MOKUEENDA kuomanima omanyingi, Kevin ankho uyumba omawela, nokusipa, nokunwa unene, nokupuena omapangwe. ^[1] (Tala okatoi konthyulilo yonthele.) Konyima elilongesa konthele ya Jeova iya ahande okukala epanga liae. Mahi opo alinge ngotyo ankho wesukisa okulinga omapiluluko omanene momuenyo wae. Etyivili vala okulinga omapiluluko nekuateso lia Jeova iya nepondolo Liondaka Yae, Ombimbiliya.—Hebreus 4:12.

1-3. (a) Omapiluluko patyi apondola okupuiya okuelinga tyina tuamambatisalwa? (b) Putyina tulinga omapiluluko epuiya unene, omapulo patyi tuna okulilinga? (Tala olutalatu pefo pahimbikila onthele.)

² Alo umwe konyima yombatisimu, Kevin ankho wesukisa okulinga omapiluluko amwe opo akale Omukristau ukahi nawa. (Efésios 4:31, 32) Mongeleka, ankho kasete okunumana. Wahuvile etyi aimbuka okuti kekahi nokutyivila  okulilongesa okukondola onyengo. Mahi, Kevin apopi okuti okulilongesa okukondola onyengo tyemupuiyile vali tyipona okuyekapo ovipuka ankho alinga puetyi ehenembatisalwe! Wetyivila vala okulinga omapiluluko nekuateso lia Jeova iya nokulilongesa Ombimbiliya.

³ Puetyi tuhenembatisalwe, ovanyingi puonthue valinga omapiluluko omanene opo vatyinde omuenyo welikuata netyi Ombimbiliya ipopia. Mahi nongotyo, nkhele tuesukisa okulinga omapiluluko amwe omatutu opo tukale novituwa ngo via Huku no via Kristu. (Efésios 5:1,2; 1Pedro 2:21) Mongeleka, pamwe tuimbuka okuti tuliyava ine hamwe tupopia omapita vakuetu. Ine hamwe ovikando vimwe tuna otyiho tyokuti oityi vakuetu mavasoko ine mavapopi konthele yotyipuka tyimwe tuahalingile nawa. Hamwe tukahi nokulinga omapiluluko mokueenda kuomanima omanyingi, mahi nongotyo nkhele tutualako okulinga oviponyo. Tupondola okulipula okuti: ‘Omokonda yatyi hikahi nokutyivila okulinga omapiluluko omatutu? Oityi ndyina okulinga opo ndyiendele muetyi Ombimbiliya ipopia opo ndyitualeko okuovola okukala novituwa oviwa?’

4. Omokonda yatyi katutyivili okuhambukiswa Jeova ovikando aviho?

⁴ Mokonda onthue tuhole Jeova, ehando lietu okulinga ovipuka vimuhambukiswa nomutima wetu auho. Mahi, katutyivili okumuhambukiswa apeho mokonda tuvakuankhali. Pamwe tulitehelela nga apostolu Paulu wapopia okuti: “Ndyina ehando liokulinga etyi tyaviuka, mahi ndyitupu ounongo wokutyilinga.”—Romanos 7:18; Tiago 3:2.

5. Omapiluluko patyi tuna tulinga tyina tuehenembatisalwe? Mahi ovitateka patyi vitunda keyembelo lietu lioukuankhali matukala navio?

⁵ Tyina nkhele tuhenekale onombangi mba Jeova, tuna okuyekapo okulinga ovipuka Jeova eyele. (1 Coríntios 6:9,10) Mahi nongotyo nkhele tuvakuankhali. (Colossenses 3:9,10) Nkhele tutualako okulinga oviponyo namphila tuambatisaluale kohale. Ovikando vimwe tupondola okukala nomapeleyo nomahando apenga, ine tulinga ononkhono onene mbokulityilika omayembelo etu. Tupu, hamwe tukahi nokulwa nomahando etu mokueenda kuomanima omanyingi.

6, 7. (a) Oityi tyituavela omphitilo yokukala omapanga a Jeova namphila tuvakuankhali? (b) Omokonda yatyi katupondola okulikondola okuita Jeova etuevele?

⁶ Namphila tuvakuankhali, nongotyo tupondola okukala omapanga a Jeova nokumuumbila. Apeho hinangela oñgeni wakala epanga lia Jeova. Wekulekesa ovipuka oviwa iya ankho uhanda umunoñgonoke. (João 6:44) Tupu Jeova utyii okuti tuvakuankhali iya tulinga oviponyo. Mahi Jeova nkhele uhanda ukale epanga liae.

⁷ Mokonda Jeova utuhole unene wetuavela otyiawa tyimwe otyiwa. Watuma Omona wae pano pohi, iya konyima Jesus aave omuenyo wae ngotyilikutila mokonda yononkhali mbetu. (João 3:16) Tyina tuamalingi otyiponyo tupondola okuita ku Jeova etuevele. Mokonda yotyilikutila tyeyovo, tupondola okukala nonthumbi yokuti metuevela iya atukala omapanga ae. (Romanos 7:24, 25; 1 João 2:1, 2) Hinangela okuti Jesus wankhila ovanthu ovakuankhali.  Namphila tuete okuti etyi tualinga otyivi unene, katupondola okuyekapo okulikuambela ku Jeova na etuevele. Inkha katuiti opo etuevele, otyo tyelifwa nokuanya okukoha pomavoko ngwe asila. Tupandula unene Jeova wetuavela omphitilo yokukala omapanga ae namphila tuvakuankhali! —Tanga 1 Timóteo 1:15.

8. Omokonda yatyi tuna okusuka neyembelo lietu liokulinga ovivi?

⁸ Tyotyili, onthue katupondola okutomba oviponyo vietu ine okuliamena mokonda yoviponyo vietu. Jeova utupopila okuti uhanda ovanthu aveho vakale omapanga ae. (Salmo 15:1-5) Ngotyo inkha tuhanda okufuena ku Jeova, tuna okutualako okumuhetekela tupu nokuhetekela Omona wae. Tupu tuna okuyunga omalusoke etu nokulityilika ovivi. Katyesukisile omanima eñgapi tuambatisalwa, mahi tuna okutualako okupilulula ovituwa vietu.—2 Coríntios 13:11.

9. Oñgeni tutyii okuti tuna okutualako okulivaleka omunthu omupe?

⁹ Apostolu Paulu wapopila Ovakristau okuti: “Onwe mualongeswa okuti muna okuyekapo ovituwa vienyi viokohale, vielikuata kumwe nomahando enyi okohale. Mahi, muesukisa okupilulula onkhalelo yenyi yokusoka nokutualako okulivaleka ovanthu ovape watungua ngetyi Huku ahanda, mouviuki wotyotyili nekolelo.” (Efésios 4:22-24) Otyo tyilekesa okuti tuesukisa okulinga ononkhono opo “tulivaleke omunthu omupe.” Ngotyo katyesukisile omanima eñgapi tuumbila Jeova, tupondola apeho okulilongesa vali ovituwa ovio. Ombimbiliya ipondola okutukuatesako okupilulula ovituwa vietu, atukala novituwa ngo via Huku.

10. Oityi tuna okulinga opo tulinge omapiluluko nekuateso lio Mbimbiliya? Iya omapulo patyi tuna okulilinga?

¹⁰ Onthue atuho tuhanda okulandula etyi Ombimbiliya ilongesa. Mahi tuesukisa okulinga ononkhono inkha tuhanda okutualako okulinga omapiluluko. Omokonda yatyi tuesukisila okulinga ononkhono? Okuti Jeova kapondola okulinga atyiho opo tyitupepukile okulinga etyi tyaviuka?

11-13. Omokonda yatyi Jeova akevela tulinge opo tuluise eyembelo lietu liokulinga ovivi?

¹¹ Tyina tusoka ovipuka aviho Jeova atunga, tyituavela onthumbi yokuti Jeova una epondolo liokulinga kese tyipuka. Mongeleka, walinga ekumbi otyipuka tyimwe tyavilapo unene, lieta omutenya noutokotwe. Mahi opo ovipuka vikaleko nomuenyo kombanda yohi, kaviesukisile outokotwe auho wekumbi. (Salmo 74:16; Isaías 40:26) Jeova tupu wavela epondolo ovaumbili vae opo vaimbuke onalupi vesukisa omutenya. (Isaías 40:29) Tyayandyuluka nawa okuti, inkha Jeova uhanda, upondola okutepulula eyembelo lietu nokutupola omahando omavi. Ngotyo, omokonda yatyi ehetyilingila?

¹² Jeova wetuavela epondolo liokuliholovonena. Utuyeka tuholovone okumutavela ine okumuanya. Tyina tuholovona okumutavela nokulinga ehando liae, tulekesa okuti tumuhole tupu tuhanda okumuhambukiswa. Satanasi wapopia okuti Jeova ha mutumini ukahi nawa. Mahi tyina tutavela ku Jeova, tulekesa okuti tutavela Outumini wae. Iya tupondola okukala nonthumbi yokuti Tate yetu woluembia upanda ononkhono tulinga opo tumutavele. (Jó 2:3-5; Provérbios 27:11) Tyina tulinga ononkhono mbokutala nawa eyembelo lietu namphila katyapepukile, tukala ovakuatyili ku Jeova iya atulekesa okuti tuhanda akale Omutimini wetu.

¹³ Jeova utupopila okuti tuesukisa okulinga ononkhono opo tuhetekele ovituwa viae. (Colossenses 3:12; tanga 2 Pedro 1:5-7.) Tupu Jeova ukevelela tutale nawa omalusoke etu nonkhalelo tulitehelela. (Romanos 8:5; 12:9) Tyina tulinga ononkhono mbokulinga omapiluluko iya atutyivili, matukala nehambu limwe enene.

14, 15. Oityi tuna okuilinga opo tukale novituwa oviwa Jeova ehole? (Tala okakasa kati: “ Ombimbiliya Nelikuambelo Viapilulula Omienyo Viavo.”)

¹⁴ Oityi tuesukisa okulinga opo tukale novituwa Jeova ehole? Onthue katutokola omapiluluko patyi tuesukisa okulinga, mahi tuyeka Ondaka ya Huku ituhongolele. Romanos 12:2 yati: “Yekeipo okukala tyelifwa nouye uno, mahi kalei ovape, okupilulula omalusoke enyi, opo onwe muene mutale okuti ehando lia Huku eewa, liafuapo iya liaviuka.” Ngotyo opo tuimbuke oityi Jeova ahanda, tuesukisa  okuyumba onthumbi mekuateso lia Jeova. Tuesukisa okutanga apeho Ombimbiliya nokusokolola kuetyi tuatanga nokuita ku Jeova etuavele ospilitu sandu. (Lucas 11:13; Gálatas 5:22, 23) Inkha tulinga ngotyo, Jeova upondola okutukuatesako opo tunoñgonoke etyi tyimuhambukiswa, tupu tupondola okulilongesa okusoka monkhalelo asoka. Okulinga ngotyo, matusoko, nokupopia, nokulinga ovipuka vihambukiswa Jeova, iya atulilongesa oñgeni matulityilika omayembelo etu omavi. Mahi tuesukisa okutualako okueluisa.—Provérbios 4:23.

¹⁵ Tyihekutanga vala Ombimbiliya ononthiki ambuho, tupu tuna okulilongesa-yo nomikanda vietu vitukuatesako okunoñgonoka Ombimbiliya, ngetyi Omutala Womulavi no Despertai! Ononthele ononyingi mbo mikanda ovio mbutulongesa oñgeni tupondola okuhetekela ovituwa via Jeova, noñgeni tupondola okulityilika omahando etu omavi. Tupondola okuvasa ononthele ine onotestu mbumwe mbutukuatesako motyitateka tyetu. Tupondola okupaka nawa ononthele ombo opo ha tumbutange vali.

¹⁶ Ovola omuwo wokulilongesa opo uhetekele ovituwa via Jeova. Ngotyo inkha wiimbuka okuti kukahi nokulinga omapiluluko ngetyi ankho uhanda, pwa vala elundo. Tete, tuesukisa okulinga ononkhono  mbokuendela muetyi Ombimbiliya ipopia. Mahi tyina usoka nokulinga ovipuka ngetyi Jeova ahanda ulinge, matyikupepukila okukala nomalusoke ngo a Huku iya olingi ovipuka viaviuka. —Salmo 37:31; Provérbios 23:12; Gálatas 5:16, 17.

17. Inkha tukala ovakuatyili na Jeova, oityi tupondola okukevelela komutwe wandyila?

¹⁷ Tukevelela omovo matukakala tyehena onkhali atuumbila Jeova apeho. Pomuvo oo, kamatukesukisa vali okulwa no mayembelo etu omavi iya tupu matuketyivila okuhetekela nawa-nawa Jeova. Mahi pahetyino nkhele tuna omphitilo yokuumbila Jeova mokonda wetuavela otyilikutila tyeyovo. Namphila tuvakuankhali, tupondola okumuhambukiswa, inkha tutualako nokulinga ononkhono mbokulinga omapiluluko iya atuendela muetyi Ombimbiliya ilongesa.

18, 19. Omokonda yatyi tuna onthumbi yokuti Ombimbiliya ina epondolo liokutualako okupilulula omuenyo wetu?

¹⁸ Kevin walinga atyiho evila opo atule onyengo yae. Wasokolola kuetyi atanga mo Mbimbiliya iya alingi ononkhono mbokulinga omapiluluko momuenyo wae. Tupu walandula onondonga Ovakristau vakuavo vemuavela. Namphila pakalele omanima amwe opo Kavin akale novituwa oviwa, mahi mokueenda kuomuvo akala omukuatesiko wovakulu vewaneno. Iya pahe omukulu weuaneno mokueenda kuomanima 20. Mahi alo pehepano, utyii okuti wesukisa okulwa neyembelo lioukuankhali.

¹⁹ Nga Kavin, nonthue tupondola okukala novituwa ovipe. Inkha tulinga ngotyo, matutualako okufuena ku Jeova. (Salmo 25:14) Iya tyina tulinga atyiho opo tulinge omapiluluko emuhambukiswa, Jeova metukuatesako opo tutyivile. Tupondola okukala nonthumbi yokuti nekuateso lio Mbimbiliya, onthue tupondola okutualako okulinga omapiluluko momuenyo wetu.—Salmo 34:8.