1. Gini bete akpiapai duho tipa agu arugute nga ga Ziazia Kekeapai, na wai du ani agbia undo ti manga ani pai kutini?

YEKOVA ima fu dungu azinahe furani rogo Fugoko yo. Ni kpiapai, ko ima zaa rani ti meteka na bäri, irisokpiahe, dĩ, na kpibuda. (1 Kor 6:9, 10) Kurigure a, Wiri Mbori nga Yesu Kristo afu zinahe fu apefuoko nga: “Oni ndú, . . . ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na Wiri na Ziazia Toro; ki nirugu yo a i niká kuti agu apai dunduko mi arugu roni kuti ni. Oni ngere, mi na oni ti arago dũ, ki da ti digida zegino.” (Mt. 28:19, 20) Nairiwo wai du agi arugute re ni bawenehe tipa rani! Mangapai kutini nakiso gu irisa du ani na ni, kini sa rani ani du na wene kpotose, na ki nifu ngbarago ti gaani aborokporo. Gu nyakipaha gbe nga pa manga ani pai kuti ga Yekova azinahe, kodihe na gu zinahe du tipa tungusapai, nga agu apai nasa Yekova ko idi na ani.

2, 3. (a) Tipagine Ziazia Kekeapai afunga arugute ti ni furani tipa apai dunduko ya? (b) Gini asanahe ani nika wisigoho rogo gi kekeapai re? (Oni bi gu sura du ti tonatonaha.)

² Ono tie, kura dungu apai kinaho Ziazia Kekeapai afuranga tipaha ya. Ni kpiapai, Ziazia Kekeapai afuranga tipa agu aroko si aida aKristano ni voho te. Wai du gipai re ayugopa ga Yekova tatamana? Ngbatunga aroko na sino arago ni bakiakia rogo zegino  dunduko, na si nasaka tihe asaka fuo bete agarã. Ka si adu nga Ziazia Kekeapai aima fura tipa gu ngbatunga roko na mbakadatise du ni wenehe fu aKristano, ka garã ha aima susa awere. Wakina gure a, Fugo Mbori afunga arugute fu aKristano tipa gu sunge si aida i mangihe, gu ngbatunga ngua husa kaza si aidaha, na aũngbarago te. Aboro ni basasa na abariikporo du si aida i mangi diaberã tipa agi apai re.

³ Ya mo gere nga pai ho rengbe ka gberã ti Yekova ka ani vura manga kina gini ngbatunga diaberã ho du ani ni rogo gu kpakarapai naida ani mangi nyanyaki diaberã te, zavura gu rengbe kadu na bakere maapai kurii gaani raka? Ya mo rago angba ti gu Barani du ngbangbaturũ yo na gu diaberã ani ka mangaha ka si vura du nga si akuonga agu arugute nga ga Ziazia Kekeapai te? Ho Ziazia Kekeapai afuranga ni tipa pai ya, wai du rengbe ani ka manga gupai nika sa ngbarago ti Mbori?

4, 5. Wai rengbe gaani diaberã kadu na gbegberẽ sangbanaha kurii kura aboro?

⁴ Kura aboro rengbe ka ya pai ho gberẽ ti gupai ani asia ka mangaha te. Ono tie, tipa ka manga gupai nika sa ngbarago ti Yekova, si naida ani berẽkurii agu arugute du rogo Fugoko yo na ki mangipai kutini. Ni kpiapai, tipa Mbori idi na gaani pai, si naida ani mangipai kuti gako arugute nibipa kure. (Bam. P. 9:4; Amo.15:28, 29) Kparakpee nika undo rani ani mangi gu diaberã nandu sa na agu arugute nga ga Ziazia Kekeapai.

⁵ Nyanyaki adiaberã rengbe arengba kadu na bakere ome kurirani rogo toro yo watadu gu kura apai. Agu adiaberã dunduko ani amangaha ima rengba ka sa gaani pagume na Yekova si du ni wenehe watadu ka gbarasaha. Wene diaberã nanyakasa gaani pagume na Mbori, na gbegberẽhe nagbarasaha agbarasa. Kurigure, gbegberẽ diaberã ima rengba ka imisa awirinarani rogo toro yo, watadu ka sayo i koto, watadu ka gbarasapa gu kodatise nga ga dungurati. Nirengo, gu diaberã ani amangaha, si na nyanyakipaha.—Oni gedi ARomo 14:19; AGaratio 6:7.

6. Ginipai si aida si ngbe fu gaani diaberã kumbatayo?

⁶ Ginipai rengbe ani ka mangaha tipa gupai Ziazia Kekeapai afuranga tipaha ya? Ho du pai ni wa gure, gaani tindiro du ngaha nga ka wisigo gupai re sirisiri na ki mangi gu diaberã Yekova nika ida na ni na ki fu maku kuriihe angianga gupai ngba tirani ya.—Oni gedi Atambuahe 37:5.

7. Ho Ziazia Kekeapai afuranga ni tipa pai ya, wai du rengbe ani ka ino gupai rengbe Yekova ka ida ani mangihe rogo ngbatungapai wa gure?

⁷ Mo ima rengba ka bakabangiro nga, ‘Wai rengbe ani ka ino gupai Yekova aidaha ka si du nga Fugoko afuranga tipaha te?’ AEfeso 5:17 naya: “[Oni rugu] tironi na gu he Gbia akpi nyemu he.” Ho Ziazia Kekeapai afuranga tipa pai ya, wai du rengbe ani ka ino gupai Mbori aida? Ani rengbe ka ino ka ani akpara fu Mbori na kini mbugene fu gako ziazia toro si ngbe furani kumbatayo.

8. Wai du Yesu aini gupai Yekova aida ko mangihe? Oni funga kpiapai.

⁸ Ani bingo wai Yesu aini gupai Bako aida ko mangihe. Bara ue, Yesu akparikpee na ki fu riahe fu bakere rimbasa aboro ngba iiriwo gene. (Mt. 14:17-20; 15:34-37) Wa si avura du wo, ko aaidanga ka sa ambia ku rogo kpakuto ho ko adu ni na gomoro ti gu regbo Bakitingbanga aˈasadi ko ngbakungbo yo te. (Oni gedi Matayo 4:2-4.) Bambiko wa ko aima ino ga Bako berãpai, ko aima ino gupai nga si aaidanga ko sa ambia ni kpakuto te. Nirengo, Yesu aima  inoho nga anga gupai Mbori aidaha nga ko mangisunge na gu ome ko adu na ni tipa gupai ko akpinyemuhe te. Pa zanga ko manga gupai re ayugu gupai nga ko aakido kuti Yekova tipa ko ngbembatayo fuko na ki fu riahe fuko.

9, 10. Ginihe nika undo rani ani mangi gu diaberã nga ga tatamana? Oni funga kpiapai tipa gipai re.

⁹ Ka si du nga ani naida ka manga ruru diaberã wa Yesu amangihe, si naida ani kido kuti ga Yekova ngbembatayo. Si naida ani mangipai ringbisihe kuti agi afugo tatamana du re nga: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu. Ka mo tigamo nibérẽ nga ha ya mo du ni iratatamana ya; ono mo gúnde ti Yekova, ki guari pati gbigbitapai.” (Snz. 3:5-7) Pa ino ani ga Yekova berãpai vurube wisigo Ziazia Kekeapai rengbe ka undo rani ani ini gupai Mbori aida ani mangihe nibi gupai du ani rogoho. Ka ani inidi tirani wenengai na ga Yekova aberãpai, kinawo ngbaduraniyo nika bi ga Yekova ngbembatayo na nyanyakipaha.—Yeze. 11:19.

¹⁰ Ani yugungo ho na kpiapai: Ani ya diakumba nangbe ahe nzengu yo. Ri bi rakata ri aida ka ngbehe ono ginoho ni bakerehe. Sidu, ri ki sana tiri nga, ‘Ga kumbami bipai nika ngia gine ka ko ini wai mi amangasunge na marã?’ Si nawira wa ri ima ino gako karagapai, wa vura duhe nga kumbari ho te vurũ. Tipagine ini ri he ti ni? Mbiko tipa bete regbo, ri ima ino wai du gako berãpai tipa gu wiri bete marã du beyo. Ni sangbanaha, ri ima ino gu bipai rengbe kumbari kadu na ni riipa gu ngbatunga ngbehe re. Wakina gure a, ka ani tona ka inido tirani na ga Yekova aberãpai gbiati agene tooni tooni, ani nika sonosa gu tandu du ani na ni tipa ka ino gupai gu Barani du ngbangbaturũ yo aida ani mangihe rogo apai ni bakiakia.

11. Gini Asanahe rengbe ani ka sana tirani na ni ho ani ageda Ziazia Kekeapai ni watadu wisigoho? (Oni bi gu sanduki nga “ Ho Mo Ageda Fugo Mbori ni Mo Sana Tiro Nga.”)

¹¹ Tipa ani inidi tirani na ga Yekova berãpai, si naida ani peresipa wisigopai nisase rogo gaani raka yo. Ho ani ageda Fugo Mbori ni watadu ho ani awisigo ho ni, ani rengbe ka sana tirani nga, ‘Ginipai gipai re ayugoho tipa Yekova, gako ruru agene, gbiati aberãpai?’ Si naida ani du na gu bipai naadu ti gu bake papara Atambuahe nangia Davide naya: “Ako Yekova, mo yúgu gamo apai fere; mo yúgu pa gamo agene fere. Mo ngbé fere ku mbata yo rogo ga rengo, ki yugu pai fere, bambiko mo nga Mbori gi bata; mi nasunguda ro na uru pitipiti.” (Tam. 25:4, 5) Wa mo nikaa berãkurii gu papara Ziazia Kekeapai re, mo ima rengba ka sanahe nga: ‘Wari du rengbe mi ka manga gipai re ni rogo gimi ngbadimokporo? Wari du rengbe mi ka mangaha ni? Kporo yo? Basunge yo? Sukuru yo? Gene tungusapai yo?’ Bara sa kindi ani naini wari rengbe ani ka mangasunge ni na ni, si ima rengba kadu taata furani tipa ani ini wai ka mangaha.

12. Wai du rengbe gaani awaraga gbiati adunguratise ka undo rani ani ini ga Yekova aberãpai tipa apai ni bakiakia?

¹² Gu kura gene rengbe ani ngbaha ka ino ga Yekova aberãpai nga ka maaberã rani wenengai kuti agu arugapai du mburuhe rii Ziazia Kekeapai gako riigbu afuhe. Ni kpiapai, gu waraga nayugo bara apai ku rogo gu kura abuku, i nakusaha tipa ka undo rani ani wirikipai tipa ga Yekova aberãpai tipa gu dungu apai naida ani mangi diaberã rogoho. (Watch Tower Publications Index na Research Guide for Jehovah’s Witnesses.) Ani nagbia bakere undo a ho ani adegaturani ni ti regbo agu adunguratise nga ga aKristano na kini karagapai baha yo. Berãkurii  agu apai i ayugoho yo nika undo rani ani rugutirani bakere gbe na ga Yekova aberãpai na ki sa gako aberãpai ni gaani. Ka ani amangasunge na agu ariahe nga ga toro Yekova afuhe furani, ani ima rengba ka sona yeeye na ki rugutirani na gako agene. Ni sangbanaha, ani rengbe arengba ka manga gu diaberã gaani Mbori nika fu maku kuriihe.

13. Oni funga gu kpiapai nayugo wai rengbe ani ka manga gu diaberã nga ga tatamana ho ani aberã ni kurii ga Yekova aberãpai.

¹³ Ani bingo gu kpiapai rengbe ka yugo wai gu inohe nga ga Yekova narengbe ka undo rani ani mangi ruru diaberã. Nidu ani ni abatungusipa Kindo, ani ima rengba ka kpinyemu ka mangasunge abazakigene. Tipa ka sa gipai re si du taata, ani natonaha na gu diandue nika sa gaani raka si du taata. Na ti kina gu bangisa regbo re, ani ima rengba ka tona bakabangirani singia ani adu na ngbarago nzunzu ka ani du na kina bete ahe berani. Kina rengo ngaha nga, ba ho Ziazia Kekeapai azinahe rogoho nga ani mangisunge abazakigene te; ani ima rengba ka mangasunge fu Yekova niruru abatungusipai. Ono tie, Yesu akido rani nga agu aboro nambupa gayo apai tipa Kindo nika gbia bakere amaku. (Oni gedi Ruka 18:29, 30.) Kurigure, Ziazia Kekeapai nayugo gupai nga rago nangba ti Yekova ho ani afu gaani “agamunihe nga [ga] tambuahe” ni fuko ni manga ani gupai rengbe ani ka mangaha tipa ndikidi irisombori ndu kumbatayo. (Tam. 119:108; 2 Kor. 9:7) Nibi gupai Ziazia Kekeapai afura tipaha re, kodihe na kparakpee tipa Mbori ngbembatayo furani, ya mo ani arengbanga ka ino ga Yekova aberãpai te? Berãkurii agi apai re ima rengba ka undo rani ani mangi gu diaberã nika du ni wenehe furani na nga gu gu Barani du ngbangbaturũ yo nika fu maku kuriihe.

14. Wai du rengbe mo ka ino singia gu ngbatunga roko re ngbaangba ti Yekova?

¹⁴ Ani bingo gu kura kpiapai: Ani ya roko gu du ho nga gu ngba tiro ono niima rengba ka ba gberãrago ti kura aboro rogo dungurati. Wa vura duhe wo, rugute ho du rogo Ziazia Kekeapai naka na pa voho te. Ono ga Yekova berãpai nga gine tipaha? Ga Mbori toro adu kugii gu mokedi nangia Pauro ko fu rugute nga: “A wo ade ka ukadi tiyo na gu roko adu nga na enda ti ni ya, nizogo tiyo na zera; ni kãikãi mangeriyo, na dahabu, na ambia fongo na gu roko kii genoho te; ono  rogo wene mangapai wa ngba ha fu agu ade idi pa sinombori.” (1 Tim. 2:9, 10) Rengo ngaha nga, gi rugute re a fu agu akumba nga aKristano. Wangia ani gu ga Mbori amoyambu niima fu tiyo fuko, ani aberãnga kina pa agu apai ani aidaha te ono gu surungba pai rengbe gaani votise gbiati mbakadatise kadu na ni kurii kura aboro. Ka ani du na ruru bipai gbiati nyemuse, si nika fõngbaduraniyo ani berẽpa gu bipai nga ga akuarani aidipase ka ne gupai rengbe ka gbeberãyo watadu ka fu gberãrago fuyo. (1 Kor. 10:23, 24; Frp. 3:17) Ka ani moi gupai kurirani yo Ziazia Kekeapai apehe, si rengbe ka undo rani ani ini ga Yekova aberãpai riipa gupai re na ki ngbembatayo furani ani mangi gu siapai nika fu ngbarago fuko.

15, 16. (a) Gini bipai rengbe Yekova kadu na ni ka ani aaberã kina pa agu apai nga ga kodaba? (b) Ho ani asia aũngbarago ni, wai du rengbe ani ka ino gupai ngba ti Yekova? (d) Wai du si aida ani mangi nyanyakipa adiaberã?

¹⁵ Ziazia Kekeapai nayugo gupai nga Yekova na gberãrago ho aboro amanga gupai ni angbanga ya na ‘gu berã du kpotoyo yo, si ni kina gbigbita ha kindi.’ (Oni gedi Bambata Pai 6:5, 6.) Mbiko gipai re ani nabi gupai nga berãpa kodaba ni gbegberẽhe mbiko si ima rengba ka sa boro ni mangi kere ingapai nga gu Ziazia Kekeapai aidanga na ni ya, na nga gu andunga sa na ga Yekova aberãpai ya. Gu bawiriki nangia Yakoba akepai ki ya: “Gu tatamana naye ari yo si du na wene sino mbata, fuo gure si du na zera, ki du yee, ki ipi na gia kpe, ki hi be inapai na wene zuzuhe, adu nga na kparaka aberã, na biriki a ya.” (Yak. 3:17) Pa ino ani gipai re rengbe ka sarani ani ne agu aũngbarago rengbe ka sa boro ni naaberã gbegberẽ apai. Gu Kristano rugu tiní na gipai re, si aidanga ni sanahe singia si ngbaangba ka geda kura abuku, ka bi kura avidio, watadu agu ambaro du na agu apai rogoho Yekova asogaha te. Gako berãpai riipa gipai re ni yuguyuguhe rogo Fugoko yo.

¹⁶ Gu kura apai kinaho rengbe aboro ka diaberã tipaha ni bakiakia ono Yekova kidu kindi na ngbarago. Wa vura duhe wo, nibipa nyanyaki adiberã, si daada ti kura aregbo tipa ka sana abaakumba tipa rugute watadu agu aKristano naima nyaka rogo toro yo. (Tito 2:3-5; Yak. 5:13-15) Kina rengo du ngaha nga, si aidanga ani sana kura aboro i diberã furani te. Si naida aKristano raba gayo berãpai na kini mangisunge na gayo rugatinapai. (Eb. 5:14) Ani dunduko si aida ani mangipai kuti afugo Pauro naya: “Boro nakpida kina gani pai.”—Gara. 6:5.

17. Wai du ani agbia undo ti manga gu diaberã nafu ngbarago fu Yekova?

¹⁷ Ho ani maa mburu gaani adiberã ni rii ga Yekova aberãpai, ani nambeda na ko. (Yak. 4:8) Ko naida na ani na ki fu maku furani. Na gere nanyakasa gaani idapase koyo du gu Barani ni du ngbangbaturũ yo. Sidu, ani mbunga agu andiko gbiati arugute nga ga Ziazia Kekeapai ambu si ningbe furani kumbatayo, mbiko si nayugo ga Mbori berãpai tipa apai. Rengo ngaha nga, aregbo dunduko ani kaa wirika vovopai tipa Yekova. (Eyo. 26:14) Ono tie, ka ani mangi ome ni bakerehe, ani ima rengba ka gbia tatamana, inohe, na gu rugatinapai ani aidaha tipa ka manga ruru diaberã. (Snz. 2:1-5) Ga kpakpa aboro aberãpai gbiati ambakadapai na go ago, ono bake papara Atambuahe natingida rani nga: “Sangba Yekova naru ku baha waragoagira, agu aberã du kpotoko yo si fu rika ngbatunga aboro dunduko.” (Tam. 33:11) Si tie ziazia nga, ani rengbe ka manga ruru diaberã kina gu ka gaani aberãpai na mangaapai andu sa na ga Yekova Mbori aberãpai nga ga tatamana.