1-3. (a) Alokaloka ango ma timone twero bedo tek adada i nge nongo batija? (b) Ka dong timo alokaloka odoko tek adada, lapeny ango ma watwero penye kwede? (Nen cal ma i pot karatac man.)

I NGE pwonyo lok ada, Kevin ^[1] onongo pe mito gin mapat ki bedo ki wat macok ki Jehovah. Kadi bed kumeno, pi mwaki mapol, en obedo ka tuko me goyo cente, mato taa, mat kongo wa i labyel kweri, ki dong tic ki yadi calo jayigi-ni. Wek Kevin onong cwak pa Lubanga, onongo mitte ni en ojuk tim magi ma pe tye atir-ri ma lubbe ki cik ma i Ginacoya. En otimo meno ki jenge i kom Jehovah ki teko ma Lokke tye kwede me loko kwo pa dano.​—Ibru 4:12.

² Kevin tika ojuko keto alokaloka i kwonne i nge nongo batija? Pe ojuko, pien en onongo pud tye ki tic me dongo ki dong yubo kit ma myero pi Lukricitayo. (Ep. 4:31, 32) Me labolle, en onongo ni juko kinigane onongo tek adada. Kevin owaco ni: “Pwonyo kit me juko kinigana onongo tek loyo  weko timo jami maraco ma onongo abedo ka timogi-ni woko!” Kevin onongo teko me timo alokaloka ma mitte ki i lega ki kwano Baibul ki cwinye ducu.

³ Calo Kevin, pol pa wan waketo alokaloka mapol i kwowa ma pud peya wanongo batija wek kwowa obed ma rwatte ki cik ma pigi teko ma nonge i Baibul. I nge batija, waneno ni mitte me medde ki keto alokaloka mogo​—wek walub lanen pa Lubanga kacel ki Kricito macok. (Ep. 5:1, 2; 1 Pet. 2:21) Me labolle, romo bedo ni waniang ni wamaro nguru, watye ki lworo pi dano, wamaro boko nying jo mukene, onyo watye ki goro mogo mukene. Tika inongo ni keto alokaloka ma mitte tek loyo kit ma onongo itamo kwede con? Ka tye kit meno, ci waromo bedo ki tam ni, ‘I nge timo alokaloka madongo, pingo dok tek tutwal me medde ki yubo ka mogo matinotino? Atwero weko Baibul medde ki loko kwona nining?’

4. Pingo pe watwero yomo cwiny Jehovah i jami ducu ma watimo?

⁴ Wan ma dong wangeyo dok wamaro Jehovah-ni, wamito yomo cwinye ki cwinywa ducu. Kadi bed ni watye ki miti matek me timo meno, roc ma watye kwede twero weko bedo tek botwa me yomo cwiny Lubanga kare ducu. Waromo winyo calo lakwena Paulo ma ocoyo ni: “Atwero mito gin ma atir, ento pe atwero tiyone.”​—Rom. 7:18; Yak. 3:2.

5. Alokaloka ango ma watimo ma pud peya wanongo batija, ento goro ango ma pud watwero medde ki lweny kwede?

⁵ Dong waweko timo bal mogo ma weko pe wabedo jo ma gupore i kacokke pa Lukricitayo woko. (1 Kor. 6:9, 10) Kadi bed kumeno, pud watye ki roc. (Kol. 3:9, 10) Pi meno, pe tye me ryeko me tamone ni i nge nongo Batija​—nyo bene i nge rii pi mwaki mapol i ada​—pe wabitimo bal mo, pe tye gin mo ma wabinongo timone tek, nyo pe wabibedo ki tam kacel ki cwiny mo marac. Bedo ki lakodi tam ma kit magi twero rii pi mwaki mapol.

6, 7. (a) Gin ango ma weko wabedo lurem Jehovah kadi bed ni watye luroc? (b) Pingo pe myero wakwer penyo ni Jehovah otimwa kica?

⁶ Roc ma walako myero pe ogengwa ki nongo mit pa bedo ki wat macok ki Jehovah ki me tic pire. Tam kong: I kare ma Jehovah ojolowa me bedo ki wat macok kwede, en onongo ngeyo ni wabitimo jami marac i kare mogo. (Jon 6:44) Kit ma Lubanga ngeyo kitwa kacel ki ngo ma tye i cwinywa-ni, labongo akalakala mo, en onongo ngeyo kit goro ma biyelowa. Dok en onongo ngeyo ni kare ki kare wabitimo bal. Ento man pe ogengo Jehovah me bedo ki miti ni wabed lureme.

⁷ Mar ma Lubanga tye kwede piwa oweko en ominiwa mic mo ma pire tek adada​—ginkok pa Wode me amara. (Jon 3:16) Ka wayenyo kica pa Jehovah ka wabalo kun wajenge i kom ginkok, ci wabibedo ki gen ni watwa ki en bimedde ki bedo matek. (Rom. 7:24, 25; 1 Jon 2:1, 2) Kadi bed ni wawinyo ni wape jo maleng nyo ni watye lubalo, tika myero wawek ogengwa me nongo adwogi maber ma bino pi ginkok? Pe wacel! Man bibedo calo watye ka kwero tic ki pii me lwoko cingwa ka col. Ki lok ada, kimiyo ginkok pi lubalo ma gingut pi balgi. Watye ki pwoc madit adada pi ginkok, pien dong watwero bedo lurem Jehovah kadi bed ni watye ki roc.​—Kwan 1 Temceo 1:15.

8. Pingo pe myero waca goro ma watye kwede?

 ⁸ Ngene kene ni pe myero waca gorowa acaya. Bedo ki wat macok ki Jehovah kwako temme ki tekwa me lubu lanene kacel ki pa Kricito macok adada kun nongo watemme me bedo jo ma gin gimito ni wabed. (Jab. 15:1-5) Kwako bene temme me lweny ki goro ma watye kwede, ki weko goro meno ka twere. Kadi bed ni pud wanongo batija cokcok-ki nyo dong warii i ada pi mwaki mapol, myero wamedde ki ‘yubo kitwa obed maber.’​—2 Kor. 13:11.

9. Wangeyo nining ni watwero medde ki ruko kit pa dano manyen?

⁹ Mitte ni wamedde ki keto tek wek ‘wuyub kitwa obed maber’ ki dok wek wanyut kit pa “dano manyen.” Paulo opoyo wi luye luwote ni: “Dong wubwoto kwowu macon ki ticce ducu, ci dong wuruko dano manyen ma Lacwec tye ka rocone i ngec manyen me dwoko i calle kikome.” (Kol. 3:9, 10) Lok man ni “tye ka rocone” nyuto ni ruko kit pa dano manyen obedo gin ma timme kare ducu. Man cuko cwiny adada, pien poyo wiwa ni kadi bed ni dong watiyo pi Jehovah pi kare malac nyo pe, pud watwero medde ki dongo ki dok timo alokaloka i kitwa ma rwatte ki kit pa dano manyen. Ki lok ada, Baibul twero medde ki loko kwowa.

10. Ngo ma watwero timone wek wamedde ki timo alokaloka pi kony ma wanongo ki i Lok pa Lubanga, dok lapeny mene ma myero wapenye kwede?

¹⁰ Mitte ni watute matek ka wamito ni Lok pa Lubanga omedde ki loko kwowa. Ento pingo tute matek mitte ki tung botwa? Ka Jehovah tye ka goya laane i tutewa, ci dongo i yo me cwiny pe bibedo yot makato? Jehovah mono onongo pe twero kwanyo miti marac ma tye i cwinywa ma weko bedo yot botwa me keto alokaloka i kitwa labongo tute matek tutwal ki botwa?

11-13. Pingo Jehovah mito ni meno watute matek me lweny ki gorowa?

¹¹ Ka watamo i kom lobo kacel ki jami ma iye, waneno ni Jehovah tye ki teko madit me timo gin mo keken. Me labolle, en ocweyo ceng ma tye ki twon teko madit adada. Pi cekon acel acel, ceng yubo dero ki lyeto madit adada. Ento manok keken aye mitte pi kwo i lobo. (Jab. 74:16; Ic. 40:26) Jehovah cwinye yom me miyo teko madwong bot luticce ma i lobo ka mitte. (Ic. 40:29) Ki lok ada, Lubanga bene twero miyo botwa teko me weko kit gorowa mo keken labongo tutewa nyo nongo pwony ki i bal ma watimogi. Ento pingo en pe timo meno?

¹² Jehovah ominiwa mic madit me bedo agonya me yero gin ma iwa mito. Ka wayero me timo miti pa Lubanga kun watute matek me timo meno, ci wabinyuto marwa pi Jehovah ki miti ma watye kwede me yomo cwinye. Wabinyuto bene cwakwa pi twero me locce. Catan okelo pyem ni Jehovah pe loyo locce i yo ma atir, pi meno Wonwa ma lakica dok ma tye ki pwoc piwa-ni neno tutewa me cwako locce calo gin ma pire tek adada. (Yubu 2:3-5; Car. 27:11) Kadi bed kumeno, ka onongo Jehovah gonyowa ma weko dong pe mitte ki wan me tute matek me lweny ki goro ma watye kwede wek wayom cwinye, ci lok man ni gwoko gennewa kun wacwako twero me locce onongo konye bibedo pe.

¹³ Pi meno, Jehovah wacciwa ni omyero ‘wacukke matek’ me dongo kit mabeco. (Kwan 2 Petero 1:5-7; Kol. 3:12) En  mito ni watute matek me lweny ki jami maraco ma watamo nyo ma wawinyo. (Rom. 8:5; 12:9) Ka watute matek i yo man, ci wabinongo yengo ka waniang ni Baibul pud tye ka medde ki loko kwowa.

14, 15. Ngo ma mitte wek wadong kit mabeco ma yomo cwiny Jehovah? (Nen bok ma wiye tye ni “ Baibul Kacel ki Lega Oloko Kwogi.”)

¹⁴ Gin ango ma myero watim wek wadong kit mabeco ma yomo cwiny Jehovah? Ma ka mokone piwa kenwa gin ango ma mitte ni wayubbi, omyero wawek Lubanga aye otelwa. Myero watute matek kun walubo tira pa Jehovah, pien Jo Roma 12:2 waco ni: “Pe wulub tam me lobo man, ento wuwek Lubanga olok tamwu odok nyen, wek omi wuniang i gin ma Lubanga mito, gin maber, ma yomo cwinye, ma roc mo pe iye.” Jehovah tiyo ki Lokke kacel ki cwiny maleng me konyowa me niang mitine, me timone ki dong keto alokaloka i kwowa ma lubbe ki mitine. I tutewa, omyero wakwan Baibul nino ducu, walwod lok i kom gin ma wakwano, ki dok waleg pi cwiny maleng. (Luka 11:13; Gal. 5:22, 23) Ka walubo tela pa cwiny pa Lubanga, kun waneno jami i kit ma Jehovah neno kwede ma lubbe ki kit ma kinyuto kwede i Lokke, ci tamwa, lokwa, ki jami ma watimogi biyomo cwiny Lubanga. Ento pud nongo bimitte ni wacung matek wek walweny ki gorowa.​—Car. 4:23.

¹⁵ Medo i kom kwano Baibul nino ducu, omyero bene wakwan Lok pa Lubanga kun watiyo ki bukke pa Lukricitayo kun nongo watye ki miti me lubo kit pa Jehovah. Jo mogo gunongo ni tye me kony adada ka giyubo kun gikwano wang Baibul mogo kacel ki Wi Lubele onyo Awake! ma twero konyogi me dongo kit mabeco pa Lukricitayo nyo me lweny ki gorogi.

16. Pingo myero cwinywa pe otur ka waneno ni dongowa i yo me cwiny tye ka timme motmot?

¹⁶ Ka dongoni i yo me cwiny nen calo tye ka timme motmot, wi myero opo ni dongo ma kit meno tero kare. Dongo kit mabeco obedo gin ma timme kare ki kare. Omyero wadi cwinywa ka nongo watye ka tute wek Baibul omedde ki kelo alokaloka mabeco i kwowa. I acakkine, myero wapwonye me timo gin matir ma lubbe ki Ginacoya. Ka kare woto ki kato, tam ki timo jami i yo ma Lubanga cwako bidoko yot, dok bene wabicako tam ki timo jami i yo macal ki pa Lubanga Jehovah.​—Jab. 37:31; Car. 23:12; Gal. 5:16, 17.

17. Ka watye lugen bot Jehovah, anyim ango mamwonya ma wabibedo kwede?

¹⁷ Jo ma giworo Jehovah ki gen gibibedo ki mot me tic pire labongo roc mo pi naka. I kare meno, pe wabitute matek wek wadong kit mabeco ento wabibedo ki yomcwiny i timo meno. Ento i kare ni, watye ki pwoc madit adada pi ginkok pien waromo woro Lubangawa ma lamar-ri. Watwero timo meno kadi bed pud watye ki roc i kareni ka wamedde ki tute matek wek teko me Lok pa Lubanga olok kwowa.

18, 19. Watwero bedo labongo akalakala nining ni Baibul tye ki teko me loko kwowa?

¹⁸ Kevin, ngat ma kiloko i kome malo-ni, otute matek me juko kinigane. En olwodo lok i kom cik ma i Ginacoya dok oketogi i tic, dok bene ojolo kony ki tira pa Lukricitayo luwote. I nge mwaki manok, Kevin oketo alokaloka i kwone. Ci lacen, kicime me bedo lakony kor tic, dok pi mwaki 20, en tye ka tic calo laelda i kacokke. Ento, kadi bed wa i kare ni, en pud neno ni mitte mada me bedo ma wange twolo wek pe dok epot woko piny pi gorone macon-ni.

¹⁹ Gin ma otimme i kom Kevin-ni nyuto ni Baibul konyo jo pa Lubanga me medde ki keto alokaloka mabeco i kwogi. Pi meno, pe myero wail cingwa ento wacung matek wek wami kare ki lok pa Lubanga wek omedde ki loko kwowa kun bene nyikowa cok bot Jehovah. (Jab. 25:14) Ka waneno kit ma Jehovah goyo kwede ki laane i kom tutewa, ci wabibedo labongo akalakala ni Baibul kara twero medde ki loko kwowa.​—Jab. 34:8.