto, nuumala mwaha owo nyuwo munnittottela mureerelo ele ehimmwale ni munnixukhurela vanceene.

¹⁸ Etthu emosaru pooti wiiraneya okathi onisoma ahu iliivuru sirina myaha silepeliwe atthu otheene. Mwa ntakiheryo, Owehaweha onilepeliwa atthu otheene, myaha seiye sinikumiheriwa ni websaite ahu jw.org, sinnithokorerya myaha sa mBiibiliyani, mwa enamuna enaakhweiherya ale ahikhanle Anamoona wiiwexexa oratteene. Okathi onisoma ahu, ninnitepa wiiwexexa ni osiveliwa sowiixuttiha sa mBiibiliyani nisuwenle ahu khalai. Ohiya-vo, nnimwiixutta inamuna isya sa moota wootthokiherya sookupali sahu, okathi onilaleerya ahu. Vamosaru, erevista Despertai! ennilipiha waamini wahu wira Muluku ookhala tthiri, ni enninikhaliherya wiixutta moota wowaakiherya sookupali sahu.​—Mmusome 1 Pedru 3:15.

19. Ninrowa wooniherya sai wira ninnixukhurela soovaha sa Yehova?

¹⁹ Tthiri, Yehova oonivaha itthu sinceene somunepani wira sinikhaliherye. (Math. 5:3) Nto nivikaniheke osoma ni ovarihela muteko itthu sotheene Yehova onnivaha awe. Niira siiso, nnimooniherya omuxukhurela Yehova, yoowo onniixuttiha wira niphwanyeke mureerelo.​—Yes. 48:17.