BIKPELA win i kamap na ren i pundaun inap planti de. Tasol nau win na ren i stop na san i lait gen na ples i hot. Dispela de em Mande, Septemba 1, 1919. Long apinun, klostu 1,000 manmeri i bung long harim program bilong kibung long Cedar Point, Ohio, Amerika. Ol i bung long bikpela haus bung we 2,500 manmeri inap sindaun long en. Taim ples i kamap tudak, 2,000 manmeri moa i kam long bot, kar, na ol tren. Long Tunde, planti manmeri moa i kam long kibung, olsem na ol i go bung ausait. Ol i bung aninit long ol bikpela diwai na mekim ol narapela hap bilong program.

Lait bilong san i kam namel long ol lip bilong diwai na sedo bilong ol lip i kamap antap long klos bilong ol man. Kol win bilong wara Erie i bloim gras bilong pisin i stap long kep bilong ol meri. Wanpela brata i tok: “Mipela i stap long naispela hap i luk olsem gaden, na mipela i stap longwe long ol manmeri bilong dispela graun, na i olsem mipela i stap long ples paradais.”

Ples bung i luk nais tru, tasol taim ol manmeri long kibung i amamas na smail, dispela i luk nais moa yet. Wanpela niuspepa i tok: “Olgeta manmeri i putim tingting i go long ol tok i kamap long kibung, na ol i amamas tru.” Ol Sumatin Bilong Baibel i amamas tru long bung wantaim ol wanbilip bilong ol bikos ol i bin karim ol hevi long ol yia paslain. Woa i kamap na ol narapela i birua long ol; kros i kamap insait long ol kongrigesen; ol i pasim wok i kamap long Brooklyn Betel; ol birua i kalabusim planti bratasista bikos ol i mekim wok bilong Kingdom, na tu, ol i kalabusim 8-pela brata husat i go pas long wok na kot i tok long kalabusim ol inap 20 yia. *

Ol dispela traim i mekim na sampela Sumatin Bilong Baibel i lusim wok autim tok. Tasol planti i sanap strong na mekim yet wok autim tok. Wanpela polisman i tok, maski ol i tambuim ol Sumatin Bilong Baibel long autim tok, ol i tok ol bai “wok yet long autim tok bilong God i go inap long pinis.”

Long dispela taim, ol Sumatin Bilong Baibel i “lukluk long Bikpela long stiaim ol, . . . na oltaim ol i beten askim Papa long stiaim ol.” Nau ol i amamas long bung wantaim long kibung long Cedar Point. Planti bratasista i holim wankain tingting olsem wanpela sista—ol i laik save long olsem wanem ol bai “kirapim gen wok autim tok.”  Ol i gat bikpela laik tru long mekim dispela wok.

Long dispela wik olgeta, ol bratasista long kibung i tingting planti long 2-pela leta, “GA,” i stap long program bilong kibung, welkam kat, na long ol sain i stap long ples kibung. Long Fraide, Joseph F. Rutherford i mekim dispela tok, “De Bilong Ol Wanlain Wokman” (“Co-Laborers’ Day”), na 6,000 manmeri i harim dispela tok. Brata Rutherford i tokaut long mining bilong “GA”—The Golden Age—em nupela magasin bilong yusim long autim tok. *

Brata Rutherford i mekim tok long ol Kristen God i makim, na em i tok: “Long taim bilong hevi, ol i holim yet bilip, olsem na ol inap lukim olsem gutpela taim bai kamap na Mesaia bai mekim wok king. . . . Ol i pilim olsem ol i gat spesel wok tru long tokaut long ol manmeri olsem dispela gutpela taim bai kamap. God i givim dispela wok long ol.”

The Golden Age i stori long ol samting i kamap tru, na kirapim ol manmeri long bilip long ol gutpela samting bai kamap bihain. Ol bai yusim dispela magasin long kirapim nupela pasin bilong autim tok i tru—ol bai i go long haus bilong ol manmeri na kirapim ol long putim sapskripsen bilong kisim dispela magasin. Taim ol i askim long husat i laik mekim dispela wok, olgeta long odiens i kirap na sanap. Brata J. M. Norris i stori olsem, “ol lain husat i bihainim lek mak bilong Jisas, ol tasol i pilim strongpela laik bilong mekim wok.” Ol i singim song olsem: “Bikpela, salim lait na tok i tru i kam.” Brata Norris i tok: “Mipela i opim maus bikpela na singsing.”

Taim program bilong kibung i pinis, ol manmeri i laik kamap fes lain long putim sapskripsen long kisim nupela magasin, olsem na ol i sanap long lain inap planti aua. Planti i pilim wankain olsem Sista Mabel Philbrick, em i tok: “Mipela i amamas tru long save olsem mipela i kisim gen wanpela wok!”

Inap olsem 7,000 Sumatin Bilong Baibel i redi long mekim wok. Wanpela liklik nius, Organization Method na buklet, To Whom the Work Is Entrusted, i tok: Nupela Sevis Dipatmen long hetkota bai stiaim dispela wok. Kongrigesen i mas i gat Sevis Komiti na wanpela dairekta bilong givim ol instraksen. Ol i mas tilim ol teritori, na olgeta wan wan teritori i ken i gat 150 i go inap 200 haus. Ol kongrigesen i mas mekim Miting Bilong Wok long Fonde nait na ol bratasista i mas kamapim ol ekspiriens bilong ol na putim ripot long wok ol i mekim.

Brata Herman Philbrick i tok: “Taim mipela i go bek long hap bilong mipela, mipela olgeta i bisi tru long toksave long ol manmeri long putim sapskripsen bilong kisim magasin.” Planti manmeri i amamas long putim yau long ol. Sista Beulah Covey i tok: “Bihain long woa na planti hevi, olgeta manmeri i amamas tru long harim olsem wanpela gutpela taim bai kamap.” Brata Arthur Claus i tok: “Olgeta long kongrigesen i kirap nogut long lukim olsem planti manmeri tru i putim sapskripsen.” Stat long taim The Golden Age i kamap nupela, insait long 2-pela mun tasol ol bratasista i tilim klostu 500,000 magasin, na 50,000 manmeri i putim sapskripsen bilong kisim dispela magasin.

Long nius Wastaua (The Watch Tower) bilong Julai 1, 1920, wanpela atikol i kamap, nem bilong en, “Gospel of the Kingdom.” Bihain, Brata A. H. Macmillan i kolim dispela atikol olsem “fes atikol bilong oganaisesen we i stori long wok bilong autim tok long olgeta hap bilong graun, na ol bratasista i mekim dispela wok long nau.” Dispela atikol i kirapim olgeta Kristen em God i makim long “autim tok long ol manmeri olsem kingdom bilong heven i kam klostu pinis.” Long nau, planti milion manmeri i givim bel tru long autim tok wantaim ol brata bilong Krais, em “lain i holim wok,” na ol i wetim gutpela taim long kamap na Mesaia bai mekim wok bos.