KATAPOS hin pipira ka adlaw nga pag-inuran, sinirak han Lunes, Septyembre 1, 1919. Pagkakulop, waray pa mag-1,000 nga delegado an nagkatirok ha awditoryum nga may 2,500 nga lingkoran para tikangan an programa ha siyahan nga adlaw han kombensyon ha Cedar Point, Ohio, E.U.A. Pagkagab-i, sobra 2,000 pa nga delegado an inabot sakay hin barko, awto, ngan espesyal nga mga tren. Han Martes, damu gud an tinambong, salit an nabibilin nga programa han kombensyon kinahanglan himoon ha gawas han awditoryum ha ilarom han dagku nga puno.

Nasisirakan an mga dahon, salit an lambong hito nagin sugad hin lace ha bado han kalalakin-an. Tungod han huyuhoy han hangin tikang ha Lake Erie, nagkakapalid-palid an mga barahibo ha kalo han kababayin-an. “An makaruruyag nga sugad parke nga palibot, nga hirayo ha maaringasa nga kadaan nga kalibotan, pariho na gud hin paraiso,” siring han usa nga bugto.

An makaruruyag nga palibot nalabawan han malipayon gud nga pamahongpahong han mga tinambong. “An ngatanan baga hin seryoso,” sumala ha usa nga lokal nga peryodiko, “pero malipayon ngan marisyo gud hira.” Para ha mga Estudyante han Biblia, makalilipay gud ito nga katirok katapos han duro nga pagsari han naglabay nga pipira ka tuig: pagtimaraot tungod han diri pag-api ha girra; diri pagsinabtanay ha mga kongregasyon; pagsara han Brooklyn Bethel; kapriso han damu nga kabugtoan tungod han Ginhadian, upod na an walo nga brother nga nangunguna ha buruhaton nga ginsentensyahan hin 20 ka tuig nga kaprisohan. *

Tungod kay nanluya ngan nahulop durante hiton makuri nga mga panahon, an pipira nga Estudyante han Biblia umundang pagsangyaw. Pero kadam-an ha ira an nangalimbasog gud nga magpadayon bisan pa han mga pagdiri han gobyerno. Ngani ha usa nga sitwasyon, may imbistigador nga nagsiring nga bisan pa han duro nga pagdiri, an mga Estudyante han Biblia nga iya ginpakianhan marig-on nga nagbaton nga “magpapadayon [hira] pagsangyaw han pulong han Dios tubtob ha kataposan.”

Durante hinin panahon han pagsari, an matinumanon nga mga Estudyante han Biblia “nagin mabinantayon ha paggiya han Ginoo, . . . padayon nga nag-aampo ha giya han Amay.” Yana malipayon nga nagkakatirok hira ha Cedar Point. Iginpahayag han usa nga bugto an inabat han damu nga naghuhunahuna kon paonan-o nira “ibabalik an madasigon nga pagsangyaw ha organisado nga paagi.” Labaw ha ngatanan, karuyag nira magsangyaw utro!

Ha bug-os nga semana, an mga delegado naghinunahuna kon ano an kahulogan han mga letra nga “GA” nga nakaimprinta ha mga programa han kombensyon, welcome card, ngan mga karatola ha palibot han katirokan. Han Biernes, “Co-Laborers’ Day,” iginpahibaro ni Brother Rutherford an kahulogan hito nga mga letra ha 6,000 nga delegado. An “GA” nagpapasabot han The Golden Age—usa nga bag-o nga magasin nga magagamit ha ministeryo. *

Hi Brother Rutherford nagsiring mahitungod han iya igkasi-dinihogan nga mga Kristiano: “Bisan pa han mga kakurian, tungod han pagtoo nakikita nira an Bulawanon nga Panahon han mahimayaon nga pagmando han Mesias. . . . Ginhunahuna nira nga importante nga responsabilidad ngan daku nga pribilehiyo nga ipasamwak ha kalibotan an pag-abot han Bulawanon nga Panahon. Bahin ito han toka nga iginhatag ha ira han Dios.”

An The Golden Age, “Barasahon Mahitungod han Kamatuoran, Paglaom, ngan Pagtoo,” magagamit ha pagtikang hin bag-o nga pamaagi ha pagpasamwak han kamatuoran—pagtanyag hin subskripsyon hito nga magasin ha balay-balay. Han ginpakianhan an mga natambong kon hin-o an naruruyag makigbahin hito nga buruhaton, an ngatanan nanindog. Katapos, tungod han “kalipay ngan kadasig nga naieksperyensyahan la hadton nagsusunod han mga pitad ni Jesus,” hira nagkanta: “Ipagawas an imo kalamrag ngan kamatuoran, O Ginoo.” Diri gud hingangalimtan ni J. M. Norris nga sugad hin nababay-og an mga puno samtang nagkakanta hira ha daku nga tingog.

Katapos han sesyon, an mga delegado pinila hin pipira ka oras basi magin siyahan nga subskrayber han magasin. Inabat han damu an pariho han inabat ni Mabel Philbrick, nga nagsiring: “Makalilipay gud hibaroan nga mahihimo na liwat namon an amon buruhaton!”

Mga 7,000 nga Estudyante ha Biblia an nangandam para ha buruhaton. An flyer nga Organization Method ngan an bokleta nga To Whom the Work Is Entrusted nagsaysay han mga detalye: An bag-o nga Service Department ha headquarters an manginginano han buruhaton. Sadang magporma hin Komite ha Pag-alagad ha kongregasyon ngan magpili hin direktor nga magpapahibaro han mga instruksyon. An mga teritoryo babahinon ha mga grupo nga may 150 tubtob 200 nga balay. Magkakaada Katirok ha Pag-alagad kada Huwebes han gab-i para isumat han kabugtoan an ira mga eksperyensya ngan ihatag an ira mga report ha pag-alagad.

“Pag-uli namon ha amon mga balay, nagin sagipo kami ngatanan ha pagtanyag hin subskripsyon han magasin,” siring ni Herman Philbrick. Nakabiling hira hin damu nga interesado. “Katapos han girra ngan duro nga kasubo, baga hin ginkarawat han ngatanan an ideya nga may bulawanon nga panahon,” siring ni Beulah Covey. Hi Arthur Claus nagsurat: “Diri gud makatoo an bug-os nga kongregasyon nga damu hinduro an nagsubskrayb.” Ha sulod hin duha ka bulan tikang han siyahan nga gowa han The Golden Age, haros 500,000 nga kopya hito an naipahamutang, ngan may-ada 50,000 nga nagsubskrayb hito.

Hi A.H. Macmillan nagsiring nga an artikulo nga “Ebanghelyo han Ginhadian,” han Hulyo 1, 1920 nga gowa han The Watch Tower, amo an siyahan nga artikulo nga an organisasyon nag-aghat ha kabugtoan ha bug-os nga kalibotan nga magsangyaw mahitungod han Ginhadian han Dios. Gin-aghat hito nga artikulo an ngatanan nga dinihogan nga Kristiano nga “ipasamwak ha bug-os nga kalibotan nga hirani na an ginhadian han langit.” Yana, an kabugtoan han Kristo—“an mga gintaporan han buruhaton”—ginsusuportaran han minilyon nga madasigon nga nagsasangyaw han pulong samtang ginpapamulat an bulawanon nga panahon han Mesianiko nga Ginhadian.