1. Kua ta algun ehèmpel di lei bíbliko, i ki benefisio nos ta saka ora nos obedesé nan?

YEHOVA a duna nos un kantidat di lei spesífiko mediante su Palabra. Por ehèmpel, e ta prohibí inmoralidat seksual, idolatria, hòrtamentu i buracheria. (1 Kor. 6:9, 10) Ademas, su Yu, Hesukristu, a duna su siguidónan e siguiente tarea enorme pero a la bes emoshonante: “Bai, i hasi hende di tur nashon mi disipel, i batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso. I wak!, mi ta ku boso tur e dianan, te na konklushon di e era akí.” (Mat. 28:19, 20) E lei- i mandamentunan divino ta un berdadero protekshon pa nos. Ora nos obedesé nan, nos ta haña mas rèspèt propio, nos lo tin mihó salú i nos famia lo ta mas felis. Mas importante ainda, ora nos kumpli lealmente ku Yehova su mandamentunan, inkluso e mandamentu di partisipá den e trabou di prediká, nos ta haña su aprobashon i bendishon.

2, 3. (a) Dikon Beibel no ta duna nos regla pa kada situashon den bida? (b) Ki preguntanan nos lo konsiderá den e artíkulo akí? (Wak e promé plachi.)

² Pero tin hopi situashon kaminda Beibel no ta duna un lei spesífiko. Por ehèmpel, e Skritura no ta kontené regla detayá tokante ki sorto di paña ta apropiá pa kristian bisti. Kon esaki ta reflehá e sabiduria di Yehova? Estilo di bisti i otro  kustumber ta varia di un pais pa otro i ta kambia ku tempu. Si Beibel lo a duna un lista di ki forma di bisti i manera di areglá nos mes ta apropiá, aworakí lo el a bai for di moda. Pa e mesun motibu ei e Palabra inspirá di Dios no ta duna hopi regla tokante ki trabou, kuido di salú i entretenimentu un kristian mester skohe. Kada persona i kabes di famia ta liber pa tuma nan desishonnan tokante e asuntunan ei.

³ Pues, ora nos tin ku tuma un desishon importante ku lo tin efekto riba nos bida i no tin un lei tokante dje den Beibel, kisas nos ta puntra nos mes: ‘Ta importá Yehova ki desishon mi ta tuma?’ Nos Tata selestial ta aprobá kualke desishon ku nos tuma basta e no ta bai kontra un lei den Beibel? Ora no tin un lei spesífiko, kon nos por sa ki desishon lo agradá Yehova?

4, 5. Ki efekto nos desishonnan por tin tantu riba nos mes komo otro hende?

⁴ Algun hende ta haña ku no ta importá kiko nos ta disidí di hasi. Pero pa nos por tuma desishon sabí ku ta agradá Yehova, nos mester analisá e lei- i prinsipionan ku tin den su Palabra i kumpli ku nan. Por ehèmpel, pa haña aprobashon di Dios, nos mester obedesé su lei tokante sanger. (Gén. 9:4; Echo. 15:28, 29) Orashon por yuda nos tuma desishon ku ta di akuerdo ku lei- i prinsipionan di e Skritura.

⁵ Desishonnan personal importante por tin gran influensia riba nos bienestar spiritual. Kada desishon ku nos tuma lo por tin su efekto riba nos relashon ku Yehova; sea bon òf malu. Un desishon sabí lo fortalesé nos relashon ku Dios; ma di otro banda, un mal desishon por ta dañino pa nos relashon kuné. Mas ainda, un mal desishon por pone spiritualidat di otro ruman na peliger. Kon asina? E por molestiá nan konsenshi, òf asta pone nan trompeká i kibra e union di e kongregashon. Pues, ta importá ki desishon nos ta tuma.—Lesa Romanonan 14:19; Galationan 6:7.

6. Kiko mester yuda nos tuma desishon?

⁶ Kiko nos mester hasi ora no tin un lei spesífiko den Beibel? Den tal kaso, ta nos mes tin e responsabilidat pa analisá e detayenan i tuma un desishon ku Yehova lo aprobá i bendishoná, en bes di djis hasi loke nos ta pensa ta mihó.—Lesa Salmo 37:5. *

7. Ora no tin un lei spesífiko den Beibel, kon nos por haña sa kiko Yehova ke pa nos hasi den un sierto situashon?

⁷ Kisas bo ta puntra bo mes: ‘Kon mi por sa kiko Yehova ta aprobá si su Palabra no ta duna un lei spesífiko?’ Efesionan 5:17 ta bisa: “Sigui komprondé kiko ta e boluntat di Yehova.” Ora no tin un lei spesífiko, kon nos por komprondé kiko ta e boluntat di Dios? Esei ta ora nos hasi orashon i aseptá su guia mediante spiritu santu.

8. Kon Hesus a komprondé kiko Yehova tabata ke p’e hasi? Duna un ehèmpel.

⁸ Tuma nota kon Hesus a komprondé kiko su Tata tabata ke p’e hasi. Beibel ta papia di dos okashon kaminda Hesus a hasi orashon promé ku el a hasi un milager i duna un multitut di hende kuminda. (Mat. 14:17-20; 15:34-37) Sinembargo, ora Hesus tabatin hamber, el a nenga  di pone piedra bira pan na momento ku Satanas a purba di hink’é den tentashon den desierto. (Lesa Mateo 4:2-4.) Hesus tabata sa kon su Tata ta pensa, i p’esei e tabata konsiente ku e no mester a pone piedra bira pan. Sí, Hesus a komprondé ku no tabata Dios su boluntat pa e usa e poder ei pa su propio benefisio. Ora el a nenga di hasi esei, el a mustra ku e tabata dependé riba Yehova pa su guia i sosten.

9, 10. Kiko lo yuda nos tuma bon desishon? Ilustrá esaki.

⁹ Pa nos por tuma bon desishon manera Hesus, nos tin ku dependé riba e guia di Yehova. Nos mester biba na armonia ku e palabranan sabí akí: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan. No sea sabí den bo mes bista; teme SEÑOR, i apartá bo mes for di maldat.” (Pro. 3:5-7) Un estudio di Beibel por yuda nos siña konosé Yehova su pensamentunan i komprondé kiko lo e ke pa nos hasi den sierto situashon. Mas nos siña konosé Yehova su pensamentunan, mas inkliná nos kurason lo ta pa sigui su guia.—Sal. 119:11, 12.

¹⁰ Pa ilustrá: Imaginá ku un señora kasá ta bai kumpra kos. E ta mira un par di sapatu ku e tin gana di kumpra, pero nan ta masha karu. E ta puntra su mes: ‘Kon mi kasá lo sintié si mi gasta tantu sèn asina?’ Kasi sigur e sa kaba kiko su kasá ta pensa, maske e no ta huntu kuné na e momento ei. Kon e por sa? Pasobra atraves di tempu, el a siña konosé su kasá, i e sa kon su kasá ke pa nan usa nan plaka debí ku nan no tin hopi moda. Komo resultado, e sa kiko su kasá lo pensa si e gasta nan plaka na e manera ei. Di mes manera, segun ku nos ta sigui konosé Yehova su pensamentu- i kamindanan, nos ta komprondé mihó kiko nos Tata selestial lo ke pa nos hasi den diferente sirkunstansia.

11. Kiko nos por puntra nos mes ora nos ta lesa òf studia Beibel? (Wak e kuadro “ Ora Bo Ta Studia e Palabra di Dios, Puntra Bo Mes.”)

¹¹ Pa nos sigui siña konosé e pensamentunan di Yehova, nos mester hasi estudio personal un prioridat. Ora nos ta lesa òf studia e Palabra di Dios, nos por puntra nos mes: ‘Kiko e informashon akí ta siña mi di Yehova, su kamindanan hustu i su pensamentunan?’ Nos mester tin e mesun aktitut ku e salmista David, kende a kanta: “Hasi mi konosé bo kamindanan, o SEÑOR; siña mi bo bereanan. Guia mi den bo bèrdat i siña mi, pasobra ta abo ta e Dios di mi salbashon; riba bo mi ta spera henter dia.” (Sal. 25:4, 5) Segun ku bo ta meditá riba un pasashi di Beibel, puntra bo mes: ‘Kon mi por pone e informashon akí na práktika den mi famia? Unda mi por aplik’é? Kisas na kas, na trabou, na skol òf den sirbishi?’ Unabes nos sa unda nos por apliká e informashon akí, lo ta mas fásil pa komprondé kon nos por aplik’é.

12. Kon nos publikashon- i reunionnan por yuda nos sa kiko Yehova ta pensa tokante diferente asuntu?

¹² Un otro manera pa nos konosé Yehova su pensamentunan mihó ta ora nos ta presta bon atenshon na e guia basá riba Beibel ku su organisashon ta proveé. Por ehèmpel, ora nos tin ku tuma un desishon, e Índise di Publikashon  Watch Tower i Guia pa Buska Informashon den Publikashonnan di Testigunan di Yehova ta yuda nos komprondé kon Yehova ta pensa tokante vários situashon. Ademas, nos ta benefisiá masha hopi ora nos ta presta bon atenshon na reunion i ta partisipá den nan. Ora nos meditá riba loke nos ta siña, nos lo por komprondé Yehova su pensamentunan mas mihó i siña pensa manera é ta pensa. Ora nos hasi bon uso di e provishonnan spiritual di Yehova, pokopoko pero sigur nos lo konosé su kamindanan mihó. Ku ki resultado? Nos lo por tuma bon desishon ku nos Dios amoroso lo bendishoná.

13. Duna un ehèmpel ku ta mustra kon nos por tuma desishon sabí ora nos komprondé kon Yehova ta pensa.

¹³ Nos por tuma desishon sabí ora nos ta komprondé kon Yehova ta pensa. Por ehèmpel, komo publikadó di e Reino, kisas nos ta deseá di traha pionero regular. Pa nos por logra esei, nos ta kuminsá na simplifiká nos bida. Na mes momento, kisas nos ta preokupá si nos lo ta berdaderamente felis ku ménos den sentido material. Di mes, Beibel no ta bisa ku nos tin ku traha pionero pa sirbi Yehova. Nos por sigui sirbié fielmente komo publikadó, maske nos no bira pionero. Sinembargo, Hesus a sigurá nos ku esnan ku hasi sakrifisio pa e Reino lo haña bendishon na abundansia. (Lesa Lukas 18:29, 30.) Ademas, e Skritura ta mustra ku Yehova ta keda kontentu ora nos ta hasi “ofrendanan boluntario” di alabansa na dje i yen di entusiasmo ta hasi tur loke nos por pa promové adorashon berdadero. (Sal. 119:108; 2 Kor. 9:7) Ora nos hasi orashon i meditá riba e informashon bíbliko ei, nos por tuma desishon práktiko ku nos Tata selestial lo bendishoná.

14. Kon bo por determiná si un sierto estilo di bisti ta agradá Yehova?

¹⁴ At’akí un otro ehèmpel: Suponé ku bo ta gusta sierto estilo di bisti ku lo por molestiá algun ruman di bo kongregashon. Pero bo no sa di niun lei spesífiko den Beibel ku ta prohibí bo di bisti asina. Kiko Yehova ta pensa di e asuntu akí? Apòstel Pablo a duna e siguiente konseho inspirá: “E bunitesa di hende muhé no ta den formanan spesial di flègtumentu di kabei ni den kos di oro òf pèrla òf paña masha karu, sino mas bien, den  bistí na òrdu, ku modestia i sano huisio, sí, manera ta pas pa hende muhé ku ta bisa ku nan ta deboto na Dios, esta, pa medio di bon obra.” (1 Tim. 2:9, 10) E konseho akí ta apliká na ruman hòmber tambe. Komo fiel sirbidó di Yehova, nos no ta pensa riba nos preferensianan personal so sino tambe riba e efekto ku nos forma di bisti i nos aparensia por tin riba otro hende. Modestia i amor por motivá nos pa tene kuenta ku opinion di nos rumannan pa evitá ku nos ta distraé nan òf asta pone nan trompeká. (1 Kor. 10:23, 24; Flp. 3:17) Ademas, ora nos tene na mente kiko e Skritura ta bisa, nos lo por komprondé kon Yehova ta pensa di un asuntu, i esei lo yuda nos tuma desishon ku ta agrad’é.

15, 16. (a) Kon Yehova ta sintié si nos ta pensa konstantemente riba kosnan inmoral? (b) Ora di skohe entretenimentu, kon nos por sa kiko ta agradá Yehova? (c) Kiko nos mester hasi ora nos tin ku tuma desishonnan di peso?

¹⁵ Beibel ta bisa ku Yehova ta bira masha tristu ora hende sigui un mal kaminda i ta pensa kos malu so tur ora bai. (Lesa Génesis 6:5, 6.) For di esaki nos por komprondé ku fantasianan seksual ta robes pasobra nos lo ta okupando nos mente ku algu ku no ta kuadra ku Yehova su manera di pensa i ku lo por pone nos kometé un piká grave. Disipel Santiago a skirbi: “E sabiduria djariba ta na promé lugá puru, despues pasífiko, rasonabel, kla pa obedesé, yen di miserikòrdia i bon fruta, imparsial i sin hipokresia.” (Sant. 3:17) Esaki mester motivá nos pa rechasá entretenimentu ku ta pone nos pensa kos robes. Kristiannan ku disernimentu lo no hinka mes den nan kabes pa entretené nan mes ku sierto buki, pelíkula òf wega ku ta kontené kos ku Yehova ta odia. E Palabra di Dios ta mustra bon kla kiko ta Dios su punto di bista di e kosnan ei.

¹⁶ Ora nos tin ku tuma un desishon, hopi biaha tin mas ku un opshon ku ta korekto i ku lo agradá Yehova. Pero ora nos tin ku tuma desishonnan di peso, ta bon pa nos buska konseho serka ansiano òf otro ruman ku eksperensia. (Tito 2:3-5; Sant. 5:13-15) Naturalmente, lo no ta apropiá pa pidi otro hende tuma desishon pa nos. Kristiannan mester entrená nan kapasidat di distinguí un kos for di otro. (Heb. 5:14) Nos tur mester kumpli ku e palabranan inspirá di Pablo, kende a bisa: “Kada ken lo karga su propio karga di responsabilidat.”—Gal. 6:5.

 17. Ki benefisio nos ta saka ora nos tuma desishon ku ta agradá Yehova?

¹⁷ Ora nos desishonnan ta basá riba Yehova su manera di pensa, nos ta hala mas serka dje. (Sant. 4:8) Nos lo tin su aprobashon i bendishon. Esaki, na su turno, ta fortalesé nos fe den nos Tata selestial. P’esei anto, sea determiná pa laga lei- i prinsipionan di Beibel guia nos, ya ku nan ta revelá kiko Dios ta pensa di sierto asuntu. Ta klaru ku semper nos lo tin algu nobo pa siña tokante Yehova. (Yòb 26:14) Ma si nos hasi esfuerso, nos por haña e sabiduria, konosementu i disernimentu ku nos tin mester pa tuma desishon sabí. (Pro. 2:1-5) Idea i plan di hende imperfekto ta kambia konstantemente, pero e salmista a duna nos un bon rekordatorio: “E konseho di SEÑOR ta permanesé pa semper; e plannan di su kurason ta di generashon pa generashon.” (Sal. 33:11) Sin duda, nos por tuma bon desishon ora nos pensamentu- i akshonnan ta na armonia ku e pensamentunan di nos Dios sabí, Yehova.