1-3. (a) Ewene vọ yen sa bẹn kẹ avwanre siẹrẹ e de bromaphiyame nu? (b) Siẹrẹ ẹyanphiaro da bẹn kẹ avwanre, enọ vọ yen a sa nọ? (Ni ihoho rẹsosuọ na.)

KEVIN ^[1] ghwa vwọ mrẹ uyota na vughe, o de vwo owenvwe ọgangan ro vwo ru oyerinkugbe rọyen vẹ Jihova ganphiyọ. Vwẹ ikpe buebun, o phi idjogba, o phopho isigati, ọ da udi vrẹ oma, ọ je reyọ ihunvwun egangan. Ọ sa vwọ dia ugbeyan rẹ Ọghẹnẹ, Kevin de siobọnu iruemu echọchọ yena. O se ru ewene na womarẹ ukẹcha rẹ Jihova vẹ Baibol na.—Hib. 4:12.

² Kevin vwo bromaphiyame nu, o ji ru ewene sansan rere ọ sa vwọ dia omamọ rẹ Onenikristi. (Ẹfe. 4:31, 32) Kerẹ udje, ọ mrẹrẹ bẹnbẹn o se vwo sun ophu ọgangan rọyen. Ọ da ta: “Mi vwo sun ophu ọgangan mẹ tobọ bẹn kẹ vwẹ vrẹ iruemu ichekọ re me dobọ rayen ji!” Ẹkẹvuọvo, womarẹ ẹrhovwo vẹ uvi rẹ uyono romobọ, o de phi ẹdia nana kparobọ.

 ³ Kerẹ Kevin, avwanre ji wene akpeyeren avwanre rere ọ vẹ irhi rẹ Baibol na vwo shephiyọ tavwen e ki bromaphiyame. E ji vwo bromaphiyame nu, a je mrẹ ewene itete rẹ avwanre ji ru, a sa vwọ nabọ vwẹrokere Ọghẹnẹ vẹ Jesu. (Ẹfe. 5:1, 2; 1 Pita 2:21) Kerẹ udje, ọ sa dianẹ avwanre vwo uruemu re vwo brenu, ra vwọ djoshọ rẹ ohworakpọ, re vwo gun ihwo, vẹ efa sansan. O krire wọ vẹ ebẹnbẹn nana muabọ cha re? Ọ da dia ọtiọyen, wo se roro nẹ, ‘Mi de se ru ewene rode vwẹ akpọ mẹ, kẹ diesorọ itete nana vwọ bẹn kẹ vwẹ? Die ofori nẹ mi ru rere Baibol na se vwo wene akpọ mẹ ọkieje?’

4. Diesorọ e rhe se ruẹ ọhọre rẹ Jihova ọkieje-e?

⁴ Avwanre vwo ẹguọnọ rẹ Jihova, a je guọnọ ru obo re cha nẹrhẹ oma vwerhọn. Jẹ ọ da ohwo mamọ nẹ fikirẹ jẹgba, e se ru obo rọ guọnọre ọkieje-e. Avwanre ghwa hepha kerẹ ọyinkọn Pọl rọ tare nẹ, “Mi vughe obo ri yovwiri, ẹkẹvuọvo yi mi se ruo-o.”—Rom 7:18; Jems 3:2.

5. Ewene vọ yen avwanre ruru e ki se bromaphiyame, jẹ egbabọse vọ yen avwanre ji nene muabọ?

⁵ Avwanre siobọnu iruemu ebrabra ri fo vwọ kẹ Inenikristi-i. (1 Kọr. 6:9, 10) Dedena, avwanre gbare-e. (Kọl. 3:9, 10) Ọtiọyena, ohwo de bromaphiyame nu yẹrẹ ọ da tobọ dianẹ ọ hẹ ukoko na krire, o ji se ru chọ, o se rhiẹromrẹ edavwini yẹrẹ vwo iroro echọchọ. A sa tobọ nene ẹdia tiọyena muabọ ikpe buebun.

6, 7. (a) Die yen nẹrhẹ a sa dia ugbeyan rẹ Jihova dede nẹ avwanre gbare-e? (b) Diesorọ avwanre vwọ yare evwoghovwo rẹ Jihova ọkieje?

⁶ Avwanre sa ga Jihova, je dia ugbeyan rọyen dede nẹ avwanre gbare-e. Roro kpahen ọnana: Ọke rẹ Jihova vwo si avwanre te oma, ọ riẹnre nẹ avwanre che ru chọ ọke evo. (Jọn 6:44) Ọghẹnẹ riẹn uruemu vẹ iroro rẹ avwanre, ọ je riẹn asan rẹ avwanre da vwiẹrẹ. Ọ riẹnre nẹ avwanre che ru chọ ọke evo. Dedena, Jihova je guọnọ nẹ wọ rhe dia ugbeyan rọyen.

⁷ Ẹguọnọ yen mu Ọghẹnẹ vwọ kẹ avwanre izobo rẹ ọtanhirhe rẹ Ọmọ ọghanghanre rọyen. (Jọn 3:16) Fikirẹ ọtanhirhe na, siẹrẹ e de ru umwemwu, e se kurhẹriẹ, yare evwoghovwo rẹ Jihova, ji vwo imuẹro nẹ a je sa dia ugbeyan rọyen. (Rom 7:24, 25; 1 Jọn 2:1, 2) Ọtiọyena, ofori nẹ e siomauko vwọ kẹ erere rẹ ọtanhirhe na fikirẹ ẹdia rẹ umwemwu rẹ avwanre hepha? Ẹjo. Ka cha họhọ ohwo rẹ abọ rọyen gberi jẹ ọ rhọnvwe reyọ ame vwọ hworhẹ-ẹ. Ọtanhirhe na herọ vwọ kẹ irumwemwu ri kurhẹriẹ. Ọ vwerhoma nẹ womarẹ ọtanhirhe na, avwanre vẹ Jihova je sa dia ugbeyan dede nẹ avwanre gbare-e.—Se 1 Timoti 1:15.

8. Diesorọ o vwo je fo re vwo kuẹrofia kẹ ẹdia rẹ jẹgba rẹ avwanre?

⁸ Avwanre ghwe kuẹrofia kẹ ẹdia rẹ jẹgba rẹ avwanre-e. A sa vwọ dia ugbeyan rẹ Jihova churobọ si ra vwọ davwẹngba rẹ avwanre eje vwọ vwẹrokere Ọghẹnẹ vẹ Jesu, a me je dia oka rẹ ohwo rẹ ayen guọnọre nẹ a dia. (Une 15:1-5) O ji churobọ si re vwo suẹn urhurusivwe rọhẹ oma avwanre, a me je davwẹngba vwọ kẹnoma kẹ ayen kare kare. Owenẹ e bromaphiyame krire, yẹrẹ o ji kri-i, e jẹ avwanre “rhuẹrẹ idjerhe” rẹ avwanre phiyọ ọkieje.—2 Kọr. 13:11.

9. Mavọ yen avwanre ru riẹn nẹ e se ku ohwo ọkpokpọ na phiyọ ọkieje?

 ⁹ A guọnọ ẹgbaẹdavwọn rẹ ọkieje a ke sa “rhuẹrẹ idjerhe” rẹ avwanre ji “ku ohwo ọkpokpọ na” phiyọ. Pọl da karophiyọ iniọvo na: “Gbe ku oma rẹ ovwan rẹ awanre na kugbe uruemu rẹ ovwan rẹ awanre na ro miovwiri fiki rẹ ophiẹvwe rẹ urhuru sivwi ofefe na kufia, [“rere ovwan vwẹ ọkeneje vwo ru ẹgba iroro ovwan phiyọ ọkpokpọ,” NW] re we ku ohwo ọkpokpọ na phihọ oma, ra mare vwẹ uhoho rẹ Ọghẹnẹ vwẹ omamọ rẹ ọvwata kugbe ẹfuọn.” (Ẹfe. 4:22-24) Ubiota na “ọkeneje” mudiaphiyọ nẹ re vwo ku ohwo ọkpokpọ na phiyọ guọnọ ẹgbaẹdavwọn rẹ ọkieje. Ọnana vwerhoma kidie ọ kẹ avwanre imuẹro nẹ otoro obo ro krite avwanre ga Jihova re-e, avwanre se ru iruemu rẹ Inenikristi rẹ avwanre yovwinphiyọ kọke kọke. Baibol na ghene sa chọn avwanre uko vwo wene akpeyeren avwanre.

10. Die yen a guọnọ mie avwanre a ke sa yan obaro womarẹ ukẹcha rẹ Baibol na, kẹ enọ vọ yen a sa nọ?

¹⁰ Avwanre cha davwẹngba mamọ siẹrẹ a da guọnọ nẹ Ota rẹ Ọghẹnẹ wene akpeyeren avwanre ọkieje. Ẹkẹvuọvo, diesorọ ọ vwọ guọnọ ẹgbaẹdavwọn mie avwanre? Ọ da dianẹ Jihova ku ebruphiyọ ku ẹgbaẹdavwọn avwanre, o rhe fo nẹ a je mrẹ ẹyan obaro rẹ ẹwẹn vwẹ akpeyeren avwanre? Jihova rhe se si iroro ọchọchọ nẹ ẹwẹn rẹ avwanre te ẹdia rẹ ẹgbaẹdavwọn otete kọyen a guọnọre re vwo dje omamọ rẹ uruemu phia?

11-13. Diesorọ Jihova vwọ guọnọ ẹgbaẹdavwọn ọgangan mie avwanre re vwo phi ovwiẹrẹ kparobọ?

¹¹ E de roro kpahen irharheghe na, a cha riẹn nẹ Jihova vwo ẹgba mamọ. Kerẹ udje, vwẹ aroẹbrẹ ọvo, elo vẹ ọrhorho ro nẹ ọnre na cha, ganre mamọ. Dede nẹ, elo vẹ ọrhorho rọyen ro te akpọ na ghwe bu-un, jẹ ọyen a guọnọre rere arhọ sa vwọ dia akpọ na. (Une 74:16; Aiz. 40:26) Oma vwerhen Jihova siẹrẹ ọ da vwẹ ẹgba rẹ idibo rọyen guọnọre vwọ kẹ ayen. (Aiz. 40:29) Ọghẹnẹ sa tobọ ruo lọhọ kẹ avwanre e se vwo phi ebẹnbẹn vẹ ovwiẹrẹ re vwori kparobọ womarẹ ẹgba rọyen. Kẹ diesorọ o rhe ru ọtiọye-en?

¹² Jihova kẹ avwanre ọmuvwiẹ. Siẹrẹ e de brorhiẹn, je davwẹngba vwo ru ọhọre rẹ Ọghẹnẹ, ọnana che dje oborẹ ẹguọnọ rẹ avwanre vwo kpahọn kodo te kugbe owenvwe re vwo ru obo ri je. O ji djephia nẹ avwanre ka ẹbẹre rẹ usuon rọyen. Eshu gbevwọso usuon rẹ Jihova, ọtiọyena Ọsẹ rẹ avwanre rọhẹ odjuvwu vwẹ ẹro ọghanghanre vwo nẹ ẹgbaẹdavwọn vẹ owenvwe rẹ avwanre vwọ ka ẹbẹre rọyen. (Job 2:3-5; Isẹ 27:11) Ẹkẹvuọvo, Jihova de ru erọnvwọn eje lọhọ vwọ kẹ avwanre, e rhe nene jẹgba rẹ avwanre họnre-e, kọyen evun-ẹfuọn vẹ obicha rẹ avwanre vwọ kẹ usuon rọyen rhe fiemu vuọvo-o.

¹³ Kọyensorọ Jihova vwọ vuẹ avwanre nẹ a “pharhe” re vwo vwo uruemu rẹ Onenikristi. (Se 2 Pita 1:5-7; Kọl. 3:12) Ọ guọnọre nẹ a davwẹngba vwo sun iroro vẹ uruemu rẹ avwanre. (Rom 8:5; 12:9) Ọ kẹ avwanre omavwerhovwẹn siẹrẹ a da mrẹ ewene rẹ Baibol na ruẹ vwẹ akpeyeren rẹ avwanre, kidie a davwẹngba avwanre eje vwo ruo.

14, 15. Mavọ yen e se vwo vwo iruemu rẹ Jihova vwo ẹguọnọ kpahen? (Ni ekpeti na, “ Baibol na vẹ Ẹrhovwo Wene Akpeyeren Rayen.”)

¹⁴ Die yen e se ru re vwo vwo uruemu rẹ Onenikristi, je nẹrhẹ oma vwerhen Jihova? Ọ vrẹ a de vwọ yanphiaro ghevweghe. Ofori nẹ a davwẹngba ọkieje, je yọnrọn irhi rẹ Ọghẹnẹ. Rom 12:2 da ta: “We hirhe oma phihọ ohwo rẹ akpọ nana ọvo-o ẹkẹvuọvo gbe wene iroro rẹ udu rẹ ovwan phihọ ọkpokpọ, re we se vughe ọhọre rẹ Ọghẹnẹ, obo ri yoma ro fo ẹreyọ kugbe obo re gbare.” Womarẹ Baibol na vẹ ẹwẹn ọfuanfon na, Jihova chọn avwanre uko vwọ riẹn ọhọre rọyen ji vwo ruo, rere e se vwo wene akpeyeren avwanre vwo nene irhi rọyen. Ẹgbaẹdavwọn rẹ avwanre churobọ si isese rẹ Baibol ri kẹdẹ kẹdẹ, re vwo roro kpahen obo re seri, kugbe ra vwọ yare ukẹcha rẹ ẹwẹn ọfuanfon na. (Luk 11:13; Gal. 5:22, 23) A cha dia omamọ rẹ Onenikristi vwọrẹ iroro, eta, vẹ uruemu, siẹrẹ e de nene odjekẹ rẹ ẹwẹn ọfuanfon rẹ Ọghẹnẹ, je kpọ iroro rẹ avwanre vwo nene iroro rẹ Jihova kirobo rọ hepha vwẹ Baibol na. Dedena, o ji fo nẹ e nomaso ọkieje e vwo jeshe ro umwemwu.—Isẹ 4:23.

¹⁵ Vwọ vrẹ isese rẹ Baibol na, o ji fo nẹ a vwẹ ẹbe ukoko na vwo yono Ota rẹ Ọghẹnẹ vẹ ẹwẹn ra vwọ vwẹrokere uruemu iyoyovwin rẹ Jihova. Ihwo evo jokaphiyọ ẹkpo rẹ Baibol evo vẹ iyovwinreta rehẹ Uwevwin Orhẹrẹ na yẹrẹ Awake! re chọn ayen uko vwo vwo uruemu rẹ Onenikristi yẹrẹ vwo phi ovwiẹrẹ ọvo kparobọ, kẹ ayen rhoma se ọke ọvo de te.

16. Diesorọ ẹwẹn avwanre vwo jẹ ẹkuọrọn siẹrẹ ewene rẹ avwanre rha ghwa dia kpakpata-a?

¹⁶ Karophiyọ nẹ ẹyan obaro wẹn guọnọ ọke, ọ dia emu rẹ kpregede-e. Re vwo vwo uruemu rẹ Onenikristi guọnọ ẹgbaẹdavwọn rẹ ọkieje. Ọ je guọnọ odirin mie avwanre, Baibol na ki se ru ewene vwẹ akpeyeren rẹ avwanre. Ẹsosuọ, ọ sa bẹn re vwo ru obo ri yoma. Jẹ ọke vwọ yanran na, kọ cha lọhọ rẹ iroro vẹ iruemu rẹ avwanre vwo shephiyọ ọ rẹ Jihova Ọghẹnẹ.—Une 37:31; Isẹ 23:12; Gal. 5:16, 17.

17. A da fuevun kẹ Jihova, die yen a sa rhẹro rọyen vwẹ ọke rọ cha obaro na?

¹⁷ Idibo rẹ Jihova re fuevun, vwo iphiẹrophiyọ rẹ ayen cha vwọ ga  bẹdẹ bẹdẹ vwẹ ẹdia rẹ ọgbagba. Ọke yena, kọ cha dia phẹphẹre vẹ omavwerhovwẹn re vwo vwo uruemu rẹ Onenikristi. Bẹsiẹ ọke yena vwo te, oma vwerhen avwanre vwọ kẹ ọtanhirhe na rọ nẹrhẹ a sa ga Jihova nonẹna. E se ru ọnana siẹrẹ a da vwẹ uphẹn kẹ ẹgba rẹ Ota rẹ Ọghẹnẹ nẹ o wene akpeyeren rẹ avwanre ọkieje dede nẹ avwanre gbare-e.

18, 19. Die yen cha kẹ avwanre imuẹro nẹ Baibol na ghini vwo ẹgba ro vwo wene akpeyeren rẹ avwanre ọkieje?

¹⁸ Kevin, re djunute siẹvore davwẹngba ro vwo sun ophu ọgangan rọyen. Ọ nabọ roro kpahen iyono rẹ Biabol na ọ da je vwẹ ayen ruiruo, o rhiabọreyọ ukẹcha vẹ uchebro rẹ iniọvo na. Ikpe evo vwọ wan nu, Kevin da mrẹ ewene rode vwẹ akpeyeren rọyen. Ukuotọ rọyen, o de muwan rọ vwọ ga kerẹ odibo rowian, omarẹ ẹgbukpe 20 rhire na, ọ ga kerẹ ọkpako vwẹ ukoko na. Dedena, ọ je mrẹ nẹ ofori o nomaso o vwo jeshe ro umwemwu.

¹⁹ Ikuegbe rẹ Kevin na djerephia nẹ Baibol na chọn ihwo rẹ Ọghẹnẹ uko vwo ruẹ ewene vwẹ akpeyeren rayen ọkieje. Ọtiọyena, e jẹ avwanre vwẹ uphẹn kẹ Ota rẹ Ọghẹnẹ rere o wene akpeyeren rẹ avwanre ọkieje, ọ je nẹrhẹ e vwo omamọ rẹ oyerinkugbe vẹ Jihova. (Une 25:14) Avwanre vwo imuẹro nẹ Baibol na se ghini wene akpeyeren rẹ avwanre ọkieje, kidie avwanre mrẹ ebruphiyọ rẹ Jihova vwẹ ẹgbaẹdavwọn rẹ avwanre.—Une 34:8.