1, 2. (a) Uw rogon e Bible u wan’ e Pi Mich Rok Jehovah? (b) Gin ngan ko Bible e ri ga baadag?

 RIB ga’ fan e Bible u wan’ e Pi Mich Rok Jehovah, ya bay e fonow riy nrayog ni nge pagan’uy ngay, maku ra fal’eg lanin’dad me pi’ e athap ngodad. (Rom. 15:4) Gad ma tay ni Bible e aram e “thin rok Got” ma gathi llowan’ ko girdi’.​—1 Thess. 2:13.

² Dariy e maruwar riy nra bagadad ma bay bang u lan e Bible nri baadag. Bod ni, bay boch e girdi’ ni yad baadag e pi Gospel u lan e Bible, ya be weliy boch ban’en u rarogon Jehovah ni i m’ug u daken Jesus. (John 14:9) Ma boch e girdi’ e yad baadag ni yad ma beeg yu yang u lan e Bible ni bay boch e yiiy riy. Bod ni, fare babyor ni Revelation e be weliy murung’agen e pi n’en “nthingari m’ug ndab ki n’uw nap’an.” (Rev. 1:1) Ma dabisiy ni gad gubin ni ma fal’eg lanin’dad fapi thin ni bay ko Psalm, maku gad ma fil boch ban’en ko fare babyor ni Proverbs ni bay rogon ko par rodad e ngiyal’ ney. Riyul’ ni Bible e ba ke babyor ni fan ngak urngin e girdi’.

3, 4. (a) Uw rogon u wan’dad e pi babyor rodad? (b) Mang boch e babyor rodad ni yima ngongliy nib thilthil e piin ni fan ngorad?

³ Bochan nib ga’ fan e Bible u wan’dad, maku aram fan nib ga’ fan u  wan’dad e pi babyor rodad nib puluw e thin riy ko Bible. Bod nib ga’ fan u wan’dad e pi n’en ni ma fil Jehovah ngodad u daken yu ken e babyor, nge brochure, nge magazine, nge ku boch e babyor rodad ni yima ngongliy nib puluw e thin riy ko Bible. Gad manang ni pi n’ey ni ma pi’ Jehovah ngodad e ma ayuwegdad ni ngad pared ni gad ba od ma gad ba gel ko tirok ban’en, mab ‘yal’uw rogon nib mich Kristus u wun’dad.’​—Titus 2:2.

⁴ Boor e pi babyor rodad ni yima ngongliy nib puluw e thin riy ko Bible ni fan ngak gubin e Pi Mich Rok Jehovah. Machane, ku bay boch e babyor ni kan ngongliy ni fan ngak e piin fel’ yangaren ara piin gallabthir. Boor e pi babyor rodad nge boch ban’en ni kan tay ko fare website rodad ni kan ngongliy rogon ni fan ngak e piin ni gathi yad e Pi Mich Rok Jehovah. Ere, gubin e pi n’ey ni be pi’ Jehovah ngodad ni fan ko tirok ban’en e be dag riy ni ka be tay u gil’ e n’en ni ke micheg ni aram e ra ngongliy ‘ba mur ni fan ko gubin e nam u fayleng​—ba mur ni ggan nth’abi fel’ e yira pi’ riy.’​—Isa. 25:6.

5. Mang e ba pagan’dad ngay nib ga’ fan u wan’ Jehovah?

⁵ Boor i gadad e baadag ni nge yoornag e tayim rok ni nga i beeg e Bible nge pi babyor nib puluw e thin riy ko Bible. Ba pagan’dad nib ga’ fan u wan’ Jehovah e athamgil ni gad ma tay ni ngad “maruwelgad ko tayim rodad nib fel’ rogon” ni aram e ngaud beeged e Bible rodad ni gubin e rran ma gad be tay e fol Bible ni yigoo gadad. (Efe. 5:15, 16, NW) Bin riyul’ riy e, sana dabiyog ni nge taab urngin e tayim ni ngad fanayed ni ngaud filed urngin e pi babyor rodad nib puluw e thin riy ko Bible. Machane, yugu aram rogon ma bay ban’en ni ngad kol ayuwgad riy. Mang e re n’em?

6. Mang e rayog ni nge talegdad ndabi yib angin ngodad boch ban’en ni ma pi’ Jehovah?

⁶ Faanra dab da kol ayuwgad, ma rayog ni ngad lemnaged ni bay yu yang u lan e Bible ara boch e babyor rodad ni gathi gadad e fan ngodad. Bod ni, uw rogon ni faanra bay yu yang u lan e Bible ni gad be lemnag ni dariy rogon ngodad? Fa reb e bay ba ken e babyor ni kan ngongliy ni gathi fan ngodad? Ere uw rogon, gad ra beeg e pi n’en ni bay riy nib gurgur ara da paged ndab da beeged, fa? Faanra aray rogon, ma aram e bay boch ban’en nib manigil u lan e pi babyor rodad ndabiyog ni nge yib angin ngodad. Ere, uw rogon ni ngad siyeged e re n’ey? Dab da paged talin ni gubin ban’en ni gad ma fil ko pi babyor rodad e gubin ni ke yib rok Got. Be gaar e Bible: “I Gag Somol ni Got romed, faen baadag ni nge fil ngomed e tin nib fel’.” (Isa. 48:17, BT) U lan e re article ney e gad ra weliy riy dalip ban’en nra ayuwegdad ni nge yib angin ngodad e pi n’en ni ma pi’ Jehovah.

7. Mang nib ga’ fan ni ngad beeged e Bible ma gad guy rogon ni ngad nanged fan?

⁷ Ngam beeg ni ga be guy rogon ni ngam nang fan. Ba tamilang ni be yog e Bible ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan.” (2 Tim. 3:16) Riyul’ ni bay yu yang u lan e Bible ni kan yoloy ni fan ngak be’ nge be’ ara fan ngak ba ulung i girdi’. Aram fan ni ngad beeged e Bible ni gad be guy rogon ni ngad nanged fan. Reb e walag ni pumoon e yog ni gaar: “Nap’an ni gu ra beeg e Bible, ma gu ma guy rogon ndab gu pagtalin ni boor ban’en nrayog ni ngan fil u taaboch yang u lan e Bible.” Miki yog ni gaar: “Gu ra lemnag e re n’ey ma ma k’aringeg ni ngkug lemnag boch ban’en ni gathi rib tamilang.” U m’on ni ngad beeged e Bible ma gad ma meybil ngak Jehovah ni nge ayuwegdad nge pi’ e gonop ngodad me yag ni ngad nanged fan e pi n’en ni baadag ni ngad nanged fan ko thin rok.​—Ezra 7:10; mu beeg e James 1:5.

8, 9. (a) Nap’an ni gad be beeg e Bible, ma mang boch e deer ni ngad fithed gadad riy? (b) Mang e gad ra fil u murung’agen Jehovah ko pi n’en thingari rin’ be’ u m’on ni nge mang reb e piilal u lan e ulung?

⁸ Ngam fith boch e deer. Nap’an ni ga be beeg e Bible, ma ngam fithem ni nge lungum: ‘Mang e be yog e re n’ey ngog u murung’agen Jehovah? Uw rogon nrayog ni nggu fanay e re n’ey nga lan e  yafos rog? Ma uw rogon nrayog ni nggu fanay e re n’ey ni nggu ayuweg boch e girdi’ ngay?’ Nap’an ni gad ra fal’eg i lemnag e pi deer ney, ma rayog ni nge ayuwegdad ni nge yib angin ngodad e beeg Bible ni gad ma tay. Bod ni, bay boch ban’en ni be yog e Bible ni thingari rin’ e piin ni yad be lemnag ni ngar manged boch e piilal u lan e ulung. (Mu beeg e 1 Timothy 3:2-7.) Bochan ni gathi gad gubin ni gad e piin piilal u lan e ulung, ma sana rayog ni ngad lemnaged ni biney e thin nu Bible e dariy rogon ngodad. Machane, faan gad ra fanay fa dalip i deer ni kan weliy murung’agen ma rayog ni ngad nanged rogon nra yib angin e pi n’ey ngodad.

⁹ Mang e be yog e re n’ey ngog u murung’agen Jehovah? Ke tamilangnag Jehovah ngodad boch ban’en nthingari rin’ be’ u m’on ni nge mang reb e piilal u lan e ulung, ya bay boch ban’en ni baadag thingari yag rok e piin ni yad be ayuweg e ulung rok. Ma re n’ey e be dag riy nib ga’ fan e ulung u wan’. Be yog e Bible ni girdien e ulung rok Got e kar “manged girdien Got u daken e yam’ ni tay Fak.” (Acts 20:28) Ere, baadag Jehovah ni nge dag e piin piilal e kanawo’ nib manigil, ya ra tomur riy ma yad ra weliy ngak rogon ni ur ayuweged e ulung rok. Baadag ni ngad pared nib pagan’dad u tan pa’rad. (Isa. 32:1, 2) Ere, nap’an ni gad ra beeg e pi n’ey u Bible, ma gad ra nang riy gelngin nri gad ba t’uf rok Jehovah.

10, 11. (a) Nap’an ni gad be beeg e pi n’en ni thingari rin’ be’ u m’on ni nge mang reb e piilal, ma uw rogon nrayog ni ngad fanayed nga lan e yafos rodad? (b) Uw rogon nrayog ni ngad fanayed e re n’ey ni ngad ayuweged boch e girdi’ ngay?

¹⁰ Uw rogon nrayog ni nggu fanay e re n’ey nga lan e yafos rog? Faanra gur reb e piilal mab t’uf ni ngaum sul u daken e pi n’en thingari rin’ be’ u m’on ni nge mang reb e piilal, mag yaliy e tin nib t’uf ni ngam mon’og riy. Reb e walag ni be nameg ni nge mang be’ ni “ngi i tay murung’agen” e ulung e thingari yag rok ni nge rin’ e pi n’en nib t’uf ni nge rin’ be’ ni baadag ni nge mang reb e piilal u lan e ulung. (1 Tim. 3:1) Bin riyul’ riy e, gubin e Kristiano nrayog ni ngar filed ban’en ko re n’ey ni bochan e yooren riy e ba muun ngay e pi n’en ni baadag Jehovah ni ngad rin’ed. Bod ni, gad gubin nib t’uf ni ngaud sumunguygad ma gad be filmunguyan’dad. (Fil. 4:5; 1 Pet. 4:7) Faanra i par e piin piilal nib ‘fel’ pangirad,’ ma rayog ni ngad filed ban’en rorad ma gad “fol u rogon ni ur pired nib michan’rad ngak Got.”​—1 Pet. 5:3; Heb. 13:7.

¹¹ Uw rogon nrayog ni nggu fanay e re n’ey ni nggu ayuweg boch e girdi’ ngay? Rayog ni ngad fanayed e pi n’ey ni ngad ayuweged e piin ni gad be fil e Bible ngorad nge ku boch e girdi’ ni yad baadag e machib ni ngar nanged rogon nib thil e piin piilal u lan e ulung rodad ngak e pi tayugang’ ko yurba’ i teliw ko  Kristiano ni googsur. Maku reb e, pi n’em e rayog ni nge ayuwegdad ni nge yib ngan’dad gelngin e maruwel ni ma tay e piin piilal u lan e ulung. Gad ra lemnag gelngin e maruwel ni yad ma tay ma aram e rayog ni ngar ud ‘ted farad.’ (1 Thess. 5:12) Ere, faanra ud daged ngorad ni gad be tay farad ni bochan e maruwel nib gel ni yad ma tay, ma aram e gad be ayuwegrad ni ngar rin’ed e maruwel rorad u fithik’ e felfelan’.​—Heb. 13:17.

12, 13. (a) Faan gad ra fanay e pi babyor rodad nge ku boch ban’en ni yima pi ngodad, ma mang e rayog ni ngad gayed murung’agen? (b) Mu weliy ban’en ni be dag rogon nrayog ni nge ayuwegdad boch e thin nu Bible ni gad ma beeg ni gathi rib tamilang.

¹² Mu gay murung’agen boch ban’en. Ngad fanayed e pi babyor nge boch ban’en ni yima pi’ ngodad ni ngad gayed e fulweg ko pi deer ni baaray ni be gaar:

•   Mini’ e en ni yoloy e re babyor ko Bible ney?

•   Uw e gin’en nni yoloy riy, ma mingiyal’ e ni yoloy?

•   Mang boch ban’en nib ga’ fan ni i buch u nap’an ni yibe yoloy e re babyor ko Bible ney?

 Pi n’ey e rayog ni nge ayuwegdad ni ngad filed boch ban’en ko pi babyor ney ni gathi rib tamilang.

¹³ Bod ni fare thin u Ezekiel 14:13, 14 (BT) e be gaar: “Faanra i denen reb e nam ni dabki yul’yul’ ngog, ma bay gu k’iyag paag nggu gothey e gin ma yib e ggan riy ngorad. Mu gu pi’ e uyungol nge li’ e girdi’ nge gamanman ni taareb rogon. Faan mang e i par fa dalip i pumoon ni Noah, Daniel, nge Job u rom, ma farad mat’aw e goo yafos e ra ayuweg. I Somol ni Th’abi Tolang e ke yog e pi thin ney.” Faan gad ra gay murung’agen e re thin nu Bible ney ma gad ra nang ni yoloy Ezekiel e re thin ney u bang ko duw ni 612 B.C.E. Ngiyal’ nem e ke yan bokum e chibog ni ke yim’ Noah nge Job, machane dawori pag Jehovah talin rogon nra pirew ni yow ba yul’yul’ ngak. Machane Daniel e ka bay e ngiyal’ nem. Bin riyul’ riy e, sogonap’an 20 e duw yangaren u nap’an ni yog Jehovah ni ir be’ nib mat’aw ni bod rogon Noah nge Job. Mang e gad ra fil ko re n’ey? Ma guy Jehovah e yul’yul’ ni ma tay gubin e pi tapigpig rok nib muun e pi fel’ yangaren ngay, mab ga’ fan e re n’ey u wan’.​—Ps. 148:12-14.

14. Mang angin ko piin fel’ yangaren e pi babyor ni kan ngongliy ni fan ngorad? Uw rogon nrayog ni nge yib angin e pi babyor ney ngak yugu boch e girdi’? (Mu guy e sasing ni bay u tabolngin e re article ney.)

¹⁴ Gad ma guy ni ma yib angin ngodad gubin yang ko Bible ni gad ma fil. Ere rayog ni ngki yib angin ngodad gubin e pi babyor rodad ni kan ngongliy ni bay e thin nu Bible riy. Ngad weliyed murung’agen boch e pi babyor nem. Pi babyor ni fan ngak e piin fel’ yangaren. Fapi duw ni ke yan ma boor e babyor rodad ni kan fal’eg ni fan ngak e piin fel’ yangaren. ^[1] Boch ko pi babyor ney e kan ngongliy ni nge ayuwegrad u rogon ni ngar gelgad ko towasar ni yad ma mada’nag u skul ara yugu boch e magawon ni ma mada’nag e piin fel’ yangaren. Ere, faan gad ra beeg e pi babyor ney, ma uw rogon nrayog ni nge yib angin ngodad? Rayog ni nge ayuwegdad ni ngad nanged e pi magawon ni ma mada’nag e piin fel’ yangaren nge rogon nrayog ni ngad ayuweged yad mad pied e athamgil nga lanin’rad.

15. Mang fan ni susun e ngki adag e pi Kristiano ni kar piilalgad e pi babyor rodad ni kan ngongliy ni fan ngak e piin fel’ yangaren?

¹⁵ Yooren e pi magawon ni kan yoloy murung’agen nga lan boch e babyor ni kan ngongliy ni fan ko piin fel’ yangaren e gathi kemus ni yigoo yad e ra yib angin ngorad. Gad gubin nib t’uf ni ngad ayuweged e michan’ rodad, maku ba t’uf ni ngad gagiyegnaged rogon ni gad ma lem, mad siyeged e pi towasar ni yima tay ngodad, nge piin nde fel’ ni ngan chag ngorad, nge pi n’en ni gad ma n’ag e chalban rodad ngay. Pi n’ey ni kan weliy murung’agen nge ku boch ban’en ko pi babyor rodad e kan ngongliy ni fan ngak e piin fel’ yangaren. Ere, dabi lemnag e piin Kristiano ni kar piilalgad ni pi babyor ni kan ngongliy ni fan ngak e piin fel’ yangaren e dariy rogon ngorad. Yugu aram rogon ni pi babyor nem ni kan ngongliy e fan ngak e piin fel’ yangaren, machane pi n’en ni bay riy e kan fek ko pi kenggin e motochiyel u lan e Bible nrayog ni nge yib angin ngodad ni gad gubin.

16. Ku mang reb e kanawo’ ni ma ayuweg e pi babyor rodad e piin fel’ yangaren riy?

¹⁶ Pi babyor ni kan ngongliy ni fan ngak e piin fel’  yangaren e ku rayog ni nge ayuwegrad ni nge gel e tha’ u thilrad Jehovah. (Mu beeg e Eklesiastes 12:1, 13.) Ku arrogon e pi Kristiano ni kar piilalgad ni ku rayog ni nge yib angin e pi babyor ney ngorad. Bod ni, fare Awake! ko April 2009 e bay fare article riy ni kenggin e “Young People Ask . . . How Can I Make Bible Reading Enjoyable? (Ma Fith e Piin Fel’ Yangaren . . . Uw Rogon ni Nggu Adag e Beeg Bible ni Gu Ma Tay?)” Re article nem e bay boch ban’en riy ni ku rayog ni nge ayuwegdad nib muun ngay ba kahol ni bay boch e thin riy nrayog ni ngan th’ab ngan fanay u nap’an e fol Bible. Gur, rayog ni nge yib angin e re n’ey ngak e piin ni kar piilalgad, fa? I yog reb e ppin nib mabgol ni bay e bitir rok ni kab kafram i yib nib mo’maw’ ngak ni nge beeg e Bible. Machane, tomuren ni ke fol ko pi fonow ni bay u lan e re article ney ma chiney e ke adag ni ma beeg e Bible, ya ke yag ni nge guy rogon nib peth reb e babyor riy nga reb ni bod rogon bangi mad ni kan sisyunag ara ka nip’ yaan ban’en ngay. I yog ni gaar: “Chiney e kug adag ni gu ma beeg e Bible.” Miki ulul ngay ni gaar: “Dariy ba ngiyal’ ni kug felfelan’ i beeg e Bible ni bod e chiney.”

17, 18. Uw rogon nrayog ni nge yib angin ngodad e pi babyor ni kan ngongliy ni fan ko girdi’ ni yoor ni gad ma beeg? Mu weliy reb e kanawo’.

¹⁷ Pi babyor ni kan ngongliy ni fan ko girdi’ ni yoor. Ka nap’an e duw ni 2008 ma kad felfelan’gad ni kad fanayed fa ken ni yima fil e Wulyang ko Damit ni kan ngongliy ni fan ngak e Pi Mich Rok Jehovah. Machane, uw rogon fapi magazine rodad ni kan ngongliy ni fan ngak e girdi’ ni yoor? Gur, rayog ni nge yib angin ngodad ni faan gad ra beeg? Mu guy rogon ni kan susunnag. Bod ni bay reb e rran u m’on ni ngan pi reb e welthin, mag guy be’ ni kam pining ni ke yib nga Kingdom Hall ni nge un ko muulung. Dariy e maruwar riy ni kam felfelan’. Nap’an ni be pi’ reb e walag e welthin rok ma ga be lemnag facha’ ni ke yib i un ko muulung. Sana ga be lemnag rogon ni be nang fan facha’ fapi n’en ni yibe weliy ko fare welthin nge rogon nrayog ni nge ayuweg nge thilyeg boch ban’en u lan e yafos rok. Ere, angin ni ke yib riy e ke taw e pi n’en ni kan weliy ko fare welthin nga gum’irchaem ma kam felfelan’ ko pi n’en ni kan weliy riy.

¹⁸ Ku aray e n’en ni gad ma lemnag u nap’an ni gad be beeg e pi babyor rodad ni kan ngongliy ni fan ko girdi’ ni yoor. Bod ni, Fare Wulyang ko Damit ni yima wereg ko girdi’ ni yoor nge pi article ni bay ko jw.org e ma weliy boch e thin nu Bible u reb e kanawo’ nib mom ni nge nang fan e girdi’ u wuru’ e ulung. Nap’an ni gad ra beeg e pi n’ey, ma rayog ni nge toarnag e tamilangan’ rodad nge rogon feni rib t’uf rodad e tin riyul’ u Bible. Maku reb e, sana rayog ni nge ayuwegdad e re n’ey ni ngad filed boch e kanawo’ u rogon ni ngad weliyed e pi n’en ni ke michan’dad ngay u nap’an e machib. Ma fare babyor ni Awake! e ku rayog ni nge ayuwegdad ni ngari mich u wan’dad ni bay e En Tasunmiy. Re ke babyor ney e ku ma ayuwegdad u rogon ni ngad ayuweged e michan’ rodad.​—Mu beeg e 1 Peter 3:15.

19. Uw rogon ni ngad daged ni gad be pining e magar ngak Jehovah ko pi n’en ni ke pi’ ngodad?

¹⁹ Ba tamilang ni boor ban’en ni ke pi’ Jehovah ngodad nrayog ni nge ayuwegdad ko tirok ban’en. (Matt. 5:3) Ere, ngad ululgad ni ngaud beeged ma gad be maruwel ko pi n’en ni ke pi’ ngodad. Faan gad ra rin’ ni aray rogon, ma ra yib angin ngodad maku gad be dag ngak Jehovah nib ga’ fan u wan’dad gubin e pi n’ey ni ke pi’ ngodad.​—Isaiah 48:17.