1-3. a) Gunáʼ nga caadxi de ca cosa ni raca nagana para laanu gusaana de gúninu neca maʼ guyuunísanu. b) Xi zándaca guinabadiidxanu laca laanu purtiʼ qué ganda guchaʼnu lu caadxi cosa. (Biiyaʼ ca foto ni zeeda ra ruzulú tema riʼ).

ANTE gaca Kevin testigu stiʼ Jiobá, stale iza gudxite apuesta, guduʼbaʼ gueza, nabé guxudxi ne guca drogar. ^[1] Ora biziidibe de Jiobá, guyuuláʼdxibe gaca xhamígube laa. Peru ante chúʼnisabe la? gupa xidé bichaabe modo laabe. Ne gunda bíʼnibe guiráʼ ndiʼ purtiʼ gucané Jiobá laabe ne gucané Stiidxaʼ Dios laabe (Hebreos 4:12).

² Neca maʼ guyuunisa Kevin, gupa xidé bíʼniruʼ stipa pur guchaa modo laa lu xcaadxi cosa ti gusihuinni maʼ dxandíʼ xpinni Cristu laa (Efesios 4:31, 32). Bidii Kevin cuenta ridxiichiruʼ nagueenda. Ne guizáʼ bidxagayaabe pabiáʼ nagana cayaca para laabe guchaabe xpiaʼbe. Guniʼbe jma nagana guca para laabe guchaabe xpiaʼbe que gusaanabe guiráʼ cosa malu rúnibe ante chúʼnisabe. Ngue runi, gunábabe Jiobá  gacané laabe ne gudixhe íquebe guni estudiarbe Biblia. Gucané guiráʼ ndiʼ laabe para gunda bichaabe.

³ Stale de laanu laaca bisaana de gúninu caadxi cosa ni cadi jneza ante chuʼnísanu. Zacatiʼ nga gunda bíninu ni rusiidiʼ Biblia. Peru zándaca gudiʼnu cuenta caquiiñeruʼ guchaʼnu modo laanu lu xcaadxi cosa ti guihuinni jma maʼ zinándanu ejemplu stiʼ Dios ne stiʼ Cristu (Efesios 5:1, 2; 1 Pedro 2:21). Guzéʼtenu caadxi ejemplu. Zándaca gudiʼnu cuenta nabé riguiche ruaanu pur intiica cosa o nabé rininu binni. O zándaca nuu tiru qué randa rúninu ni jneza purtiʼ ridxíbinu xi guiníʼ binni o xi guiníʼ íquecaʼ de laanu. Zándaca maʼ gudiʼdiʼ stale iza de cayúninu stipa pur guchaʼnu, peru dede yanna rucheʼnu raqueca. Nga runi, zándaca guinabadiidxanu laca laanu: «Xiñee cayaca nagana para naa guchaaʼ pue. Xi naquiiñeʼ guneʼ para chinandaʼ ni na Biblia ti gusihuinneʼ dxandíʼ maʼ gadxé naa».

4. Xiñee qué randa rúninu guiráʼ ni riuulaʼdxiʼ Jiobá.

⁴ Cumu rúninu ni na Dios ne nadxiinu laa la? racaláʼdxinu gúninu ni riuuláʼdxibe de guidubi ladxidoʼno. Peru nuu tiru rucheʼnu, purtiʼ cadi perfectu laanu. Stale biaje runi sentirnu casi biʼniʼ sentir apóstol Pablu, laa guníʼ racalaʼdxiʼ guni ni jneza, peru cadi guiráʼ diʼ ora gunda biʼniʼ ni (Romanos 7:18; Santiago 3:2).

5. a) Xi bisaana de gúninu para gunda guyuunísanu. b) Xi qué randa rúninu purtiʼ binni imperfectu laanu.

⁵ Para gunda guyuunísanu ne gúcanu testigu stiʼ Jiobá, gupa xidé bisaana de gúninu stale cosa ni nanalaʼdxiʼ Jiobá (1 Corintios 6:9, 10). Peru cumu nácarunu binni imperfectu la? ruchéʼrunu neca maʼ napa iza de guyuunísanu (Colosenses 3:9, 10). Zándaca chuʼ ora uquiinde laanu gúninu xiixa cosa malu, o guni sentirnu xiixa ni cadi jneza, o zándaca cayaca nagana para laanu gucueezanu laanu. Ne zándaca maʼ nápanu iza de cayúninu xiixa cosa ni cadi jneza, peru qué ganda gusaananu ni.

6, 7. a) Xiñee zanda gaca xhamígunu Jiobá neca binni imperfectu laanu. b) Xiñee cadi jneza nga gusaana de guinábanu Jiobá guni perdonar laanu.

⁶ Neca binni imperfectu laanu, zanda gaca xhamígunu Jiobá ne gúninu ni na. Cadi guiaandaʼ laanu guca xhamígube laanu purtiʼ guyuuláʼdxibe xiixa de laanu ne racaláʼdxibe gunibiaʼnu laabe (Juan 6:44). Nanna dxíchibe imperfectu laanu, feu xpiaʼnu ne rucheʼnu. Neca zacá, biale de ladxidoʼbe gaca xhamígube laanu.

⁷ Cumu nabé nadxii Jiobá laanu la? bidiibe laanu ti regalu nabé risaca. Biseendabe Xiiñibe lu Guidxilayú para gatiʼ pur laanu ti guiaxa ca pecadu stinu (Juan 3:16). Ora gucheʼnu la? zanda guinábanu Jiobá guni perdonar laanu. Ra gutiʼ Jesús pur laanu, randa runi perdonar Dios donda stinu ne randa raca xhamígunu laabe (Romanos 7:24, 25; 1 Juan 2:1, 2). Naquiiñeʼ gánnanu guti Jesús pur ca binni ruchee ni raca arrepentir. Nga runi, ora guni sentirnu bíninu xiixa nabé malu, cadi gusaana de guinábanu Jiobá guni perdonar laanu. Pa qué guinábanu perdón laabe la? zeeda gaca ni casi ora nininu cadi naquiiñeʼ guiaʼriʼ nanu neca nabiidiʼ ni. Ñee cadi dxandíʼ rudiʼnu xquíxepeʼ Jiobá purtiʼ xhamigu laanu neca binni imperfectu laanu la? (Biindaʼ 1 Timoteo 1:15).

8. Xiñee naquiiñeʼ gúninu stipa pur guchaʼnu modo laanu.

 ⁸ Peru naquiiñeʼ guizaaláʼdxinu guchaʼnu xpiaʼnu. Naquiiñeʼ gúninu ni purtiʼ huayabi Jiobá laanu tu clase binni nga raca xhamigu (Salmo 15:1-5). Nga runi, pa racaláʼdxinu gaca xhamígunu Dios la? naquiiñeʼ gúninu stipa pur chinándanu ejemplu stibe ne stiʼ Xiiñibe. Laaca naquiiñeʼ gúninu stipa pur gucueezanu ca cosa malu ni riale de laanu gúninu ne gusaana de gúninu cani. Neca maʼ nápanu stale iza de guyuunísanu, naquiiñeʼ gúnirunu stipa pur gusihuínninu dxandíʼ maʼ gadxé laanu (2 Corintios 13:11).

9. Ximodo nánnanu cadi naquiiñeʼ gusaana de gúninu stipa pur guihuinni maʼ gadxé laanu.

⁹ Apóstol Pablu bidii conseju riʼ: «Ma cadi ucaa ique tu ni ucuá ique tu chiqué, purti udxite si ni laatu biʼni tu ni cadi jneza». Ne laaca guniʼbe: «Ma naquiiñe usihuinni tu ma nacubi tu dede ndaani ladxidóʼ to ne idubi xquenda biaani tu. Naquiiñe ibani tu modo naguixhe Dios ne usihuinni tu dxandí ma adxé laatu yanna, purti ma nayá xpida tu ne runi tu ni jneza» (Efesios 4:22-24). Textu riʼ cusiidiʼ cadi naquiiñeʼ gusaana de gúninu stipa pur guchaʼnu modo laanu ti guihuinni dxandíʼ maʼ gadxé laanu. Nga runi, neca maʼ xadxí de cayúninu ni na Jiobá, qué ziuu dxi gusaana de guizíʼdinu pabiáʼ sicarú ca cualidad stibe. Ne zanda gacané Biblia laanu guchaʼnu modo laanu ti ganda gácanu casi Jiobá.

10. a) Xiruʼ naquiiñeʼ gúninu para gacané Biblia laanu. b) Xi zándaca guinabadiidxanu.

¹⁰ Guiranu racaláʼdxinu chinándanu ni na Biblia. Peru naquiiñeʼ gúninu stale stipa ti ganda guchaʼnu modo laanu. Xiñee naquiiñeʼ gúninu stale stipa yaʼ. Ñee qué ñanda ñuni Jiobá xiixa ni nucaa laanu nuchaʼnu modo laanu jma nagueenda la?

11-13. Xiñee ribeza Jiobá gúninu stipa pur guchaʼnu modo laanu.

¹¹ Ora riníʼ íquenu guiráʼ ni bizáʼ Jiobá, nanna dxíchinu nápabe poder para gúnibe intiica cosa. Guiníʼ íquenu modo bíʼnibe Gubidxa. Cada segundu rundaa ni stale biaaniʼ ne calor, peru caadxi si de laacani redandá lu Guidxilayú riʼ, purtiʼ nga si nga caquiiñeʼ para chuʼ guendanabani (Salmo 74:16; Isaías 40:26). Laaca rudii Jiobá poder ca xpinni ni nuu lu Guidxilayú ora caquiiñecaʼ ni (Isaías 40:29). Nga runi, zándaca chuʼ tu guinabadiidxaʼ xiñee qué runi Jiobá xiixa ni gacané laanu guchaʼnu xpiaʼnu jma nagueenda.

¹² Rudii Jiobá lugar laanu quixhe íquenu xi gúninu. Rusaanabe lu nanu gúʼyanu pa zuzúʼbanu stiidxabe o pa coʼ. Ora riguixhe íquenu guzúʼbanu stiidxabe ne gúninu stipa pur gúninu ni riuuláʼdxibe la? rusihuínninu nadxiinu laabe ne racaláʼdxinu gúninu ni rusiecheʼ laabe. Binidxabaʼ na qué gapa diʼ Jiobá derechu para guni mandar laanu. Peru ora ruzúʼbanu stiidxaʼ Dios, rusihuínninu racaláʼdxinu guni mandarbe laanu. Nabé rusisaca Bixhózenu stipa ni rúninu (Job 2:3-5; Proverbios 27:11). Cumu qué runi Jiobá xiixa para gucueeza laanu de gúninu cosa malu la? ca stipa rúninu rusihuinni cani qué racaláʼdxinu guixélenu de laabe ne racaláʼdxinu guni mandarbe laanu.

¹³ Jiobá cayabi laanu naquiiñeʼ gúninu stipa pur gápanu ca cualidad stiʼ (Colosenses 3:12; biindaʼ 2 Pedro 1:5-7). Racaláʼdxibe gúninu stipa pur gucueezanu  ca cosa ni cadi jneza riníʼ íquenu ne cani runi sentirnu (Romanos 8:5; 12:9). Pa gúninu biaʼ gándatiʼ pur guchaʼnu ne ganda gúninu ni la? ziuʼnu nayecheʼ.

14, 15. Xi zanda gúninu para gápanu ca cualidad ni riuulaʼdxiʼ Jiobá. (Biiyaʼ recuadru « Bichaa Biblia ne oración xquendanabánicabe»).

¹⁴ Xi naquiiñeʼ gúninu para gápanu ca cualidad ni riuulaʼdxiʼ Jiobá yaʼ. Cadi laadinu nga guidúʼyanu paraa nga naquiiñeʼ guchaʼnu modo laanu. Naquiiñeʼ gudiʼnu lugar gabi Jiobá ni laanu. Romanos 12:2 na: «Ma cadi chi nanda tu ni na binni guidxilayú, sínuque laudii lugar uchaa Dios laatu ne cuee irá ni ucuá ique tu chiqué. Zacá zanna tu xii nga racalaʼdxi Dios guni tu, ni nachaʼhui ne ni chuʼlaʼdxiʼ ne ni jneza peʼ». Pa racaláʼdxinu gánnanu xi riuulaʼdxiʼ Jiobá la? naquiiñeʼ gudiʼnu lugar gacanebe laanu. Naquiiñeʼ guidúʼndanu Biblia guiráʼ dxi, guiníʼ íquenu ni na ni ne guinábanu laabe espíritu santu stibe (Lucas 11:13; Gálatas 5:22, 23). Pa gúninu zacá, zacané Jiobá laanu gúninu ni riuulaʼdxiʼ ne zazíʼdinu guiníʼ íquenu modo riníʼ íquebe. Xi zabeendunu yaʼ. Ziuulaʼdxiʼ Jiobá ni guiníʼ íquenu, ni guininu ne ni gúninu. Peru naquiiñeʼ gúnirunu stipa pur gucueezanu laanu de gúninu cosa malu (Proverbios 4:23).

¹⁵ Nánnanu naquiiñeʼ guidúʼndanu Biblia guiráʼ dxi, peru ni zacané laanu guiénenu ni jma nga guidúʼndanu ca publicación casi revista Torre stiʼ ni rapa ne ¡Despertad! Stale de ca tema ni reeda lu ca revista riʼ rusiidiʼ cani laanu gápanu ca cualidad stiʼ Jiobá ne rusiidiʼ cani laanu xi naquiiñeʼ gúninu para gucueezanu laanu de gúninu cosa malu. Zándaca guidúʼndanu caadxi tema o caadxi textu ni caquiiñepenu. Galán uguu chaahuinu cani para guidúʼndanu cani gatigá.

16. Xiñee cadi naquiiñeʼ guireʼnu gana pa para laanu nanene cuchaʼnu modo laanu.

¹⁶ Zadiʼdiʼ tiempu para ganda gápanu ca cualidad stiʼ Jiobá. Nga runi, cadi guireʼnu gana pa qué ganda guchaʼnu nagueenda casi ñuuláʼdxinu. Zándaca ora guzulunu naquiiñeʼ guni obligarnu laanu para gúninu ni na Biblia. Pa gúninu stipa pur guiníʼ íquenu casi riníʼ ique Jiobá ne gúninu ni riuulaʼdxiʼ la? qué zácapeʼ nagana para laanu guiníʼ íquenu casi laabe ne gúninu ni jneza (Salmo 37:31; Proverbios 23:12; Gálatas 5:16, 17).

17. Xi ndaayaʼ zacaanu pa qué gusaana de gúninu ni na Jiobá.

¹⁷ Racaláʼdxinu guedandá dxi maʼ gácanu binni perfectu ne qué chuʼ dxi gusaana de gúninu ni na Jiobá. Dxi ca, maʼ qué zúnirunu stipa para gucueezanu laanu de gúninu ni cadi jneza. Maʼ qué zaca nagana para laanu gácanu casi Jiobá. Peru neca imperfectu laanu yanna, zanda guni adorarnu laabe purtiʼ guti Jesús para guixiá donda stinu. Pa gúnirunu stipa pur guchaʼnu modo laanu ne gúninu ni rusiidiʼ Jiobá laanu lu Biblia la? ziuuláʼdxibe ni gúninu.

18, 19. Xi rusihuinni napa Biblia poder para guchaa xquendanabáninu.

¹⁸ Lu ca primé párrafo stiʼ tema riʼ bizéʼtenu de Kevin, ti hermanu ni biʼniʼ stipa pur gucueeza laa de guidxiichi. Guníʼ íquebe ni ruundabe lu Biblia ne bíʼnibe stipa pur guchaabe. Laaca bicaadiágabe ca conseju ni bidii xcaadxi hermanu laabe. Peru gudiʼdiʼ iza para gunda bichaabe, ne despué gúcabe siervu ministerial. Yanna maʼ zinebe 20 iza de nácabe ancianu de congregación. Peru nánnabe naquiiñeruʼ gúnibe stipa pur gucueezabe laabe.

¹⁹ Cásica Kevin, laanu laaca zanda gucháʼrunu modo laanu. Pa gúninu zacá la? jma zaca xhamigu Jiobá laanu (Salmo 25:14). Galán gúnirunu stipa para guchaʼnu ti gúninu cani riuulaʼdxiʼ Jiobá, ne laabe zacanebe laanu. Nanna dxíchinu napa Biblia poder para guchaa xquendanabáninu (Salmo 34:8).