1. Ikkefa ekkewe ekkóch allúk lón Paipel, me ifa usun ach álleasochisiir a échitikich?

 LÓN ewe Paipel, Jiowa a fen awora ngenikich ekkewe allúk mi affata met a mochen ach sipwe féri. Áwewe chék, a allúk ngenikich ach sisap fel ngeni ululun, solá, únnúpuch, are féri féfférún lisowumwáál. (1 Kor. 6:9, 10) Jesus, néún Jiowa a awora ei allúk mi tichik ngeni néún kewe chón káé: “Oupwe feila o asoulängala chon ekewe mwü meinisin, oupwe papataisiir ngeni iten ewe Sam, ewe Nau me ewe Ngünmifel. Oupwe afalafaleer pwe repwe aleasochisi meinisin mine üa allük ngenikemi. Nge ngang üpwe etikemi fansoun meinisin tori lesopolan fanüfan.” (Mat. 28:19, 20) Mettóch meinisin Jiowa me Jesus ra erenikich ach sipwe féri repwe pwisin échitikich. Án Jiowa kewe allúk a áiti ngenikich ifa usun sipwe túmúnú pwisin kich me ach famili, me álisikich ach sipwe eáni eú manaw mi péchékkúl me pwapwa. Lap seni ena, lupwen sia álleasochisi án Jiowa kewe allúk, kapachelong ewe allúk ach sipwe afalafal, I a pwapwa rech me a efeiéchúkich.

2, 3. (a) Pwata ewe Paipel ese tichikin allúkú met itá sipwe féri lón eú me eú kinikin lón manawach? (b) Ikkefa ekkóch kapas eis sipwe pwóróus wóón lón ei lesen? (Ppii ewe sasing lepoputáán ei lesen.)

 ² Nge ewe Paipel ese awora allúk mi weneiti eú me eú kinikinin manawach. Áwewe chék, ewe Paipel ese tichikin allúkú ngenikich ekkewe sókkun fout sipwe fouteni. Ei mettóch a pwáraatá án Jiowa tipachem. Inaamwo ika napanapen fouten aramas mi sissiwil lón eú me eú fansoun me mi sókkopat stylin úfen aramas lón en me fénúan, nge ewe Paipel ese tongeni siwil, mi chék pwúng fansoun meinisin. Pwal och, ewe Paipel ese masou ren chómmóng allúk ren ifa usun sipwe túmúnú péchékkúlen inisich, met sókkun angang are minen apwapwa mi lamot sipwe filatá. Jiowa a mut ngeni emén me emén, me ekkewe mékúren famili ar repwe pwisin féri ekkewe kefil wóón ekkeei mettóch.

³ Ina minne, ika sipwe féri eú kefil mi lamot epwe kkúú manawach, nge ese wor och allúk lón Paipel usun, iwe neman sipwe ekieki: ‘Jiowa a chúen áfánni met upwe filatá? Jiowa epwe pwapwa ren ese lifilifil met uwa filatá me lúkún chék ika ua atai eú allúk lón Paipel? Ifa usun upwe silei pwe epwe pwapwa ren ekkewe kefil ua féri?’

4, 5. Ifa usun ach kewe kefil ra tongeni kkúúkich me ekkewe ekkóch?

⁴ Ekkóch aramas ra meefi pwe ra tongeni féri met chék ra mochen. Nge sia mochen féri met epwe apwapwaai Jiowa. Ina minne, me mwen ach sipwe féri eú kefil, mi lamot sipwe ekieki usun met ewe Paipel a apasa, mwirin sipwe álleasochisi. Áwewe chék, ewe Paipel a áiti ngenikich meefien Kot usun áeáán chcha, iwe sipwe fiti met a apasa. (Ken. 9:4; Föf. 15:28, 29) Sia tongeni iótek ngeni Jiowa an epwe álisikich le féri ekkewe kefil epwe apwapwaai i.

⁵ Ach kewe kefil ra kkúúkich. Eú kefil mi múrinné a tongeni álisikich ach sipwe ririéch ngeni Jiowa. Nge eú kefil mi ngaw a tongeni atai ach ririéch ngeni. Ach kewe kefil ra pwal tongeni kkúú ekkóch aramas. Sise mochen féri och mettóch epwe tongeni eletipengawa pwiich kewe are apwangapwangaaló ar lúkú. Sise pwal mochen efisi osukosuk lefilen pwiich kewe lón ewe mwichefel. Ina popun, a lamot sipwe féri ekkewe kefil mi múrinné.​—Álleani Rom 14:19; Kalatia 6:7.

6. Itá met epwe emmwenikich lupwen sipwe féri kefil?

⁶ Ifa usun sipwe féri ekkewe kefil mi múrinné lupwen ewe Paipel ese tichikin affata ngenikich met mi lamot sipwe féri? Sise mochen féri met chék sia mochen, nge mi lamot sipwe ekiekiéchú nónnómuch, me féri eú kefil epwe apwapwaai Jiowa. Iwe sia tongeni lúkúlúk pwe I epwe álisikich an epwe sópwéch minne sia filatá.​—Álleani Kölfel 37:5.

7. Ika ese wor allúk lón Paipel ren met itá sipwe féri, ifa usun sipwe silei met Jiowa a mochen ach sipwe féri atun a fis och mettóch lón manawach?

⁷ Ifa usun sipwe tongeni silei pwe sipwe apwapwaai Jiowa? Iei met Efisos 5:17 a apasa: “Oupwe achocho le kütta met letipen ach Samol fän itemi.” Ika ese wor eú allúk mi tichik lón Paipel mi tongeni affata met itá sipwe féri, iwe mi lamot sipwe mirititi, are weweiti met Jiowa a mochen ach sipwe féri atun a fis och  mettóch lón manawach. Ifa usun sipwe féri ena? Mi lamot sipwe iótek ngeni me mut ngeni an we manaman mi fel an epwe emmwenikich.

8. Ifa usun Jesus a mirititi met Jiowa a mochen i epwe féri? Áweweei.

⁸ Iteiten fansoun meinisin, Jesus a silei met Jiowa a mochen i epwe féri. Áwewe chék, a wor ekkewe ruu atun eú pwiin aramas ra echik, iwe Jesus a iótek, mwirin a féri eú manaman me amwéngééniir. (Mat. 14:17-20; 15:34-37) Nge lupwen Jesus pwisin a echik me lón ewe fénúpéén, Jesus ese mochen féri met ewe Tefil a mochen i epwe féri, án epwe siwili ekkewe faú ngeni pilawa. (Álleani Mateus 4:2-4.) A fókkun silei Seman we, ina popun a silei pwe Jiowa ese mochen epwe áeá ewe manaman mi fel fán iten pwisin osupwangan. A lúkúlúk wóón án Seman we epwe emmweni me awora anan mwéngé.

9, 10. Met epwe álisikich le féri ekkewe kefil mi pwáraatá mirit? Áweweei.

⁹ Sia tongeni féri ekkewe kefil mi múrinné usun chék Jesus ika sipwe lúkúlúk wóón Jiowa an epwe emmwenikich. Ewe Paipel a apasa: “Kopwe lükü ewe Samol mi Lapalap ren unusen lelukom, nge kosap lükülükü püsin om sile. Kopwe chechemeni i won meinisin mine ka föri, nge i epwe aiti ngonuk ewe al mi pwüng. Kosap püsin ekieki pwe ka tipachem. Kopwe niuokusiti ewe Samol mi Lapalap o kul seni mine a ngau.” (SalF. 3:5-7) Lupwen sia káé Paipel me silei án Jiowa ekiek, sipwe weweiti met Jiowa a mochen kich sipwe féri lón manawach atun a ppiitá och mettóch. Lapólóón ach silei án Jiowa ekiek, pwal ina mecheresilóón ach sipwe féri ekkewe sókkun kefil epwe apwapwaai i. Iwe, ekis me ekis sipwe eáni “ew netip mi anneasosich.”​—Is. 11:19, Kapasen God.

¹⁰ Áwewe chék, emén fin pwúpwúlú a ló lón sitowa me a kúna eú pean suus mi éch nge a fókkun mémmong. Inaamwo ika pwúlúwan we ese nóm ren, nge a silei met pwúlúwan we epwe ekieki ika a néúnaaló ena úkúkún moni. Pwata a silei? Pún a fen ttam ar nónnómfengen me a silei ekiekin pwúlúwan we ren ifa usun repwe néúnéú néúr moni. Pwal ina chék usun, lupwen sia silei án Jiowa ekiek me an kewe féffér lón fansoun lóóm, iwe sipwe silei met a mochen sipwe féri lón eú me eú atun a fis lón manawach ach sipwe féri kefil.

11. Menni kapas eis sia tongeni pwisin eisinikich atun ach álleani are káé ewe Paipel? (Ppii ewe pwóór “ Atun Óm Káé án Kot we Kapas, Pwisin Eisinuk.”)

¹¹ Ifa usun sipwe silei án Jiowa ekiek? Mi fókkun lamot ach sipwe álleani me káé ewe Paipel iteitan. Atun sia féri ei, sia tongeni pwisin eisinikich: ‘Met ei pwóróus a áiti ngeniei usun Jiowa? Pwata a ina usun féfférún?’ Mi pwal lamot sipwe tingorei Jiowa an epwe álisikich le silefichi i, usun chék Tafit a pwal tingor. Tafit a makkeei: “Ai Samol mi Lapalap, kopwe aiti ngeniei om kewe al o aitöchüür ngeniei. Kopwe emweniei lon om let o aiöüei, pun en ewe Kot mi amanauaei, üa apilükülükuk fansoun meinisin.” (Kölf. 25:4, 5) Lupwen sia káé och mettóch usun Jiowa, sia tongeni ekieki ika ineet atun sipwe tongeni apwénúetá minne sia káé. Kich mi tongeni apwénúetá lón ach famili, lón sukul, are lón ach angangen afalafal? Iwe, lupwen sia ekieki ekkena atun mi fich, iwe epwe mecheres ngenikich ach sipwe silei letipen Jiowa ren ifa usun sipwe apwénúetá minne sia káé.

12. Ifa usun néúch kewe puk me ach kewe mwich epwe álisikich le silefichi án Jiowa ekiek wóón sókkopaten mettóch?

 ¹² Pwal eú alen ach sipwe silei án Jiowa ekiek, ina ach sipwe ekiekifichi met an we mwicheich a áiti ngenikich seni Paipel. Áwewe chék, ika a nóm rech eú kefil, ewe Research Guide for Jehovah’s Witnesses me ewe kúkkún puk Itelap lón Paipel fán Iten Pwóróusfengen ra tongeni álisikich le silei ekiekin Jiowa. Sia pwal tongeni kúna feiéch seni ach kewe mwich lupwen sia aúselingéch, uwawu meefiach me pwal lupwen sia ekilonei met sia fen káé. Ena mettóch epwe álisikich le silei án Jiowa ekiek. Iwe mwirilóón, sipwe tongeni féri ekkewe sókkun kefil epwe apwapwaai me i epwe efeiéchú.

13. Eáni eú kapas áwewe ren ifa usun sia tongeni féri kefil mi pwáraatá mirit lupwen sia mwo ekieki meefien Jiowa usun.

¹³ Ekieki mwo ei kapas áwewe ren ifa usun sipwe tongeni féri eú kefil mi múrinné lupwen sia mwo ekilonei án Jiowa ekiek. Neman ka mochen kopwe pioneer. Ka fen féri ekkóch siwil lón manawom pwe ka tongeni alapaaló óm angangen afalafal. Nge kesaamwo kon lien silei ika kopwe wesewesen pwapwa ren an epwe chék ekis noum moni me pisekum. Pwúngún pwe ewe Paipel ese allúk ngenikich ach sipwe pioneer ren ach sipwe angang ngeni Jiowa. Sia tongeni sópweló le angang ngeni fán tuppwél usun emén chón afalafal. Nge, Jesus a erá pwe Jiowa a pwapwaiti chókkewe ra pennúkúóló pwisin mocheniir fán iten án Kot we Mwú. (Álleani Lukas 18:29, 30.) Ewe Paipel a pwal apasa pwe Jiowa a pwapwa lupwen sia féri úkúkún ach tufich le mwareiti i, me a mochen ach sipwe pwapwa lón ach angang ngeni. (Kölf. 119:108, Testament Mi Fö; 2 Kor. 9:7) Ren ach ikkiótek usun ekkeei mettóch me ekiloner, sia tongeni féri eú kefil epwe échitikich me Jiowa epwe efeiéchú.

14. Ifa usun kopwe silei ika eú sókkun stylin úf epwe apwapwaai Jiowa?

¹⁴ Iei pwal eú kapas áwewe: Ka fókkun sani eú stylin úf, nge ka silei pwe ekkóch lón mwichefel repwe osukosuk ika ka úfeni ena sókkun úf. Ese wor allúk lón Paipel ika met sókkun stylin úf sipwe úfeni. Iwe, ifa usun kopwe silei án Jiowa ekiek usun? Iei alon Paipel ngenikich: “Ekewe fefin repwe üföüföch, repwe öüköchü üfer o üföüf sokun üf mi fich ngeni souläng. Resap firesi mökürer ren sokopaten fifires, ika mwärämwär kolt ika fau aüchea ika  üföüf üf mi mömong, nge repwe foute ngeniir föför mürina usun a fich ngeni fefin kana mi souläng.” (1 Tim. 2:9, 10) Pwúngún pwe meinisin néún Jiowa kewe chón angang kapachelong ekkewe mwán ra tongeni káé seni ekkena kapas. Lupwen sia tipetekison, sipwe ekieki ika epwe met meefien ekkóch ren ekkewe sókkun stylin úf sia filatá le úfeni. Pwal och, pokiten sia tongei pwiich kewe, sise mochen sipwe aosukosuker are eletipengawer. (1 Kor. 10:23, 24; Fil. 3:17) Ika sia ekieki met ewe Paipel a apasa me án Jiowa ekiek, sia tongeni féri ekkewe kefil epwe apwapwaai.

15, 16. (a) Met meefien Jiowa ika sia akkanchangei mettóch mi limengaw? (b) Lupwen sipwe filatá ach kewe minen apwapwa, ifa usun sipwe silei met sókkun minen apwapwa Jiowa epwe pwapwa ren? (c) Ifa usun sipwe féri ekkewe kefil mi fókkun lamot?

¹⁵ Sia káé seni Paipel pwe Jiowa a fókkun letipengaw lupwen aramas ra féfféringaw me ra ekieki mettóch mi ngaw. (Álleani Keneses 6:5, 6.) A ffat pwe Jiowa ese mochen ach sipwe anchangei mettóch mi limengaw. Ach ekkekieki usun ekkena mettóch epwe tongeni emmwenikich le apwénúetá mettóch mi ngaw sia anchangei. Nge Jiowa a mochen ach sipwe ekieki mettóch mi limeliméch me múrinné. Ewe chón káé James a makkeei pwe án Jiowa tipachem “a fokun limelimöch, a pwal akinamwe, tipepwetete me kirikiröch, a uren tong o awora chomong föför mi mürina, esap lifilifil aramas, esap pwal atuputup.” (Jas. 3:17) Iwe, ewe Paipel a áiti ngenikich pwe mi lamot sipwe túmúnú seni ekkewe minen apwapwa mi tongeni efisi ach sipwe anchangei are mocheniaiti mettóch mi limengaw. Ika sia wewefichiti met Jiowa a tongei me met a oput, epwe mecheres ngenikich ach sipwe silei met sókkun puk, kachito, are minen game sipwe filatá. Iwe, ese pwal lamot ach eisini ekkewe ekkóch ren met itá sipwe féri.

¹⁶ Lupwen a nóm rech eú kefil, fán chómmóng mi wor chómmóng mettóch sia tongeni filatá le féri nge meinisin iir repwe apwapwaai Jiowa. Nge lupwen sipwe féri eú kefil mi fókkun lamot, epwe múrinné ika sipwe tingorei emén chónemmwen lón mwichefel are emén pwiich mwán are fefin mi ásimaw ar repwe awora ngenikich emmwen. (Tit. 2:3-5; Jas. 5:13-15) Pwúngún pwe mi lamot sisap tingorei emén an epwe féri ewe kefil fán itach. Nge mi lamot sipwe ekiekifichi met sia silei lón Paipel, mwirin sipwe pwisin féri ach kefil. (Ipru 5:14) Aposel Paulus a erá: “Pun eman me eman epwe püsin mwärei wosan wosochou.”​—Kal. 6:5.

17. Ifa usun sipwe kúna feiéch lupwen sia féri ekkewe kefil mi apwapwaai Jiowa?

¹⁷ Lupwen sia féri kefil mi apwapwaai Jiowa, sia arap ngeni me onómukich fán an chen. (Jas. 4:8) Iwe, ach lúkú Jiowa a péchékkúleló. Ina minne, sipwe ekilonei met sia álleani lón Paipel pwe sipwe tongeni weweiti án Jiowa ekiek. Pwúngún pwe epwe chék wokkor mineféén mettóch sipwe káé usun Jiowa. (Hiop 26:14) Nge ika sipwe akkachocho le silei usun i iei, sipwe tipachemeló me sipwe tongeni féri ekkewe kefil mi múrinné. (SalF. 2:1-5) Án aramas ekiek me minne ra akkóta ra kan siwil, nge Jiowa esap tongeni siwil. Ewe soumakken kélfel a erá: “Nge än ewe Samol mi Lapalap akot a nonom tori feilfeilachök, ekiekin lelukan a nonom seni eu täppin aramas tori eu täppin.” (Kölf. 33:11) A ffat pwe sia tongeni féri ewe kefil mi múrinné seni meinisin lupwen sia káé ifa usun sipwe eáni án Jiowa ekiek me féri met epwe apwapwaai i.