LOK MA I POK NGEYE | GINANYUTA MA TITO LOK I KOM POLO
Lapeny Madok i Kom Polo
In tika dong itamo i kom kit ma polo tye kwede kacel ki cwec ma gibedo i iye? Ka tye kit meno, ci pe in keken. Pi mwaki milion mapol, dano gubedo ka byeko lok mapol madok i kom polo. Jo mogo gitamo ni polo opong ki kwariwa ma guto ma omyero kiworgi. Jo mukene gigoyo i wigi cal kabedo ma tye ki kuc ki yomcwiny, ma opong ki lumalaika kacel ki dano ma guto ma kitgi beco. Jo mukene bene gitamo ni polo obedo kabedo pa lubange milion mia mapol ata.
Jo mapol gipyem ni pe watwero ngeyo gin mo keken madok i kom polo pien pe tye ngat mo ma oa ki kunnu ma oneno ki wange wek otitiwa. Tam ma kit meno pe tye kakare. Yecu Kricito kong obedo i polo, ma peya obino i lobo. En owaco ka maleng bot lutela dini me cencwari me acel ni: “Alor piny ki i polo, pe ka tiyo gin ma iya mito pira kena, ento ka tiyo gin ma ngat ma yam oora mito.” Pi meno, Yecu onongo tye ka tito gin ma oneno ki wange i kare ma owaco bot lukwenane ni: “I ot pa Abana tye iye kabedo mapol.”—Jon 6:38; 14:2.
Labongo akalakala mo, Won Yecu aye Lubanga, ma nyinge Jehovah, dok Jehovah ‘gange’ tye i polo. (Jabuli 83:18) Pi meno, pe tye ngat mo ma twero tittiwa lok i kom jami ma tye i polo maber loyo Lubanga Jehovah gin ki Yecu Kricito. Gutito lok mapol i kom jami ma i polo kun gitiyo ki ginanyuta me ur ma kimiyo bot jo ma lugen.
I pwony ma lubo man wabinyamo lok mogo ma kicoyo i Baibul i kom jami ma co mogo guneno i ginanyuta mapatpat. Ka itye ka kwano lok i kom ginanyuta magi, wi myero opo ni cwec ma i polo gipeke ki kom, calo ma watwero gudogi nyo nenogi. Dong, ma ka tittiwa lok i yo ma cwec me cwiny keken aye gitwero niang iye, Lubanga otiyo ki ginanyuta me konyowa me goyo cal cwec me cwiny magi i yo ma niang iye yot. Ginanyuta magi bikonyi me niang maber cwec ma gibedo i “kabedo mapol” ma i polo.
