1-3. (a) Kayari bautismo, anto ran pananguman so nayarin mairap tayon gawaen? (b) No naiirapan itayon manggaway pananguman, anto ray nayarin itepet tayod sarili tayo? (Nengnengen so litratod gapo na artikulo.)

SANEN naaralan nen Kevin ^[1] so katuaan, labalabay ton onapit so relasyon tod si Jehova. Balet antis na satan, sikatoy pigay taon lan mansusugal, mansisigarilyo, manbuabuanges, tan mandrudruga. Pian naawat toy panangabobon na Dios, kaukolan nen Kevin ya itunda iratan ya kagagawan sumlang ed Biblia. Agawaan to itan diad impanmatalek tod si Jehova tan ed pakayari na Salita To a mamasimbalo.—Heb. 4:12.

² Kayari ton abautismoan, kasin tinmunda lay Kevin a manggaway pananguman ed bilay to? Andi, ta kaukolan to nin tuloytuloy a bayuboan tan pinoen iray kualidad to bilang Kristiano. (Efe. 4:31, 32) Singa bilang, sikatoy mainomay ya onsanok tan mair-irap ton kontrolen itan. Inamin to: “Diad tua et mas mairap ko nin kontroley sanok ko nen say impangitundak ed saray datin bisyok!”  Agawaan nen Kevin iratan ya pananguman panamegley na impapuson panagpikasi tan impasyan panagaral na Biblia.

³ Singa si Kevin, dakel ed sikatayo so nanggaway baleg iran pananguman antis tayon nampabautismo pian makapambilay tayo unong ed saray manunan kakaukolanen na Biblia. Kayari na bautismo, amoria tayon kaukolan tayo ni so tuloytuloy ya manggaway pananguman—angkelag la ran pananguman—pian mas lalo tayon naalig so Dios tan say Kristo. (Efe. 5:1, 2; 1 Ped. 2:21) Singa bilang, ompan naimano tayo ya makritiko itayo, walay takot tayod too, walay tendensia tayon man-tsismis, odino wala ni ray arum ya kakapuyan tayo. Kasin nibaga tayon mas mairap nin umanen iraya nen say iilaloan tayo? No ontan, nayarin isipen mon, ‘Akagawa ak lay baleg a pananguman. Akin balet et mair-irap kon nagawaan so angkelag la ran pananguman? Anto ni kasi gawaen ko pian tuloytuloy ya umanen na Biblia so bilay ko?’

4. Akin et agtayo nayarian a paliketen si Jehova ed amin a panaon?

⁴ Sikatayo ran makankabat la ed si Jehova tan mangaaro ed sikato et pilalek na puso tayo a gawaen so panliketan to. Balet anggan panon lay pilalek tayon napaliket so Dios, agtayo nagawaan itan ed amin a panaon lapud ag-itayo perpekto. Say kipapasen tayo et mipadpara ed si apostol Pablo, ya angisulat: “Walay pilalek kon manggawa na maong, balet anggapoy pakayarik a gawaen itan.”—Roma 7:18; Sant. 3:2.

5. Anto ran pananguman so agawaan tayo la antis itayon nampabautismo, balet anto ni ray kakapuyan ya siansia nin lalabanan tayo?

⁵ Impulisay tayo la ray makasalanan ya kagagawa kanian nagmaliw itayon membro na Kristianon kongregasyon. (1 Cor. 6:9, 10) Balet siansia nin ag-itayo perpekto. (Col. 3:9, 10) Kanian aliwan realistiko ya ilaloan a kayari bautismo—odino kayari ni ingen na dakel a taon ed katuaan—et agtayo la nalingo, nadismaya, odino nagonigon ed saray mauges a motibo tan tendensia. Say arum a tendensia et nayarin mansiansia ni ed pigaran taon.

6, 7. (a) Akin et posiblin makapikaaro itayo ed si Jehova anggano agtayo perpekto? (b) Akin ya agtayo nepeg ya manduaruwa ya onkerew na panamerdona ed si Jehova?

⁶ Balet anggano atawir tayoy ag-inkaperpekto, nayarian tayo nin siansia so mikaaro ed si Jehova tan tuloytuloy a manlingkor ed sikato. Nonoten pa iya: Sanen inyasingger itayo nen Jehova ed sikato, amta to ya siansia nin nalingo tayo. (Juan 6:44) Lapud amta na Dios so ugali tayo tan no antoy walad puso tayo, seguradon amta to iray agperpekton tendensia ya makapagonigon ed sikatayo. Tan amta to ya sagpaminsan et mankasalanan itayo. Balet, siansia nin labay nen Jehova so mikaaro ed sikatayo.

⁷ Lapud panangaro na Dios ed sikatayo, inikdan to itayo na mabmablin regalo—say dondon bagat na inad-aro ton Anak. (Juan 3:16) No magbabawi itayo base ed sayan mabmablin probisyon tan kerewen tayoy panamerdona nen Jehova no akagawa tayoy kasalanan, makapanmatalek itayo ya mansiansia so pikakaaro tayo ed sikato. (Roma 7:24, 25; 1 Juan 2:1, 2) Panduaruwaan tayo kasi ya awaten iray gunggona na dondon lapud iisipen tayon marutak odino makasalanan itayo? Siempre andi! Singa tayo ipupulisay so danum a panuras anta marutak iray lima tayo. Diad tua, say dondon et nitarya parad saray magbabawin nankasalanan. Kanian, misalamat itayo ed dondon lapud siansia nin makapikaaro tayod si Jehova anggano agtayo perpekto.—Basaen so 1 Timoteo 1:15.

8. Akin ya agtayo nepeg ya ibaliwala iray kakapuyan tayo?

⁸ Siempre, agtayo basta ibabaliwala iray kakapuyan tayo. Pian napaelet tayoy pikakaaro  tayod si Jehova, kaukolan tayon maapit ya aligen so Dios tan say Kristo tan bayuboan so inkatoo a labay dan pagmaliwan tayo. (Sal. 15:1-5) Kaukolan met ya kontrolen tayo iray mauges a tendensia, tan no posible et sigpot tayon ekalen iratan. Balanglan agano itayo nin abautismoan odino abayag ti lad katuaan, kaukolan ya ‘itultuloy tayoy paipetek.’—2 Cor. 13:11.

9. Akin a nibaga tayon tuloytuloy tayon nisulong so balon personalidad?

⁹ Kaukolan so tuloytuloy a pansagpot pian ‘nipetek’ itayo tan nipatnag tayoy “balon personalidad.” Pinanonotan nen Pablo iray kapananisiaan to: “Imbangat kayo a nepeg yon lakseben so daan a personalidad a mitunosan ed datin kabibilay yo tan nadederal lapud mapalikdo iran pilalek na satan. Tan nepeg yon itultuloy a pasimbaloen so paraan na panagnonot yo, tan nepeg yon isulong so balon personalidad a pinalsa unong ed linawa na Dios tan mitunosan ed saray kakaukolanen na tuan inkatunong tan katooran.” (Efe. 4:22-24) Ipapabitar na saray salitan “itultuloy a pasimbaloen” a say pangisulong na balon personalidad et tuloytuloy a proseso. Makapaseseg itan, ta ipapaseguro na satan ya anggano abayag ti lan manlilingkor ed si Jehova, sarag tayo nin tuloytuloy a bayuboan tan pinoen iray Kristianon kualidad a pakapatnagan na balon personalidad. On, tuloytuloy ya umanen na Biblia so bilay tayo.

10. Antoy kaukolan tayon gawaen pian tuloytuloy itayo nin manguman diad tulong na Biblia, tan anto ray nayarin itepet tayo?

¹⁰ Kaukolan tayoy mansagpot pian mantultuloy itayon umanen na Salitay Dios. Balet akin et kaukolan tayoy impasyan mansagpot? No bebendisyonan nen Jehova iray sagpot tayo, agta mainomay komon so onaligwas ed espiritual? Nayari kasin paandien la nen Jehova iray mauges ya tendensia tayo pian agti la mansagpot a mangipatnag na saray makadios a kualidad?

11-13. Akin et iilaloan nen Jehova ya pansagpotan tayon maong ya talonaan iray kakapuyan tayo?

¹¹ No obserbaan tayo so uniberso, lalo itayon nakombinse ed mabiskeg a pakapanyari nen Jehova. Singa bilang, diad kada segundo et magmamaliw ya enerhiya so limaran milyon a tonilada ya ibubuga na agew. Anggano daiset labat so makakaloob ya enerhiya ed atmospera na mundo tayo, magenap la itan a mangitaryay dugarugan petang tan liwawa pian nasuportaan so bilay diad dalin. (Sal. 74:16; Isa. 40:26) Maliket si Jehova a mangiter na dugarugan karakel na pakayari ed saray totoon lingkor to no nakaukolan. (Isa. 40:29) On, sarasarag na Dios ya iter ed sikatayo so biskeg pian natalonaan so amin ya kakapuyan tayo tan agtayo la nairapan odino nalingo ni. Balet akin et agto ginawa itan?

¹² Inikdan itayo nen Jehova na agnaparaan a regalo ya makapandesisyon a bukor. No pilien tayon gawaen so linawa na Dios tan pansagpotan tayo itan, nipanengneng tayoy kaaralem na panangaro tayod si Jehova tan say pilalek tayon sikatoy napaliket. Nipatnag tayo met so suporta tayo ed soberanya to. Kinuestion nen Satanas so kanepegan nen Jehova a manuley, kanian say boluntaryo tan impasyan sagpot tayo pian suportaan itan et seguradon papablien na maapresya tan maomaong ya Ama tayo ed tawen. (Job 2:3-5; Pro. 27:11) Balet no ag-itayo la pansagpoten nen Jehova ya labanan iray mauges a tendensia tayo pian sikatoy napaliket tayo, anggapoy kana na panmamatoor tan panusuporta tayo ed soberanya to.

¹³ Kanian imbagad sikatayo nen Jehova a kaukolan ya ‘gawaen tayoy anggaay nayarian tayo’ pian nabayuboan iray makadios a kualidad. (Basaen so 2 Pedro 1:5-7; Col. 3:12) Iilaloan to ya pansagpotan tayon kontrolen so kanonotan tan liknaan tayo. (Roma 8:5; 12:9) No talagan pansagpotan tayo iya, mas  lalon nalikna tayoy liket no namomoria tayo a tuloytuloy nin uumanen na Biblia so bilay tayo.

14, 15. Antoy gawaen tayo pian nabayuboan tayo ray kualidad ya labalabay nen Jehova? (Nengnengen so kahon ya “ Inuman na Biblia tan Pikakasi so Bilay Da.”)

¹⁴ Antoy nayarin gawaen tayo pian nabayuboan iray makadios a kualidad tan napaliket si Jehova? Aliwa labat iyan pamaaligwas ed personalidad. Kaukolan tayoy mantultuloy a mansagpot tan unoren iray ganggan na Dios, ta oniay ibabaga na Roma 12:2: “Agkayo la manpapaimpluensya ed sayan sistema na mundo, noagta manpasimbalo kayo diad panguman yo ed panagnonot yo, pian napaneknekan yo ed inkasikayo so maong tan makapaliket tan ayadyarin linawa na Dios.” Panamegley na Salita to tan say masanton espiritu, tutulongan itayo nen Jehova pian natebek so linawa to, nagawaan itan, tan nauman iray kaukolan tayon umanen ed bilay tayo pian natumbok tayo iray kakaukolanen to. Kaiba ed saratan a sagpot tayo so inagew-agew a panagbasa na Biblia, pandalepdep ed Kasulatan, tan ikerew na masanton espiritu. (Luc. 11:13; Gal. 5:22, 23) No papaigiya itayo ed masanton espiritu na Dios tan mannonot tayo a singa panagnonot nen Jehova unong a niparungtal ed Salita to, magmaliw a mas makadios so panagnonot, panagsalita, tan kakikiwas tayo. Anggaman ontan, kaukolan tayoy mansiansian alerto pian ag-itayo nadaeg na kakapuyan tayo.—Pro. 4:23.

¹⁵ Niarum ni ed inagew-agew a panagbasay Biblia, kaukolan tayon aralen so Salitay Dios tan saray publikasyon tayo pian naalig tayo ray alay abig a kualidad nen Jehova. Akatulong ed arum so pankolekta tan sagpaminsan a panrepaso ed saray teksto tan saray artikulo na Panag-bantayan odino Onliing! ya espisipikon makatulong pian nabayuboan iray makadios a kualidad odino natalonaan iray kakapuyan.

16. Akin et agtayo nepeg a nadismaya no agtayo nagawaan ya tampol iray pananguman?

¹⁶ No singa matantan so iyaaligwas mod espiritual, tandaan a kaukolan so panaon parad iyaligwas. Say pamayubo ed espiritual iran kualidad et tuloytuloy a proseso. Nepeg a maanos itayo ed pansasagpot tayon abuloyan so Biblia a tuloytuloy a mamawalay positibo iran pananguman ed bilay tayo. Diad gapo, ompan kaukolan tayon disiplinaen so sarili tayo pian nagawaan tayoy duga base ed Biblia. Balet diad ilalabas na panaon, mas mainomay tan mas natural lay pannonot tan ikiwas tayo ed makadios a paraan legan tayon kalkalnan naaalig si Jehova diad panagnonot tan kakikiwas tayo.—Sal. 37:31; Pro. 23:12; Gal. 5:16, 17.

17. No matoor tayod si Jehova, anton makapaliket ya arapen so ilaloan tayo?

¹⁷ Agmanbayag et nagamoran la na saray matoor a lingkor nen Jehova so pribilehyo ya andi-anggaan a panlingkor ed sikato diad perpekton kipapasen. Diad saman a panaon et agtayo la nairapan a mangipatnag na saray makadios a kualidad, tan panliketan tayo lan maong itan. Natan, misalsalamat tayo ed dondon ta naabuloyan itayon mandayew ed maaron Dios tayo. Anggano agtayo perpekto et nagawaan tayo itan no tuloytuloy tayon manpasakop ed pakayari na Salita to a mamasimbalo.

18, 19. Panon tayon naseguro ya walay pakayari na Biblia a tuloytuloy ya umanen so bilay tayo?

¹⁸ Si Kevin, ya abitlad gapo, et nansagpotan ton kontrolen so sanok to. Dinalepdep tan inyaplika to ray prinsipyo na Biblia, tan inawat to so tulong tan simbawa na saray agagi. Diad inlabas na pigaran taon, baleg so inaligwasan nen Kevin. Ag-abayag et sikatoy aturo bilang ministeryal a lingkor, tan natan et 20 taon lan manlilingkor bilang elder ed kongregasyon. Anggaman ontan, amta ton kaukolan toy mansiansian manalwar pian agla nadaeg na datin kakapuyan to.

¹⁹ Ipapatnag na eksperiensya nen Kevin a tutulongan na Biblia iray totoo na Dios pian tuloytuloy dan nagawaan iray positibon pananguman ed bilay da. Kanian, agtayon balot ontutunda ya abuloyan so Salitay Dios a mamasimbalo ed sikatayo tan lalon mamaapit ed relasyon tayod si Jehova. (Sal. 25:14) Legan a bebendisyonan nen Jehova iray sagpot tayo, sankanengneng tayoy ebidensya a nayarian na Biblia ya tuloytuloy nin umanen so bilay tayo.—Sal. 34:8.