Ħafna nies jargumentaw li ma nistgħux inkunu nafu x’hemm fis-​smewwiet għax ħadd ma ġie minn hemm biex jgħidilna x’ra. Però, dan ir-​raġunar mhux korrett. Ġesù Kristu għex fis-​sema, jiġifieri fil-​qasam tal-​ispirti, qabel ma ġie fuq l-​art. Hu qal dan bil-​miftuħ lill-​mexxejja reliġjużi fl-​ewwel seklu: “Jien ma nżiltx mis-​sema biex nagħmel ir-​rieda tiegħi imma r-​rieda taʼ dak li bagħatni.” U Ġesù kien qed jgħid x’ra hu stess meta lill-​appostli qalilhom: “F’dar Missieri hemm ħafna postijiet fejn toqogħdu.”—Ġwanni 6:38; 14:2.

Ovvjament, Missier Ġesù hu Alla, li ismu hu Ġeħova, u d-​“dar” taʼ Ġeħova hi fis-​smewwiet. (Salm 83:18) B’hekk, ħadd ma jistaʼ jiddeskrivi d-​dinja inviżibbli aħjar minn Alla Ġeħova u Ġesù Kristu. Huma rrivelaw ħafna informazzjoni dwar il-​qasam tal-​ispirti permezz taʼ viżjonijiet spettakolari li taw lil uħud leali.

L-​artiklu li jmiss jiddiskuti siltiet mill-​Bibbja li jiddeskrivu x’raw xi rġiel f’diversi viżjonijiet. Hekk kif tikkunsidra dawn il-​viżjonijiet, ftakar li l-​qasam tal-​ispirti mhuwiex post li nistgħu mmissu u naraw. B’hekk, Alla minflok ma spjegalna l-​affarijiet fi kliem li jifhmuh biss il-​ħlejjaq spirti, hu uża viżjonijiet biex jurina kif inhu l-​qasam tal-​ispirti fi kliem li nistgħu nifhmu. Il-​viżjonijiet se jgħinuk tifhem lil dawk li jgħixu fil-​“ħafna postijiet” fis-​smewwiet.