1, 2. (a) Ano an panhunahuna han mga Saksi ni Jehova mahitungod ha Biblia? (b) Ano an imo paborito nga bahin han Biblia?

GINPAPABILHAN han mga Saksi ni Jehova an Biblia. Naghahatag ito ha aton hin masasarigan nga giya, pagliaw, ngan paglaom. (Roma 15:4) Para ha aton, an Biblia diri usa nga koleksyon han panhunahuna han tawo kondi, “kon ano gud ito, sugad nga pulong han Dios.”—1 Tes. 2:13.

² Sigurado nga kita ngatanan may paborito nga bahin han Biblia. An iba nalilipay gud ha mga Ebanghelyo, kay ginhihisgotan hito an mag-opay nga kalidad ni Jehova nga iginpakita han iya Anak. (Juan 14:9) An pipira naruruyag ha mga bahin nga naghihisgot hin mga tagna—bangin an Pahayag, nga nagpapakita han “mga butang nga hirani na gud mahitabo.” (Pah. 1:1) Ngan diri ba kita naliliaw han mga Salmo o nahibabaro hin praktikal nga mga leksyon ha Proberbios? Matin-aw, an Biblia usa nga libro para ha ngatanan.

3, 4. (a) Ano an aton panhunahuna mahitungod han aton mga publikasyon? (b) Ano nga mga publikasyon an aton nakakarawat nga para ha espisipiko nga grupo hin mga tawo?

³ Tungod kay ginpapabilhan naton an Biblia, ginpapabilhan liwat naton an aton mga publikasyon nga basado ha Biblia. Pananglitan, gin-aapresyar naton an espirituwal nga pagkaon nga aton nakakarawat  pinaagi han mga libro, brosyur, magasin, ngan iba pa nga literatura. Maaram kita nga ini nga mga tagana ni Jehova nabulig ha aton nga magin alerto ngan busog ha espirituwal ngan “mahimsog an pagtoo.”—Tito 2:2.

⁴ Labot la han mga publikasyon nga para ha ngatanan nga Saksi ni Jehova, nakakakarawat liwat kita hin mga publikasyon nga iginsurat para ha partikular nga grupo. An pipira hito gindisenyo labi na para ha mga batan-on; an iba para ha ira mga kag-anak. An kadam-an han aton mga publikasyon nga gin-iimprinta o aada ha aton website ginhimo para ha mga diri Saksi. Ito nga hura nga espirituwal nga pagkaon nagpapahinumdom ha aton nga gintutuman ni Jehova an iya saad nga mag-aandam hiya hin “bangkite para ha ngatanan nga mga nasod han kalibutan—bangkite han girarasahi nga pagkaon.”—Isa. 25:6, Maupay nga Sumat.

5. Ano an sigurado nga ginpapabilhan ni Jehova?

⁵ Posible gud nga hingyap han kadam-an ha aton nga magkaada mas daku nga panahon ha pagbasa ha Biblia ngan ha aton mga publikasyon. Sigurado nga ginpapabilhan ni Jehova an aton mga pangalimbasog nga ‘gamiton ha pinakamaopay nga paagi an aton panahon’ pinaagi han regular nga pagbasa ha Biblia ngan personal nga pag-aram. (Efe. 5:15, 16) Oo, bangin diri naton pirme matagan hin igo nga panahon an ngatanan nga espirituwal nga pagkaon. Pero may peligro nga kinahanglan naton likyan. Ano ito?

6. Ano an posible magin hinungdan nga diri kita magpahimulos ha pipira nga tagana ni Jehova?

⁶ May peligro nga diri naton mapahimulosan hin bug-os an espirituwal nga mga tagana kon huhunahunaon naton nga an pipira hito diri aplikado ha aton. Pananglitan, ano man kon may bahin han Biblia nga baga hin diri aplikado ha aton kahimtang? O ano man kon an publikasyon gindisenyo labi na para ha partikular nga grupo ngan diri kita kaapi hito? Pahapyaw la ba an aton pagtagad hito o ginlilikyan pa ngani ito? Kon oo, diri naton mapapahimulosan an mga impormasyon nga makakabulig gud ha aton. Paonan-o naton malilikyan ito nga peligro? Hinumdoman naton nga an Dios an Surok han espirituwal nga mga tagana. Pinaagi kan propeta Isaias, Hiya nagsiring: “Ako hi Jehova nga imo Dios, nga nagtututdo ha imo ha pagpahimulos.” (Isa. 48:17) Hisgotan naton an tulo nga suhestyon nga makakabulig basi magpahimulos ha ngatanan nga bahin han Biblia ngan han iba-iba nga klase han espirituwal nga pagkaon nga aton nakakarawat.

7. Kay ano nga kinahanglan naton basahon an Biblia nga may abrido nga hunahuna?

⁷ Pagbasa nga may abrido nga hunahuna. An Biblia matin-aw nga nasiring nga “an ngatanan nga Kasuratan giniyahan han Dios ngan mapulsanon.” (2 Tim. 3:16) Oo, an pipira nga bahin han Biblia iginsurat labi na para ha partikular nga indibiduwal o grupo. Salit kinahanglan basahon naton an Kasuratan nga may abrido nga hunahuna. “Kon ginbabasa ko an Biblia, ginhuhunahuna ko nga may iba-iba nga leksyon nga akon hibabaroan ha partikular nga teksto,” siring han usa nga bugto. Hiya nagdugang: “An paghunahuna hini nagpapagios ha akon nga mag-usisa hin dugang pa.” Antes magbasa han Pulong han Dios, maopay nga mag-ampo para magkaada hin abrido nga hunahuna ngan hin kinaadman basi masabtan an mga leksyon nga karuyag ni Jehova nga hibaroan naton.—Esra 7:10; basaha an Santiago 1:5.

8, 9. (a) Kon nagbabasa ha Biblia, ano an mahimo naton ipakiana ha aton kalugaringon? (b) May kalabotan ha mga kwalipikasyon para ha mga tigurang, ano an iginsusumat hito ha aton mahitungod kan Jehova?

⁸ Pagbangon hin mga pakiana. Kon ginbabasa mo an Biblia, undang ngan pakianhi an imo kalugaringon: ‘Ano an iginsusumat hini ha akon mahitungod kan Jehova? Paonan-o ko iaaplikar ini nga impormasyon ha akon kinabuhi? Paonan-o  ko ini magagamit ha pagbulig ha iba?’ Kon papamalandungon naton ini nga mga pakiana, sigurado nga damu gud an aton hibabaroan ha aton pagbasa ha Biblia. Pananglitan, tagda an Kasuratanhon nga mga kwalipikasyon para ha Kristiano nga mga tigurang. (Basaha an 1 Timoteo 3:2-7.) Pipira la ha aton an mga tigurang salit bangin hunahunaon naton nga ini nga teksto diri aplikado ha aton. Pero kon huhunahunaon naton an posible nga mga baton ha masunod nga mga pakiana, masasantop naton nga ini nga gin-unabi nga mga kwalipikasyon mapulsanon ha aton ha damu nga paagi.

⁹ Ano an iginsusumat hini ha akon mahitungod kan Jehova? An paghatag ni Jehova hini nga mga kwalipikasyon nagpapakita nga hitaas an iya suruklan para ha Kristiano nga mga tigurang. Naglalaom hiya nga magpapakita hira hin maopay nga susbaranan, ngan may baratunon hira ha iya ha paagi han ira pagtratar ha kongregasyon, “nga ginpalit niya pinaagi han dugo han iya Anak.” (Buh. 20:28) Karuyag ni Jehova nga umabat kita nga talwas ngan ginmamangnoan han iya pinili nga kabulig nga mga paraataman. (Isa. 32:1, 2) An Kasuratanhon nga mga kwalipikasyon para ha mga tigurang nagpapahinumdom ha aton nga hinigugma gud kita ni Jehova.

10, 11. (a) Kon ginbabasa an mga kwalipikasyon para ha mga tigurang, paonan-o naton maiaaplikar ito nga impormasyon ha aton kinabuhi? (b) Paonan-o naton magagamit ito nga impormasyon ha pagbulig ha iba?

¹⁰ Paonan-o ko iaaplikar ini nga impormasyon ha akon kinabuhi? Ha panapanahon, sadang usisahon han tigurang an iya kalugaringon basado hini nga espirituwal nga mga kwalipikasyon, ngan mamalandong han puydi niya pauswagon. Kon an usa nga brother “nagtatalinguha pagkab-ot hin pribilehiyo sugad nga paramangno,” sadang niya pamalandungon hin maopay ini nga mga kwalipikasyon kay kinahanglan niya ini makab-ot ha pinakamaopay nga iya mahihimo. (1 Tim. 3:1) Ngani, an tagsa nga Kristiano may hibabaroan hini nga mga kwalipikasyon, kay an kadam-an hito karuyag ni Jehova nga buhaton han ngatanan nga Kristiano. Pananglitan, kita ngatanan kinahanglan magin makatadunganon ngan magkaada hin maopay nga panhunahuna. (Fil. 4:5; 1 Ped. 4:7) Kon an mga tigurang ‘susbaranan ha panon,’ mahibabaro kita tikang ha ira ngan aton ‘masusubad an ira pagtoo.’—1 Ped. 5:3; Heb. 13:7.

¹¹ Paonan-o ko magagamit ini nga impormasyon ha pagbulig ha iba? Magagamit naton an mga kwalipikasyon para ha mga tigurang basi buligan an mga interesado o mga estudyante ha Biblia nga  makita nga an mga tigurang han mga Saksi ni Jehova naiiba ha mga klero han Kakristianohan. Kon ginbabasa naton ini nga mga kwalipikasyon, napapahinumdoman liwat kita han mga pangalimbasog nga ginhihimo para ha aton han mga tigurang ha aton kongregasyon. An pagpamalandong han ira mga sakripisyo nagpapahilarom han aton ‘respeto ha mga maduruto nga nagbubuhat’ kaupod naton. (1 Tes. 5:12) Samtang mas iginpapakita naton an aton sinsero nga respeto hinin maduruto nga kabugtoan, mas nagigin malipayon hira.—Heb. 13:17.

12, 13. (a) Pinaagi han aton mga garamiton ha pagsaliksik, ano nga mga impormasyon an mahimo naton pamilngon? (b) Paghatag hin ehemplo kon paonan-o an mga impormasyon may kalabotan ha teksto makakabulig nga hibaroan an mga leksyon nga bangin diri dayon nakikita.

¹² Pagsaliksik. Pinaagi han aton mga garamiton ha pagsaliksik, puydi naton pamilngon an baton ha masunod nga mga pakiana:

• Hin-o an nagsurat hini nga bahin han Kasuratan?

• Diin ngan kakan-o ini iginsurat?

• Ano an importante nga mga panhitabo samtang iginsusurat an partikular nga libro han Biblia?

An baton ha sugad nga mga pakiana makakabulig nga hibaroan an pipira nga leksyon nga bangin diri dayon nakikita.

¹³ Pananglitan, tagda an Esekiel 14:13, 14, diin mababasa naton: “Kon an tuna makasala patok ha akon pinaagi han pagtalapas, ngan akon unaton an akon kamot ngada hini, ngan utdon an sustento han tinapay dida, ngan ipadara an kagutoman ngada hini, ngan papangiwason tikang dida an tawo ngan an mananap; bisan kon inin tulo ka tawo, hi Noe, hi Daniel, ngan hi Job, nakada hini, hira makakaluwas la han ira kalugaringon nga mga kalag pinaagi han ira pagkamatadong, nasiring an Ginoo nga hi Jehova.” Kon magsasaliksik pa kita, hibabaroan naton nga ini nga asoy ha Esekiel iginsurat han mga 612 B.C.E. Hito nga panahon, mga siglo na nga patay hira Noe ngan Job, pero an ira pagkamatinumanon nahinunumdoman han Dios. Kondi buhi pa hi Daniel. Ngani, posible nga mga 20 anyos hiya han nagsiring hi Jehova nga matadong hiya pariho kanda Noe ngan Job. Ano an leksyon? Nakikita ngan ginpapabilhan ni Jehova an integridad han ngatanan nga iya magtinumanon nga magsiringba, pati na han mga batan-on.—Sal. 148:12-14.

14. Paonan-o nabubuligan an mga batan-on han mga publikasyon nga gindisenyo para ha ira, ngan paonan-o makakapahimulos liwat hito an iba? (Kitaa an retrato ha tinikangan hini nga artikulo.)

¹⁴ Sugad la nga nagpapahimulos kita ha pag-aram ha ngatanan nga bahin han Pulong han Dios, magpapahimulos liwat kita ha ngatanan nga espirituwal nga pagkaon nga igintatagana ha aton. Tagda inin pipira nga ehemplo. Publikasyon para ha mga batan-on. Hinin bag-o la nga mga tuig, kadam-an han aton literatura iginpublikar para ha mga batan-on. ^[1] Gindisenyo an pipira hini para buligan hira nga maatubang an mga pagsulay ha eskwelahan o an mga pagsari han pagin batan-on. Paonan-o kita ngatanan mahimo magpahimulos ha pagbasa hito nga mga publikasyon? Kon ginbubuhat naton ini, napapahinumdoman kita han mga pagsari nga gin-aatubang han aton matinumanon nga mga batan-on. Sugad nga resulta, mas mabubuligan ngan madadasig naton hira.

15. Kay ano nga an adulto nga mga Kristiano sadang magin interesado ha mga impormasyon nga para ha mga batan-on?

¹⁵ Kadam-an han mga problema nga ginhihisgotan ha mga publikasyon para ha mga batan-on naieksperyensyahan liwat han mga adulto. Kinahanglan naton ngatanan nga depensahan an aton pagtoo, kontrolon an aton emosyon, isalikway an impluwensya han mga kaupod, ngan likyan an maraot nga mga kaupod ngan kaliawan. Ini nga mga topiko ngan damu nga iba pa ginhihisgotan ha mga publikasyon para ha mga tin-edyer. Sadang  ba hunahunaon han adulto nga mga Kristiano nga diri angayan para ha ira an pagbasa hin mga publikasyon nga iginsurat para ha mga batan-on? Diri gud! Bisan kon ito nga mga publikasyon gindisenyo basi makapainteres ha mga batan-on, iginbasar ito ha diri nadadaan nga mga prinsipyo ha Kasuratan, salit kita ngatanan mahimo magpahimulos hinin espirituwal nga mga tagana.

16. Ano pa an naibubulig ha mga batan-on han aton mga publikasyon?

¹⁶ Labot la ha pagbulig ha mga batan-on nga maatubang an ira mga problema, an aton mga publikasyon nabulig ha ira nga mag-uswag ha espirituwal ngan magin duok kan Jehova. (Basaha an Eklesiastes 12:1, 13.) Magpapahimulos liwat hini an adulto nga mga Kristiano. Pananglitan, an Abril 2009 nga gowa han Gumising! may artikulo nga “Ang mga Kabataan ay Nagtatanong . . . Paano Ko Gagawing Kawili-wili ang Pagbabasa ng Bibliya?” May mga suhestyon ito ngan may kahon nga puydi guntingon ngan ibutang ha Biblia para magin giya. Nagpahimulos ba liwat hito nga artikulo an mga adulto? Usa nga 24 anyos nga asawa ngan nanay an nagsurat: “Makuri para ha akon an pagbasa ha Biblia. Ginsunod ko an mga suhestyon hini nga artikulo, ngan ginagamit ko na an iginhatag nga eskedyol. Nalilipay na ako yana ha akon pagbasa ha Biblia. Nasabtan ko nga nagkakauruyon an mga libro han Biblia ngan may-ada ito uusa nga maopay nga mensahe. Eksayted na gud ako yana pagbasa ha Biblia.”

17, 18. Paonan-o kita magpapahimulos ha pagbasa han mga publikasyon nga iginsurat para ha publiko? Paghatag hin ehemplo.

¹⁷ Publikasyon para ha publiko. Tikang han 2008, nagpapahimulos kita han aradman nga edisyon han An Barantayan, nga iginsurat labi na para ha mga Saksi ni Jehova. Kondi kumusta man an aton mga magasin nga iginsurat labi na para ha publiko? Magpapahimulos ba liwat kita ha pagbasa hito? Handurawa ini nga sitwasyon. Usa ka adlaw, antes magtikang an pahayag publiko, nakita mo nga tumambong ha Kingdom Hall an imo gin-imbitar. Sigurado nga nalipay ka. Samtang nagpapahayag an mamumulong, posible nga ginhuhunahuna mo kon paonan-o magpapahimulos an imo bisita ha iya nababatian. Sugad nga resulta, mas naapresyar mo pa gud an topiko.

¹⁸ Ito liwat an mahimo naton abaton kon ginbabasa naton an mga publikasyon nga iginsurat para ha publiko. Pananglitan, an panpubliko nga edisyon han An Barantayan naghihisgot hin mga topiko ha Biblia gamit an mga pulong nga masayon masabtan han diri Saksi nga mga magbarasa. Pariho liwat hito an estilo han damu nga artikulo nga iginpupublikar ha jw.org, sugad han mga seksyon nga “Sagot sa mga Tanong sa Bibliya” ngan “Karaniwang mga Tanong.” Kon ginbabasa naton ini nga mga impormasyon, naghihilarom an aton apresasyon ha mga kamatuoran nga maaram na kita. Mahimo liwat kita mahibaro hin bag-o nga mga paagi ha pagsaysay han aton mga gintotoohan ha ministeryo. Sugad man, an Pagpamata! nagpaparig-on pirme han aton pagtoo nga naeksister an tinuod nga Dios, ngan nabulig ito ha aton nga depensahan an aton mga gintotoohan.—Basaha an 1 Pedro 3:15.

19. Paonan-o naton maipapakita an aton pagpasalamat kan Jehova tungod han iya mga tagana?

¹⁹ Matin-aw, hi Jehova hura nga nagtatagana para matagbaw an aton “espirituwal nga panginahanglan.” (Mat. 5:3) Hinaot padayon nga pahimulosan naton an ngatanan nga espirituwal nga tagana nga aton nakakarawat. Kon bubuhaton naton ito, iginpapakita naton an aton pagpasalamat ha Usa nga nagtututdo ha aton basi kita magpahimulos.—Isa. 48:17.