1-3. (a) Mbia mefulu mevé bi ne yen ayaé ya tyendé éyoñe bi dubaneya? (b) Éyoñe bi nji yaé nsisim avale bia yi, minsili mivé bi ne sili bia bebien? (Fombô’ô fôtô ya atata’a ya ayé’é di.)

ÉYOÑE Kévin a nga yé’é benya mejôô ^[1] a mbe a dañe kômbô bo mvôé Yéhôva. Mvus abui mimbu nde a nga taté na a nyu ta’a, meyok, banga, a do fe abia. Asu na Kévin a ve Yéhôva nleme mevak, a mbe a yiane jô’é mam mese Kalate Zambe a tyili. Jam a nga bo le, amu a mbe a too ndi a Yéhôva. A mbe fe a too ndi na, mejô mé me bili ngule ya tyendé ényiñe jé.​—Beh. 4:12.

² Éyoñe Kévin a dubaneya, ye a nga bo teke beta tyendé mam méziñ ényiñe jé? Téké’é, a nga ke ôsu a saé asu na a bi mbamba mefulu, a bo na mefulu mete me tu’a yené. (Beép. 4:31, 32) Éve’an é ne na, Kévin a mbe môt a ji’a wô’ô ôlun. A mbe a yene na, e jô’é mbia fulu ate a mbe ayaé jam. Kévin émien a jô na: “E yé’é na ma juane mbia fulu ate, a mbe a dañ ayaé a lôte na me juane mbia mefulu mevok me mbe me bili!”  Kévin a mbe a yiane tyendé a zene ya bo mban meye’elan, a mbane ya yé’é Kalate Zambe.

³ Aval ane Kévin, bia fe bia yiane tyendé beta be mam ya ényiñe jangan ôsusua na bia duban asu na, ényiñe jangan é lu’an a mam Kalate Zambe a ye’ele. Éyoñe bi dubaneya, bia yem éyoñe te na, bia yiane ke ôsu a tyendé abui bone be mam asu na bi kôme vu Zambe ba Yésus. (Beép. 5:1, 2; 1 P. 2:21) Ajô te, bi ne yene na bi ngenan bi bili mbia fulu ya nye’e bia ve mam mese ve abé abé, mbia fulu ya ko bôte woñ, mbia fulu ya bo ékobôkobô, nge mbia mefulu mefe. Éyoñe bia jeñe na bi tyendé mfa’a te, ye bia kui fo’o na, bi bo de avale da yian? Nge nalé momo, ô ne sili womiene na: ‘Nge me kuiya na ma tyendé beta be mam ényiñe jam, amu jé ma yen ayaé ya tyendé bone be mam béziñ? Aval avé Kalate Zambe a ne volô ma na, me tyendé mam méziñ ényiñe jam?’

4. Amu jé bi nji bo ngule ya ve Yéhôva meva’a nlem éyoñ ése?

⁴ Bia, bôte be nga yeme Yéhôva a nye’e nye, bia kômbô ve nye meva’a nlem a nleme wongan ôse. Ja’a bi bili nkômbane ya bo mam me ne mvo’é, abé bi nga bialé de da bo na, bi bo te ve Yéhôva nleme mevak éyoñ ése. Éyoñe bi tele aval été te, bia funane nlômane Paul, nnye a nga tili na: “Nkômbane ya bo mvaé ñwô ô ne be ma, ve saa ngule ya bo je.”​—Bero. 7:18; Jc. 3:2, Mfefé Nkôñelan.

5. Mintyendane mivé bi nga bo ôsusua na bia duban, ve mbia mefulu mevé bi ne ke ôsu a juane mie?

⁵ Bi nyoñeya ntyi’an ya jô’é mbia be mam bese be ne bo na, bi bo te beta bo ébu’a ya akônda Bekristen. (1 Bec. 6:9, 10) To’o nalé bia ke ôsu a bo abé. (Beco. 3:9, 10) É nji bo mvo’é ya simesane na, éyoñe bi dubaneya nge ke na, éyoñe bi mbili abui mimbu akônda Zambe été, bi vo’o beta bi mbia mefulu nge tôbane minjuk, nge ke na mbia b’asimesan b’aye ke beta ndeñele bia. Mbia mefulu méziñe me ne tabe abui mimbu asu na me man.

6, 7. (a) Jé ja bo na, bi bo ngule ya bo bemvôé be Yéhôva ja’a bi ne bebo mam abé? (b) Amu jé bi nji yiane ko woñe ya sili Yéhôva njaman?

⁶ Mbia mefulu bi bili me nji yiane kamane bia na, bi bi meva’a ya bo bemvôé be Yéhôva, nge ke ôsu a kañe nye. Tame yene jame di: Éyoñe Yéhôva a nga bañete bia na bi bo bemvôé bé, a mbe a yeme na bia ye bo bikobe biyoñe biziñ. (Jean 6:44) Mbôle Zambe a yeme bia, a lañe fe bia minlem, a kôme bia kat avale mam é ne tyelé bia minleme yôp. Yéhôva a yeme fe na, é wô’ô kui na bi bo bikop. Ve nalé a nji kamane bia na bi bo bemvôé bé.

⁷ Nye’an, ñwô ô nga tindi Zambe na, a ve bia beta das​—ényiñe Mone wé a nye’e. (Jean 3:16) Nge bia jôban a jeñe na, Yéhôva a jamé bia éyoñe bia bo bikop a zene ya ntañ, bi ne tabe ndi na, amvôé dangan bia be nye d’aye ke ôsu a bo ngul. (Bero. 7:24, 25; 1 Jean 2:1, 2) Ye bia ye ko woñe ya bu’uban a ma’ane ya ntañ amu bia wô’ôtan na bi nji bo mfuban, nge ke na, bia te bo abé? Momo! Aye bo ane bia bene belane mendim na bi sôbe mo mangan éyoñe me ne mvit. Ntañ ô ne asu bebo mam abé ba jôban. A zene ya ntañ, bi ne bo bemvôé be Yéhôva akusa bo na bi ne bebo mam abé.​—Lañe 1 Timothée 1:15.

8. Amu jé bi nji yiane fete mise mbia mefulu bi bili?

⁸ É ne été na, bi nji fete mise mbia mefulu bi bili. E bo bemvôé be Yéhôva, a  tindi bia na bi dañe vu Zambe ba Krist, a na bi bo ane nkômbane wop ô né. (Bs. 15:1-5) E bo bemvôé be Yéhôva a tindi fe bia na, bi juan a na bi vaa mbia mimboan ényiñe jangan. Ja’a bi ndeme duban, nge ke na, bi tabeya akônda Zambe abui mimbu, bia yiane ‘ke ôsu a bo ésaé mfa’a ya nkean ôsu wongan.’​—2 Bec. 13:11.

9. Aval avé bia yeme na bi ne ke ôsu a ba’ale mfefé môte wongan?

⁹ Bia yiane ke ôsu a ve ngule jangan asu na bi tyendé, a liti na bi ntoo “mfefé môt.” Paul a nga ba’alane bobenyañe bé ya nsisime na: “Na, mi vaa nnôme môt mfa’a ya aval ényiñe denane ya melu mvus, ñwô ôte wo aboé aval ane mimbia minkômbane ya medu’an; a na, mi bo mimfefé mfa’a ya minsisime ya mimlem mianan, a jaé mfefé môt, ñwô ô nga téban ô funa’ane Zambe mfa’a ya zôsô a mfubane ya benya mejôô.” (Beép. 4:22-24) Bifia “mi bo mimfefé,” bia liti na, e bo mfefé môt, a ne jame bia bo ôte’ete’e ôte’etek. Nalé a ve bia ngule nyôl, a liti bia na, to’o bi kañeya Yéhôva den a ntoo abui mimbu, bi ne ke ôsu a yaé nsisim a zene ya bi mbamba mefulu, a bo na mefulu me Kristen mete me yené, mme mete ma liti na bi nto mfefé môt. Ôwé, Kalate Zambe a ne ke ôsu a tyendé ényiñe jangan.

10. Jé bia yiane bo asu na bi ke ôsu a tyendé a zene ya Kalate Zambe, a minsili mivé bi ne sili?

¹⁰ Bia yiane ve ngule jangan ése nge bia yi na, Kalate Zambe a ke ôsu a tyendé ényiñe jangan. Ve amu jé da sili na bi bo de? Nge Yéhôva a botane ngule bia ve, nga bia yene na e yaé nsisim aye dañe bo tyi’ibi éyoñe te? Ye Yéhôva a se ngule ya volô na, bi yene tyi’ibi ya dañe mbia b’asimesane bangan, asu na bi bo ngule ya liti mbamba mefulu?

11-13. Amu jé Yéhôva a yi na bi ve ngule jangan ése asu na, bi dañe mbia mefulu bi bili?

¹¹ Éyoñe bia yene biôm Yéhôva a nga té, bia yene fo’o na a bili nya ngulu. Éve’an é ne na seconde ase a lôt, nlô jôbô a bo na biôm betône bemilion betan, bi kuli abui ngul. Mon abime ngul ya été nnye a tulan a zu kui si va. Ve abime te da yiane asu na ayôñ a éfufup bi bo si va. Mam mete mese, mme ma bo na ényiñ é bo mvo’é si. (Bs. 74:16; És. 40:26) Yéhôva a ne meva’a ya ve bebo bisaé bé ba nyiñe si ngule ja yiane be. (És. 40:29) Yaa, Zambe a ne kui na a ve bia ngule ya dañe mbia fulu ase teke na bi ve ngul éziñ, nge ke teke na bi nyoñe ñye’elan wo so bikobe bite yat. Ve a bo ke de. Amu jé?

¹² Yéhôva a nga ve bia beta das, nnye a ne fili ya top. Éyoñe bia tobe na bia bo nkômbane Zambe, bi va’a fe ngule jangan ése na bi bo wô, bia liti Yéhôva beta nye’an. Bia liti nkômbane bi bili na, bia ve nye nleme mevak. Bia su’u fe ngule Yéhôva a bili na a jôé bôt. Satan a nga wosane ngule Yéhôva a bili na a jôé bôt avale da yian. Nde ñhe, ngule bia ve a nlem ôse na bi su’u ngule Yéhôva a bili na a jôé bôt, é ne fo’o dia mise m’Ésa wongane ya yôp été. (Job 2:3-5; Mink. 27:11) Nge Yéhôva a bo na minjuk a meve’ele mi bo teke bia kui, bia ye kusa jô na bia wulu ba’aba’a a nye a na bia su’u ngul a bili na a jôé môt a binam, ve bia ye ke bo ngule ya liti mam ma yemete njôan ôte.

¹³ Ve Yéhôva a jô bia na bi ve ‘ngule jangan’ ése na bi bi mbamba mefulu. (Lañe 2 Pierre 1:5-7, Mfefé Nkôñelan; Beco. 3:12) A yi na bi ve ngule jangan ése na bi jôé asimesane dangan, a avale bia wô’ôtane mam. (Bero. 8:5; 12:9) Éyoñe bia ve ngul a nleme wongan ôse mfa’a te, bi ne meva’a été éyoñe bia yen ane Kalate Zambe a ke ôsu a tyendé ényiñe jangan.

14, 15. Jé bi ne bo asu na, bi bi mefulu Yéhôva a nye’e? (Fombô’ô nka’ale ô ne nlô ajô na, “ Kalate Zambe a meye’elan be nga tyendé binyiñe biap.”)

¹⁴ Ye bi nji yene na, bia ve Yéhôva nlem mevak éyoñ bia jeñe na bi bi mbamba mefulu? Bi nji yiane jeñe ve na bi yeme mam bia yiane tyendé. Bia yiane ve ngul ése a jeñe na bi tôñe melebe me Zambe. Ajô te, kalate Beromain 12:2 a jô na: “Te boan éfunan a si nyô: ve mi veñesa’an ñveñesan ya bo minsisim mienane mimfefé, nde mi aye ve’ele mve’elane ya bo mam me ne nkômbane ya Zambe, mam me ne mvaé, me anyoñeban, a me ne mvo’é ésese’e.” A zene ya mejô mé a mbamba nsisim, Yéhôva a volô bia na bi yeme nkômbane wé, bi bo wô, a bi tyendé ényiñe jangan na é bo aval a yi. Éyoñe bia lañe Kalate Zambe môs ôse, bi fase mam bia lañ, a bi ye’elane na bi bi mbamba nsisim, bia liti na bia ve ngule jangan ése. (Luc 11:13; Beg. 5:22, 23) Nge bia jô’é na nsisime Zambe ô liti bia zen, a bo na ôsimesane wongan ô lu’an a ôsimesane Yéhôva bia koone wô e Kalate Zambe été, bia ye dañe bi mbamba b’asimesan, mbamba minkobô, a mbamba mimboan. To’o nalé, da ye sili na bi ke ôsu a tabe ntyele na mbia mefulu méziñ bia to bi fiti’i be bia bebien, me beta so.​—Min. 4:23.

¹⁵ Nge bi vaa na bia yiane lañe Kalate Zambe môs ôse, bia yiane fe yé’é mejô me Zambe a zene ya bekalate bangan, bi ba’ale ôsimesane na bia kômbô vu mbamba mefulu me Yéhôva. Bôte béziñ be yeneya mfi ya tôkan, a e beta lañe bifuse biziñe ya Kalate Zambe. Be lañeya fe minlô mejô miziñe ya Nkume mmombô a bete nge ke Réveillez-vous!, me ne volô be na be bi mefulu Bekristen, nge dañe mbia mefulu méziñ.

16. Amu jé bi nji yiane bili atek nlem nge bi nji kui na, bi ji’a tyendé?

¹⁶ Nge ô yene na ô nji yaé avôle nsisim wo yiane ba’ale na, avale nyaéane te da sili abui éyoñ. E jeñe na bi bi mbamba mefulu, a ne jam bia bo ôte’ete’e ôte’etek. Ajô te, bia yiane bo ôjibi nté bia jô’é na Kalate Zambe a ke ôsu a tyendé ényiñe jangan aval é ne mvo’é. Bi ne taté na bia jôé bia bebien asu na bi bo mam me ne mvo’é mise me Zambe. Ve biyoñe biziñ, nté bia bo na asimesane dangan é lu’an a di Yéhôva Zambe ôte’ete’e ôte’etek, nde fe bia yene tyi’ibi ya bo mbamba be mam nalé.​—Bs. 37:31; Mink. 23:12; Beg. 5:16, 17.

17. Nge bia wulu ba’aba’a a Yéhôva, ôsimesan ôvé bi ne bi a lat a mbamba be mam ba yange bia melu ma zu?

¹⁷ Bebo bisaé be Yéhôva ba wulu ba’aba’a a nye, ba ye su’ulane bi fane ya kañe nye nnôm éto teke nsem. Éyoñe te da ye bo tyi’ibi ya liti mbamba mefulu, ve bia ye bi beta mevak kom ése. Éyoñe ji, a zene ya ntañ, bi ntoo ngule ya kañe Zambe wongan a nye’e bia. Bi ne de bo to’o bi ne mbialan abé été, nge bia yeme mebo si na bi jô’é Kalate Zambe a tyendé bia.

18, 19. Aval avé bi ne tabe ndi na, Kalate Zambe a bili ngule ya ke ôsu a tyendé ényiñe jangan?

¹⁸ Kévin bia te jô nye atata’a ya ayé’é di, a nga ve ngule jé ése na a bo teke beta wô’ô ôlun avôl. A nga fas, a bo jôme miñye’elane ya Kalate Zambe mia jô. A nga yebe fe mvolan, a melebe Bekristen bevok. Mvus abime mimbu éziñ, Kévin a nga bo beta mintyendan ényiñe jé. A nga su’ulane bo diakon, a ne fe mvendé ya akônda den a ntoo mimbu 20. Akusa bo nalé, a yeme na a yiane ke ôsu a tabe ntyel a mbia fulu ya ji’a wô’ô ôlun.

¹⁹ Nkañete Kévin wu wo liti bia na, Kalate Zambe a volô bebo bisaé be Zambe na be tyendé ényiñe jap. Nde ñhe, njô’ané Kalate Zambe a ke ôsu a tyendé bia môs ane môs, a volô fe bia na, bi bo beta bemvôé be Yéhôva. (Bs. 25:14) Avale bia yen ane Yéhôva a botan ngule bia ve, nde bia kôme fo’o yeme na Kalate Zambe a ne tyendé ényiñe jangan.​—Bs. 34:8.