BEYÉ’É Kalate Zambe be nga bi mevak mvus abui minjuk mbu 1919 ya ngon ébulu é to alu da. Nda beta étôkane ya Cédar Point, e si ya Amelka é mbe ve nyoñe bôt 2 500. Ve môs ôsu, bôt be nga so mame ngô’é be mbe bôte 1 000 a mvuk. Éyoñ alu é nga vin, bôte 2 000 a mvuk be nga so besitima, bemetua, a beminsini a minkoñ. E môs tusedé, beta nsamba bôt a nga sulan a nga bo na, bôt be ke tabe nseñ e bilé si.

Éfufube ya vian é mbe é tula’ane bilé si, a minsisiñe mi bôt mi mbe mi yené ane bone minkol. Abeñe mone mfebe a mbe a bo’o na, mefô’ôlô me binga me kebelan. Mojan éziñ a nga jô na: “E beta étôkan, jôm ése é mbe abeñ, ne mieññ, a mbe ve ane bobejañ a bekal be nto e paradis.”

Ve vôm ate a nji be a dañ abeñ a lôte ava’a é mbe bobejañ mesu. Kalate mefoé éziñ a nga jô na, “Bôte bese be mbe ayôñ, be nye’esan abui, be to fe mevak.” Beyé’é Kalate Zambe, be mbe angôndô ya meva’a ya tabe a bobejañe bap mvus abui mimbu. Be nga tôban abui minjuk: étibela’a éyoñe bita; beta minjuk akônda été; be nga fete Béthel ya Brooklyn; abui bobejañ é nga ke mimbôk amu be mbe be su’u Éjôé Zambe. Ja’a ba be mbe be wulu’u ésaé nkañete be nga tabe mimbôk mimbu 20. *

Beyé’é Kalate Zambe béziñ, be nga jô’é ésaé nkañete amu minju’u be nga tôbane mie. Be nga bi bisô a bili ate’e nlem. Abui ki é nga ke ôsu a tebe ne bip akusa bo étibela’a ngovina. Môs éziñ, mone bezimba a nga jô na, Beyé’é Kalate Zambe a nga sili minsili be nga yalane nye na, ba ye “ke ôsu a kañete mejô me Zambe akekui memane” ja’a bôt ba jô be na te ba beta kañete.

Beyé’é Kalate Zambe be mbe be wulu’u ba’aba’a a Zambe, be nga “tôñe zene Tate a mbe a liti’i be, . . . be ye’elan Ésa wop éyoñ ése.” Éyoñe ji, ba be bobenyañe bap be ne e beta étôkan ya Cédar Point e meva’a été. Sita éziñ a nga kat ôsimesan abui Beyé’é Kalate Zambe; be nji be be yem avale “ba ye beta taté ésaé nkañete a ayôñ ése.” Susu’a jam be mbe be yi a mbe ve na, be beta taté ésaé nkañete!

Nté sondô a mbe a lôte, bôte be mbe be kômbô’ô yem atinane ya “GA” be mbe be yene nta’ane mam wop, a bevôm befe. Môse nkul éwonga be mbe be loone na, “beébe bebo ésaé,” Joseph F. Rutherford a nga ve bôte 6 000 atinane ya “GA,” nkañete wé ô mbe ô su’ulan. “GA” a mbe a tinane na, Golden Age (L’Âge d’or). A mbe mfefé kalate mefoé asu ésaé nkañete. *

Mojañe Rutherford a nga kobô bobejañe be mbe miñwo’an a jô’ô na: “Éyoñe minjuk, be nga yene mbamba be mam ya éjôé Messie (L’Âge d’or) amu be mbe be bili mise ya mbunan. . . . Ésaé ya kate bôte ya si se na éjôé Messie ja zu, a mbe beta jam a mbe a dañe tebe ôsu ényiñe jap. Ngabe jia ya ésaé Zambe a nga ve be le.”

L’Âge d’or, a mbe “kalate mefoé, kalate a ve ndi, a nyi a yemete ñyeman.” Be nga belane nye na, be mias benya mejôô a zene ya ke menda menda. Éyoñe be nga sili abime bôt é mbe é kômbô’ô bo ésaé te, ane bôte bese be nga kute fas. “Bôte be mbe be bili nkômbane ya tôñe bibu’a mebo bi Yésus, be nga yia jia a ayôñ ése.” Jia te é mbe nlô ajô na, “Lôm éfufupe jôé a benya mejôô, a Tate.” Mojañ J. M. Norris a nga jô na: “Me se ngule ya vuan avale bilé bi mbe bi bo’o ane nge bia fô’ôsan.”

Mvuse beta étôkan, bôte be nga tabe ayap be tele minnoñ na be tili’i be biyôlé, ndemben be ne bo be nyoñe kalate mefoé ate éyoñ ése. Abui ya été é mbe é wô’ôtan ane Mabel Philbrick, nnye a nga jô na: “Ngo’o abime meva’a bi nga wôk éyoñe bi nga yeme na, abui ésaé da yange bia!”

Beyé’é Kalate Zambe 7 000 be nga kômesan asu ésaé te. Afebe kalate ba loone na, Organization Method (Méthode d’organisation), a nsoé kalate ba loone na, À qui l’œuvre est confiée (angl.), be nga liti aval ésaé ja yiane boban: Be nga telé mfefé asu ésaé ja ye wulu ésaé nkañete. Akônda ése é mbe é yiane bi bemvendé belal ba tebele ésaé éziñ. Mvendé jia ya été, é mbe é liti’i aval ésaé nkañete ja yiane boban. Be nga ke ba kap mebôta me kañete, abôta ése é mbe é bili menda 150 nge 200. Ékôane bisaé é mbe fe é boba’an mame ngô’é ya môse beletô. Ékôane te, bobejañ be mbe be kañete mam ba te bo ésaé nkañete, be mbe fe be suu nsôl ésaé ba te bo.

Herman Philbrick a nga jô na: “Éyoñe bi nga bulane menda mangan, bi nga taté na bia ke ôban nkañete, bi nyoñe biyôlé bi bôte be mbe be yi kalate mefoé.” Bôte bese be mbe be vô’ôlô be. Beulah a nga jô na: “Mvuse bita a abui mintaé, môt ase a mbe a nye’e asimesan é mbe ntilan e L’Âge d’or.” Arthur Claus a nga tili na: “Bôte bese ya akônda be mbe fe’e ne vema na, abui bôt é nga tiliban asu na be bi nsoé kalate te.” Éyoñ ôsu be nga kuli nye, mvuse ngon ébaé, be mbe be kabeya minsoé mi kalate e kui étune million, a abime bôt é nga tili biyôlé na ba yi nye é mbe 50 000.

Nkume mmombô a bete ya mbu 1920, ngone zangbwale é to alu da nlô ajô ô mbe na “mbamba foé ya Éjôé,” A. H. Macmillan a nga jô na kalate mefoé ate a ne “nsoé kalate ôsu ékôane Yéhôva ja belan na, é tindi bobejañ a bekale ya si se na be kañete mbamba foé ya Éjôé.” Nlô ajô te ô nga tindi miñwo’an mise na, be kañete si se na, éjôé ya yôp é ntele. Melu ma, bobenyañe be Yésus “be nga ve ésaé ya kañete,” ba bi mvolan wo so be bizu’u bi bôt ba kañete a ayôñ ése, e si se nté ba yange bibotan ya éjôé Messie.