1, 2. 1) Toʼoneʼ, ¿bix k-ilik le Bibliaoʼ? 2) Techeʼ, ¿yaan wa u jaats tiʼ le Biblia maas jatsʼuts a wilkoʼ?

 TOʼON u j-jaajkunajoʼon Jéeobaeʼ jach uts t-tʼaan k-xokik le Bibliaoʼ. Ken k-xokeʼ ku líiʼsik k-óol, ku tsʼáaiktoʼon esperanza yéetel k-ilik jeʼel u páajtal k-confiar tiʼ baʼax ku yaʼalikeʼ (Rom. 15:4). Le baʼax ku yaʼalikoʼ maʼ u tuukul chéen wíinikiʼ, baʼaxeʼ «u tʼaan Dios» (1 Tes. 2:13).

² Óoliʼ tuláakloʼon yaan junpʼéel jaats tiʼ le Biblia maas jatsʼuts k-ilkoʼ, yanoʼobeʼ jatsʼuts u yilkoʼob le Evangelioʼoboʼ tumen ku yeʼeskoʼob u jatsʼuts u modos Jéeoba chíikbesaʼab tumen Jesús (Juan 14:9). Uláakʼoʼobeʼ maas jatsʼuts u yilik u xokikoʼob libroʼob ku tʼaan tiʼ profecíaʼob jeʼex Apocalipsiseʼ tumen ku yeʼeskoʼob le baʼaxoʼob kun ‹úuchul ichil junpʼíit kʼiinoʼoboʼ› (Apo. 1:1). Yanoʼob xaneʼ jach ku líikʼil u yóoloʼob ken u xokoʼob u libroil Salmos yéetel uláakʼoʼobeʼ jatsʼuts u yilik u xokikoʼob le tsolnuʼukoʼob yanoʼob tu libroil Proverbiosoʼ. Jeʼex k-ilkoʼ le Bibliaoʼ junpʼéel libro utiaʼal tuláakal máak.

3, 4. 1) Techeʼ, ¿bix a wilik le publicacionoʼob yaantoʼonoʼ? 2) ¿Utiaʼal máaxoʼob beetaʼan le publicacionoʼob ku jóoʼsaʼaloʼoboʼ?

³ Toʼoneʼ k-yaabiltmaj tuláakal baʼax ku yaʼalik le Bibliaoʼ yéetel k-ilik jach kʼaʼanaʼan tuláakal le publicacionoʼob ku taaloʼob tiʼoʼ.  Tuláakal le libroʼob, folletoʼob, revistaʼob yéetel uláakʼ publicacionoʼoboʼ ku taaloʼob tiʼ Jéeoba. Le baʼaloʼobaʼ ku yáantkoʼon utiaʼal k-maas k-natsʼikba tiʼ Jéeoba yéetel ku yáantkoʼon utiaʼal ka muʼukʼaʼanchajak k-fe (Tito 2:2).

⁴ Yaʼab tiʼ le publicacionoʼoboʼ beetaʼan utiaʼal ka xoʼokok tumen u j-jaajkunajoʼob Jéeoba. Chéen baʼaleʼ yaneʼ beetaʼan chéen utiaʼal u jaats máakoʼob, jeʼex le táankelem paalaloʼoboʼ wa le taatatsiloʼoboʼ. Yaʼab xan tiʼ le xookoʼob wa videoʼob ku chíikpajal teʼ sitio yaantoʼon teʼ Internetoʼ beetaʼan utiaʼal u xokik le máaxoʼob maʼ j-Jaajkunajoʼoboʼ. Lelaʼ ku yeʼesikeʼ Jéeobaeʼ táan u tsʼáaik tiʼ tuláakal máak le janal wa kaʼansaj jeʼex u yaʼalmil u beetkoʼ (Isa. 25:6).

5. ¿Baʼax k-ojel tu yoʼolal Jéeoba?

⁵ Maʼ xaaneʼ tuláakloʼon k-kʼáat ka yanaktoʼon maas yaʼab tiempo utiaʼal k-xokik le Biblia yéetel uláakʼ publicacionoʼoboʼ. Chéen baʼaleʼ yaan horaeʼ maʼ tu páajtal k-xokik tubeel tuláakal le publicacionoʼob k-kʼamkoʼ. Toʼoneʼ k-ojleʼ Jéeobaeʼ ku kiʼimaktal u yóol ken u yil táan k-beetik tuláakal le ku páajtal utiaʼal k-jóoʼsik tiempo utiaʼal k-xokik le Biblia yéetel le publicacionoʼoboʼ (Efe. 5:15, 16). Chéen baʼaleʼ, yaan junpʼéel baʼal unaj k-kanáantik maʼ u yúuchultoʼon, ¿baʼaxiʼ?

6. ¿Baʼax jeʼel u beetik maʼ k-jóoʼsik u yutsil tuláakal le publicacionoʼoboʼ?

⁶ Wa maʼ t-kanáantikbaeʼ jeʼel u káajal k-tuklik mix baʼal jeʼel k-kanik tiʼ jujunpʼéel jaatsoʼob tiʼ le Bibliaoʼ wa tiʼ jujunpʼéel publicacionoʼoboʼ. ¿K-ilik wa bey mix baʼal yaan u yil yéetel k-kuxtal le baʼax ku yaʼalik wa baʼax jaatsil tiʼ le Bibliaoʼ? ¿Kux túun wa ku jóoʼsaʼal junpʼéel publicación k-ilik bey maʼ beetaʼan utiaʼal k-xokik toʼoneʼ? ¿Chéen wa k-jáajan k-xokik, wa hasta maʼatech k-xokik? Wa k-beetik beyaʼ maʼ ken k-jóoʼs u yutsil tuláakal le tsolnuʼukoʼob ku kaʼansikoʼ. ¿Baʼax jeʼel k-beetik utiaʼal maʼ u yúuchultoʼon beyoʼ? Yáaxeʼ unaj k-kʼaʼajsikeʼ tiʼ Jéeoba u taal tuláakal le publicacionoʼob ku jóoʼsaʼaloʼ. Le Bibliaoʼ ku yaʼalik: «Teen Yuumtsil a [Dios]; teen kaʼanbesik tiʼ teech baʼax unaj a beetik utiaʼal a wutsil» (Isa. 48:17). Teʼ xookaʼ yaan k-ilik óoxpʼéel baʼaloʼob jeʼel u yáantkoʼon k-jóoʼs u yutsil tuláakal le baʼaxoʼob ku tsʼáaiktoʼon Jéeobaoʼ.

7. ¿Baʼaxten unaj k-xokik le Biblia yéetel u tuukulil k-kanik túumben baʼaloʼoboʼ?

⁷ Xooknen yéetel u tuukulil a kanik túumben baʼaloʼob. U jaajileʼ yaan jaatsoʼob tiʼ le Bibliaoʼ tsʼíibtaʼan utiaʼal wa baʼax claseil máakoʼob. Chéen baʼaleʼ le Bibliaoʼ ku yaʼalik: «Tuláakal Kiliʼich Tsʼíibeʼ Dios tsʼáa tu tuukul máak utiaʼal ka tsʼíibtaʼak, maʼalob utiaʼal kaʼansaj» (2 Tim. 3:16). Lelaʼ ku yeʼesikeʼ ken k-xok le Bibliaoʼ unaj k-beetik yéetel u tuukulil k-kanik túumben baʼaloʼob. Juntúul sukuʼuneʼ ku yaʼalikeʼ le táan u xokik le Bibliaoʼ ku kʼaʼajsik de ke yaʼab baʼaxoʼob jeʼel u páajtal u kanik máak tiʼ junpʼéel chan jaatseʼ, lelaʼ le áantik u kan uláakʼ túumben baʼaloʼob maʼ jach séeb jeʼel u yilik máakiʼ. Le oʼolaleʼ táanil tiʼ k-xokik le Bibliaoʼ unaj k-kʼáatik tiʼ Jéeoba ka u yáantoʼon k-kan túumben baʼaloʼob yéetel ka u yáantoʼon k-naʼat le baʼaxoʼob u kʼáat ka k-kanoʼ (Esd. 7:10; xok Santiago 1:5).

8, 9. 1) Ken k-xok le Bibliaoʼ, ¿tiʼ baʼax kʼáatchiʼiloʼob jeʼel u páajtal k-tuukuleʼ? 2) ¿Baʼax k-kanik tiʼ le baʼaxoʼob ku kʼáatik Jéeoba tiʼ le ancianoʼoboʼ?

⁸ Tuukulnen tiʼ jujunpʼéel kʼáatchiʼob. Ken a xok le Bibliaoʼ, jeʼelen junsúutukeʼ ka a máans ta tuukul le kʼáatchiʼobaʼ: «¿Baʼax ku kaʼansikten tu yoʼolal Jéeoba? ¿Bix jeʼel u páajtal u meyajten ichil in kuxtaleʼ? ¿Bix jeʼel u meyajten utiaʼal in wáantik uláakʼ máakoʼobeʼ?». Wa k-tuukul tiʼ le kʼáatchiʼobaʼ yaan k-maas k-jóoʼsik u yutsil u xookil le Bibliaoʼ. Koʼox ilik junpʼéel ejemplo. Le Bibliaoʼ ku  tʼaan tiʼ jujunpʼéel baʼaloʼob kʼaʼabéet utiaʼal u beetik u ancianoil máak (xok 1 Timoteo 3:2-7). Yaʼab tiʼ toʼoneʼ maʼ ancianoʼoniʼ, le oʼolaleʼ jeʼel k-tuklik tiʼ mix baʼal jeʼel u yáantkoʼon le baʼaxoʼob ku kʼáataʼaltiʼob ka u beetoʼoboʼ. Chéen baʼaleʼ yéetel u yáantaj le óoxpʼéel kʼáatchiʼob t-aʼalaj tu káajbal le xóotʼolaʼ, koʼox ilik baʼax utsil jeʼel k-jóoʼsik tuláakloʼon tiʼ le baʼaxoʼob ku kʼáataʼal ka u beet le ancianoʼoboʼ.

⁹ «¿Baʼax ku kaʼansikten tu yoʼolal Jéeoba?» Jéeoba aʼalmil baʼax kʼaʼabéet tiʼ tuláakal le máaxoʼob taak u beetik u ancianoiloʼoboʼ. Letiʼeʼ yaʼab baʼaxoʼob ku kʼáatik tiʼ le máaxoʼob ken u kanáantoʼob le múuchʼuliloʼ, lelaʼ ku yeʼesikeʼ le máaxoʼob yanoʼob teʼ múuchʼuliloʼ jach kʼaʼanaʼan u yilkoʼob. Le Bibliaoʼ ku yaʼalikeʼ ‹le múuchʼuliloʼ Dios man yéetel u kʼiʼikʼel u Paal› (Bax. 20:28). Bey túunoʼ Jéeobaeʼ u kʼáat ka u tsʼáa junpʼéel maʼalob ejemplo le ancianoʼoboʼ, tumen letiʼob kun kʼubkoʼob cuentas tu táan Jéeoba tu yoʼolal le sukuʼunoʼob yanoʼob teʼ múuchʼuliloʼ. Letiʼeʼ u kʼáat ka k-uʼuy kanáantaʼanoʼon tumen le ancianoʼoboʼ (Isa. 32:1, 2). ¿Máasaʼ le baʼaxoʼob ku kʼáataʼal tiʼ le ancianoʼoboʼ yaʼab baʼaloʼob ku kaʼansiktoʼon tu yoʼolal Jéeoba?

10, 11. 1) Le baʼaxoʼob ku kʼáataʼal tiʼ le ancianoʼoboʼ, ¿bix jeʼel u yáantkoʼon ichil k-kuxtaleʼ? 2) ¿Bix jeʼel u meyajtoʼon utiaʼal k-áantik u maasileʼ?

¹⁰ «¿Bix jeʼel u páajtal u meyajten ichil in kuxtaleʼ?» Wa juntúul ancianoecheʼ, cada wa baʼax kʼiineʼ maʼalob ka a xakʼalt le baʼaxoʼob ku kʼáataʼal ka u beet le ancianoʼoboʼ yéetel maʼalob ka a wil a maas maʼalobkíintik bix a modos. Wa táan a ‹kaxtik u tsʼaʼabaltech u meeyjil u kanáantaʼal le múuchʼuliloʼ› ilawil a beetik le baʼaloʼob ku kʼáataʼaltech u maas maʼalobil ku páajtaloʼ (1 Tim. 3:1). Tuláakloʼon jeʼel u páajtal k-kaanbal tiʼ le baʼaxoʼob ku kʼáataʼal tiʼ le ancianoʼoboʼ. Jéeobaeʼ u kʼáat ka yanaktoʼon junpʼéel utsul puksiʼikʼal yéetel u kʼáat ka yanaktoʼon junpʼéel maʼalob tuukul (Fili. 4:5; 1 Ped. 4:7). Wa le ancianoʼob ku yeʼeskoʼob «maʼalob bej tiʼ le tamanoʼoboʼ» jeʼel u páajtal k-kaanbal tiʼobeʼ yéetel jeʼel u yantaltoʼon le ‹fe yaantiʼoboʼ› (1 Ped. 5:3; Heb. 13:7).

¹¹ «¿Bix jeʼel u meyajten utiaʼal in wáantik uláakʼ máakoʼobeʼ?» Le baʼaxoʼob ku kʼáataʼal tiʼ le ancianoʼoboʼ jeʼel u yáantkoʼon k-kaʼans tiʼ k-xoknáaloʼob wa tiʼ uláakʼ máakoʼobeʼ baʼaxten le ancianoʼoboʼ maʼ beyoʼob jeʼex u nuuktakil uláakʼ religionoʼoboʼ. Lelaʼ jeʼel xan  u yáantkoʼon k-kʼaʼajs le bukaʼaj meyaj ku beetik le ancianoʼob teʼ múuchʼuliloʼ. Wa k-naʼatik maʼalob lelaʼ yaan k-maas respetartikoʼob (1 Tes. 5:12). Tsʼoʼoleʼ wa k-respetartikoʼobeʼ, maas yaan u beetkoʼob u meyajoʼob yéetel kiʼimak óolal (Heb. 13:17).

12, 13. 1) Yéetel u yáantaj le baʼaxoʼob u tsʼaamaj u kaajal Jéeoba utiaʼal k-xakʼalxookoʼ, ¿baʼax maʼalob ka a kaxt ken a xok le Bibliaoʼ? 2) Tsʼáa junpʼéel ejemplo tiʼ baʼaxoʼob túumbentak jeʼel k-kanik ken k-xakʼalxokt junpʼéel libro tiʼ le Bibliaoʼ.

¹² Xakʼalxooknen. Ken k-xok le Bibliaoʼ unaj k-núukik le kʼáatchiʼobaʼ:

•   ¿Máax tsʼíibt le jaats tiʼ le Bibliaaʼ?

•   ¿Baʼax kʼiin yéetel tuʼux tsʼíibtaʼabi?

•   ¿Baʼax táan kaʼach u yúuchul le ka tsʼíibtaʼab le libroaʼ?

 Le kʼáatchiʼobaʼ jeʼel u yáantkoʼon k-kan túumben baʼaloʼob maʼ chíikaʼan u yilaʼaloʼobiʼ.

¹³ Koʼox ilik junpʼéel ejemplo. Ezequiel 14:13 yéetel 14, ku yaʼalik: «Wa junmúuchʼ kaajoʼob ku kʼebanchajal tiʼ teen, tu yoʼolal u kʼáat u kʼexeneʼ, teneʼ bíin in líikʼes in kʼab utiaʼal in jatsʼik, bíin in lukʼes xan tuláakal u yoʼoch waaj; bíin in túuxt wiʼij tu yóokʼol, bíin in beet u kíimil u wíinikiloʼob yéetel u baʼalcheʼiloʼob. Wa tiʼ le kaaj ka kʼuchuk taal Noé, Daniel yéetel Job[oʼ], chéen letiʼob óoxtúuloʼob jeʼel u [salvartikubaʼob] tu yoʼolal u tojil u kuxtaloʼob. Teen Yuumtsil, teen aʼalik». Ken xakʼalxooknakoʼoneʼ k-ilkeʼ le tʼaanoʼobaʼ tu tsʼíibtaj Ezequiel óoliʼ tu añoil 612 táanil tiʼ u taal Jesús. Noé yéetel Jobeʼ tsʼokaʼaniliʼ u máan años kíimkoʼobeʼ, pero Jéeobaeʼ láayliʼ ku kʼaʼajsik kaʼach bix chúukpajik u yóoloʼobeʼ. Chéen baʼaleʼ Danieleʼ, láayliʼ kuxaʼan kaʼacheʼ. Maʼ xaaneʼ yaan kex 20 años tiʼ ka tu yaʼalaj Jéeoba jach chúukaʼan u yóol jeʼex Noé yéetel Jobeʼ. ¿Baʼax ku kaʼansiktoʼon lelaʼ? Jéeobaeʼ jach nojoch baʼal u yilik u chúukpajal u yóol le máaxoʼob meyajtikoʼ, tak le táankelmoʼoboʼ (Sal. 148:12-14).

14. 1) ¿Baʼax utsil ku kʼamik le táankelmoʼob ken u xokoʼob le publicacionoʼob beetaʼan utiaʼaloʼoboʼ? 2) Wa maʼ táankelmoʼoneʼ, ¿baʼax utsil jeʼel k-jóoʼsik tiʼ le xookoʼob yéetel tiʼ le libroʼob jóoʼsaʼan utiaʼaloʼoboʼ? (Ilawil le foto yaan tu káajbal le xookaʼ.)

¹⁴ Publicacionoʼob utiaʼal le táankelem paalaloʼoboʼ. Jeʼex tsʼoʼok k-ilkoʼ jeʼel u páajtal k-jóoʼsik u yutsil tuláakal le baʼax ku yaʼalik le Bibliaoʼ. Lelaʼ láayliʼ xan bey u yúuchul yéetel le jejeláas publicacionoʼob yaantoʼonoʼ. Koʼox ilik jujunpʼéel ejemploʼob. Teʼ tu tsʼook añoʼobaʼ u kaajal Jéeobaeʼ tsʼoʼok u jóoʼsik yaʼab publicacionoʼob utiaʼal le táankelem paalaloʼoboʼ. ^[1] Le xookoʼobaʼ ku yáantkoʼob utiaʼal u yiloʼob baʼax jeʼel u páajtal u beetkoʼob wa ku túulchʼintaʼal u beetoʼob baʼaloʼob maʼ maʼalobtak teʼ escuelaoʼ. Ku yáantkoʼob xan u yiloʼob baʼax jeʼel u beetkoʼob yéetel le problemaʼob ku yantaltiʼob beora táankelmoʼobaʼ. Wa maʼ táankelmoʼoneʼ, ¿baʼax utsil jeʼel k-jóoʼsik tiʼ le xookoʼob yéetel tiʼ le libroʼob jóoʼsaʼan utiaʼaloʼoboʼ? Ken k-xokoʼobeʼ k-naʼatik le problemaʼob ku yantaltiʼoboʼ, k-ilik bix jeʼel k-áantkoʼobeʼ yéetel bix jeʼel k-líiʼsik u yóoloʼobeʼ.

15. ¿Baʼaxten tuláakloʼon unaj k-xokik le publicacionoʼob beetaʼan utiaʼal le táankelmoʼoboʼ?

¹⁵ Le máaxoʼob tsʼoʼok u maas nojochtaloʼoboʼ maʼ unaj u tuklikoʼob wa maʼ unaj u xokikoʼob le publicacionoʼob beetaʼan utiaʼal le táankelmoʼoboʼ. Yaʼab tiʼ le baʼaxoʼob ku tsolik le publicacionoʼobaʼ jeʼel u yáantik tuláakal le sukuʼunoʼob kex jeʼel bukaʼaj u jaʼabiloʼobeʼ. Tuláakloʼon ku kʼaʼabéettal k-defendertik baʼax k-creertik, k-controlartik le baʼaxoʼob k-tsʼíiboltikoʼ, maʼ k-chaʼik túulchʼintaʼal k-beet baʼax kʼaas, maʼ k-bisikba yéetel máaxoʼob maʼatech u meyajtikoʼob Jéeoba yéetel maʼ k-táakpajal tiʼ náaysaj óoloʼob maʼ maʼalobtakiʼ. Jeʼex k-ilkoʼ kex tsʼíibtaʼan utiaʼal le táankelmoʼoboʼ, le baʼax ku yaʼalikoʼ jóoʼsaʼan  teʼ Bibliaoʼ, le oʼolaleʼ tuláakloʼon jeʼel u páajtal k-jóoʼsik u yutsileʼ.

16. ¿Bix uláakʼ u yáantik le táankelmoʼob le publicacionoʼob beetaʼan utiaʼaloʼoboʼ?

¹⁶ Le publicacionoʼob beetaʼan utiaʼal le táankelmoʼoboʼ ku yáantkoʼob xan utiaʼal u maas natsʼubaʼob tiʼ Jéeoba (xok Eclesiastés 12:1, 13). Chéen baʼaleʼ kex maʼ táankelmoʼoneʼ láayliʼ jeʼel u yáantkoʼoneʼ. Le revista ¡Despertad! ich español jóokʼ tu mesil abril tiʼ 2009, tu taasaj junpʼéel xook utiaʼal le táankelmoʼob tu kʼaabaʼtaj: «¿Cómo disfrutar la lectura de la Biblia?». Le xookaʼ tu yaʼalaj yaʼab baʼaxoʼob jeʼel u yáantkoʼon utiaʼal k-xookeʼ yéetel tu taasaj junpʼéel cuadro jeʼel u páajtal u kʼoʼosol yéetel u líiʼsaʼal utiaʼal u kaʼa meyaj ken u xok máak le Bibliaoʼ. ¿Máasaʼ tuláakloʼon jeʼel k-jóoʼsik u yutsil le xookaʼ? Juntúul maamatsileʼ tu yaʼaleʼ maʼ chéen chʼaʼabil u yilik u xokik le Bibliaoʼ. Chéen baʼaleʼ tu yilaj u beetik le baʼax tu yaʼalaj le xook jóokʼ teʼ revistaoʼ yéetel bejlaʼeʼ uts tu yich u xokik le Bibliaoʼ. Letiʼeʼ ku yaʼalikeʼ jach jatsʼuts u yilik bix u tʼaan tuláakal u libroiloʼob le Biblia tiʼ junpʼéeliliʼ baʼaloʼ, tsʼoʼoleʼ lelaʼ ku yáantik u naʼat tubeel baʼax ku kaʼansik. Letiʼeʼ tu yaʼalaj xan: «Mix juntéen in wuʼuyinba kaʼach bey ken in xok le Bibliaoʼ».

17, 18. ¿Bix jeʼel k-jóoʼsik u yutsil k-xokik le revistaʼob beetaʼanoʼob utiaʼal le kʼaʼaytajoʼ? Tsʼáa junpʼéel ejemplo.

¹⁷ Publicacionoʼob beetaʼan utiaʼal u yúuchul kʼaʼaytaj. Desde 2008, káaj u jóoʼsaʼal le revista U Pʼíich Tulumil Kanan utiaʼal le múuchʼuliloʼ. Le revistaaʼ beetaʼan utiaʼal u j-jaajkunajoʼob Jéeoba, chéen baʼaleʼ yaan xan toʼon revistaʼob utiaʼal u yúuchul kʼaʼaytaj. ¿Bix jeʼel k-jóoʼsik u yutsil le revistaʼobaʼ? Koʼox ilik junpʼéel ejemplo. Ken k-invitart wa máax utiaʼal u bin u yuʼub le tsoltʼaan teʼ muchʼtáambaloʼ, ku kiʼimaktal k-óol ken k-il u biniʼ. Le táan u máansaʼal le tsoltʼaanoʼ k-tuukul tu yoʼolal le máax t-invitartoʼ. Toʼoneʼ k-tuukul tiʼ bix u yuʼubikuba yoʼolal le baʼaxoʼob ku yaʼalaʼaloʼ yéetel bix jeʼel u yáantaʼal u kʼex u kuxtal tumen le baʼax ku kaʼansaʼaloʼ. Lelaʼ ku beetik u maas kʼuchul t-puksiʼikʼal le baʼax ku yaʼalaʼaloʼ yéetel k-maas tsʼáaik u graciasil yoʼolal le baʼax ku kaʼansaʼaloʼ.

¹⁸ Láayliʼ bey xan u yúuchul ken k-xok le publicacionoʼob utiaʼal u yúuchul kʼaʼaytajoʼ. Por ejemploeʼ u revistail U Pʼíich Tulumil Kanan ku jóoʼsaʼal utiaʼal u yúuchul kʼaʼaytaj yéetel uláakʼ xookoʼob ku tsʼaʼabal teʼ sitio jw.org ich Internetoʼ, ku tsolkoʼob baʼax ku kaʼansik le Biblia tiʼ junpʼéel bix maas séeb jeʼel u naʼataʼaloʼ. Ken k-xok le publicacionoʼobaʼ, k-kʼuchul k-maas apreciart le baʼaxoʼob ku yaʼalikoʼ yéetel k-maas k-naʼatik le baʼaxoʼob k-kanmaj teʼ Bibliaoʼ. Le revista ¡Despertad! xanoʼ ku yáantkoʼon k-maas creert yaan juntúul Dios beetmil tuláakal baʼal. Leloʼ ku yáantkoʼon xan k-kan bix jeʼel k-defendertik le baʼaxoʼob k-creertikoʼ (xok 1 Pedro 3:15).

19. ¿Bix jeʼel k-tsʼáaik u graciasil tiʼ Jéeoba yoʼolal le baʼaxoʼob ku tsʼáaiktoʼonoʼ?

¹⁹ Jeʼex k-ilkaʼ Jéeobaeʼ ku tsʼáaiktoʼon yaʼab tsolnuʼukoʼob yéetel kaʼansajoʼob utiaʼal k-utsil (Mat. 5:3). Koʼoneʼex seguert k-xokik tuláakal le publicacionoʼob ku tsʼáaiktoʼonoʼ yéetel k-tsʼáaik ichil k-kuxtal le baʼaxoʼob ku kaʼansiktoʼonoʼ. Wa k-beetik beyoʼ yaan k-jóoʼsik u yutsil tuláakal le publicacionoʼoboʼ yéetel yaan k-eʼesik tiʼ Jéeoba k-tsʼáaik u graciasil yoʼolal le baʼaxoʼob ku tsʼáaiktoʼon utiaʼal u kaʼanskoʼonoʼ (Isa. 48:17).