1. Cik macalo mene ma gitye i Baibul, dok adwogi mabeco ango ma wanongo ka walubo?

JEHOVAH otiyo ki Baibul me miniwa cik ma kwako jami mapatpat. Me labolle, en ogengo tim kwele, woro cal jogi, kwalo kwo, ki dong mero. (1 Kor. 6:9, 10) Medo i kom meno, Wod pa Lubanga, Yecu Kricito, bene owaco ki lulub kore cik man ma pire tek-ki, ocikogi ni: “Wuciti wucilok jo me rok ducu gudok jo ma luba, kun wubatijagi i nying Won ki Wod ki cwiny maleng, wupwonygi me gwoko gin ducu ma dong atyeko cikowu kwede. Nen, atye kwedwu kare ducu, nio i agikki piny.” (Mat. 28:19, 20) Cik pa Lubanga pud dong gwoko kwowa ya! Lubo cik pa Lubanga weko wanongo woro ki bot jo mukene, wabedo ki yotkom, ki dok bene weko jo me ot gibedo ki yomcwiny. Ma dong pire tek loyo, wanongo cwak pa Jehovah kacel ki motte ka walubo cikke ma man bene kwako nywako i tic me tito kwena.

2, 3. (a) Pingo Baibul pe miniwa cik i kom jami mogo atir atir? (b) Lapeny ango ma wabinyamo i pwony man? (Nen cal ma tye i pot karatac 18.)

² Kadi bed kit meno, tye jami mogo ma Baibul pe miyo cik iye atir atir. Me labolle, Ginacoya pe tito kore ki kore kit bongo  ango me aruka ma opore pi Lukricitayo. Man nyuto ryeko pa Jehovah nining? Cital ki tekwaro tye mapatpat i wi lobo ducu dok bedo ka lokke kare ki kare. Ket kong ni ka onongo Baibul omiyo macalo cik kit bongo ma myero dano guruk kono onongo dong pe tiyo i kareni. Pi tyen lok meno, Lok pa Lubanga pe miyo cik mapol ma myero odor kwo pa Lakricitayo ma lubbe ki tic, kony me ot yat ki dong galowang. Pi meno, ngat acel acel ki dong luwi odi gitye agonya me moko tam i kom jami magi.

³ Man tika te lokke ni ka cik pa Jehovah pe loko i kom gin moni atir atir nongo en pe paro i kom gin ma wayero me timone ka watye ka moko tam ma pire tek ma twero gudo kwowa? Tika Wonwa me polo bicwako tam mo keken ma wamoko ka pe turo cikke ma tye i Baibul? Ka cik me Baibul pe loko i kom gin moni atir atir, watwero ngeyo gin me atima ma yomo cwiny Jehovah nining?

4, 5. Tam ma wamoko twero gudo wan kacel ki jo mukene nining?

⁴ Jo mogo giromo bedo ki tam ni meno gin ma wayero me atima pire pe tek. Wek wamok tam me ryeko ma yomo cwiny Jehovah, pire tek ni kong watam i kom cik me Baibul kacel ki cik ma igi lac ci walubgi. Me labolle, wek wanong cwak pa Lubanga, myero walub cikke madok i kom tic ki remo. (Acak. 9:4; Tic 15:28, 29) Lega bikonyowa me moko tam ma rwatte ki cik kacel ki cik ma igi lac ma tye i Ginacoya.

⁵ Tam madito ma wamoko twero gudo kwowa i yo me cwiny kacel ki jami mukene ma watimo. Kit tam mo keken ma wamoko twero gudo watwa ki Jehovah​—i yo maber nyo marac. Ka wamoko tam maber ci bijingo watwa ki Lubanga, ento ka watimo olung tukke ci bibalo watwa. Ki lok ada, tam maraco ma wamoko twero gudo jo mukene marac i yo me cwiny, nyo bene turo cwinygi, dok twero balo wa note ma tye i kacokke. Ngene kene ni, tam ma wamoko pire tek adada.​—Kwan Jo Roma 14:19; Jo Galatia 6:7.

6. Tam ma wamoko myero ocung i kom gin ango?

⁶ Gin ango ma myero watim ka odok i kom jami mogo ma cik me Baibul pe loko iye atir atir? Ma lube ki lok man, obedo ticwa me kwedo lok matut kun wamoko tam ma pe cobo mitiwa keken ento ma cung i kom jami ma Jehovah cwako kun bene goyo laane iye.​—Kwan Jabuli 37:5.

7. Ka Baibul pe oketo cik i kom gin moni, watwero ngeyo gin ma Jehovah mito ni watim nining?

⁷ Itwero bedo ki tam ni, ‘Atwero ngeyo gin ma Jehovah mito nining ka Lokke pe miniwa cik atir atir i kom gin moni? Jo Epeco 5:17 wacci: “Wutem niang gin ma Rwot [Jehovah] mito wuti.” Ka Baibul pe oketo cik i kom gin moni atir atir, watwero ngeyo gin ma Jehovah mito nining? Ka walego bote dok waye lubo tela pa Cwiny mere maleng.

8. Yecu onyuto nining ni eniang gin ma Jehovah mito ni etim? Mi lapor.

⁸ Tam i kom kit ma Yecu oniang kwede i kom gin ma Wonne mito ki bote. Tyen aryo kulu ma kiloko iye ni, Yecu kong olego ka lacen omiyo cam bot lwak  i yo me tango. (Mat. 14:17-20; 15:34-37) Ento, ma kec tye ka neke en okwero loko gweng wek odok kwon i kare ma Larac-ci obite i dye tim. (Kwan Matayo 4:2-4.) Pien en onongo niang tam pa Wonne, Yecu onongo ngeyo ni meno pe pore bote me loko gweng wek odok kwon. Ki lok ada, Yecu onongo ngeyo ni pe obedo miti pa Lubanga me tic ki tango pi cobo mitine kene. I kwero cobo miti pa Larac-ci, Yecu onyuto ni en ejenge i kom Jehovah pi tira kacel ki gwok.

9, 10. Gin ango ma bikonyowa me moko tam me ryeko? Tit kong.

⁹ Ka wamito moko tam me ryeko kit ma Yecu otimo kwede, myero wajenge i kom Jehovah pi tira. I gin mo keken ma watimo omyero walub lok me ryeko man ni: “Gen Rwot [Jehovah] ki cwinyi ducu, pe ibed ka jengnge i kom niang ma itye kwede. I kit kwoni ducu wii myero opo i kom Rwot, ci en bitiro yo ma iwoto iye bedo atir. Pe myero ibed ka tamo kekeni ni iryek; lwor Rwot, ci ilokke iwek timo gin marac.” (Car. 3:5-7) Watwero ngeyo tam pa Jehovah ki kwano Baibul piwa kekenwa dok man twero konyowa me niang gin ma Lubanga mito ni watim ma lube ki gin moni. Ka wangi ki timo jami ma lubbe ki tam pa Jehovah, ci wabiketo cwinywa i timo jami kun nongo walubo tirane.​—Ejek. 11:19.

¹⁰ Me lapore: Ket kong ni dako mo munyomme ocito ka wil. En oneno war mo maber ma opore pire, ento welle tek adada. Pi meno en openye kekene ni, ‘Cwara biwinyo nining ka awilo war ma welle tek kuman?’ Twero bedo ni en bene ngeyo lagamme, kadi bed ni cware peke kenyo. Pingo en ngeyo lagamme? Pien dong gurii kacel i ot, dok man oweko en dong ngeyo kit ma cware tamo kwede i kom pulangi me ot. Macalo adwogine, en oniang tam pa cware madok i kom wilo jami ma welgi tek. I yo acel-li, ka wamedde ki ngeyo tam pa Jehovah ki yone, ci wabinyebbe me niang kit ma Wonwa me polo mito ni watim kwede ki jami i yo mapatpat.

11. Lapeny ango ma watwero penye kwede ka watye ka kwano Baibul nyo kwan piwa kenwa? (Nen bokma wi lokke tye ni “  Ka Itye ka Kwano Lok pa Lubanga, Penye Kekeni Ni.”)

¹¹ Wek wange kit ma Jehovah tamo kwede, myero water yub me kwan piwa kenwa calo gin ma pire tek. Ka watye ka kwano nyo kwedo Lok pa Lubanga, watwero penye kekenwa ni, ‘Pwony ango ma atwero nongo madok i kom Jehovah, yone matir, ki dok kit ma en tamo kwede?’ Myero wabed ki kodi cwiny calo pa Daudi ma owaco ni: “Pwonya wek ange yoni ducu, ai Rwot; mi angegi maber. Tela i ada meri, dok ipwonya, pien in Lubanga Lalarra. Abedo ka kuri dyeceng jwi.” (Jab. 25:4, 5) Ka itye ka lwodo lok i kom Ginacoya moni, itwero bene tic ki lapeny macalo magi: ‘Atwero tic ki ngec man nining bot jo me oda? Ka kwene ma atwero tic ki tira man iye? I paco? I dog tic? I cukul? I ticwa me pwony?’ Ka dong iniang ka kwene ma itwero keto iye pwony man i tic, ci dong twero bedo yot me niang kit me timone.

12. Bukkewa ma jenge i kom Baibul ki cokkewa twero konyowa me ngeyo kit ma Jehovah tamo kwede i kom jami mapol nining?

¹² Yo mukene ma watwero ngeyo kwede ki tam pa Jehovah aye me keto tamwa i kom bukke ma dul pa Jehovah  goyo ma jenge i kom Baibul. Me labolle, Watch Tower Publications Index ki Buk ma Konyo me Kwedo Lok pa Lucaden pa Jehovah kigoyogi me konyowa me niang tam pa Jehovah i kom jami mapol ma myero wamok iye tam piwa kenwa. Wanongo bene adwogi maber ki i bedo tye ki dok nywako i cokke kare ki kare. Lwodo lok i kom jami ma kitye ka pwonyone bikonyowa me niang tam pa Jehovah kun waloko tamwa ma rwatte ki mege. Ka waketo tek me kwano ki dok niang cam me cwiny ma Jehovah miniwa, ci motmot tamwa birwatte ki tamme. Macalo adwogine, wabibedo atera me moko tamwa i yo ma Lubangawa ma lamar-ri cwako.

13. Mi labol ma nyuto kit ma watwero moko kwede ki tam me ryeko ka watamo i kom kit ma Jehovah tamo kwede.

¹³ Nen kong labol man ma nyuto kit ma bedo ki ngec i kom tam pa Jehovah twero konyowa me moko tam me ryeko. Macalo lutit kwena me Ker-ri, twero bedo ni watye ki miti me donyo i tic pi kare malac calo painia marii. Wek wabed ki kare me timo meno, myero kong wacak ki dwoko rwom me kwowa lapiny. Kitungcel bene, twero bedo ni watye ki par kace wabibedo ki yomcwiny ka watye ki jami me kom manok. Ki lok ada, pe tye cik mo me Baibul ma waco ni myero wabed painia; pud watwero medde ki tic pi Jehovah calo latit kwena ma lugen kadi bed ni wape painia. Ento kadi bed kit meno, Yecu owacci jo ma gujalle pi Ker-ri gibinongo mot mapol. (Kwan Luka 18:29, 30.) Ki lok ada, Ginacoya waco ni Jehovah cwinye bedo yom i kom ‘pwocwa me pak ma watero bote’ kun bene watimo jami ducu ma watwero ki yomcwiny me teno kor yub me woro me ada. (Jab. 119:108; 2 Kor. 9:7) Ma lubbe ki Ginacoya magi kacel ki lega pi telane, watwero niang tam pa Jehovah. Pe kumeno? Lwodo lok i kom tam magi twero konyowa me moko tam me ryeko i kom gin ma myero watim dok bene ma Wonwa me polo twero goyo laane iye.

14. Itwero ngeyo kit bongo me aruka ma yomo cwiny Jehovah nining?

¹⁴ Nen kong dok labol mukene: Ket kong ni imaro kit cital me bongo moni ento kodi cital meno twero balo cwiny jo mukene i kacokke. Twero bedo ni pe ingeyo wang Baibul mo keken ma gengi ruko bongo meno. Jehovah mono tamo iye ningo? Lakwena Paulo omiyo  tira man ni: “Mon bene myero gurukke maber ki mwolo, kun gigwokke, pe i yer wic ma gikedo, nyo jabu, nyo tiko ngut, nyo ruk mogo me wel ma malo; ento bergi myero onen i tic maber ma gitiyo, meno en gin ma mitte bot mon ma gilwonnge kengi ni gin jo ma woro Lubanga.” (1 Tem. 2:9, 10) Ki lok ada, tira man bene tiyo bot omege. Macalo lutic pa Jehovah, pe waketo cwinywa i kom cobo mitiwa keken ento bene watamo i kom adwogi ma rukwa twero kelo i kom jo mukene. Mwolo kacel ki mar pi luye luwotwa biweko watamo pi kit ma giwinyo kwede wek pe wacwer cwinygi. (1 Kor. 10:23, 24; Pil. 3:17) Ka waketo tamwa i kom gin ma Ginacoya waco ci twero konyowa me ngeyo tam pa Jehovah i lok meno dok bene twero tirowa me moko tam ma yomo cwiny Jehovah.

15, 16. (a) Jehovah winyo nining ka wamedde ki tam i kom jami mogo maraco ma gitugo miti me buto? (b) Ka watye ka yero galowang, watwero ngeyo mene ma yomo cwiny Jehovah nining? (c) Watwero ngeyo ka tam moni ber nyo rac nining?

¹⁵ Baibul waco ni Jehovah cwinye cwer ka dano gitimo jami maraco ki dok ka “tam ducu ma cwinygi lwodo kare ducu kemo bal keken.” (Kwan Acakki 6:5, 6.) Ki i lok man watwero niang ni bedo ki tam marac i kom tim me buto twero terowa i timo bal dok man pe rwatte ki tam pa Jehovah. Lapwonnye Yakobo ocoyo ni: “Ryeko ma oa ki malo, mukwongo bedo leng, dok bedo me kuc, me mwolo, gamo tam ducu mabeco, opong ki kica, ki nyako nyig maber, ngat ma tye kwede pe poko kin dano, bedo ma cwinye atir.” (Yak. 3:17) Ngeyo jami magi myero ocuk cwinywa me kwero galowang mogo ma tugo tam kacel ki miti maraco. Lakricitayo ma niang pe myero openye ka ce opore me galowange ki kwano buk, vidio, nyo tuku moni ma nyuto jami ma Jehovah dag. Jehovah dong omiyo tamme ongene ka maleng i kom jami magi i Lokke.

¹⁶ Kitwero moko tam mogo i yo mapat pat ento Jehovah pud twero bedo ki yomcwiny iye. Ka watye ka moko tam ma pire tek, omyero wapeny pi tam ki bot luelda nyo Lukricitayo ma guteggi. (Tito 2:3-5; Yak. 5:13-15) Ki lok ada, pe pore me weko ni jo mukene aye gumok tam piwa. Lukricitayo myero gupwonye me niang ki dok me moko tam pigi kengi. (Ibru 5:14) Dano ducu myero gulub tira ma Paulo ocoyo ni: “Dano acel acel tye ki yecce ma myero oting.”​—Gal. 6:5.

17. Adwogi maber ango ma wanongo ka wamoko tam ma yomo cwiny Jehovah?

¹⁷ Ka wamoko tam ma jenge i kom tam pa Jehovah, wabinyikke cok bote. (Yak. 4:8) Wabinongo cwakke dok en bigoyo laane i komwa. Man bijingo niyewa i kom Wonwa me polo. Pi meno, wawek cik me Baibul kacel ki cik ma igi lac aye odor tamwa, pien giweko waniang tam pa Lubanga. Ki lok ada, kare ki kare pud wabimedde ki pwonyo jami mapol manyen madok i kom Jehovah. (Yubu 26:14) Ka watute matek, wabinongo ryeko kacel ki ngec ma twero konyowa me moko tam matir. (Car. 2:1-5) Tam kacel ki yub pa dano ma gitye ki roc pol kare bedo ka lokke aloka, ento laco Jabuli opoyo wiwa ni: “Yub pa Rwot [Jehovah] bedo matwal; yub ducu ma en tamo ki i cwinye bedo matwal i kare pa yalwak ducu.” (Jab. 33:11) Ki lok ada, watwero moko tam matir piwa kenwa kace tamwa ki ticwa rwatte ki tam pa Jehovah Lubangawa ma ryek tutwal-li.