IITOPOLWA YI IKOLELELA KOSHIPALANYOLO SHOKOMBANDA | OMAMONIKO NKENE MEGULU MWA TYA
Omapulo kombinga yehala moka hamu kala iishitwa yopambepo
Mbela owi ipulile nale kombinga yehala moka hamu kala iishitwa yopambepo nosho wo mboka haya kala mo? Ngele osho, hangoye awike ho ipula ngawo. Uule womimvo odhindji, aantu oya kala nokwiipula kombinga yoshinima shoka. Yamwe oyi itaala kutya mehala moka omo hamu kala aakulu yonale, mboka ya pumbwa okusimanekwa. Yalwe ohaya dhiladhila kutya olyo ehala ewanawa lyombili nenyanyu, ndyoka hali ithanwa egulu, moka mu na aayengeli naantu aawanawa mboka ya sa. Omanga yalwe ye li tala ko li li ehala moka hamu kala iikalunga oyindjiyindji.
Aantu oyendji ohaya ti kutya itatu vulu okutseya sha kombinga yehala moka hamu kala iishitwa yopambepo, oshoka kapu na omuntu a yile mo, ngoka ta vulu oku tu lombwela kombinga yalyo. Okudhiladhila kwa tya ngawo kaku li mondjila. Manga Jesus Kristus inee ya kombanda yevi, okwa li megulu, ehala moka hamu kala iishitwa yopambepo. Omimvo 2000 nasha dha ka pita, okwa li a lombwele aawiliki yomalongelokalunga sha yela a ti: “Ngame onda za megulu; inandi ya okugwanitha ehalo lyandje mwene, ihe olyaanguka a tuma ndje.” Okwa li wo a lombwele aayapostoli ye uuyelele wu shi okwiinekelwa, sho a ti: “Megumbo lyaTate omu na omahala gokukala ogendji.” — Johannes 6:38; 14:2.
He yaJesus, oKalunga nedhina lye oJehova. ‘Egumbo’ lyaJehova oli li megulu. (Eksodus 15:3, OB-1954) Onkee ano, Jehova naJesus oyo owala taya vulu oku tu lombwela kutya ehala lyiishitwa yopambepo olya tya ngiini. Oya holola uuyelele owundji kombinga yehala ndyoka, okupitila momamoniko omakumithi ngoka ya pe aalumentu aadhiginini.
Oshitopolwa sha landula ko otashi popi kombinga yoovelise dhOmbiimbeli ndhoka dha hokolola shoka sha monika kaalumentu mboka momamoniko. Sho to konakona omamoniko ngoka, dhimbulukwa kutya ehala moka hamu kala iishitwa yopambepo kali shi ehala li na iinima mbyoka tatu vulu okuguma nenge okumona. Kalunga okwa longitha omamoniko, e tu ulukile kutya ehala ndyoka olya tya ngiini, pehala lyoku li tu fatululila momukalo ngoka iishitwa yopambepo oyo owala tayi vulu okuuva ko. Omamoniko ngoka otage ke ku kwathela wu tseye kutya oolye haya kala mehala ndyoka, moka mu na “omahala gokukala ogendji.”
