1-3. (a) Ana mpaka tulajilileje kucenga yindu yapi panyuma pakubatiswa? (b) Naga yikutusawusya kumalana ni yakulemweceka yine, ana mpaka tuliwusyeje yiwusyo yapi? (Alole yiwulili yayili penaniyi.)

KEVIN ^[1] paŵalijiganyisye usyesyene, ŵatandite kusacilila mnope kuti aŵe paunasi wambone ni Yehofa. Nambope kwa yaka yejinji munyumamo, jwalakwe ŵatendaga yakusakala mpela kucesa juga, kwemba sona, kolelwa, soni kamulicisya masengo mtela wakusokonasya mtwe. M’yoyo kuti jwalakwe aŵe paunasi wambone ni Mlungu, ŵasosekwaga kuleka yitendo yangakamulana ni Malembayi. Kevin ŵakombwele kumalana ni yitendoyi mwakwegamila kwa Yehofa soni Maloŵe gakwe.—Ahe. 4:12.

² Kevin paŵabatiswe nganaleka kucenga ndamo sine ni sine paumi wakwe. Jwalakwe ŵasosekwaga kwendelecela kusya ndamo syaciklistu. (Aef. 4:31, 32) Mwambone, jwalakwe yamsawusyaga mnope kumalana ni ndamo ja kupya mtima mwacitema. Kevin ŵatite, “Kumalana ni kupya mtima kwaliji kwakusawusya mnope  kulekangana ni kuleka ndamo sine syakusalaka syanatendaga.” Kupopela ni mtima wosope soni kulijiganya Baibulo mwamtawu kwamkamucisye Kevin kuti akombole kumalana ni kupya mtima.

³ Mwakulandana ni Kevin, ŵajinji mwetuwe twacenjile yindu yejinji paumi wetu mkanitubatiswe pakusaka kuti umi wetu uŵe wakamulana ni yajikusasala Baibulo. Panyuma pakubatiswa, twayiweni kuti panasoni yindu yine yamwanamwana yatukusosekwa kwendelecela kucenga kuti tumsasyeje Mlungu soni Klistu. (Aef. 5:1, 2; 1 Pet. 2:21) Mwambone, komboleka kuti tukusanonyela kunyinyita, kusogoda, tukusajogopa mnope ŵandu, kapena tukusatenda yakulemweceka yine. Komboleka kuti tuŵele tuli mkulingalinga kumalana ni ndamo syelesi kwa yaka yejinji nambo yikutusawusyape. Paligongo lyeleli mwine mpaka tuliwusyeje kuti, ‘Nakombwele kala kumalana ni yakulemweceka yekulungwakulungwa, nambi ligongo cici ngulepela kumalana ni yakulemweceka yamwanamwanayi? Ana ngusosekwa kutenda wuli kuti Baibulo jicenje umi wangu?’

4. Ligongo cici nganituŵa tukombwele kumsangalasya Yehofa ndaŵi syosope?

⁴ Wosopewe tukusamnonyela mnope Yehofa soni tukusasacilila ni mtima wosope kutenda yindu yakumsangalasya. Nambo ligongo lyakuti tuli ŵangali umlama nganituŵa tukombolece kumsangalasya Mlungu ndaŵi syosope. Ndaŵi syejinji tukusapikana mumtima mpela muŵapikanilaga Paulo juŵalembile kuti, “Ngusasacilila kutenda yambone nambo ngangusakombola kuyitenda.”—Alo. 7:18; Yak. 3:2.

5. Ana ndamo syakusakala syapi syatwalesile mkanitubatiswe, nambo ana tukusalagape ni yindu yapi atamose panyuma pakubatiswa?

⁵ Mkanitubatiswe, twalesile ndamo syakusasiŵenga Yehofa. (1 Akoli. 6:9, 10) Nambo atamose yili m’yoyo, tuli ciŵela ŵangali umlama. (Akolo. 3:9, 10) M’yoyo nganiyiŵa yisyene kuganisya kuti panyuma pakubatiswa kapena pakuŵa mu usyesyene kwa yaka yejinji nganituŵa tulemwesye cilicose, kutenguka, kapena kola nganisyo syakusakala. Mpaka tusosekwe kulimbana ni yakulemweceka yine kwa yaka yejinji.

6, 7. (a) Ana cici cacikusatukamucisya kuti tujendelecele kuŵa paunasi ni Yehofa atamose kuti tuli ŵangali umlama? (b) Ligongo cici tukusosekwa kum’ŵenda Mlungu kuti atukululucile patulemwisye?

⁶ Atamose kuti tuli ŵangali umlama mpaka tuŵepe paunasi wambone ni Yehofa soni kwendelecela kumtumicila. Tukusosekwa tumanyilileje kuti Yehofa paŵatuwutile kuti tuŵe paunasi ni jwalakwejo, ŵamanyililaga kuti ndaŵi sine mpaka tulemwesyeje. (Yoh. 6:44) M’yoyo pakuŵa Mlungu akusamanyilila yitendo yetu soni yayili mumtima mwetu, ŵamanyililaga ya yindu yakulemweceka yatucilagaga nayo. Jwalakwe ŵamanyililagasoni kuti ndaŵi sine tucikasaga malamusi gakwe. Nambo yosopeyi nganiyimlekasya jwalakwe kuti aŵe paunasi ni m’weji.

⁷ Yehofa ŵatunonyele mnope mwati ŵatupele mtuka wambone mnope. Jwalakwe ŵamtumisye Mwanagwe pacilambo capasi kuti capelece umi wakwe ni kutuwombola wosope. (Yoh. 3:16) Patutesile cakulemwa tukusosekwa kum’ŵenda Yehofa kuti atukulucile, soni tukulupilileje kuti mtuka wakwe wa ciwombolo ciwutukamucisye kuti unasi wetu ni jwalakwe ujendelecele. (Alo. 7:24, 25; 1 Yoh. 2:1, 2) Tukumbucileje kuti Yesu ŵawilile ŵandu ŵakulemwa ŵapitikwice mtima. M’yoyo atamose patukulipikana kuŵa ŵakulemwa mnope, tukaleka kum’ŵenda Yehofa kuti atukululucile. Naga tukuleka kum’ŵenda yiciŵa mpela kuti tukukana kunaŵa m’miyala mwetu muli mubilile. Tukusayamicila mnope mtuka wa ciwombolo ligongo ukusatukamucisya kuti tujendelecelepe  kuŵa paunasi ni Yehofa atamose kuti tuli ŵangali umlama.—Aŵalanje 1 Timoteo 1:15.

8. Ligongo cici ngatukusosekwa kwambaga kutama ngayikosya yakulemwesya yetu?

⁸ Yili yisyene kuti ngatukusosekwa kwambaga kutama ngayikosya yakulemwesya yetu. Kuti tuŵe paunasi ni Yehofa tukusosekwa kulingalinga kumsyasya jwalakwe soni Klistu, soni kutenda yakusasaka jemanjajo. (Sal. 15:1-5) Tukusosekwasoni kulingalinga kuti tuŵambaleje yitendo yakulemweceka. Cinga tubatiswe pacangakaŵapa kapena twabatiswe yaka yejinji munyumamo, tukusosekwa ‘kwendelecela . . . kucenga.’—2 Akoli. 13:11.

9. Ana tukumanyilila catuli kuti mpaka tujendelecele kuwala umundu wasambano?

⁹ Tukusasosecela mtawu kuti tukombole “kucenga” soni kola “umundu wasambano.” Paulo ŵakumbwisye ŵakulambila acimjakwe kuti, “Ŵajiganyisye kuti awule umundu wakala wakamulana ni yitendo yawo yakala soni wawukusakasigwa ni yakumbila yakwe yaunami. Ajendelecele kuŵa ŵasambano munganisyo mwawo, soni awale umundu wasambano wawapanganyikwe mwakamulana ni lisosa lya Mlungu soni cilungamo cisyesyene ni kulupicika.” (Aef. 4:22-24) Maloŵe gakuti “ajendelecele kuŵa ŵasambano” gakulosya kuti kuwala umundu wasambano ngakukusamala. Yeleyi yili yakulimbikasya ligongo yikutukamucisya kumanyilila kuti kanga tuŵele tuli mkumtumicila Yehofa kwandaŵi jelewu catuli, mpaka tujendelecelepe kusya ndamo syaciklistu syasikusatutendekasya kola umundu wasambano. Kusala yisyene, Baibulo mpaka jijendelecele kucenga umi wetu.

10. Ana tukusasosekwa kutenda cici kuti Maloŵe ga Mlungu gajendelecele kutucenga, soni ana mpaka tukole yiwusyo yapi pangani jeleji?

¹⁰ Tukusasosekwa kuŵa ŵamtawu mnope kuti Maloŵe ga Mlungu gajendelecele kutucenga. Ligongo cici tukusosekwa kuŵa ŵamtawu? Naga Yehofa akusajaliwa yakulingalinga yetu, ana ngamkanakomboleka kutukamucisya kuti tukalajililaga kucenga?

11-13. Ligongo cici Mlungu akusasaka kuti tulinjejelinjeje kumalana ni yatukusalemwesya?

¹¹ Patukuganicisya ya yindu yaŵapanganyisye Yehofa, tukusamanyilila kuti jwalakwe akwete macili gamajinji mnope. Mwambone, lyuŵa likusapanganya macili gakuŵala, soni gakoca gamajinji pa sekandi jilijose. Nambo macili gamnonope gakusayika pacilambo capasi ligongo ni gagakusasosecela kuti papagwe yaumi. (Sal. 74:16; Yes. 40:26) Yehofa akusasangalala kutupa macili gakwe patukusosecela. (Yes. 40:29) Jwalakwe mpaka akombolece kutupa macili gakutukamucisya kumalana ni yakulemwa yetu yosope mwangalajilila soni kuti tulece kulemwesya. Nambo, ligongo cici ngakusatenda yeleyi?

¹² Yehofa ŵatupele upile wakulisagulila yakutenda. Naga tukusagula kutenda lisosa lya Mlungu tukusalosya kuti tukusamnonyela mnope Yehofa soni kuti tukusasacilila kumsangalasya. Tukusalosyasoni kuti tuli kumbali ja ulamusi wakwe. Satana ŵasasile kuti Yehofa nganaŵa jwakulamulila jwambone. M’yoyo naga tukumpikanila Yehofa tukusalosya kuti jwalakwe ali Jwakulamulila jwetu. Soni Atati ŵetu ŵakwinani akusayamicila mnope mtawu wetu. (Yobu 2:3-5; Miy. 27:11) Yikaŵe kuti Yehofa akusagamba kututendekasya kuti tukalemwesyaga cilicose ngamkanitulosya kuti tuli ŵakulupicika kwa jwalakwe soni kuti tuli kumbali ja ulamusi wakwe.

¹³ M’yoyo, Yehofa akusasaka kuti ‘tulinjejelinjeje mwamtawu’ kuti tukole ndamo syakusasaka jwalakwe. (Aŵalanje 2 Petulo 1:5-7; Akolo. 3:12) Yehofa akusajembeceya kuti tutendeje yindu mwamacili kuti tulamulileje nganisyo soni  mtima wetu. (Alo. 8:5; 12:9) Kutenda yindu m’litala lyeleli, kukusatukamucisya kuŵa ŵakwikutila mnope ligongo tukusamanyilila kuti Baibulo jikucenga umi wetu.

14, 15. Ana tukusosekwa kutenda cici kuti tukusye ndamo syakusasaka Mlungu? (Alole libokosi lyakuti, “Baibulo soni Lipopelo Yacenjile Umi Wawo.”)

¹⁴ Ana tukusosekwa kutenda cici kuti tukusye ndamo syakusanonyela Yehofa? Tukusosekwa kunda kuti Mlungu atulongoleleje mmalo mwakwamba kulitendela jika. Tukusosekwasoni kwendelecela kuya maloŵe ga Yehofa ga pa Aloma 12:2 gagakusati, “Akajigalilaga lunda lwa ndaŵi ajino, nambo agalawuce mwakucenga nganisyo syawo kuti amanyilile lisosa lya Mlungu lyalili lyambone, lyakundilila soni lyamlama.” Yehofa akusakamulicisya masengo Maloŵe soni msimu wakwe weswela pakusaka kutukamucisya kuti tumanyilileje lisosa lyakwe, kulitenda soni kucenga umi wetu. Tukusosekwa kutenda yakomboleka kuti tuŵalanjeje Baibulo lisiku lililyose, kuganicisya mwakusokoka yatukuŵalangayo, soni kupopela kuti Mlungu atupeje msimu weswela. (Luk. 11:13; Aga. 5:22, 23) Naga tukutenda yeleyi, Yehofa cacitukamucisya kupikanicisya soni kutenda yakumsangalasya jwalakwe soni tucilijiganya kaganisye kakwe. Yakuyicisya yakwe yiciŵa yakuti kaganisye, kaŵecete soni yitendo yetu yicimsangalasya mnope Yehofa soni tucimanyilila mwampaka tutendeleje ni yatukusalemwesya. Atamose yili m’yoyo, tukusosekwa kwendelecela kulimbana ni yatukusalemwesyayo.—Miy. 4:23.

¹⁵ Konjecesya pakuŵalanga Baibulo lisiku lililyose, tukusosekwasoni kulijiganyaga Baibulo pakamulicisya masengo mabuku getu, mpela Sanja ja Mlonda ni Galamukani! Ngani syejinji sya m’magasiniga sikusatujiganya mwampaka tusyasye ndamo sya Yehofa soni kulimbana ni yatukusalemwesya. Mpaka tusonganganye nganisi soni malembaga kuti tugaŵalanjeje ndaŵi ni katema.

16. Ligongo cici ngatukusosekwa kutenguka naga tukuyiwona kuti ngatukucenga mwacitema umi wetu?

¹⁶ Tukumbucileje kuti yikusajigala ndaŵi jelewu kulijiganya kuti tusyasyeje ndamo syakusasaka Yehofa. M’yoyo, naga akulipikana kuti nganatenda yejinji kuti acenje umi wawo mpela mwasacileje, akusosekwa kulitimalika. Candanda, akusosekwa kulingalinga mnope kuti atendeje yajikusasala Baibulo. Nambo pakuganicisya mnope soni kutenda yindu m’litala lyakusasaka Yehofa yikusaŵa yangasawusyasoni kuganisya mwakusatendela jwalakwe soni kutenda yakuŵajilwa.—Sal. 37:31; Miy. 23:12; Aga. 5:16, 17.

17. Ana tucipata majali gapi naga tukuŵa ŵakulupicika kwa Yehofa?

¹⁷ Tukwembeceya mwalung’wanu ndaŵi jele tuciŵa ŵandu ŵamlama ni kumtumicilaga Yehofa mpaka kalakala. Ndaŵi jelejo, kutenda yindu yakusasaka Mlungu kuciŵa kwangasawusya soni kuciŵa kwakusangalasya mnope. Nambo apano tukomboleka kumlambila Yehofa ligongo lyakuti ŵatupele mtuka wa ciwombolo. Atamose kuti tuli wangali umlama, mpaka tumsangalasye jwalakwe naga tukwendelecela kutenda yakomboleka kuti tucenje soni kuya yatukusalijinganya m’Baibulo.

18, 19. Ana mpaka tuŵe ŵakusimicisya catuli kuti Baibulo jikwete macili gakucenga umi wetu?

¹⁸ Kevin jwatumsasile kundanda jula, ŵatesile yakomboleka kuti amalane ni kupsa mtima. Jwalakwe ŵaganicisyaga mwakusokoka songa sya m’Baibulo soni kunda cikamucisyo caŵampaga ŵakulambila acimjakwe. Pali papitile yaka yakuŵalanjika, Kevin ŵajongolele mnope umundu wakwe. M’kupita kwa ndaŵi, jwalakwe ŵaŵajilwe kuŵa jwakutumicila jwakamucisya soni kwa yaka 20 aŵele ali mkutumicila mpela jwamkulungwa jwa mumpingo. Atamose yili m’yoyo, jwalakwe akuyiwona kuti akusosekwa kwendelecela kulimbana ni cilicose campaka cisokonasye usimu wakwe.

¹⁹ Ngani ja Kevin, jikulosya kuti Baibulo jikwakamucisya ŵandu ŵa Mlungu kwendelecela kucenga umi wawo kuti uŵe wambone. M’yoyo, kwende wosope tukundeje kuti Maloŵe ga Mlungu gajendelecele kutucenga soni kutukamucisya kuti tuŵe paunasi wambone ni Yehofa. (Sal. 25:14) Patukuyiwona kuti Yehofa akujaliwa mtawu wetu, tuciŵa ŵakusimicisya kuti Baibulo mpaka jijendelecele kucenga umi wetu.—Sal. 34:8.