1-3. (1) Ta oktak ko emaroñ pen ñan ad kõm̦m̦ani ãlikin ad peptaij? (2) Ta kajjitõk ko jemaroñ jino l̦õmn̦ak kaki ñe jej kile bwe ewõr jet men ko epen ad oktak jãni? (Lale pija ko itulõñ.)

 IUM̦WIN elõñ iiõ, Kevin ear kããm̦bõl̦, kõbaatat, kadek, im bõk uno ko rekkajjoor. ^[1] (Lale kõmel̦el̦e eo ilo jem̦l̦o̦kin katak in.) Tokãlik ear katak kõn Jeova im kõn̦aan epaake. Bõtab, bwe en maroñ jem̦jerãik Jeova, ear aikuj kõm̦m̦an oktak ko rel̦l̦ap ilo mour eo an. Ear maroñ kõm̦m̦ani oktak kein ikijjeen jipañ eo jãn Jeova im naan ko an ilo Baibõl̦.​—Hibru 4:12.

² Ãlikin an kar Kevin peptaij, ear aikuj wõnm̦aanl̦o̦k im kõm̦m̦an oktak ko ilo an kakõm̦anm̦anl̦o̦k wãween ko ej aikuj kwal̦o̦ki ãinwõt juon Kũrjin. (Epesõs 4:31, 32) Ñan waanjoñak, e kar juon eo ejidimkij an illu. Ear bwilõñ ke ear kile joñan an pen ñan an kar aikuj katak ñan dãpij an illu. Ilo m̦ool, Kevin ear ba bwe epenl̦o̦k an kar katak ñan dãpij an illu jãn an kar bõjrak jãn men ko renana ear kõm̦m̦ani m̦okta jãn an kar peptaij! Bõtab, ear maroñ  kõm̦m̦an oktak kõn an kar akwel̦ap ñan Jeova bwe en jipañe im ilo an lukkuun katak Baibõl̦ ippãn make.

³ Ãinwõt Kevin, elõñ iaad jaar aikuj kõm̦m̦an oktak ko rel̦l̦ap m̦okta jãn ad peptaij kõnke wãween ad mour en ekkar ñan ta ko Baibõl̦ ej ba. Meñe em̦õj ad peptaij, ak jej kile bwe ewõr oktak jiddik ko jej aikuj kõm̦m̦ani ñan ad maroñ anõke Anij im Kũraij. (Epesõs 5:1, 2; 1 Piter 2:21) Ñan waanjoñak, jemaroñ kile bwe el̦ap ad ellotaan ak ekkã ad kõnnaan kõn ro jet im ba men ko rejjab em̦m̦an kõn er. Ak bõlen jet iien el̦ap ad l̦õmn̦ak kõn wãween an ro jet l̦õmn̦ak kõn kõj im joñan ad mijak armej, epen ad kõm̦m̦ani men ko rejim̦we. Bõlen jaar kate kõj ñan kõm̦m̦an oktak ium̦win elõñ iiõ ak jej wõnm̦aanl̦o̦k im kõm̦m̦ani ejja likjab ko wõt jej kõm̦m̦ani. Kõn men in, kwõmaroñ jino l̦õmn̦ak im ba: ‘Etke elukkuun pen aõ kõm̦m̦ani oktak jiddik kein? Ta ko ij aikuj kõm̦m̦ani ñan l̦oori ta ko Baibõl̦ ej ba bwe in maroñ wõnm̦aanl̦o̦k im kakõm̦anm̦anl̦o̦k wãween ko ij aikuj kwal̦o̦ki ãinwõt juon Kũrjin?’

4. Etke jejjab maroñ kam̦õn̦õn̦õik bũruon Jeova ilo aolep men ko jej kõm̦m̦ani?

⁴ Jej yokwe Jeova, im jelukkuun kõn̦aan kam̦õn̦õn̦õik bũruon. Ak ekabũrom̦õjm̦õj bwe jejjab maroñ kam̦õn̦õn̦õik bũruon aolep iien kõnke jejjab weeppãn. Enañin aolep iien jej bõk ejja eñjake eo an rijjilõk Paul, eo ear ba: “Kõn̦aan ej pãd ippa, a bwe in kõm̦m̦an men eo em̦m̦an ejjab pãd ippa.”​—Rom 7:18; Jemes 3:2, UBS.

5. Ta oktak ko jaar kõm̦m̦ani m̦okta jãn ad kar peptaij, im ta ko jemaroñ aikuj wõnm̦aanl̦o̦k im tarin̦aeiki?

⁵ M̦okta jãn ad kar del̦o̦ñtok ilo doulul in, jaar aikuj bõjrak jãn ad kõm̦m̦ani men ko Jeova ediki. (1 Korint 6:9, 10) Bõtab, ejjañin jako ad jab weeppãn. (Kolosse 3:9, 10, UBS) Kõn men in, jej wõnm̦aanl̦o̦k im kõm̦m̦an likjab ko meñe emootl̦o̦k elõñ iiõ kiiõ jãn ke jaar peptaij. Jãn iien ñan iien, emaroñ wal̦o̦k kõn̦aan ak eñjake ko rejekkar ippãd, ak jemaroñ lo bwe epen ad anjo̦ ioon m̦õjn̦o̦ ak likjab ko ad. Ilo m̦ool, jemaroñ aikuj tarin̦aeiki jet iaan m̦õjn̦o̦ kein ium̦win elõñ iiõ.

6, 7. (1) Ta eo ear kõmaroñ kõj bwe jen jem̦jerãik Jeova meñe jejjab weeppãn? (2) Etke jejjab aikuj bõjrak jãn ad jar bwe Jeova en jol̦o̦k ad bõd?

⁶ Meñe jejjab weeppãn, ak jemaroñ jem̦jerãik Jeova im karejar ñane. Em̦m̦an ñe aolep iien kwõj keememej wãween am̦ kar jino epaake Jeova. E eo ear loe men ko rem̦m̦an kõn kwe im ear kõn̦aan bwe kwõn jel̦ã kõn e. (Jon 6:65, UBS) Jeova ear bar jel̦ã bwe ewõr m̦õjn̦o̦ im likjab ko ippam̦ im bwe ewõr iien kwõnaaj kõm̦m̦an bõd. Bõtab, ear kõn̦aan wõt bwe kwõn jem̦jerãik e.

⁷ Joñan an Jeova yokwe kõj ear letok juon menin letok elukkuun aorõk. Ear jilkintok Nejin ñan lal̦ in bwe en ajel̦o̦k mour eo an kõn jerawiwi ko ad. (Jon 3:16) Ñe jej kõm̦m̦an bõd, jemaroñ kajjitõk bwe Jeova en jol̦o̦k ad bõd. Im ikijjeen katok in mour eo an Jijej, jemaroñ tõmak bwe Jeova enaaj jol̦o̦k ad bõd im bwe jenaaj wõnm̦aanl̦o̦k im jem̦jerãik e. (Rom 7:24, 25; 1 Jon 2:1, 2, UBS) Meñe jemaroñ l̦õmn̦ak bwe kõj rijjerawiwi, ak jejjab aikuj bõjrak jãn ad jar bwe Jeova en jol̦o̦k ad bõd. Keememej bwe Jijej ear mej kõn rijjerawiwi ro me rej ukel̦o̦k jãn bõd ko aer. Kõn men in, ñe jejjab jar bwe Anij en jol̦o̦k ad bõd, ej ãinwõt ñe jej m̦akoko in kwal̦e peid ñe ettoon. El̦ap ad kam̦m̦oolol bwe Jeova ear kõpel̦l̦o̦k juon ial̦ bwe jen maroñ jem̦jerãik e meñe jejjab weeppãn!​—Riit 1 Timote 1:15.

8. Etke jejjab aikuj kõjekdo̦o̦n m̦õjn̦o̦ ko ad ak wõnm̦aanl̦o̦k im kõm̦m̦ani?

 ⁸ Jejel̦ã bwe jejjab aikuj kõjekdo̦o̦n m̦õjn̦o̦ ko ad ak wõnm̦aanl̦o̦k im kõm̦m̦ani ilo ad jekpen im ba bwe ãindein kõj. Em̦õj an Jeova kwal̦o̦k ñan kõj kõn kain armej rot ro ekõn̦aan jem̦jerãik er. (Sam 15:1-5, UBS) Kõn men in, ñe jekõn̦aan epaakel̦o̦k Jeova, jej aikuj kate kõj ñan anõke e im Nejin. Jej aikuj bareinwõt kate kõj ñan jel̦ã irooj ioon m̦õjn̦o̦ ko ad, im bõlen jemaroñ julo̦k jet iaaer. Jekdo̦o̦n ewi toon ad karejar ñan Jeova, jej aikuj kate kõj ñan kakõm̦anm̦anl̦o̦k wãween ko jej kwal̦o̦ki ãinwõt juon Kũrjin.​—2 Korint 13:11, NW.

9. Ewi wãween ad jel̦ã bwe ad kõn̦ak armej eo ekããl ej juon men jej wõnm̦aanl̦o̦k im kõm̦m̦ane?

⁹ Rijjilõk Paul ear jiroñ Kũrjin ro im ba: “Kom̦win utũk armej em̦or ekkar ñan ami etetal m̦okta, eo enanal̦o̦k ekkar ñan m̦õm̦ ko in m̦on̦, im kom̦win [wõnm̦aanl̦o̦k im, NW] erom ekããl ilo bũruomi, im bwe kom̦win kõn̦ak armej ekããl, eo ekkar ñan Anij em̦õj kõm̦m̦ane ekããl ilo wãnõk im kwõjarjar in m̦ool.” (Epesõs 4:22-24) Ealikkar bwe jej aikuj wõnm̦aanl̦o̦k im kate kõj ñan kõm̦m̦an oktak im “kõn̦ak armej ekããl” ak kwal̦o̦k wãween ko juon Kũrjin ej aikuj kwal̦o̦ki. Kõn men in, jekdo̦o̦n ewi toon ad karejar ñan Jeova, ak aolep iien jenaaj katak elõñ men ko rem̦m̦an kõn e. Im Baibõl̦ emaroñ jipañ kõj ñan wõnm̦aanl̦o̦k im kõm̦m̦an oktak ko bwe en l̦apl̦o̦k ad anõki men ko rem̦m̦an kõn e.

10. Ta eo jej aikuj kõm̦m̦ane bwe Naanin Anij en wõnm̦aanl̦o̦k im jipañ kõj ñan kõm̦m̦an oktak ko, im ta kajjitõk ko jemaroñ l̦õmn̦ak kaki?

¹⁰ Kõj aolep jekõn̦aan l̦oore ta ko Baibõl̦ ej ba. Bõtab, bwe jen wõnm̦aanl̦o̦k im kõm̦m̦an oktak ko, jej aikuj lukkuun kate kõj. Etke jej aikuj lukkuun kate kõj? Etke Jeova ejjab kõm̦m̦an bwe en pidodo ñan ad kõm̦m̦ani men ko rejim̦we?

11-13. Etke Jeova ekõn̦aan bwe jen lukkuun kate kõj ñan anjo̦ ioon m̦õjn̦o̦ ko ad?

¹¹ Ñe jej l̦õmn̦ak kõn aolep men ko ilo lañ im ioon lal̦ in, jejel̦ã bwe ewõr an Jeova maroñ ñan kõm̦m̦ane jabdewõt men. Ñan waanjoñak, ear kõm̦anm̦an al̦. Joñan an al̦ lukkuun kajoor, el̦ap meram im bwil ej wal̦o̦ktok jãne kajjojo jekõn. Jidikin wõt kajoorin al̦ jej aikuji bwe aolep men ko ioon lal̦ in ren maroñ mour. (Sam 74:16, UBS; Aiseia 40:26) Jeova ej bareinwõt kakajoor armej ro an ñe rej aikuj jipañ. (Aiseia 40:29, UBS) Ealikkar bwe ejjab pen ñan an Jeova naaj kar kõm̦m̦an bwe en pidodo ñan ad anjo̦ ioon m̦õjn̦o̦ im kõn̦aan ko ad rebõd. Ak etke ejjab kõm̦m̦ane men in?

¹² Jeova ear letok ñan kõj maroñ in jokãlõt. Ej kõtl̦o̦k bwe jen make kããlõt el̦aññe jenaaj pokake e ke ak jaab. Ñe jej kããlõt ñan pokake e im kate kõj ñan kõm̦anm̦an ankilaan, jej kwal̦o̦k bwe jej yokwe e im jekõn̦aan kabuñbũruon. Setan ej ba bwe ejjab tõllo̦kũn ñan an Jeova tõl. Bõtab, ñe jej pokake Jeova, jej kwal̦o̦k bwe jekõn̦aan bwe e eo en ad Rũtõl. Im jej tõmak bwe Jemãd Jeova el̦ap an m̦õn̦õn̦õ ñe ej loe ad kate kõj ñan pokake e. (Job 2:3-5; Jabõn Kõnnaan 27:11) Ñe jej kate kõj ñan anjo̦ ioon m̦õjn̦o̦ ko ad meñe ejjab pidodo ñan kõj, men in ej kaalikkar ad tiljek ñan Jeova im jej kwal̦o̦k bwe jekõn̦aan bwe e eo en ad Rũtõl.

¹³ Jeova ej jiroñ kõj bwe jej aikuj lukkuun ‘kate kõj’ ñan anõke wãween ko rem̦m̦an kõn e. (Riit 2 Piter 1:5-7; Kolosse 3:12) Ej bareinwõt kõtmãne bwe jen kate kõj ñan irooj ioon l̦õmn̦ak im eñjake ko ad. (Rom 8:5, UBS; 12:9) Jabdewõt iien ñe jej kate kõj ñan kõm̦m̦an oktak ko im jej lo tõprak, men in ej kõm̦m̦an bwe jen lukkuun m̦õn̦õn̦õ.

14, 15. Ta ko jemaroñ kõm̦m̦ani bwe jen maroñ kwal̦o̦ki wãween ko Jeova ekõn̦aan bwe juon Kũrjin en kwal̦o̦ki? (Lale bo̦o̦k eo “ Aer Riit Baibõl̦ im Jar Ear Jipañ Er ñan Kõm̦m̦an Oktak.”)

¹⁴ Ta eo jej aikuj kõm̦m̦ane bwe jen maroñ kwal̦o̦ki wãween ko Jeova ekõn̦aan bwe juon Kũrjin en kwal̦o̦ki? Ijello̦kun ad kããlõt ñan kõj make ta ko jekõn̦aan kakõm̦anm̦anil̦o̦k, jej aikuj kõtl̦o̦k bwe Anij en tõl kõj. Rom 12:2 (UBS) ej ba: “Kom̦win jab anõk m̦antin lal̦ in, ak kom̦win kõtl̦o̦k an Anij ukot bũruomi, kõn an lukkuun kõkããl l̦õmn̦ak ko ami. Innem kom̦ naaj maroñ in jel̦ã ankilaan Anij men eo em̦m̦an, im eweeppãn im ej kabuñbũruon.” Jeova ej jipañ kõj bwe jen jel̦ã ta ko ekõn̦aan ikijjeen Baibõl̦ eo im kajoor eo an. Jej aikuj riit Baibõl̦ kajjojo raan, kõl̦mãnl̦o̦kjen̦ kõn men ko jej riiti, im jar ñan Jeova bwe en letok kajoor eo an. (Luk 11:13; Galetia 5:22, 23) Ñe jej kõm̦m̦ani men kein, Jeova emaroñ jipañ kõj bwe jen jel̦ã ta ko ekõn̦aan, im jemaroñ katak ñan l̦õmn̦ak ãinwõt e. Kõn men in, men ko jej l̦õmn̦aki, ba, im kõm̦m̦ani renaaj l̦apl̦o̦k aer kam̦õn̦õn̦õik bũruon Jeova, im jenaaj jel̦ã irooj ioon m̦õjn̦o̦ ko ad. Meñe ãindein, ak jenaaj aikuj wõnm̦aanl̦o̦k im kate kõj ñan tarin̦aeiki m̦õjn̦o̦ ko ad.​—Jabõn Kõnnaan 4:23.

¹⁵ Jejjab baj riit Baibõl̦ wõt kajjojo raan, ak jej aikuj bareinwõt kal̦apl̦o̦k ad mel̦el̦e ilo ad bõk jipañ jãn bok ko ad ãinwõt Naan in Keeañ ko im Awake! ko. Elõñ katak ko ilo bok kein me remaroñ jipañ kõj bwe jen jel̦ã wãween ad maroñ anõke wãween ko rem̦m̦an kõn Jeova im wãween ad maroñ anjo̦ ioon m̦õjn̦o̦ ko ad. Jemaroñ lo jet katak ak eoon ko me el̦ap aer jipañ kõj. Jemaroñ kakon̦i katak kein ak kakõl̦l̦eiki eoon kein bwe jen maroñ bar kwal̦o̦ki im riiti jãn iien ñan iien.

16. Etke jejjab aikuj in ebbeer ñe jejjañin kõm̦m̦ani elõñ iaan oktak ko jekõn̦aan kõm̦m̦ani?

¹⁶ Ebõk iien ñan katak ñan anõki wãween ko rem̦m̦an kõn Jeova. Kõn men in, ñe kwõj l̦õmn̦ak bwe kwõjjañin kõm̦m̦ani elõñ iaan oktak ko kokõn̦aan kõm̦m̦ani, kwõj aikuj kijenmej. Ilo jinoin, bõlen kwõnaaj aikuj iuun kwe make bwe kwõn kõm̦m̦ani ta ko Baibõl̦ ej ba. Bõtab, ilo an l̦apl̦o̦k am̦ l̦õmn̦aki im kõm̦m̦ani men ko Jeova em̦õn̦õn̦õ kaki, enaaj pidodol̦o̦k am̦ l̦õmn̦ak ãinwõt e im kõm̦m̦ani men ko rejim̦we.​—Sam 37:31; Jabõn Kõnnaan 23:12; Galetia 5:16, 17, UBS.

17. Ñe jej tiljek wõt ñan Jeova, ta ko jej reim̦aanl̦o̦k ñani ilju im jekl̦aj?

¹⁷ Jej reim̦aanl̦o̦k ñan iien eo jenaaj  weeppãn im karejar ñan Jeova ñan indeeo. Ilo naaj tõre en̦, eban bar wõr m̦õjn̦o̦ ko ippãd me jenaaj aikuj tarin̦aeiki im enaaj lukkuun pidodo ñan ad anõke Jeova. Meñe jejjab weeppãn kiiõ, ak jemaroñ kabuñ ñan Jeova kõnke ear letok ñan kõj menin letok eo kõn katok in mour eo an Jijej. El̦aññe jej wõnm̦aanl̦o̦k im kate kõj ñan kõm̦m̦ani oktak ko jej aikuj kõm̦m̦ani im l̦oore ta ko Baibõl̦ ej jiroñ kõj ñan kõm̦m̦ani, jemaroñ kabuñbũruon Jeova meñe jejjab weeppãn.

18, 19. Ta eo emaroñ kõm̦m̦an bwe jen lukkuun tõmak bwe Baibõl̦ emaroñ jipañ kõj ñan wõnm̦aanl̦o̦k im kõm̦m̦an oktak ko ilo mour ko ad?

¹⁸ Kevin ear lukkuun kate bwe en maroñ jel̦ã dãpij an illu. Ear kõl̦mãnl̦o̦kjen̦ kõn men ko ear riiti ilo Baibõl̦ im lukkuun kate ñan kõm̦m̦an oktak ko ilo mour eo an. Ear bareinwõt l̦oore naanin kakapilõk ko jãn rũttõmak ro m̦õttan. Ear bõk jejjo iiõ ñan an Kevin kõm̦m̦ani oktak ko ear aikuj kõm̦m̦ani, im tokãlik ear maroñ erom juon rijjipañ ilo eklejia eo an. Im ium̦win 20 iiõ ko m̦aantak in an jerbal ãinwõt juon iaan em̦m̦aan ro rej lale eklejia. Meñe ãindein, ak ej kile bwe ej aikuj wõnm̦aanl̦o̦k wõt im tarin̦aeik m̦õjn̦o̦ ko an.

¹⁹ Ãinwõt Kevin, jemaroñ wõnm̦aanl̦o̦k im kakõm̦anm̦anl̦o̦k wãween ko ippãd me juon Kũrjin ej aikuj kwal̦o̦ki. Ad kõm̦m̦ane men in enaaj kõm̦m̦an bwe jen epaakel̦o̦k wõt Jeova. (Sam 25:14, UBS) Im ñe jej kate kõj joñan wõt ad maroñ ñan kõm̦m̦an oktak ko ñan kabuñbũruon Jeova, enaaj jipañ kõj ñan lo tõprak. Men in enaaj kõm̦m̦an bwe jen lukkuun tõmak bwe Baibõl̦ emaroñ jipañ kõj ñan wõnm̦aanl̦o̦k im kõm̦m̦an oktak ko ilo mour ko ad.​—Sam 34:8.