SIHLOKO LESINGUMGOGODLA | IMIBONO LEMAYELANA NENDZAWO YEMOYA
Imibuto Lemayelana Nalabahlala Endzaweni Yemoya
Uke wacabanga yini ngendzawo yemoya kanye nebantfu labaphila kuyo? Nangabe kunjalo, banengi labake bacabanga ngayo. Sekuphele tinkhulungwane teminyaka bantfu bacabanga ngalendzaba. Labanye bakholelwa kutsi endzaweni yemoya ngulakuhlala khona bokhokho lokufanele bahlonishwe. Labanye bacabanga kutsi kusezulwini, indzawo lenekuthula kanye nenjabulo lakuhlala khona tingilosi nebantfu labalungile lasebafa. Labanye basebambelele ekutseni indzawo yemoya ngulakuhlala khona tigidzigidzi tabonkulunkulu.
Bantfu labanyenti batsi kute lowatiko ngendzawo yemoya ngobe kute loke waphila khona lobuyile watosichazela ngayo. Ngisho noma lombono ungabonakala unengcondvo, kodvwa awusilo liciniso. Ngaphambi kwekutsi Jesu Khristu ete emhlabeni, bekaphila ezulwini lokuyindzawo yemoya. Wabachazela ngalokucacile baholi benkholo bangelikhulu lekucala leminyaka watsi: “Ngehla ezulwini kuze ngitewukwenta intsandvo yaloyo longitfumile, hhayi intsandvo yami.” Ngako Jesu bekakhuluma ngentfo layati kahle nakatsi kubaphostoli bakhe, “ekhaya laBabe kunetindzawo tekuhlala letinyenti.”—Johane 6:38; 14:2.
Babe waJesu nguNkulunkulu, ligama lakhe nguJehova futsi uhlala ezulwini. (Tihlabelelo 83:18, NW) Ngako nguJehova Nkulunkulu naJesu Khristu kuphela labangakhona kuyichaza kahle indzawo yemoya. Kunyenti labasembulele kona ngemibono lehlukahlukene labayibonisa bantfu labebatsembekile.
Sihloko lesilandzelako sitawuchaza emavesi lakukhulunywa khona ngemibono leminyenti leyabonwa bantfu labetsembekile. Njengobe sicabanga ngalemibono, khumbula kutsi indzawo yemoya ayisiyo intfo lesingayibona noma lesingayitsintsa. Esikhundleni sekutsi Jehova asebentise emagama latiwa tidalwa temoya kuphela nalesingeke siwacondze nakachaza indzawo yemoya, wakhetsa kusebentisa emagama natsi lesingawacondza. Lemibono itakusita kutsi ubati labahlala endzaweni yemoya lapho khona “kunetindzawo tekuhlala letinyenti.”
