EMEDẸ jọ taure ẹdẹ ọsosuọ amara Azie ọrọ ukpe 1919 o te ti te, oso ọ jẹ hae rrọ kẹdẹ kẹdẹ avọ ofou, rekọ ẹdẹ yena nọ ọ jọ Ẹdẹvo-Oka na uvo o bẹre ze, oria kpobi o tẹ jọ sasasa. Evaọ oke uvo ẹdẹ yena, ahwo nọ a joma bu te odu ọvo (1,000) a te kokohọ afe-arozaha nọ u wo egbara nọ i bu te idu ivẹ gbe egba isoi (2,500). Onana o jọ ẹdẹ ọsosuọ okokohọ nana evaọ Cedar Point, Ohio, obọ America. Taure owọwọ u te ti te, amọfa nọ a bu te idu ivẹ (2,000) a tẹ nyaze, ejọ e ro ekọ, efa e ro imoto gbe itreni ze. Evaọ Edivẹ-Oka, ahwo na a te ti bu te epanọ a ro ru abọ okokohọ na nọ o kiọkọ evaọ otọ ire ilogbo nọ e jọ otafe.

Who re roro inọ ilesi ezae na a kuhọ nọ whọ tẹ ruẹ elo ọre nọ ọ be nya ighogho ebe ire ilogbo na lafi ikotu rai nọ a rrọ otọ edhedhẹ ire na. Yọ ofou odhedhẹ nọ o bi fou no ethẹ nọ a re se Lake Erie nọ ọ kẹle etẹe ze, ọ be lẹliẹ ileli nọ e rrọ itu eyae na gbile. Oniọvo-ọmọzae jọ ọ ta nọ: “Oria yena nọ o jọ wọhọ ogege-eriosehọ nọ ma jọ ababọ edo ọgaga akpọ anwae na, ginẹ aparadase.”

Oria nọ a jọ na o jọ wowoma gaga, rekọ u te oware ovo ho nọ a tẹ rehọ iẹe wawọ oghọghọ nọ o jọ ovao ahwo nọ a jọ etẹe. Obe-usi ẹkwotọ na jọ o ta nọ: “Ahwo na kpobi a se egagọ gboja gaga, ghele na a rrọ sasa gaga avọ ohwohwẹ.” Omakugbe kẹ egagọ o were Emọ-Uwuhrẹ Ebaibol na gaga, maero nọ edawọ egaga nọ i te rai ikpe jọ nọ i kpemu i serihọ no. Edawọ egaga nana jọ họ, ọwọsuọ etoke ẹmo, ohẹriẹ nọ o jẹ romavia evaọ ukoko na, Ebẹtẹle obọ Brooklyn nọ a wuhu di, inievo buobu nọ a mu fihọ iwou-odi fiki iruo Uvie na, enọ i kugbe inievo eree nọ e jẹ kobaro evaọ iruo Uvie na nọ a ta nọ a te rria uwou-odi ikpe 20. *

Udu nọ u whrehe i rai gbe oma nọ o lọhọ e rae u ru nọ Emọ-Uwuhrẹ Ebaibol na jọ a rọ siọ iruo usiuwoma ota na ba. Dede na, ibuobu rai a daoma thihakọ ghelọ ọwọsuọ otu egọmeti. Evaọ ẹdẹ jọ, ọkiotọ jọ ọ niyẹrẹ inọ ghelọ unuovẹvẹ ogaga nọ a kẹ Emọ-Uwuhrẹ Ebaibol na, enọ ọyomariẹ ọ kiẹriwi a ta nọ a “te ruabọhọ ta usiuwoma ẹme Ọghẹnẹ rite urere.”

Evaọ etoke odawọ nana soso, Emọ-Uwuhrẹ Ebaibol nọ i wo ẹrọwọ ziezi a ruabọhọ jẹ “ruẹ oghẹrẹ nọ Olori na ọ jẹ rọ kpọ eware, . . . jẹ lẹ ẹsikpobi rọkẹ ekpakpọ Ọsẹ na.” Obọnana, a wariẹ kuomagbe no evaọ okokohọ evawere nana nọ a ru evaọ Cedar Point na. Oniọvo-ọmọtẹ jọ ọ ta oghẹrẹ nọ o jọ ahwo buobu oma, enọ e jẹ ruawa kpahe epanọ a te sae rọ “wariẹ wobọ ziezi evaọ egagọ Ọghẹnẹ, jẹ ta usiuwoma na evaọ okugbe ọvo.” Ọwhọ nọ a re ro zihe kpohọ iruo na ọ jarai oma.

Evaọ oka na soso, ibieme ivẹ na, “GA” nọ e jọ iprogramo okokohọ, ekade odederehọ, gbe eka sa-sa nọ a fihọ wariẹ oria okokohọ na họ i je gbe ahwo nọ a jọ okokohọ na kpobi unu. Evaọ Edisoi-Oka nọ ọ jọ “Co-Laborers’ Day” (Ẹdẹ Ibe Iruiruo), Brọda Joseph F. Rutherford ọ tẹ fa otọ ibieme ivẹ na kẹ ahwo idu ezeza (6,000) nọ e ziọ okokohọ na. “GA” o dikihẹ kẹ The Golden Age, emagazini ọkpokpọ nọ a te rọ ta usiuwoma na. *

Brọda Rutherford ọ ta kpahe ibe Ileleikristi riẹ nọ a rọ ẹzi wholo re inọ: “Dede nọ a jọ oke ẹbẹbẹ, ẹrọwọ o ru nọ a rọ kparo ruẹ Golden Age, koyehọ oge oro hayo etoke ọruẹriọ gbe omofọwẹ ọrọ esuo Mesaya na. . . . A rri rie fihọ ugogo owha-iruo rai gbe uvẹ-ọghọ re a whowho kẹ akpọ-soso kpahe ẹtha etoke ọruẹriọ gbe omofọwẹ na. Onana yọ abọjọ iruo nọ Ọghẹnẹ ọ kẹ rai.”

The Golden Age na yọ “Emagazini Uzẹme, Ẹruore, gbe Imuẹro” nọ a ti ro rovie edhere ọkpokpọ nọ a ti ro whowho uzẹme na, koyehọ uvẹ nọ a ti ro no ẹthẹ ruọ ẹthẹ vuẹ ahwo inọ a fi odẹ hotọ kẹ emagazini nana. Okenọ a nọ unu ahwo nọ a gwọlọ wobọ evaọ iruo nana, ogbotu na kpobi ọ tẹ sa kpama. Kẹsena, “a tẹ rọ ọwhọ gbe ẹzẹ nọ ahwo nọ a bi lele ithihi Jesu ọvo a riẹ” so inọ: “Vi elo gbe uzẹme ra ze, O Olori.” Oniọvo jọ nọ a re se J. M. Norris ọ ta nọ: “Ẹdẹ yena ọ rẹ thọrọ omẹ ẹro vievie he, ẹkoyẹ ole na o wọhọ ẹsenọ u je nuhu ire nọ ma jọ otọ rai.”

Nọ a ku abọ yena họ no, ahwo nọ a jọ okokohọ na a te dhe uhie họ je dikihẹ euwa buobu re a ruẹse jọ ahwo ọsosuọ nọ a re fi odẹ hotọ kẹ emagazini na. Epanọ o jọ kẹ Mabel Philbrick ere o jọ ahwo buobu oma, ọ ta nọ: “O were oma kẹhẹ nọ ma rọ riẹ nọ ma be te wariẹ wo iruo nọ ma ti ru!”

Emọ-Uwuhrẹ Ebaibol nọ e joma bu te idu ihrẹ (7,000) a ruẹrẹ oma họ kẹ iruo. Omobe na, Organization Method gbe To Whom the Work Is Entrusted e ta kpahe epanọ iruo na e te jọ inọ: Ẹko-Iruo Ẹruorote Iruẹru Ikoko okpokpọ evaọ obọ ehri ukoko o te kpọ iruo na. A rẹ rọ Ogbẹgwae Iruo Ukoko mu evaọ ukoko na, gbe osu-iruo nọ ọ te hae rọ ithubro kẹ inievo na. No umuo iwou udhuhrẹ gbikpe (150) rite udhusoi akuava (200) a te hae ghale fihọ ẹkwotọ ọvuọvo. A vẹ te hai ru Ewuhrẹ Odibọgba evaọ owọwọ Edene-Oka, onọ inievo na a te jọ ta eware nọ a rọ ẹro ruẹ evaọ usiuwoma ota jẹ niyẹrẹ usiuwoma ota rai.

Oniọvo jọ nọ a re se Herman Philbrick ọ ta nọ: “Nọ ma no okokohọ na kpo te ọvuọ uwou riẹ no, mai kpobi ma tẹ nwani mu ahwo họ ẹvuẹ nọ a fi odẹ hotọ kẹ emagazini na.” Oria kpobi ahwo a jẹ jọ gaviezọ. Oniọvo ọfa nọ a re se Beulah Covey ọ ta re nọ: “O wọhọ nọ ẹmo na nọ o kuhọ na avọ uweri nọ o da oria kpobi fia, u ru nọ ohwo kpobi ọ jẹ rọ gaviezọ kẹ ovuẹ kpahe okenọ ọruẹriọ gbe omofọwẹ o te rọ jọ oria kpobi.” Oniọvo ọfa jọ nọ a re se Arthur Claus o kere nọ: “U gbe ukoko na soso unu nọ a ruẹ unu ahwo nọ a fi odẹ hotọ kẹ emagazini na.” Evaọ etoke emerae ivẹ nọ a ro siobọno The Golden Age na, a fi enwenọ idu egba isoi (500,000) erọ emagazini na họ ada, yọ ahwo nọ a bu te idu udhuvẹ gbikpe (50,000) a fi odẹ hotọ inọ a gwọlọ emagazini na.

Uzoẹme na, “Gospel of the Kingdom” (Emamọ Usi Uvie Na) o romavia evaọ uvitha Ahrẹ 1, 1920 orọ Uwou-Eroro Na. Uwhremu na, Brọda A. H. Macmillan ọ ta nọ uzoẹme nana họ “ẹme ọsosuọ nọ a ro se iruo usiuwoma ota akpọ-soso na, onọ ma bi gine ru nẹnẹ.” Uzoẹme yena o tuduhọ Ileleikristi kpobi nọ a rọ ẹzi wholo awọ re a “se isẹri kẹ akpọ na soso inọ uvie odhiwu na o kẹle no.” Nẹnẹ, ima ahwo buobu a kuomagbe inievo Kristi no, enọ “a mu iruo na h’obọ.” Yọ a be rọ ajọwha whowho usiuwoma na nọ a be hẹrẹ etoke ọruẹriọ gbe omofọwẹ Uvie Mesaya na.