1-3. 1) Bautisasjjasinjja, ¿kunanak jaytañas chʼamakïspa? 2) Jan wali luräwinak jaytañajj chʼamakïchi ukajja, ¿kunsa jisktʼassna? (Aka janankir foto uñjjattʼam).

CHEQA yatichäwi yateqasinjja, Kevin ^[1] jilatajj Jehová Diosan amigopäñwa munäna. Jupajja, walja maranakaw qollqe apuestanakan anatirïna, cigarro fumirïna, machjasirïna ukatsti droganakampis qolljasirïna. Diosamp sum apasiñatakejja, Kevin jilatajj taqe ukanakwa jaytawayjjäna. Ukatakisti Jehová Diosaru ukhamarak Bibliaru confiyañaw yanaptʼawayi (Heb. 4:12).

² Bautisasjjasinjja, Kevin jilatajj jukʼampiw suma cristianöñatak chʼamachasiñapäna (Efe. 4:31, 32). Jupajj jankʼaki colerasir chuymanïnwa, jan ukham chuymanïñatakejj chʼamachasiñapänwa, ukwa jupajj amuyasïna. Jilatajj akham siwa: “Kunanaktï nayrajj lurirïkayäta ukanak jaytañat sipansa, jankʼaki colerasir chuymanïkayäta uk jaytañaw jukʼamp chʼamänjja” sasa. Kevin jilatarojja, Diosar taqe chuyma mayisiña, Bibliat jukʼampi yatjjatañaw jan walinak jaytañatakejj yanaptʼäna.

 ³ Jiwasat waljanejja, janïr bautisaskasajj Kevin jilatjamarakiw jan wali luräwinak jaytawaytanjja, ukhamat Biblian mayitanakap phoqañataki. Bautisasjjasajja, kunjam jaqëñastï Jehová Diosasa, Jesusas munapki ukhamar tukuñataki chʼamachasiñas wakisitapwa amuysna (Efe. 5:1, 2; 1 Ped. 2:21). Inas yaqhanakat jan walinak parlaña, jaqenakar ajjsarirïña, aru apnaqaña jan ukajj yaqha ukhamanak jaytañasa wakisitap amuysna. ¿Ukanak jaytañajj chʼamakiti? Ukhamächi ukhajja, inas akham sasin jisktʼassta: “Jan wali luräwinak jaytawayksta ukasa, ¿kunatsa akanak jaytañajj nayatak chʼamakejja? Kunjam jaqëñajtï Bibliajj maykitu ukham jaqëñatakejja, ¿kunsa lurirista?” sasa.

4. ¿Kunatsa Diosatakjam sarnaqañajj chʼamakejja?

⁴ Jehová Diosan servirinakapajja, Jupar wal munastanjja, taqe kunansa Jupatakjamaw sarnaqañ muntanjja. Ukampisa wal chʼamachaskasasa, pantjasirïtasat janiw Diosatakjam sarnaqerjamäktanti. Apóstol Pabljamarakiw jikjjatastanjja, jupajj akham sänwa: “Aski lurañsti munasktwa, ukampis janiw lurkti” sasa (Rom. 7:18; Sant. 3:2).

5. Janïr bautisaskasajja, ¿kuna lurañanaksa jaytawaytanjja, ukampis kunatakis chʼamachasiskakiñasa?

⁵ Jehová Diosar serviñatakejja, kunanaktï Jupajj uñiski uka jan wali luräwinak jaytawaytanwa (1 Cor. 6:9, 10). Ukhamäkchi ukasa, pantjasir jaqëskaktanwa (Col. 3:9, 10). Ukhamajja, jichhak bautisatästansa jan ukajj walja maranak bautisatästansa, janiw akham amuyañasäkiti: ‘Nayajj janiw pantjasjjäti, jan wali amuyunaka lurañas janiw chuymajan utj-jjaniti, jan wali luräwinaksa janiw lurjjäti’ sasa. Cheqansa jan wali luräwinak jan lurañatakejj chʼamachasiskakiñasawa.

6, 7. 1) Pantjasirïkstan ukasa, ¿kunas Jehová Diosamp sum apasiskakiñatakejj yanaptʼistaspa? 2) Pantjasisajja, ¿kunatsa Jehová Diosarojj perdón mayisiñasa?

⁶ Pantjasirïkstan ukasa, Jehová Diosampejj sumwa apassna, Juparus serviraksnawa. Amtañäni, Diosajj jupar jakʼachasiñasatak yanaptʼkistäna ukhajja, pantjasirïtas yatïnwa (Juan 6:44). Ukatsti, kunjamätansa, kunas chuymasan utji uksa Jupajj yatirakiwa. Ukhamajja, kuna jan wali luräwinak jaytañatakis jukʼamp chʼamachasiñasa uksa amuyiwa. Ukhamäkchi ukasa Jupan amigopäñasatakejj yanaptʼistuwa.

⁷ Diosajja, juchampit jiwañampit jiwasar qhespiyañatakiw mä sapa Yoqapar khitaniwayi (Juan 3:16). Pantjasisintï Jesusan jiwatapjjaru Diosar taqe chuyma perdón mayisiñäni ukhajja, Jupamp sum apasiskaksnawa, uka toqet janipun pächasipjjañäniti (Rom. 7:24, 25; 1 Juan 2:1, 2). Pantjasirïtas amuyasisajja, ¿janit Jesusan jiwatapjjaru perdonatäñ thaqjjañasäspa? Thaqhaskakiñasawa. Janitï thaqjjsna ukhajja, umanïkasin qʼañu amparanakas janis jareqasiñ munksna ukhamäspawa. Jesucristojja khitinakatï taqe chuyma arrepentisipki ukanakatakiw jiwawayi. Ukhamasti, pantjasirïkstan ukasa Jehová Diosan amigopäsnawa (1 Timoteo 1:15 liytʼañataki).

8. Pantjasitanakasjja, ¿kunatsa janis kunäkaspa ukham jan uñjañasäki?

⁸ Maysa toqetjja, pantjasitanakasajj janis kunäkaspa ukham janiw amuyañasäkiti. Jiwasatï Jehová Diosamp sum apasiñ munstan ukhajja, Diosasa Yoqapasa kunjamäpkitï  ukhamäñatakiw chʼamachasiñasa, ukatsti kunjam jaqëñastï jupanakajj munapki ukhamäñatakis chʼamachasiñasarakiwa (Sal. 15:1-5). Janiw ukakïkiti, Diosajj uñiski uka jan wali luräwinak jan lurañatakisa, chuymasat apsuñatakis chʼamachasiñasawa. Ukhamajja, jichhakisa jan ukajj walja maranak bautisatäkstansa suma cristianor tukuñatakiw chʼamachasiñasa (2 Cor. 13:11).

9. Sapürutjamaw suma jaqer tukuskaksna sasinjja, ¿kunatsa sissna?

⁹ Suma cristianor tukuñatakisa, ‘machaq jakäwimpi isthapisiñatakisa’, chʼamachasiñasaw wakisi. Pablojj akham sasaw cristianonakar säna: “Nayra jakäwinakamarjam sarnaqañjja apanukupjjam, uka sarnaqäwisti kunayman jucha lurañanakampi sallqjatänwa. Jumanakajj machaqar trocatäjjapjjañamawa ajayunakamansa ukhamarak amuytʼañanakamansa, ukatsti Diosan munañaparjama luratäki uka machaq jakäwimpi isthapisipjjam, suma qʼoma cheqa kankañan jakapjjarakim” sasa (Efe. 4:22-24). “Machaqar trocatäjjapjjañamawa” siski arunakajj sapürutjam suma jaqer tukuñatwa parlaski. Ukhamajja, walja maranakasa jan ukajj jukʼa maranakakis Jehová Diosar sirvstanjja, suma cristianoru tukuskakiñatakejj chʼamachasiskakiñasawa. Ukatakejj Bibliaw yanaptʼistaspa.

10. Jakäwisan Bibliampi yanaptʼayasiskakiñatakejja, ¿kunsa lurañasa, ukat kunsa jisktʼassna?

¹⁰ Taqeniw Biblian ewjjanakaparjam sarnaqañ muntanjja, ukampis ukatakejj chʼamachasiñasawa. ¿Kunatsa ukham chʼamachasiñasajj wakisi? Jan walinak jan chʼamachasisa apanukuñatakejja, ¿janit Jehová Diosajj yanaptʼkistaspa?

11-13. Jan walinak jaytañatakejja, ¿kunatsa Jehová Diosajj jiwaspachpa chʼamachasiñas muni?

¹¹ Kunanakatï alajjpachan utjki ukanak uñjasajja, Jehová Diosajj wali chʼamanïtapwa amuysna. Amuytʼañataki, Intejj wal qhantʼi. Qhantʼki ukatjja mä jukʼakiw aka Oraqer purini. Ukham mä jukʼa qhantʼanitapatwa Oraqejj juntʼutati, jakañas utjaraki (Sal. 74:16; Isa. 40:26). Jehová Diosajja, qawqha yanaptʼsa servirinakapajj munapjje ukarjamaw chʼamap churi (Isa. 40:29). Ukhamajja, jan walinak lurañ jaytañatakisa, ukanakar saykatañatakisa, Jehová Diosajj yanaptʼistaspawa. Ukampis janiw ukhampun lurkiti, ¿kunatsa?

¹² Diosajj amtasarjam sarnaqeri chuymanwa lurawayistu. Munañapa lurañ amttan ukhamarak ukarjam sarnaqañataki chʼamachastan ukhajja, Jehová Diosar wal munasitasa, Jupatakjam sarnaqañ munataswa uñachtʼaytanjja. Maysa toqetjja, Diosajj Taqe Kunjjar munañanïtapsa uñachtʼayaraktanwa. Amtañäni, Diosajj apnaqañatak janis wakichtʼatäkaspa ukhamwa Supayajj qalltan säna. Ukampis jan ukhamätap uñachtʼayañatak chʼamachasitasjja, Jehová Diosajj sum uñji (Job 2:3-5; Pro. 27:11, NM). Maysa toqetjja, Jehová Diosatï jan wali luräwinak apaqestaspa, ukanak jaytañatakis janirak chʼamachasksna ukhajja, ‘Diosat jan jitheqtañatakiw chʼamachasta ukhamarak Jupan apnaqatäñwa munta’ sasin sissna ukajj kʼarïspawa.

¹³ Jehová Diosajja, suma cristianor tukuñasatakiw chʼamañchtʼistu (Col. 3:12; 2 Pedro 1:5-7 liytʼañataki). Jupajja, amuyunakasampi ukhamarak chuymasampi jan apayasiñaswa muni (Rom. 8:5; 12:9). Biblian yanaptʼapampi jan walinak jaytañatak taqe chuyma chʼamachasiñäni ukhajja, wali kusisitaw jikjjatasiñäni.

14, 15. ¿Kunsa suma cristianöñatakejj lurañasa? (“ Bibliampi mayisiñampiw jupanakar yanaptʼawayi” siski uka recuadro uñjjattʼam).

¹⁴ Jehová Diosan munañaparjam sarnaqañatakisa, suma cristianor tukuñatakisa, ¿kunsa lurañasa? Kunanakan chʼamachasiñasas wakisi uk janiw jiwaspachpajj amtañasäkiti. Jan ukasti Jehová Diosampiw yanaptʼayasiñasa. Romanos 12:2 qellqatajj akham siwa: “Janiy jumanakajj akapacha saräwinakarjamajja jakjjapjjamti, jan ukasti amtañanakamanjja machaqat amtasjjapjjam, ukhamat jumanakan jakañanakamajj sumäjjañapataki. Ukhamatwa jumanakajj Diosan munañapjja yatipjjäta, kunatejj askïki, kunatejj Diosarojj kusisiyki, qʼomäkaraki ukanaksa” sasa. Jehová Diosajja, munañaparjam sarnaqañatakisa, kunanak jaytañasas wakiski uk amuyasiñasatakisa, Arupampi ukhamarak qollan ajayupampiw yanaptʼistu. Ukatakisti, sapüruw Biblia liyiñasa, liyktan ukjjatsa lupʼiñasa, qollan ajayupsa oración toqew mayisiñasa (Luc. 11:13; Gál. 5:22, 23). Ukhamtï lurañänejja, Jehová Diosajj kunjam jaqëñastï munki uk amuyañatakiw yanaptʼistani, Jupjam amuyañsa yateqarakiñäniwa. Ukhamatwa arunakasasa, luratanakasas Jehová Diosar kusisiyani. Ukhamäkchini ukasa, jan wali luräwinak jan lurañatakejj chʼamachasiskakiñasawa (Pro. 4:23).

¹⁵ Diosan Arupjja janiw aleq ukhamak sapür liyiñasäkiti, jan ukasti Bibliat apstʼat qellqatanak toqew jukʼamp yatjjatañasa. Uksti, Jehová Diosajj kunjam Diosasa uk yateqañ amtampiw lurañasa. Yaqhepajja, suma cristianöñatakisa, jan wali luräwinak jaytañatakisa, Bibliat apstʼat qellqatanakampiw yanaptʼayasipjje. Ukatakejj Biblian kawkïr jiskʼa tʼaqanakapasa, jan ukajj Yatiyañataki ukhamarak ¡Despertad! revistanakat kawkïr yatichäwis yanaptʼaspa ukwa qellqtʼasipjje, ukatsti wasitampiw uk liytʼapjjaraki.

16. Ajay toqen jan jankʼak jiltatas amuyasstan ukhajja, ¿kunatsa jan aynachtʼañasäki?

¹⁶ Ajay toqen jiltaskakiñatakejj tiempow munasi. Ukatwa cristianjam sarnaqañatakejj wal chʼamachasiñasa. Bibliampi yanaptʼayasisa suma jaqer tukuñatakejj paciencianïñasawa. Qalltanjja, Bibliarjam sarnaqañatakejj wal chʼamachasiñasaw wakisini, ukampis janiw aynachtʼañasäkiti. Tiempompejja, Jehová Diosajj munki ukarjam amuyañasa, sarnaqañasa janiw chʼamäjjaniti (Sal. 37:31; Pro. 23:12; Gál. 5:16, 17).

17. Diosar jan jitheqtas serviskakiñäni ukhajja, ¿jutïrin kunjamsa Diosar serviñäni?

¹⁷ Diosan servirinakapajja, jutïrin jan pantjasisaw Diosar wiñayatak servipjjani. Uka tiemponjja, Diosajj munki ukham sarnaqañajj janiw chʼamäjjaniti, Diosar yupaychasajj kusisitäñäniwa. Uka uru puriniñapkamajja, Jesusan jiwas layku jiwatapatwa Diosar servisktanjja. Jehová Diosajj Biblia toqe yatichkistu ukarjam sarnaqañataki chʼamachasiskakiñäni ukhajja, Jupan munañaparjamaw sarnaqsna.

18, 19. Diosan Arupajj jakäwisan yanaptʼistaspawa sasin ¿kunatsa sissna?

¹⁸ Aka yatichäwi qalltan parlaniwayktan uka Kevin jilatajja, jan jankʼak colerasir chuymanïñatakejj wal chʼamachasïna. Biblian aski yatichäwinakapat amuytʼasinjja, ukarjamaw sarnaqäna. Ukatsti cristiano masinakapan ewjjtʼanakapsa katoqasirakïnwa. Tiempompejj irpir chuymaninakan yanapiripjamaw irnaqjjäna. Jichhajj pä tunka maranakas irpir chuymanjam irnaqtʼaskchejja, pantjasir chuymapampi jan apayasiñatakejj chʼamachasiskakiñapawa.

¹⁹ Bibliajja, jan wali luräwinak jaytapjjañapatakejj Diosan servirinakapar yanaptʼaskakiwa, ukwa Kevin jilatan sarnaqäwipat yateqtanjja. Ukhamasti, Diosan Arupampejj jakäwisan yanaptʼayasiskakiñäni Diosarus jakʼachasiskakiñäni (Sal. 25:14). Jiwasatï Jehová Diosatakjam sarnaqaskakiñatak chʼamachasiñäni ukhajja, Jupajj yanaptʼistaniwa. Ukhamatwa Bibliajj kunjamsa jakäwisan yanaptʼaskistu uk amuyañäni (Sal. 34:8).