1-3. (a) Wanem nao maet iumi faendem hem no isi for changem bihaen iumi baptaes? (b) Wanem nao maet samfala kwestin wea iumi garem? (Lukim olketa piksa long start bilong study.)

STAKA year nao Kevin ^[1] hem gambol, smoke, drink, and iusim olketa nogud drug. Taem hem start for lanem truth, hem barava laek for fren gud witim Jehovah. Bat for duim olsem, Kevin mas changem staka samting long laef bilong hem. Hem fit for duim datwan bikos Jehovah helpem hem and hem followim wanem Bible talem.—Heb. 4:12.

² Bihaen Kevin baptaes, hem mas gohed for changem wei bilong hem mekem hem savve kamap mature Christian. (Eph. 4:31, 32) Olsem example, long bifor Kevin hem man for kros kwiktaem, and hem faendem hem barava no isi for lusim datfala nogud wei. Kevin sei: “Hem moa isi for lusim olketa nogud  samting wea mi duim bifor winim wei for lane for kontrolem kros bilong mi!” Bat gogo Kevin changem wei bilong hem taem hem askem Jehovah for helpem hem, and taem hem barava studyim gud Bible.

³ Bifor iumi kamap fit for baptaes, staka long iumi mas mekem olketa bigfala change for followim wanem Bible talem. Nomata olsem, bihaen iumi baptaes iumi luksavve iumi mas gohed for changem samfala wei bilong iumi mekem iumi savve barava followim example bilong God and Christ. (Eph. 5:1, 2; 1 Pet. 2:21) Olsem example, maet samfala taem iumi no duim stret samting bikos iumi fraet long man. Or maet iumi luksavve iumi man for komplen tumas, or iumi savve gossip tumas or talem nogud samting abaotem olketa narawan. Maet for plande year iumi traem best for changem olketa wei hia bat iumi still duim olketa sem mistek. So maet iu ting olsem: ‘Why nao hem hard tumas for mi changem olketa wei hia? Wanem nao mi mas duim mekem mi followim wanem Bible talem?’

4. Why nao iumi no savve evritaem mekem Jehovah hapi?

⁴ Iumi lovem Jehovah and iumi barava laek for mekem hem hapi. Bat sorre samting, from iumi no perfect, iumi no savve evritaem mekem hem hapi. Staka taem iumi garem sem feeling olsem aposol Paul, wea sei: “Mi laek for duim gudfala samting bat mi no savve duim datwan.”—Rome 7:18; Jas. 3:2.

5. Olketa wanem nogud samting nao iumi lusim bifor iumi baptaes, bat wanem nao samfala samting wea maet iumi stragol yet witim?

⁵ Bifor iumi baptaes, iumi lusim olketa nogud samting wea Jehovah heitim. (1 Cor. 6:9, 10) Nomata olsem, iumi no perfect. (Col. 3:9, 10) So iumi still savve duim olketa mistek nomata maet iumi baptaes for staka year finis. Samfala taem maet iumi garem feeling for laek duim olketa rong samting, or maet iumi faendem hem no isi for kontrolem wanfala wik point wea iumi garem. Maet staka year nao iumi stragol witim olketa wik point hia.

6, 7. (a) Wanem nao Jehovah duim mekem iumi fit for fren witim hem nomata iumi no perfect? (b) Why nao iumi mas no stop for askem Jehovah for forgivim iumi?

⁶ Nomata iumi no perfect, iumi fit for fren witim Jehovah and gohed worshipim hem. Iu mas no forgetim diswan, Jehovah nao leadim iu kam long hem. Hem lukim gud samting long iu and hem laekem iu for savve long hem. (John 6:44) And tu, hem savve iu no perfect and garem olketa wik point and samfala taem duim samting wea no stret. Nomata olsem, Jehovah still laekem iu for fren witim hem.

⁷ From Jehovah barava lovem iumi, hem givim iumi wanfala spesol present. Hem sendem kam Son bilong hem Jesus for givim ransom sakrifaes for iumi. (John 3:16) Taem iumi duim samting wea no stret, iumi savve askem Jehovah for forgivim iumi. Bikos long ransom sakrifaes wea Jesus givim, iumi sure Jehovah bae forgivim iumi and iumi fit for gohed fren witim hem. (Rome 7:24, 25; 1 John 2:1, 2) Jesus dae for olketa man wea sin and repent. So nomata iumi feel olsem samting wea iumi duim hem nogud tumas, iumi mas no stop for askem Jehovah for forgivim iumi. Sapos iumi no askem Jehovah for forgivim iumi, hem olsem iumi no laek for wasim hand bilong iumi taem hem dirty. Iumi tinghae long wanem Jehovah duim mekem iumi fit for fren witim hem  nomata iumi no perfect.—Readim 1 Timothy 1:15.

8. Why nao iumi mas no ting nating long olketa wik point bilong iumi?

⁸ Hem tru, iumi mas no ting nating or mekem excuse for olketa wik point bilong iumi. Jehovah talem iumi wanem kaen pipol nao hem laek for fren witim. (Ps. 15:1-5) So sapos iumi laek for fren gud witim hem, iumi mas traem best for followim wei bilong hem and Son bilong hem. And tu, iumi mas kontrolem feeling for laek duim rong samting and trae for aotem olketa feeling hia. Nomata haomas year iumi baptaes finis, iumi mas gohed changem wei bilong iumi.—2 Cor. 13:11.

9. Hao nao iumi savve iumi mas gohed waka hard for “garem niufala wei”?

⁹ Aposol Paul sei olsem long olketa Christian: “Iufala mas lusim old wei bilong iufala wea followim nomoa samting iufala duim bifor and wea datwan kamap nogud bikos long wei for laekem nogud samting wea leadim iufala go rong. Iufala mas gohed for garem wanfala niu tingting, and iufala mas garem niufala wei wea fitim wanem God hem laekem and wea datwan hem barava raeteous and faithful.” (Eph. 4:22-24) Diswan showimaot iumi mas gohed waka hard for “garem niufala wei.” So nomata haomas year iumi worshipim Jehovah, iumi savve gohed for lane abaotem olketa wei bilong hem. And Bible savve helpem iumi for changem wei bilong iumi mekem iumi savve followim olketa wei bilong God.

10. Wanem nao iumi mas duim sapos iumi laek for gohed change, and wanem tufala kwestin nao kamap?

¹⁰ Sapos iumi laek for gohed change, iumi mas waka hard for duim wanem Bible talem. Why nao iumi mas waka hard olsem? Why nao Jehovah no mekem hem isi nomoa for iumi duim stret samting?

11-13. Why nao Jehovah laekem iumi for waka hard for winim olketa wik point bilong iumi?

¹¹ Taem iumi tingim evri samting wea stap long universe, iumi barava sure Jehovah garem paoa for duim eni samting. Olsem example, hem wakem sun, wea garem bigfala paoa. Paoa wea kamaot from sun evri second hem strong fogud. Lelebet paoa from sun nomoa hem mekem evri samting long earth hem laef. (Ps. 74:16; Isa. 40:26) Jehovah hem givim paoa tu long pipol bilong hem long earth taem olketa needim. (Isa. 40:29) Tru nao, sapos Jehovah laek for duim, hem savve mekem hem isi nomoa for iumi winim olketa wik point bilong iumi. So why nao hem no duim datwan?

¹² Iumi savve disaedem samting seleva. Jehovah letem iumi for chus for obeyim hem or nomoa. Taem iumi chus for obeyim God and waka hard for duim wanem hem laekem, iumi showimaot iumi lovem hem and laek for mekem hem hapi. Satan sei Jehovah no garem raet for rul. Bat taem iumi obeyim Jehovah, iumi showimaot iumi laekem hem nao for rulim iumi. And iumi sure Dadi bilong iumi long heven barava tinghae long evri samting wea iumi duim for obeyim hem. (Job 2:3-5; Prov. 27:11) Taem iumi waka hard for kontrolem olketa wik point bilong iumi nomata hem no isi, datwan showimaot iumi faithful long Jehovah and laekem hem nao for rulim iumi.

¹³ Jehovah talem iumi for waka hard for followim olketa wei bilong hem. (Readim 2 Peter 1:5-7; Col. 3:12) And tu, hem laekem  iumi for waka hard for kontrolem tingting and feeling bilong iumi. (Rome 8:5; 12:9) Taem iumi waka hard for changem wei bilong iumi and iumi win long datwan, datwan mekem iumi barava hapi.

14, 15. Wanem nao bae helpem iumi for garem olketa gudfala wei mekem Jehovah hapi long iumi? (Lukim box “ Bible and Wei for Prea Helpem Olketa for Change.”)

¹⁴ Wanem nao bae helpem iumi for garem olketa gudfala wei mekem Jehovah hapi long iumi? Winim wei for disaed seleva long diswan, iumi laek for followim wanem God talem. Rome 12:2 hem sei: “No gohed followim wei bilong pipol long disfala world. Changem wei bilong iufala long wei for changem tingting, mekem iufala luksavve long samting wea God laekem iumi for duim, wea hem gudfala and stret and wea hem hapi long hem.” So for savve long wanem Jehovah laekem iumi for duim, iumi mas iusim wanem hem givim for helpem iumi. Iumi mas readim Bible evriday, ting raonem wanem iumi readim, and prea long Jehovah for holy spirit bilong hem. (Luke 11:13; Gal. 5:22, 23) Datwan bae helpem iumi for savve wanem nao Jehovah hapi long hem and for garem sem tingting olsem hem. Then samting iumi tingim, talem, and duim bae mekem Jehovah hapi, and bae iumi lane for kontrolem olketa wik point bilong iumi. Nomata olsem, iumi mas gohed waka hard long diswan.—Prov. 4:23.

¹⁵ Nara samting iumi mas duim tu hem for iusim olketa pablikeson olsem Wastaoa and Awake! magasin for helpem iumi studyim Bible. Staka article insaed olketa magasin hia helpem iumi for followim olketa wei bilong Jehovah and for winim olketa wik point bilong iumi. Maet samfala article or scripture barava helpem iumi. Iumi savve raetem olketa scripture hia and keepim olketa article hia mekem iumi savve readim moa bihaen.

16. Why nao iumi mas no wikdaon sapos iumi stragol yet for changem samfala wei bilong iumi?

¹⁶ Hem tek taem for lane for followim olketa wei bilong Jehovah. So sapos iu stragol yet for changem wei bilong iu, iu mas patient. Maet long firstaem, iu mas barava waka hard for duim wanem Bible talem. Bat taem iu gohed for duim wanem Jehovah laekem, bae hem moa isi for iu garem sem tingting olsem Jehovah and for iu duim stret samting.—Ps. 37:31; Prov. 23:12; Gal. 5:16, 17.

17. Sapos iumi faithful long Jehovah, wanem gudfala samting nao bae iumi kasem long future?

¹⁷ Iumi barava luk forward long taem wea iumi bae perfect and worshipim Jehovah for olowe. Long datfala taem, bae iumi no garem olketa wik point, and bae hem isi for followim olketa wei bilong Jehovah. Bikos long ransom sakrifaes, distaem tu iumi fit for worshipim Jehovah. Nomata iumi no perfect iumi savve mekem God hapi sapos iumi gohed waka hard for changem wei bilong iumi and followim wanem iumi lanem insaed long Bible.

18, 19. Hao nao iumi sure Bible savve helpem iumi for gohed changem wei bilong iumi?

¹⁸ Kevin hem traem best for kontrolem kros bilong hem. Hem ting raonem wanem hem readim insaed Bible and waka hard for changem olketa wei bilong hem. And tu, hem followim advaes wea olketa nara Christian talem long hem. Nomata hem tek taem for Kevin changem wei bilong hem, gogo hem kasem privilege for kamap ministerial servant. And insaed 20 year wea go finis, hem wanfala elder long kongregeson. Nomata olsem, hem savve hem mas gohed for kontrolem olketa wik point bilong hem.

¹⁹ Olsem Kevin, Bible savve helpem iumi tu for garem olketa gudfala wei. Sapos iumi waka hard long diswan, datwan bae strongim wei wea iumi fren witim Jehovah. (Ps. 25:14) And taem iumi traem best for mekem hem hapi, hem bae blessim iumi. Datwan mekem iumi sure Bible savve helpem iumi for gohed changem wei bilong iumi.—Ps. 34:8.