1. ¿Máakalmáak jujunpʼéel leyoʼob yaan teʼ Bibliaoʼ, yéetel baʼax utsil ku taasiktoʼon k-beetik?

 ICHIL le Bibliaoʼ Jéeobaeʼ yaʼab leyoʼob u tsʼaamajtoʼon, le leyoʼobaʼ ku yáantkoʼon k-beet baʼax uts tu tʼaan. Ku yaʼaliktoʼoneʼ maʼ unaj k-adorartik imagenoʼobiʼ, maʼ unaj k-ookoliʼ, maʼ unaj k-káaltaliʼ mix unaj u yantal baʼax k-il yéetel núupkʼebaniʼ (1 Cor. 6:9, 10). Jesús xaneʼ tu tsʼáaj tiʼ u disipuloʼob le mandamientoaʼ: «Beeteʼexoʼob disipuloʼob, táan a tsʼáaikeʼex u yokjaʼob tu kʼaabaʼ le Taataoʼ, le Paaloʼ yéetel le kiliʼich muukʼoʼ, yéetel táan a kaʼanskeʼexoʼob u tsʼoʼokbesoʼob tuláakal le baʼaxoʼob tsʼoʼok in waʼalikteʼex ka a beeteʼexoʼ. Yéetel, ¡ileʼex!, tiʼ yanen ta wéeteleʼex tak teʼ kʼiinoʼob táan u kʼuchul u xuul yóokʼol kaaboʼ» (Mat. 28:19, 20). Le baʼaxoʼob ku yaʼaliktoʼon Jéeoba yéetel Jesús ka k-beetoʼ utiaʼal k-utsil. Le leyoʼob ku tsʼáaiktoʼon Jéeobaoʼ ku yáantkoʼon utiaʼal k-kanáantikba bey xan utiaʼal k-kanáantik le máaxoʼob yanoʼob ichil k-familiaoʼ. Ku yáantkoʼon xan utiaʼal k-kanáantik k-toj óolal yéetel utiaʼal ka yanaktoʼon kiʼimak óolal. Le baʼax maas kʼaʼanaʼan k-tiaʼaloʼ letiʼeʼ k-beetik baʼax ku yaʼaliktoʼon Jéeobaoʼ, ichil lelaʼ tiaʼan le kʼaʼaytajoʼ. Ken k-beeteʼ k-kiʼimakkúunsik u yóol Jéeoba yéetel ku bendecirkoʼon.

2, 3. 1) ¿Baʼaxten le Bibliaoʼ maʼatech u tsʼáaik leyoʼob tiʼ cada baʼax ku yúuchul ichil k-kuxtal? 2) ¿Baʼax kʼáatchiʼiloʼob ken k-núuk teʼ xookaʼ? (Ilawil le foto yaan tu káajbal le xookaʼ.)

 ² Chéen baʼaleʼ le Bibliaoʼ maʼatech u tsʼáaik leyoʼob tiʼ baʼax unaj k-beetik tiʼ cada baʼax ku yúuchul ichil k-kuxtal. Por ejemploeʼ maʼatech u yaʼaliktoʼon jach baʼax clase nookʼ unaj k-búukintikiʼ. Lelaʼ ku yeʼesik jach yaan u naʼat Jéeoba. Teʼ yóokʼol kaabaʼ le modaoʼ cada kʼiin ku máaneʼ ku kʼexpajal yéetel cada máakeʼ jejeláas bix u vestirkuba, chéen baʼaleʼ le tsolnuʼukoʼob ku tsʼáaik le Biblia yoʼolal bix unaj u vestirkuba máakoʼ, maʼatech u máanoʼob de moda. Le Biblia xanoʼ maʼatech u yaʼalik baʼax meyajil unaj k-beetik, bix unaj k-náaysik k-óol mix tech u yaʼalik baʼax tratamientoiloʼob unaj k-kʼamkiʼ. Baʼaxeʼ Jéeobaeʼ ku chaʼik tiʼ cada juntúul bey xan tiʼ cada íichamtsil ka u chʼaʼtukult baʼax maas maʼalob ka u beete.

³ Le ken k-chʼaʼtukult junpʼéel baʼal jach kʼaʼanaʼan ichil k-kuxtal yéetel minaʼan mix junpʼéel ley teʼ Biblia aʼalik baʼax unaj k-beetkoʼ, maʼalob ka tuukulnakoʼon tiʼ le kʼáatchiʼobaʼ: «¿Ku chʼaʼik wa en cuenta Jéeoba le baʼax ken in beetoʼ? ¿Jeʼel wa u kiʼimaktal u yóol desde maʼ u bin tu contra le Biblia le baʼax ken in beetoʼ? ¿Bix jeʼel in wojéeltik wa yaan in kiʼimakkúuntik u yóol yéetel le baʼax ken in beetoʼ?».

4, 5. Le baʼaxoʼob k-beetkoʼ, ¿bix u afectartik k-kuxtal bey xan u kuxtal u maasil?

⁴ Yaan máakoʼobeʼ ku tuklikoʼobeʼ jeʼel u páajtal u beetkoʼob jeʼel baʼaxak u kʼáatoʼobeʼ. Chéen baʼaleʼ toʼoneʼ k-kʼáat beet le baʼax jeʼel u kiʼimakkúuntik u yóol Jéeobaoʼ. Le oʼolaleʼ táanil tiʼ k-chʼaʼtuklik k-beetik wa baʼaxeʼ unaj k-ilik baʼax ku yaʼalik le Biblia tu yoʼolaloʼ yéetel k-beetik. Por ejemploeʼ le Bibliaoʼ ku yaʼalik bix u yilik Jéeoba le kʼiʼikʼoʼ, le oʼolal toʼoneʼ k-beetik le baʼax ku yaʼalikoʼ (Gén. 9:4; Bax. 15:28, 29). Bey túunoʼ jeʼel u páajtal k-kʼáatik tiʼ Jéeoba ka u yáantoʼon k-beet le baʼax maas jeʼel u taasik kiʼimak óolal tiʼeʼ.

⁵ Le baʼaxoʼob k-beetkoʼ ku afectartik k-kuxtal. Wa k-beetik baʼax maʼalobeʼ yaan k-maas náatsʼal tiʼ Jéeoba. Chéen baʼaleʼ wa k-beetik baʼax kʼaaseʼ yaan u xuʼulul k-bisikba tu yéetel. Le baʼaxoʼob k-beetik xanoʼ ku afectartik u kuxtal u maasil. Toʼoneʼ maʼ k-kʼáat beet mix baʼal jeʼel u beetik u yaatal u yóol u conciencia k-sukuʼunoʼobeʼ mix k-beetik u xuʼulul u yantal u fejoʼobiʼ. Maʼ xan k-kʼáat beet u yantal problemaʼob ichil le sukuʼunoʼob teʼ múuchʼuliloʼ. Jeʼex k-ilkoʼ jach kʼaʼanaʼan k-chʼaʼtuklik k-beetik baʼax maʼalob (xok Romailoʼob 14:19 yéetel Galaciailoʼob 6:7).

6. ¿Baʼax jeʼel u yáantkoʼon k-chʼaʼtukult k-beetik baʼax maʼalobeʼ?

⁶ Wa jach junpuliʼ maʼatech u yaʼalik le Biblia baʼax unaj k-beetik yoʼolal wa baʼaxoʼ, ¿baʼax jeʼel u yáantkoʼon k-chʼaʼtukult beetik baʼax maʼalobeʼ? Tu lugar k-jáan chʼaʼtuklik k-beetik chéen baʼax k-kʼáateʼ, maas maʼalob ka k-tukult tubeel baʼax ken k-beete yéetel k-tuklik wa yaan u kiʼimakkúuntik u yóol Jéeoba. Wa k-beetik beyaʼ Jéeobaeʼ yaan u yáantkoʼon utiaʼal ka xiʼiktoʼon utsil (xok Salmos 37:5).

7. Wa teʼ Biblia minaʼan junpʼéel ley eʼesik jach baʼax unaj k-beetkeʼ, ¿baʼax jeʼel u yáantkoʼon k-il baʼax u kʼáat Jéeoba ka k-beeteʼ?

⁷ ¿Bix jeʼel k-ojéeltik baʼax u kʼáat Jéeoba ka k-beeteʼ? Efesoiloʼob 5:17, ku yaʼalik: «Seguernak a jach ilkeʼex baʼax u kʼáat Jéeoba». Wa teʼ Biblia minaʼan junpʼéel ley eʼesik jach baʼax unaj k-beetkeʼ, kʼaʼabéet k-ilik yéetel k-naʼatik baʼax u kʼáat Jéeoba ka k-beete. ¿Baʼax jeʼel u yáantkoʼoneʼ? Letiʼe k-orar tiʼ  Jéeobaoʼ yéetel k-chaʼik u nuʼuktikoʼon u kiliʼich muukʼ.

8. Tsol yéetel junpʼéel ejemplo baʼax áant Jesús u naʼat baʼax u kʼáat Jéeoba ka u beete.

⁸ Jesuseʼ mantatsʼ tu yilaj u naʼatik baʼax u kʼáat Jéeoba ka u beete. Letiʼeʼ kaʼatéen tu tséentaj yéetel junpʼéel milagro yaʼabkach máakoʼob wiʼijoʼob, chéen baʼaleʼ antes u beetkeʼ orarnaji (Mat. 14:17-20; 15:34-37). Uláakʼ juntéen le tiaʼan teʼ desiertooʼ, wiʼijchaji, le Kʼaasilbaʼal túunoʼ tu yaʼalajtiʼ ka u sut waajil le tuunichoʼoboʼ pero Jesuseʼ maʼ tu beetiʼ (xok Mateo 4:2-4). Letiʼeʼ jach u kʼaj óol maʼalob u Taata yéetel u yojleʼ Jéeobaeʼ maʼ u kʼáat ka meyajnaktiʼ le kiliʼich muukʼ chéen utiaʼal u kaxtik u yutsiloʼ. U yojel xaneʼ jeʼel u yáantaʼal yéetel u tséentaʼal tumen u Taata ken kʼaʼabéetchajkeʼ.

9, 10. Tsol yéetel junpʼéel ejemplo baʼax jeʼel u yáantkoʼon k-chʼaʼtukult baʼax maʼalobeʼ.

⁹ Jeʼex Jesuseʼ toʼoneʼ jeʼel k-beetik baʼax maʼalob wa k-confiar tiʼ le nuʼuktaj ku tsʼáaiktoʼon Jéeobaoʼ. Le Bibliaoʼ ku yaʼalik: «Okes a wóol tiʼ Yuumtsil yéetel tuláakal a puksiʼikʼal maʼ a walab óoltik le naʼat yaan tiʼ techoʼ. Maʼ a tuʼubsik Yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej. Maʼ a tukultik wa sen yaʼab baʼal a wojel; tsʼáa tsiikil tiʼ Yuumtsil, tselaba tiʼ le kʼaasoʼ» (Pro. 3:5-7). Wa k-xokik le Biblia yéetel k-kanik bix u tuukul Jéeobaoʼ, maas chéen chʼaʼabil ken k-naʼatil baʼax unaj k-beetik ken k-chʼaʼtukult wa baʼax. Jeʼex u bin k-maas k-kaanbal tiʼ bix u tuukul Jéeobaoʼ maas chéen chʼaʼabil xan ken k-beet baʼax kiʼimakkúuntik u yóol, tsʼoʼoleʼ yaan xan k-chaʼik u nuʼuktik k-puksiʼikʼal (Jer. 31:33).

¹⁰ Tukulteʼ juntúul atantsileʼ bijaʼan máan yéetel ku yilik junpʼéel xanab jach táaj jatsʼuts, chéen baʼaleʼ jach táaj koʼoj. Kex minaʼan u yíicham tu yiknaleʼ letiʼeʼ u yojel baʼax jeʼel u yaʼalik u yíicham wa ka u xup le bukaʼaj taakʼinoʼ. ¿Baʼaxten u yojel? Tumen tsʼoʼok u máan kʼiin tsʼoʼokok u beel tu yéetel, le oʼolaleʼ u kʼaj óol u yíicham yéetel u yojel baʼax ku tuklik letiʼ tiʼ bix unaj u kanáantkoʼob le taakʼinoʼ. Bey túun xanoʼ wa k-naʼatik bix u tuukul Jéeoba yéetel k-kaanbal tiʼ baʼaxoʼob u beetmaj úuchjeakileʼ, yaan u béeytal k-ojéeltik baʼax u kʼáat ka k-beet tiʼ jeʼel baʼaxak ka k-aktáant ichil k-kuxtaleʼ.

11. Ken k-xok yéetel ken k-xakʼalxokt le Bibliaoʼ, ¿tiʼ baʼax kʼáatchiʼiloʼob unaj k-tuukul? (Ilawil le cuadro: « Ken a xakʼalxokt le Bibliaoʼ, tukle».)

¹¹ ¿Bix jeʼel k-ojéeltik baʼax ku tuklik Jéeobaeʼ? Letiʼe ken k-xok yéetel ken k-xakʼalxokt le Biblia mantatsʼoʼ. Mientras táan k-xookeʼ, maʼalob ka k-tukle: «Lelaʼ ¿baʼax ku kaʼansikten yoʼolal Jéeoba? ¿Baʼaxten tu beetaj beyoʼ?». Jeʼex tu beetil Davideʼ, toʼoneʼ unaj k-kʼáatik tiʼ Jéeoba ka u yáantoʼon k-maas kʼaj óolte. Davideʼ tu yaʼalaj: «Jéeoba Dios, beet in kʼaj óoltik a beeloʼob, kaʼansten bix unaj in xíimbal ta beeloʼob. Beet in xíimbal teʼ maʼalob bejoʼ, kaʼanseniʼ tumen teech in Dios, teech salvarken. Bul kʼiin táan in páaʼtikech» (Sal. 25:4, 5, Traducción del Nuevo Mundo). Ken k-kan wa baʼax yoʼolal Jéeobaeʼ, maʼalob ka k-tukult tiʼ baʼax súutukil ichil k-kuxtal jeʼel u meyajtoʼon le baʼax t-kanoʼ. Unaj k-tuklik: «¿Bix jeʼel u meyajten ichil in familia, tin meyaj, teʼ escuela wa teʼ kʼaʼaytajoʼ?». Wa k-tuklik tiʼ baʼax súutukil jeʼel u meyajtoʼoneʼ maas chéen chʼaʼabil ken k-ojéelt bix u kʼáat Jéeoba ka meyajnaktoʼon le baʼax t-kanoʼ.

12. Le publicacionoʼob yéetel le muchʼtáambaloʼoboʼ, ¿bix jeʼel u yáantkoʼon k-naʼat bix u tuukul Jéeobaeʼ?

¹² Uláakʼ baʼal jeʼel u yáantkoʼon k-naʼat bix u tuukul Jéeobaeʼ, letiʼe k-xakʼaltik le publicacionoʼob u tsʼaamajtoʼon u kaajaloʼ. Utiaʼal k-ojéeltik wa maʼalob ken u yilil Jéeoba le  baʼax ken k-beetoʼ jeʼel u páajtal k-xakʼaltik le folleto Áantaj utiaʼal u xakʼalxook u j-jaajkunajoʼob Jéeoba wa uláakʼ publicacionoʼob jeʼel u yáantkoʼoneʼ. Toʼon xaneʼ jeʼel k-jóoʼsik u yutsil le muchʼtáambaloʼob wa k-chʼenxikintik le baʼax ku yaʼalaʼaloʼ, wa k-comentar bey xan wa k-tuukul tiʼ le baʼax ku kaʼansaʼaloʼ. Lelaʼ yaan u yáantkoʼon k-ojéelt bix u tuukul Jéeoba. Beyoʼ yaan u béeytal k-chʼaʼtuklik baʼax maʼalob tu táan Jéeoba yéetel letiʼeʼ yaan u bendecirkoʼon.

13. Tsol yéetel junpʼéel ejemplo bix u yáantkoʼon k-beet baʼax maʼalob k-kʼaj óoltik bix u tuukul Jéeoba.

¹³ Koʼox ilik junpʼéel ejemplo jeʼel u yáantkoʼon k-il wa maʼalob tu táan Jéeoba le baʼax ken k-chʼaʼtukloʼ. Koʼox aʼalikeʼ taak a beetik a precursoril yéetel tsʼoʼok a kʼexik jujunpʼéel baʼaloʼob ichil a kuxtal utiaʼal a maas jóokʼol kʼaʼaytaj. Chéen baʼaleʼ maʼ xaaneʼ maʼ jach a wojel wa jeʼel u kiʼimaktal a wóol chéen yéetel junpʼíit taakʼin wa a kuxtal chéen yéetel le baʼaxoʼob jach kʼaʼabéettechoʼ. U jaajileʼ le Bibliaoʼ maʼatech u yaʼalik wa kʼaʼabéet k-beetikba precursor utiaʼal k-meyajtik Jéeoba, tumen tak chéen wa publicadoroʼoneʼ jeʼel u páajtal u chúukpajal k-óol k-meyajt Jéeobaeʼ. Chéen baʼaleʼ unaj k-chʼaʼik en cuenta xaneʼ Jesuseʼ tu yaʼaleʼ Jéeobaeʼ yaan u bendecirtik le máaxoʼob ku tsʼáaikoʼob táanil le Reino ichil u kuxtaloʼoboʼ (xok Lucas 18:29, 30). Le Biblia xanoʼ ku yaʼalikeʼ jach ku kiʼimaktal u yóol Jéeoba ken k-beet tuláakal le ku páajtal utiaʼal k-alabartikoʼ, tsʼoʼoleʼ letiʼeʼ u kʼáat ka kiʼimakchajak xan k-óol le táan k-meyajtikoʼ (Sal. 119:108; 2 Cor. 9:7). Utiaʼal k-chʼaʼtuklik baʼax maʼalobeʼ kʼaʼabéet k-orar tiʼ Jéeoba yéetel k-tuklik tubeel baʼax ken k-beete, beyoʼ Jéeobaeʼ yaan u bendecirkoʼon.

14. ¿Bix jeʼel k-ojéeltik baʼax ku tuklik Jéeoba tu yoʼolal le nookʼ k-tsʼáaikoʼ?

¹⁴ Koʼox ilik uláakʼ ejemplo. Maʼ xaaneʼ uts ta wich a tsʼáaik junpʼéel clase nookʼ, chéen baʼaleʼ a wojel xaneʼ yaan máaxoʼob ichil le múuchʼuliloʼ maʼ maʼalob bix u yilkoʼobiʼ. Tsʼoʼoleʼ ka wilkeʼ le Bibliaoʼ maʼatech u yaʼalik mix baʼal tu yoʼolal. ¿Bix jeʼel k-ojéeltik baʼax ku tuklik Jéeobaeʼ? Le Bibliaoʼ ku yaʼalik: «Ka u jatsʼutskíintuba le koʼoleloʼob yéetel kʼambeʼen nookʼ, yéetel kabal óolal bey xan yéetel maʼalob tuukul, maʼ yéetel u nikiʼ jiitʼil u tsoʼotsel u pooloʼobiʼ, mix yéetel oro, mix perlaʼob, mix yéetel koʼokoj nookʼiʼ, baʼaxeʼ yéetel maʼalob meyajoʼob jeʼex unaj u beetik le koʼoleloʼob meyajtik Diosoʼ» (1 Tim. 2:9, 10). U jaajileʼ tuláakal máax  meyajtik Jéeoba unaj u beetik le baʼax ku yaʼalik le Bibliaaʼ, tak le xiiboʼoboʼ. Wa kabal k-óoleʼ yaan k-chʼaʼik en cuenta baʼax ku tuklik u maasil yoʼolal le nookʼ k-tsʼáaikoʼ. Tsʼoʼoleʼ tumen k-yaabiltmaj le sukuʼunoʼoboʼ maʼ k-kʼáat k-beet u yaatal u yóol u concienciaʼobiʼ (1 Cor. 10:23, 24; Fili. 3:17). Wa k-ilik baʼax ku yaʼalik le Biblia yéetel k-naʼatik bix u tuukul Jéeobaoʼ, yaan k-chʼaʼtuklik k-beetik baʼax jeʼel u kiʼimakkúuntik u yóoleʼ.

15, 16. 1) ¿Bix u yuʼubikuba Jéeoba wa maʼ t-jáan luʼsik t-tuukul baʼaloʼob yaan yil yéetel núupkʼeban? 2) Ken k-yéey tiʼ baʼax ken k-náays k-óoleʼ, ¿bix jeʼel k-ojéeltik baʼax uts tu tʼaan Jéeobaeʼ? 3) ¿Baʼax jeʼel u yáantkoʼon k-chʼaʼtukult baʼaloʼob kʼaʼanaʼantak ichil k-kuxtaleʼ?

¹⁵ Ken k-xok le Bibliaoʼ k-kanikeʼ Jéeobaeʼ ku yaatal u yóol ken u yil u beetaʼal yéetel u tuklaʼal baʼaloʼob kʼaastak (xok Génesis 6:5, 6). Lelaʼ ku kaʼansiktoʼoneʼ Jéeobaeʼ junpuliʼ maʼ u kʼáat ka k-máans t-tuukul baʼaloʼob yaan yil yéetel núupkʼebaniʼ. Tsʼoʼoleʼ wa maʼ t-jáan luʼsik t-tuukul le baʼaloʼob kʼaastakoʼ jeʼel k-lúubul tiʼ kʼebaneʼ. Ka tʼaanaj le disipulo Santiago yoʼolal u naʼat Jéeobaeʼ, tu yaʼalaj: «Yáax táanileʼ kiliʼich, ku tsʼoʼokoleʼ ku taasik jeetsʼelil, ku tsʼáaik utsil puksiʼikʼal, séeb u yuʼubik tʼaan, nojoch u chʼaʼ óotsilal, yaʼab baʼaloʼob maʼalobtak ku taasik, mix máak jelaʼan u yilik yéetel maʼ j-kaʼapʼéel ichiʼ» (Sant. 3:17). K-ilik túuneʼ le Bibliaoʼ ku kaʼansiktoʼoneʼ maʼ unaj k-náaysik k-óol yéetel baʼax jeʼel u beetik k-tuklik wa k-tsʼíiboltik baʼaloʼob kʼaastakoʼ. Wa k-naʼatik xan tubeel baʼaxoʼob u yaabiltmaj Jéeoba yéetel baʼaxoʼob u pʼekmeʼ, yaan k-yéeyik yéetel baʼax videojuegoʼob, libroʼob wa baʼax peliculaʼob ken náays k-óol. Maʼ unaj u suuktal k-kʼáatik tiʼ mix máak baʼax unaj k-beetik ken k-chʼaʼtukult wa baʼaxiʼ.

¹⁶ Yaan kʼiineʼ ken joʼopʼok k-tuklik bix ken k-beet wa baʼaxeʼ, k-tsʼáaik cuentaeʼ wa maʼ tu bin tu contra baʼax ku yaʼalik Jéeobaeʼ, jejeláas baʼaxoʼob jeʼel u páajtal k-beetkeʼ. Chéen baʼaleʼ ken kʼaʼabéetchajak k-chʼaʼtuklik k-beetik junpʼéel baʼax jach kʼaʼanaʼan ichil k-kuxtaleʼ, maas maʼalob ka k-kʼáat u yáantaj juntúul anciano wa juntúul sukuʼun wa kiik yiijchajaʼan u tuukul (Tito 2:3-5; Sant. 5:13-15). Pero maʼ unaj k-tuʼubsikeʼ, toʼon unaj k-chʼaʼtuklik baʼax ken k-beete, maʼ letiʼiʼ. Utiaʼal lelaʼ unaj k-tuukul tiʼ le baʼax tsʼoʼok k-kanik teʼ Bibliaoʼ, tsʼoʼoleʼ k-chʼaʼtuklik baʼax ken k-beete (Heb. 5:14). Le apóstol Pablooʼ, tu yaʼalaj: «Cada juntúuleʼ yaan u bisik u kuuch» (Gal. 6:5).

17. ¿Baʼax utsil ku taasiktoʼon k-beetik baʼax maʼalob tu táan Jéeoba?

¹⁷ Ken k-chʼaʼtukult k-beetik baʼax maʼalob tu táan Jéeobaeʼ, k-maas natsʼikba tu yiknal, k-kiʼimakkúuntik u yóol yéetel letiʼeʼ ku bendecirkoʼon (Sant. 4:8). Lelaʼ ku beetik u maas muʼukʼaʼantal k-fe tiʼ Jéeoba. Bey túunoʼ utiaʼal k-naʼatik bix u tuukul Jéeobaeʼ kʼaʼabéet k-tuukul tiʼ baʼax k-xokik teʼ Bibliaoʼ. Wa k-beetik lelaʼ yaan k-tsʼáaik cuentaeʼ yaʼab túumben baʼaloʼob jeʼel k-kanik yoʼolal Jéeobaeʼ (Job 26:14). Yaan xan k-ilkeʼ wa k-tsʼáaik óol k-maas kaanbal tiʼ Jéeoba desde bejlaʼeʼ, yaan u maas yantal k-naʼat yéetel maas chéen chʼaʼabil ken k-chʼaʼtukult beetik baʼax maʼalob (Pro. 2:1-5). Le baʼaxoʼob ku tuklik yéetel ku beetik wíinikoʼ séeb u kʼexpajal chéen baʼaleʼ le baʼaxoʼob ku yaʼalik Jéeobaoʼ mix bikʼin ku kʼexpajal. Le salmistaoʼ ku yaʼalik: «Le baʼaloʼob ku beetik Yuumtsiloʼ ku pʼáatal jeetsʼel yaniloʼob jaʼaboʼob minaʼan u xuul» (Sal. 33:11). Jeʼex k-ilkoʼ wa k-naʼatik bix u tuukul Jéeobaeʼ, yaan k-kanik k-chʼaʼtukult baʼax maʼalob tu táan.