KALPASAN ti adu nga aldaw a panagangin ken panagtudo, nabara ken naginiten idi Lunes, Septiembre 1, 1919. Iti dayta a malem, nakurang pay a 1,000 a delegado ti nagtataripnong iti auditorium a makalaon iti 2,500 iti panglukat a sesion iti kombension idiay Cedar Point, Ohio, U.S.A. Karabiyanna, simmangpet pay ti nasurok a 2,000 a naglugan iti barko, kotse, ken dagiti espesial a tren. Iti Martes, immadu ti bilang dagiti tattao isu a kasapulan a maangay ti nabatbati a programa ti kombension iti ruar iti sirok dagiti dadakkel a kayo.

Makalinong dagiti bulong ngem sumarut latta ti init ket nangpataud iti kasla puntas (lace) nga anniniwan iti kawes dagiti lallaki. Mayang-angin met dagiti dutdot kadagiti kallugong dagiti babbai gapu iti pul-oy ti angin nga aggapu iti Lake Erie. “Iti napintas a kasla parke nga aglawlaw, nga adayo iti arimbangaw ti daan a lubong, arigna paraiso dayta,” kinuna ti maysa a kabsat a lalaki.

Naabak ti pintas ti aglawlaw no idilig iti naragsak a rupa dagiti immatender. “Kasla nakapaspasnek ti amin,” impadamag ti maysa a lokal a diario, “ngem nakaragragsakda a tattao.” Kadagiti Estudiante ti Biblia, talaga a nakaragragsak ti aglalangen kalpasan ti nakaro a pannakasuotda iti napalabas a sumagmamano a tawen: pannakabusor idi panawen ti gubat; pannakabingaybingay kadagiti kongregasion; pannakaiserra ti Brooklyn Bethel; pannakaibalud ti adu gapu iti Pagarian, a pakairamanan dagiti walo a mangidadaulo a kakabsat a lallaki a nasentensiaan a maibalud iti agingga iti 20 a tawen. *

Gapu ta naupay ken nariribukanda, dadduma nga Estudiante ti Biblia ti simmardeng a mangasaba bayat dagita a narigat a tawen. Ngem inaramid ti kaaduan ti amin a kabaelanda nga agtultuloy iti laksid ti panangiparit ti gobierno. Kas pagarigan, impadamag ti maysa nga imbestigador nga iti laksid dagiti nainget a pakdaar, dagiti Estudiante ti Biblia a pinagsaludsodanna imbagada nga “agtultuloyda a mangikasaba iti sao ti Dios agingga iti panungpalan.”

Iti daytoy a panawen ti pannakasuot, dagiti matalek nga Estudiante ti Biblia “sinipsiputanda ti panangidaulo ti Apo, . . . a kanayon nga ikarkararagda ti panangiwanwan ti Ama.” Ita, agkakaduada manen iti naragsak nga asamblea ditoy Cedar Point. Inyebkas ti maysa a kabsat a babai ti rikna ti adu a nangpampanunot no kasano a “parang-ayenda ti trabahoda ken no kasano  a mangasabada manen iti organisado a pamay-an.” Kangrunaanna, kayatdan nga aramiden dayta!

Iti makalawas, saan a maawatan dagiti delegado dagiti letra a “GA” a nayimprenta iti programa ti kombension, welcome card, ken kadagiti karatula iti aglawlaw ti pagkombensionan. Iti Biernes, “Co-Laborers’ Day,” inlawlawag ni Joseph F. Rutherford ti kaipapanan dayta kadagiti 6,000 a nakikombension. Ti “GA” kaipapananna ti The Golden Age—maysa a baro a magasin para iti ministerio. *

Maipapan kadagiti padana a napulotan a Kristiano, kinuna ni Kabsat Rutherford: “Iti laksid dagiti riribuk, gapu ta adda pammatida, makitkitada ti Nabalitokan a Panawen ti nadayag a panagturay ti Mesias. . . . Ibilangda a kangrunaan nga obligasion ken pribilehioda nga ipakaammo iti lubong ti idadateng ti Nabalitokan a Panawen. Paset dayta ti inted-Dios a trabahoda.”

Ti Golden Age, “Maysa a Magasin ti Kinapudno, Namnama, ken Pammati,” ket mausar iti baro a pamay-an ti panangisaknap iti kinapudno—ti kampania a panangitukon iti suskripsion iti binalaybalay. Idi naisaludsod no mano ti mayat a makiraman iti dayta a trabaho, timmakder ti amin nga agdengdengngeg. Kalpasanna, “gapu iti ragsak ken regta a marikna laeng dagiti sumursurot iti addang ni Jesus,” inkantada: “Isilnagmo ti lawag ken kinapudnom, O Apo.” “Diakto malipatan a kasla nagunggon dagiti kayo gapu iti nakapigpigsa a kanta,” nalagip ni J. M. Norris.

Kalpasan ti sesion, adu nga oras a naglinia dagiti delegado tapno mairamanda kadagiti umuna nga agsuskribir iti magasin. Narikna ti adu ti kas iti narikna ni Mabel Philbrick, a nagkuna: “Talaga a nakaragragsak a maammuan nga adda manen trabaho nga aramidenmi!”

Nagsagana ti agarup 7,000 nga Estudiante ti Biblia. Impakaammo ti polieto nga Organization Method ken ti bokleta a To Whom the Work Is Entrusted (Dagiti Nakaitalkan ti Trabaho) dagiti detalye: Ti baro a Service Department iti hedkuarter ti mangiwanwan iti trabaho. Masapul a mangbuangay dagiti kongregasion iti maysa a Service Committee ken madutokan ti maysa a direktor a mangipaay kadagiti instruksion. Mabingbingay dagiti teritoria a tunggal paset ket 150 agingga iti 200 a balbalay. Maaramid ti Gimong ti Serbisio tunggal rabii ti Huebes tapno maisalaysay dagiti kakabsat dagiti kapadasanda ken maitedda dagiti reportda iti serbisio.

“Idi nakaawidkamin kadagiti pagtaenganmi, okupadokami aminen iti panangikampania iti suskripsion,” kinuna ni Herman Philbrick. Adu ti nasarakanda nga interesado. Nadlaw ni Beulah Covey a “kalpasan ti gubat ken nakaro a ladingit, kayat a maammuan ti amin ti maipapan iti umay a nabalitokan a panawen,” ti tiempo a masolbar ti amin a problema ken nasayaaten ti biag ti amin. Insurat ni Arthur Claus: “Talaga a nasdaaw ti intero a kongregasion gapu ta nagadu ti nangala iti suskripsion.” Iti uneg ti dua a bulan manipud iti umuna a ruar, dandani kagudua a milion a sampol a kopia ti The Golden Age ti naipaima, ken 50,000 ti nagsuskribir iti magasin.

Idi agangay, kinuna ni A. H. Macmillan nga iti artikulo a “Gospel of the Kingdom” (Ebanghelio ti Pagarian), a ruar ti The Watch Tower a Hulio 1, 1920, ti kaunaan a gundaway a pinaregta ti organisasion dagiti kakabsat iti intero a lubong a mangikasaba iti Pagarian ti Dios. Dayta nga artikulo ginutugotna ti amin a napulotan a Kristiano a “mangipaay iti pammaneknek iti lubong nga asidegen ti pagarian ti langit.” Ita, dagiti kakabsat ni Kristo, “dagiti nakaitalkan ti trabaho,” ket adda kaduada a minilion a naregta a mangikaskasaba iti sao bayat nga ur-urayenda ti nabalitokan a panawen a panagturay ti Mesias.