1, 2. a) Ximodo ruuyaʼ ca testigu stiʼ Jiobá Biblia. b) Xi parte de Biblia jma riuuláʼdxiluʼ.

LAANU, ca testigu stiʼ Jiobá, nadxiinu Stiidxaʼ Dios, Biblia. Riguixhedxí libru riʼ ladxidoʼno, rudii ni esperanza laanu ne zanda gápanu confianza jneza guiráʼ ni rusiidiʼ ni (Romanos 15:4). Cadi zeeda diʼ ni na ique binni luni. Laani nga «stiidxa Dios» (1 Tesalonicenses 2:13).

² Xi parte de Biblia jma riuuláʼdxiluʼ. Zándaca guiranu nápanu ti parte ni jma riuuláʼdxinu guidúʼndanu. Nuu tu riuulaʼdxiʼ guʼndaʼ ca Evangeliu, purtiʼ ni rusiidiʼ cani de Jesús racané cani laacabe gunibiáʼ chaahuicabe ximódopeʼ nga Jiobá (Juan 14:9). Xcaadxi riuulaʼdxiʼ ca libru ni caníʼ de profecía, casi libru Apocalipsis, ni cuzeeteʼ de ca cosa ni «ma zeda dxiña dxi acaʼ» (Apocalipsis 1:1). Ne stale tu riuulaʼdxiʼ libru stiʼ ca Salmo purtiʼ riguixhedxí ni ladxidoʼcaʼ, xcaadxi riuulaʼdxiʼ ca conseju ni zeeda lu libru stiʼ Proverbios. Cani bizéʼtenu riʼ, rusihuinni cani gucuá Biblia para guiráʼ xixé binni.

3, 4. a) Ximodo ridúʼyanu ca publicación stinu. b) Gunáʼ nga ca publicación ni nápanu para gadxé gadxé grupu binni.

³ Cumu nadxiinu Stiidxaʼ Dios la? nga runi rusisácanu ca  publicación ni caníʼ de laani. Ca libru, ca folletu, ca revista ne xcaadxi publicación ni ricaanu, zeeda gaca cani guendaró espiritual ni rudii Jiobá laanu. Racané cani laanu chuʼnu jma gaxha de Jiobá ne gaca fe stinu jma naguidxi (Tito 2:2).

⁴ Stale de ca publicación stinu jma ricá cani para guiráʼ ca testigu stiʼ Jiobá. Maca nuu tu para ricá caadxi tema, casi para ca joven o para ca binni napa xiiñiʼ. Ne stale de ca tema ne videu ni nápanu lu Internet, riree cani para ca binni ni cadi naca testigu stiʼ Jiobá. Cudii Jiobá guiráʼ ni caquiiñeʼ binni para guiziidicaʼ de laabe, zacá nga cudiibe guendaró espiritual casi bidii stiidxabe gúnibe ni (Isaías 25:6).

5. Xi naquiiñeʼ ganna dxíchinu.

⁵ Stale de laanu ñuuláʼdxinu ñápanu jma tiempu para nidúʼndanu Biblia ne ca publicación stinu. Zándaca ñuuláʼdxinu niquiiñenu biáʼqueca tiempu para nidúʼndanu cada publicación ni ricaanu, peru nuu tiru qué randa. Peru nanna dxíchinu riechené Jiobá laanu ora ribeenu tiempu para guidúʼndanu Biblia ne para guni estudiarnu ca publicación stinu (Efesios 5:15, 16). Xi si la? naquiiñeʼ chuʼnu cuidadu para cadi guiábanu lu ti trampa. Xi laani yaʼ.

6. Xi ñándaca nucueeza laanu de nibeendunu ni galán lu guiráʼ ni cudii Jiobá laanu.

⁶ Pa qué chuʼnu cuidadu la? zándaca guiníʼ íquenu nuu parte ni zeeda lu Biblia o lu caadxi publicación qué zusiidiʼ cani laanu gastiʼ. Guidúʼyanu ti ejemplu. Xi gúninu pa cadúʼndanu xiixa lu Biblia ne guiníʼ íquenu qué zacané ni laanu lu ni cazaacanu. Xi gúninu pa cadi para laanu biree ti publicación. Ñee zadúʼndanu ni purtiʼ si maʼ gucuaanu ni la? o qué lica zadúʼndanu ni. Pa qué gúninu ni la? zunítinu información risaca ni ñanda ñacané laanu. Xi zanda gúninu ti cadi guiábanu lu trampa ca yaʼ. Naquiiñeʼ gánnanu de Jiobá nga zeeda guiráʼ ni rusiidiʼ cani. Biblia na: «Naa, Jiobá, naa nga Dios stiluʼ, ni cusiidiʼ lii para cueenduluʼ ni galán» (Isaías 48:17). Lu tema riʼ zadúʼyanu chonna conseju ni zanda gacané laanu cueendunu stale cosa galán lu guiráʼ ni zeeda lu Biblia ne lu guiráʼ guendaró espiritual rudii Jiobá laanu.

7. Xiñee naquiiñeʼ gucaʼ íquenu guizíʼdinu xiixa ora guidúʼndanu Biblia.

⁷ Gucáʼ íquenu guizíʼdinu xiixa ora guidúʼndanu. Dxandíʼ nga maca nuu tu para gucuá caadxi relatu stiʼ Biblia o gucuá cani para caadxi si binni. Peru 2 Timoteo 3:16 nayaguieʼ modo cusiene laanu: «Irá Xquiʼchi Dios, Espíritu Santu uníʼ xi icá». Nga runi, naquiiñeʼ gucáʼ íquenu guizíʼdinu xiixa ora maʼ cadúʼndanu Biblia. Guidúʼyanu ximodo runi ti hermanu ni. Ora gúʼndabe xiixa lu Biblia riníʼ íquebe zanda guiziidibe chupa chonna cosa luni. Nga racané laabe gúʼyabe xi rusiidiʼ cani laabe neca nagana para guidxela binni cani rusiidiʼ ni. Nga runi, ante guidúʼndanu Biblia, guinábanu Jiobá guxheleʼ xpiaaninu ne gacané laanu gácanu binni riene ti guidúʼyanu xipeʼ nga racaláʼdxibe gusiidibe laanu (Esdras 7:10; biindaʼ Santiago 1:5).

8, 9. a) Xi zanda guinabadiidxanu laca laanu ora guidúʼndanu Biblia. b) Xi rizíʼdinu de Jiobá pur ca requisitu ni canábabe ca ancianu.

⁸ Guinabadiidxanu laca laanu. Ora guidúʼndanu Biblia, galán guinabadiidxanu laca laanu: «Xi cusiidiʼ ndiʼ naa de Jiobá. Ximodo zanda iquiiñeʼ ni lu xquendanabaneʼ. Ximodo zanda iquiiñeʼ ni para  gacaniáʼ xcaadxi binni». Pa gúninu zacá, zabeendunu stale cosa lu cani guidúʼndanu lu Biblia. Guidúʼyanu ti ejemplu. Lu Biblia zeeda ca requisitu ni naquiiñeʼ chinanda ca ancianu de congregación (biindaʼ 1 Timoteo 3:2-7). Dxandíʼ cadi guiranu nga ancianu de congregación. Ne zándaca guiníʼ íquenu qué zacanepeʼ ni na ca versículo riʼ laanu. Peru iquiiñenu guionnaʼ ni gunabadiidxanu que para guidúʼyanu ximodo zanda gacané cani guiráʼ xixenu.

⁹ «Xi cusiidiʼ ndiʼ naa de Jiobá». Ca requisitu ni nuu para ca ancianu riʼ, rusihuinni cani ribeza Jiobá guni cumplir ca hombre riʼ caadxi norma ni maʼ gudíxhebe para laacaʼ. Xiñee yaʼ. Purtiʼ nabé risaca congregación para laabe. Biblia na guzíʼ Jiobá laanu né «rini» stiʼ Xiiñiʼ (Hechos 20:28). Nga riníʼ ribeza Dios gudii ca ancianu ti ejemplu galán. Ne zabídxibe cuenta laacaʼ pur modo guni tratarcaʼ ca xpínnibe. Laabe racaláʼdxibe guni sentirnu dxandíʼ cayapa ca ancianu laanu (Isaías 32:1, 2). Ca requisitu ni canabaʼ Jiobá ca rusiidiʼ cani laanu nabé rizaaláʼdxibe laanu.

10, 11. a) Xi zabeendunu ora guidúʼndanu ca requisitu ni naquiiñeʼ chinanda ca ancianu. b) Ximodo zanda iquiiñenu ca requisitu riʼ para gacanenu xcaadxi binni.

¹⁰ «Ximodo zanda iquiiñeʼ ni lu xquendanabaneʼ». Pa ancianu de congregación laanu la? galán pa gatigá cueenu tiempu para guidúʼndanu ca requisitu riʼ ne gúninu stipa pur gúninu cani jma jneza. Ne pa cá íquenu gácanu ancianu la? naquiiñeʼ gúninu stipa pur gúninu ni na ca requisitu riʼ dede biaʼ gándatiʼ (1 Timoteo 3:1). Peru guiranu zanda guizíʼdinu de ca requisitu ca. Guidúʼyanu ejemplu riʼ, ribeza Jiobá gaca cada tobi de laanu binni riene ne gácanu binni nuu xpiaaniʼ (Filipenses 4:5; 1 Pedro 4:7). Ora gudii ca ancianu ti ejemplu galán para congregación, guiráʼ hermanu zanda guiziidiʼ de laacabe ne zinándacaʼ ejemplu stícabe pur fe ni rusihuínnicabe (Hebreos 13:7; 1 Pedro 5:3).

¹¹ «Ximodo zanda iquiiñeʼ ni para gacaniáʼ xcaadxi binni». Zanda iquiiñenu ra zeeda ca requisitu para ca ancianu riʼ para guluinu cani tuuxa ni cayúʼndanenu Biblia o xcaadxi binni, ti gánnacaʼ maʼ gadxé ca  ancianu de ca xaíque stiʼ xcaadxi religión. Laaca rusihuinni ca requisitu riʼ nadipaʼ dxiiñaʼ runi ca ancianu. Racané ndiʼ laanu gápanu jma respetu laacabe pur stipa ni rúnicabe (1 Tesalonicenses 5:12). Ne pa jma guni respetarnu laacabe la? jma nayecheʼ zúnicabe xhiiñacabe ndaaniʼ congregación (Hebreos 13:17).

12, 13. a) Xi zanda guni investigarnu lu ca publicación ni nápanu. b) Bidii ti ejemplu ni rusihuinni xi rizíʼdinu ora runi investigarnu xi bizaaca tiempu gucuá xiixa relatu.

¹² Guni investigarnu. Ora guni estudiarnu Biblia, galán gúninu stipa pur guidxélanu ximodo guicábinu ca guendarinabadiidxaʼ riʼ:

• Tu bicaa ni cayuundaʼ lu Biblia riʼ.

• Paraa ne padxí gucuá ni.

• Xi ca cosa risaca bizaaca tiempu gucuá libru riʼ.

Pa guyúbinu cani bizéʼtenu riʼ, zacané cani laanu guidúʼyanu xi rusiidiʼ cani laanu neca nagana para guidxela binni cani rusiidiʼ ni.

¹³ Guidúʼyanu ti ejemplu. Lu Ezequiel 14:13, 14, na Jiobá zunitilú ti guidxi pa gucheené laabe ne zunduuxebe guiráʼ ni gocaʼ ne ca maniʼ sticaʼ. Peru laaca guniʼbe: «Pa ñuu guionnaʼ hombre riʼ ndaaniʼ guidxi ca: Noé, Daniel ne Job, ñanda nulácabe xquendanabanisícabe purtiʼ rúnicabe ni jneza». Pa guni investigarnu xcaadxi de laani, zadúʼyanu bicaa Ezequiel ca versículo riʼ biaʼ 612 iza ante gueeda Cristu. Neca maʼ gudiʼdiʼ gayuaa iza de guti Noé ne Job, rietenaláʼdxiruʼ Jiobá qué lica nusaana de nuzuubacabe stiidxaʼ. Peru nabániruʼ Daniel dxi que. Ne zándaca nápabe biaʼ 20 iza ora guníʼ Jiobá rúnibe ni jneza cásica biʼniʼ Noé ne Job. Xi rusiidiʼ nga laanu yaʼ. Rusiidiʼ ni laanu rusisaca Jiobá guiráʼ xpinni, dede né ca joven (Salmo 148:12-14).

14. a) Ca publicación ni ricá para ca joven, ximodo racané cani laacabe. b) Ximodo racané cani guiranu. (Biiyaʼ foto ni zeeda ra ruzulú tema riʼ).

¹⁴ Ni gucuá para ca joven. Maʼ bidúʼyanu zanda guizíʼdinu stale cosa lu guidubi naca Biblia. Zacaca nga zanda guizíʼdinu stale cosa lu guiráʼ ca publicación stinu. Guidúʼyanu caadxi ejemplu. Lu ca últimu iza riʼ, maʼ bidii Jiobá stale tema ne libru para ca joven. ^[1] Racané cani laacabe para cadi gúnicabe xiixa ni cadi jneza ra scuela ne gudxiilúcabe ca guendanagana ni rapa cani nahuiiniʼ biaʼ laacabe. Peru, ximodo zanda gacané ca tema ne ca libru riʼ guiranu yaʼ. Ora guidúʼndanu cani la? zánnanu xi guendanagana rapa ca joven ne ximodo zanda gacanenu ne uguʼnu gana laacabe.

15. Xiñee laaca galán guʼndaʼ ca xpinni Cristu ni huaniisi ca publicación ni riree para ca joven.

¹⁵ Cadi jneza diʼ guiníʼ ique ca xpinni Cristu ni maʼ huaniisi cadi caquiiñecaʼ ni zeeda lu ca tema para ca joven. Pa guiníʼ íquecabe zacá, zusihuínnicabe rudxiibacabe laca laacabe. Cani huaniisi laaca ridxaagalucaʼ stale de ca guendanagana ni zeeda lu ca tema ca. Guiranu naquiiñeʼ gusiénenu cani runi crenu, gucueezanu ca cosa feu ni runi sentirnu, gucáʼnanu ca binni ni gucaa laanu gúninu xiixa ni cadi jneza, cadi guidxaaganu cani qué runi ni jneza ne caquiiñeʼ gánnanu ximodo gaca divertirnu. Ca tema ni gucuá para ca joven riʼ laaca biree cani lu Biblia. Nga runi, zanda gacané cani guiráʼ ca xpinni Cristu.

16. Ximódoruʼ racané ca publicación stinu ca joven.

¹⁶ Ca publicación ni riree para ca joven laaca racané cani laacabe para jma gaca  xhamígucabe Jiobá. Biblia na: «Yanna la? bietenalaʼdxiʼ de Dios ni nandxóʼ ni bizáʼ guiráʼ cosa laga nahuiiniluʼ, ante gueeda ca dxi nagana, o guedandá ca iza ra guiniʼluʼ: “Maʼ qué rusiecheʼ diʼ cani naa”. Despué de bieeteʼ guiráʼ ndiʼ, ni naquiiñeʼ guni binni nga: guidxibi Dios ni dxandíʼ ne guni guiráʼ ni na ca mandamientu stibe, purtiʼ laani nga ni jma naquiiñeʼ guni binni» (Eclesiastés 12:1, 13). Peru laaca zanda guʼyaʼ cani huaniisi ximodo zacané cani laacaʼ. Guidúʼyanu ti ejemplu. Lu revista ¡Despertad! de abril 2009 biree ti tema ni láʼ «¿Cómo disfrutar la lectura de la Biblia?». Lu tema riʼ zeeda caadxi conseju ne ti recuadru ni zanda uganu para guni estudiarnu. Ñee gucané ni ca hermanu ni maʼ huaniisi la? ¡Gucané ni pue! Ti gunaa ni maʼ bichaganáʼ ne napa xiiñiʼ guníʼ raca nagana para laa guʼndaʼ Biblia, ngue runi yenándabe ca conseju ni cudii tema que. Yanna jma maʼ riuuláʼdxibe gúʼndabe Biblia ne maʼ bidiibe cuenta de ti tema si nga caníʼ guiráʼ libru stiʼ Biblia. Ora gúnibe zacá racané ni laabe gudiibe cuenta nabé sicarú ni rusiidiʼ Biblia. Laabe guniʼbe: «Yanna huaxa jma riuuladxeʼ guundaʼ Biblia».

17, 18. Ximodo racané ca tema ni riree para ca binni ni cadi naca Testigu laanu. Bizeeteʼ ti ejemplu.

¹⁷ Publicación para ca binni ni cadi Testigu. Lu iza 2008 bizulú biree revista Torre stiʼ ni rapa ni chiguiuundaʼ para ca testigu stiʼ Jiobá. Peru laaca riree revista para ca binni ni cadi naca Testigu. Ximodo zanda gacané ni laanu yaʼ. Guidúʼyanu ti ejemplu. Guxuíʼlunu biʼniʼ invitarnu ti binni cheʼ ra Yoo stiʼ Reinu, ne guyebe. Ne guizáʼ cayéchenu bidúʼyanu laabe. Laga cucaʼdiáganu ni caníʼcabe lu discursu que caníʼ íquenu ximodo cayuni sentirbe ne ximodo zacané información que laabe guchaabe modo nabánibe. Guiráʼ nga zucaa laanu gudiʼnu xquíxepeʼ Jiobá pur ni cayeeteʼ lu discursu ni cucaadiáganu que.

¹⁸ Zacaca nga zándaca guizaacanu ora guidúʼndanu ca publicación ni riree para ca binni ni cadi naca Testigu. Guidúʼyanu ximodo zanda cueendunu ni galán lu revista Torre stiʼ ni rapa ne ca tema ni riree lu jw.org para ca binni ni cadi naca Testigu. Cadi nagana modo rusiene cani ni na Biblia ti ganda guiene binni ni cadi naca Testigu ni. Ora ridúʼndanu cani jma riene chaahuinu cani rusiidiʼ Biblia, ne nga rucaa laanu jma gusisácanu cani maca nánnanu. Laaca zazíʼdinu ximodo gusiene chaahuinu cani runi crenu ora maʼ zigucheechenu diidxaʼ. Zacaca nga racané revista ¡Despertad! laanu. Rudii ni laanu xcaadxi razón para guni crenu Dios bizáʼ guiráʼ ni nuu, ne laaca rusiidiʼ ni laanu ximodo gusiénenu cani runi crenu (biindaʼ 1 Pedro 3:15).

19. Ximodo zanda gusihuínninu rudiʼnu xquíxepeʼ Jiobá pur guiráʼ guendaró espiritual ni cudii laanu.

¹⁹ Guiráʼ ni bizéʼtenu ca rusihuinni cani stale guendaró espiritual nga cudii Jiobá para gacané laanu (Mateo 5:3). Nga runi, cadi gusaana de guidúʼndanu cani ne chinándanu guiráʼ ni cusiidiʼ cani laanu. Pa gúninu zacá, zacané cani laanu ne zusihuínninu rudiʼnu xquíxepeʼ Jiobá pur guiráʼ guendaró espiritual ni cudii laanu (Isaías 48:17).