OSAPI YO KONDYE | OKUTI OVIPUKA VIKAHI KEULU OVIO TYOTYILI?
Omapulo Konthele Yovipuka Vikahi Keulu
Okuti ove welipulilia-le konthele yeulu novipuka vikalako? Inkha welipulile ngootyo, have-ko vala. Mokueenda kuomanima omanyingi, ovanthu vehole okufuanyeka unene konthele yotyo. Vamwe vasoka okuti eulu omphangu imwe ikala vala ovanthu vokuankhimana. Vamwe nkhele vasoka okuti eulu omphangu imwe ina ombembwa, kukala onoandyu novanthu vana vekahi nawa tyina vamankhi. Nkhele vamwe vatala eulu ngatyina eumbo lio vanthu ovanyingi-nyingi vokuankhia.
Ovanthu ovanyingi vapopia okuti, onthue katupondola okunoñgonoka etyi tyikahi keulu mokonda petupu ou watundako opo etupopile oñgeni kukahi. Okusoka ngotyo tyapenga. Etyi Jesus Kristu eheneye pano pohi tete wali keulu. Wapopilile ononkhalamutwe mbono ngeleya kotyita tyotete okuti: “Ame natunda keulu, hapala okulinga ehando liange, mahi opo ndyilinge ehando lia una wanthuma.” Moluotyo, Jesus wapopila tete ovalongwa vae etyi apopia okuti: “Meumbo lia Tate yange muna onomphangu ononyingi.”—João 6:38; 14:2.
Tate ya Jesus o Huku, enyina liae o Jeova iya “eumbo” liae o keulu. (Salmo 83:18) Ngotyo, petupu vali ou upondola okupopia nawa konthele yeulu tyipona Jeova Huku na Jesus Kristu. Ovo vapopia ovipuka ovinyingi konthele yovipuka vikahi keulu pokati komamonekelo valekesa kuvana vena ekolelo.
Onthele mailandulako, maipopi haunene ononthele ononyingi mbo Mbimbiliya konthele yomamonekelo elikalaila. Tyina ulilongesa omamonekelo oo, hinangela okuti eulu hamphangu imoneka, kuna ovipuka onthue tupondola okukuata ine okumona. Opo Huku ahangunune ovipuka vikahi keulu, monkhalelo onthue tupondola okunoñgonoka, waundapesa omamonekelo. Omamonekelo oo maekukuatesako okunoñgonoka nawa ovipuka vikahi keulu, “kuna onomphangu ononyingi.”
