1-3. (a) Ni mpindahinduka ki ezirikubaasa kutugumira kukora bwanyima y’okubatizibwa? (b) Kyaba kigumire kukora empindahinduka, nitubaasa kwebuuza bibuuzo ki? (Reeba ekishushani aha kutandika.)

OBU Kevin yaayega amazima, ^[1] akaba naayenda munonga kuba munywani wa Yehova. Kwonka atakeegire mazima akaba amazire emyaka mingi arikwejumba omu kuteera zaara, arikureetsa, arikunywa amaarwa maingi, kandi arikukoresa n’emibazi erikutokooza obwongo. Kevin kubaasa kusiimwa Ruhanga, akaba aine kurekyera aho ebikorwa ebi ebirikuhenda emisingye ya Baibuli. Akabaasa kukora empindahinduka ezi, arikuhwerwa Yehova n’Ekigambo kye ekiine amaani g’okuhindura omuntu.—Heb. 4:12.

² Mbwenu shi Kevin bwanyima y’okubatizibwa, akarekyera aho kukora empindahinduka? Ngaaha, ahakuba akaba aine kugumizamu naateeraho kugira emitwarize mirungi y’Ekikristaayo. (Efe. 4:31, 32) Nk’eky’okureeberaho, akeetegyereza ngu okwerinda kutarahuka kugira ekiniga kigumire munonga. Kevin naagira ati: “Okwega kurinda ekiniga kyangye buzima kikaba kigumire munonga kukira okucwa emize yangye ey’enyima!” Kevin akashwijuma  gye Baibuli, kandi yaashaba kubaasa kukora empindahinduka ezirikwetengyesa.

³ Nka Kevin, baingi ahariitwe tukakora empindahinduka z’amaani tutakabatiziibwe kubaasa kuhikaanisa emitwarize yaitu n’enyegyesa za Baibuli ez’okubandizaho. Bwanyima y’okubatizibwa, tuketegyereza ngu twine kugumizamu nitukora empindahinduka ezitarikurahuka kureebwa, kubaasa kuteeraho kutooreza Ruhanga na Kristo. (Efe. 5:1, 2; 1 Pet. 2:21) Nk’eky’okureeberaho, nitubaasa kuba twareebire ngu tukiine omuze gw’okucwera abandi orubanja, ogw’okugambuura abandi, okutiina abantu, nari obweremwa obundi. Mbwenu shi tushangire ngu okukora empindahinduka nk’ezi kigumire kukira oku tubaire nituteekateeka? Ku kiraabe nikwo kiri, noobaasa kwebuuza oti: ‘Obu naaherize kukora empindahinduka empango, ahabw’enki nikingumira kukora empindahinduka enkye? Nimbaasa kwongyera kutunguuka nta ndikwikiriza Baibuli kumpindura?’

4. Ahabw’enki obumwe turikuremwa kushemeza Yehova?

⁴ Itwe abaaherize kumanya Yehova kandi abarikumukunda, twine ekyetengo ky’amaani eky’okukora ebirikumushemeza. Kwonka n’obu turaabe twine ekyetengo ky’amaani eky’okumushemeza, okutahikiirira kwaitu nikuturemesa kumushemeza obwire bwona. Nitweshanga turi omu mbeera nk’ey’entumwa Paulo, owaahandiikire ati: “Obutoosha nkunda kukora ekirungi, kwonka okukikora kundema.”—Rom. 7:18; Yak. 3:2.

5. Ni mpindahinduka ki ezi twakozire tutakabatiziibwe, kwonka nitubaasa kuba tukiine bweremwa ki?

⁵ Tukareka ebikorwa bibi tutakaizire omu kibiina Ekikristaayo. (1 Kor. 6:9, 10) Kwonka nabwo, tukiri abatahikiriire. (Kol. 3:9, 10) N’ahabw’ekyo, nikiba kitari ky’oburyo kuteekateeka ngu bwanyima y’okubatizibwa, nari bwanyima y’okumara emyaka mingi omu mazima titurikwija kukora enshobe, kugaruka enyima, kuteganisibwa ebigyendererwa bibi, nari emiteekateekyere mibi. Obweremwa obumwe nibuguma nibututeganisa kumara emyaka mingi.

6, 7. (a) Niki ekirikutubaasisa kuba banywani ba Yehova n’obu turaabe tutahikiriire? (b) Ahabw’enki tutashemereire kutiina kushaba Yehova kutusaasira?

⁶ Titushemereire kwikiriza obweremwa bwaitu kuturemesa kuba banywani ba Yehova nari kugumizamu nitumuheereza. Teekateeka ahari eki: Obu Yehova yaatweyiriza haihi kuba banywani be, akaba naamanya ngu obumwe nitwija kukora enshobe. (Yoh. 6:44) Obu Yehova arikumanya emitwarize yaitu n’ebiri omu mitima yaitu, hatariho kubanganisa akaba naamanya obweremwa oburikwija kuguma nibututeganisa. Kandi akaba naamanya ngu obumwe n’obumwe nitwija kushobya. Kwonka, eki tikiramuzibiire kutunywana.

⁷ Rukundo ekahiga Ruhanga kutuha ekiconco ky’omuhendo, nikyo kitambo ky’Omwana we ou arikukunda munonga. (Yoh. 3:16) Twashobya kwonka tukeeteisa kandi tukashaba Yehova kutusaasira arikwihirira aha kitambo, nitubaasa kugira obuhame ngu nitwija kuguma turi banywani be. (Rom. 7:24, 25; 1 Yoh 2:1, 2) Mbwenu shi tushemereire kweziringa kuteeraho kugasirwa omu kitambo ahabw’okuteekateeka ngu titushemeire nari turi abasiisi? Ngaaha buzima! Ekyo nikibaasa kushushana n’okwanga kukoresa amaizi kunaaba engaro zaaba ziri endofa. Ekitambo kikaheebwayo ahabw’abasiisi abarikweteisa. Nitusiima ekitambo ahabw’okugira ngu nikitubaasisa kuba banywani ba Yehova n’obu turaabe tutahikiriire!—Shoma 1 Timoseo 1:15.

8. Ahabw’enki tutashemereire kwehuzya obweremwa bwaitu?

 ⁸ Buzima, titurikwehuzya obweremwa bwaitu. Okuguma turi banywani ba Yehova nikitwariramu okuteeraho kumutooreza hamwe na Kristo, kandi tukagira emitwarize ei barikwenda ngu tugire. (Zab. 15:1-5) Kandi nikitwariramu okuteeraho kutegyeka obweremwa bwaitu, nangwa tukabuhezaho kyaba nikibaasika. Yaaba nibwo tuherize kubatizibwa nari tumazire emyaka mingi omu mazima, twine kugumizamu nitukora empindahinduka omu mitwarize yaitu.—2 Kor. 13:11.

9. Nitumanya tuta ngu twine kugumizamu nituhindura emitwarize yaitu?

⁹ Nikyetengyesa okuguma nituteeraho kubaasa kuhindura emitwarize yaitu tukaba basya. Paulo akaijutsya Abakristaayo bagyenzi be ati: “Ebyo nibibeegyesa aha by’emicwe yaanyu eya ira, ngu mujuure omuntu waanyu owa ira, orikujunzibwa okwetenga okurikuhabisa, muhindurwe basya omu mwoyo gw’obwengye bwanyu. Mujware omuntu ondiijo omusya, owaahangirwe omu nshusha ya Ruhanga omu kuhikiirira n’okwera okw’amazima.” (Efe. 4:22-24) Eki nikimanyisa ngu twine kugumizamu nituteeraho kutaho ‘omuntu musya.’ N’ahabw’ekyo, n’obu twakuba tumazire obwire burikwingana ki turikuheereza Yehova, twine kugumizamu nitwega bingi aha mitwarize ye. Kandi Baibuli neebaasa kutuhwera kugumizamu nitukora empindahinduka omu mitwarize yaitu.

10. Twine kukora ki kubaasa kugumizamu nitukora empindahinduka turikuhwerwa Baibuli, kandi nitubaasa kwebuuza bibuuzo ki?

¹⁰ Twine kukora n’amaani kubaasa kwikiriza Ekigambo kya Ruhanga kugumizamu nikituhindura. Kwonka shi ahabw’enki nikyetengyesa ngu tuteereho munonga? Yehova ku araabe naaha omugisha ebi turikukora, okutunguuka omu by’omwoyo tikushemereire kuba kworobi? Mbwenu shi tashemereire kutwihamu emiteekateekyere egwire, reero kikatworobera kukora ekihikire?

11-13. Ahabw’enki Yehova naayenda ngu tuteereho munonga kusingura obweremwa bwaitu?

¹¹ Ku turikuteekateeka aha bi Yehova yaahangire ebirikureebwa, nitwetegyereza ngu aine amaani maingi. Nk’eky’okureeberaho, omu katikitiki kamwe, eizooba nirishohoza amaani agarikwingana taani obukaikuru butaano. N’obu otwani tukye turaabe nitwo turikuraba omu mwanya kuhika aha omu nsi, otwani otwo nitumara kutuha obutagatsi n’ekyererezi ky’okubaisaho amagara omu nsi. (Zab. 74:16; Isa. 40:26) Yehova naashemererwa kuha abaheereza be amaani kyaba nikyetengyesa. (Isa. 40:29) Buzima, Ruhanga akaabaasize kutuha amaani g’okusingura obweremwa tutategaine nari tutakozire nshobe. Ahabw’enki ekyo atarikukikora?

¹² Yehova atuhaire ekiconco ky’omuhendo eky’okwecweramu. Twacwamu kukora n’obweziriki ebi Ruhanga arikukunda, nitworeka ngu nitumukunda kandi ngu nitwenda kumushemeza. Kandi nitworeka ngu nitwenda kumushagika ahabw’okuba ohikire kutegyeka byona. Sitaane akahakanisa obushoboorozi bwa Yehova obw’okuba ohikire kutegyeka, n’ahabw’ekyo twayehayo kushagika Yehova ngu niwe ahikire kutegyeka, naasiima munonga. (Yob. 2:3-5; Enf. 27:11) Kwonka, Yehova yaatwihaho obujunaanizibwa bw’okuteeraho munonga kurwanisa obweremwa bwaitu kugira ngu tumushemeze, okumuhamiraho n’omukushagika nk’ohikire kutegyeka nibibura amakuru.

¹³ N’ahabw’ekyo, Yehova naatwehanangiriza kugira “obweziriki bwingi” omu kuteeraho kugira emitwarize mirungi. (Shoma 2 Petero 1:5-7; Kol. 3:12) Naayenda ngu tukore n’amaani kurinda ebiteekateeko byaitu n’enyehurira zaitu. (Rom. 8:5; 12:9) Ku turikukora  n’amaani kandi tukaba abasinguzi omu kukora empindahinduka ezi, nitushemererwa.

14, 15. Nitubaasa kukora ki kugira emitwarize ei Yehova arikukunda? (Reeba akabokisi “ Baibuli n’Okushaba Bikahindura Emitwarize Yaabo.”)

¹⁴ Twine kukora ki kubaasa kugira emitwarize erikushemeza Yehova? Omu mwanya gw’okwecweramu eki twine kuhindura, twine kwikiriza Ruhanga akaba niwe yaatworeka. Abarooma 12:2 nihagira hati: “Mutashushanisibwa n’ab’obusingye obu, kureka muhindurwe basya ahabw’okugarurwa obusya omu biteekateeko byanyu, mubone kumanya gye ebi Ruhanga akunda, oku biri birungi, ebirikusiimwa, kandi ebihikire buzima.” Yehova arikukoresa Ekigambo kye n’omwoyo gwe gurikwera, naatuhwera kumanya ebi arikukunda, kubikora, n’okuhindura emitwarize yaitu tukakora ebi arikwenda ngu tukore. Tushemereire kuteeraho kushoma Baibuli buri izooba, tuteekateeke aha Byahandiikirwe, kandi tushabe kutunga omwoyo gurikwera. (Luk. 11:13; Gal. 5:22, 23) Twakora ekyo, Yehova naija kutuhwera kugira emiteekateekyere nk’eye nk’oku erikworekwa omu Kigambo kye, kandi omu biteekateeko, ebigambo n’ebikorwa byaitu, nitwija kworeka ngu twine emitwarize mirungi. Kwonka n’obu kiraabe kiri kityo, twine kugumizamu nitwerinda kutasingurwa obweremwa bwaitu.—Enf. 4:23.

¹⁵ Okwongyerera aha kushoma Baibuli buri izooba, twine kugyega turikukoresa ebitabo byaitu kubaasa kugira emitwarize mirungi nk’eye. Abamwe bashangire kirikuhwera kushwijuma ebyahandiikirwe n’ebicweka by’Omunaara gw’Omurinzi nari Awake! ebirikukwata aha kugira emitwarize y’Ekikristaayo nari ebirikugamba aha kusingura obweremwa obumwe.

16. Ahabw’enki tutashemereire kuhwamu amaani twaba tutarahukire kukora empindahinduka?

¹⁶ Ku oraabe nooreeba ngu nootunguuka mpora, ijuka ngu okutunguuka omu by’omwoyo nikitwara obwire. Twine kugumizamu nituteeraho kugira emitwarize nk’eya Yehova. Twine kugumisiriza twaba nituteeraho kwikiriza Baibuli kutuhwera kukora empindahinduka. Eky’okubanza eki twine kukora, n’okuteeraho kugyendera aha buhabuzi oburi omu Byahandiikirwe. Kwonka ku orikuguma nooteekateeka kandi okatwaza nk’oku Yehova arikwenda, nikiija kukworobera kugira emitwarize nk’eye n’okukora ekihikire.—Zab. 37:31; Enf. 23:12; Gal. 5:16, 17.

17. Twagumizamu tuhamiire ahari Yehova, nitugira kihika ki eky’ebiro by’omumaisho?

¹⁷ Abaheereza ba Yehova abarikuguma bamuhamiireho nibaija kurugaho nibatunga  omugisha gw’okumuheereza ebiro byona bahikiriire. Omu bunaku obwo, tikirikwija kutwetengyesa kurwanisa obweremwa, kandi nikiija kuba kyorobi kutooreza Yehova. Kwonka ekyo kitakabaireho, nitwebaza Yehova ahabw’okuhayo ekitambo ekirikutubaasisa kumuramya. Eki nitubaasa kukikora n’obu turaabe turi abatahikiriire, twagumizamu nituteeraho kwikiriza amaani g’Ekigambo kye kutuhindura.

18, 19. Nitubaasa kuhamya tuta ngu Baibuli eine amaani g’okugumizamu neehindura emitwarize yaitu?

¹⁸ Kevin, owaagambwaho aha kutandika, akateeraho munonga kurinda ekiniga kye. Akateekateeka aha misingye ya Baibuli kandi yaagigyenderaho, kandi yaikiriza obuhwezi n’obuhabuzi bw’Abakristaayo bagyenzi be. Kevin akakora empindahinduka z’amaani omu myaka mikye. Bwanyima akatooranwa kuba omuheereza omu kibiina, kandi kumara emyaka erengire 20, atwire naaheereza nk’omureeberezi. Beitu na hati, naamanya ngu aine kugumizamu naarwanisa obweremwa.

¹⁹ Ebirikukwata ahari Kevin nibyoreka ngu Baibuli neehwera abaheereza ba Ruhanga kugumizamu nibakora empindahinduka omu mitwarize yaabo. N’ahabw’ekyo, tihaine ekishemereire kuturemesa kwikiriza Ekigambo kya Ruhanga kugumizamu nikituhindura, kandi kikatuhwera kugira omukago murungi nawe. (Zab. 25:14) Twareeba Yehova naatuha emigisha ahabw’okuteeraho kwaitu, nitweyongyera kugira obuhame ngu Baibuli neija kugumizamu neetuhwera kuhindura emitwarize yaitu.—Zab. 34:8.