Ior kpishi ka ve nyiman ér se fatyô u fan kwagh môm sha kwagh u tar u ken jijingi la ga, sha ci u or ngu a mough ker nan va shin tar, u nana ôr se kwagh u ijiir la ga. Nahan kpa, mhen ne ka u shami ga. Sha ci u Yesu Kristu yange vande lun sha, sha tar u ken jijingi, cii ve va shin tar ne ye. Yange pase mbahemenev mba kwaghaôndo mba sha shighe na la ken igbar ér: “M sen Sha, ka sha u Me er ishima Yam ga, kpa ka u eren ishima i u A tindim la.” Ka nahan ve yange Yesu iyol na pase mbaapostoli nav kwagh u ijiir la ye, a kaa ér: “Ken ya u Terem ayou nga kpishi.”—Yohane 6:38; 14:2.

Ter u Yesu ka Aôndo, u i yer iti na ér Yehova la, man ka tar u sha la u lu “ya” na ye. (Ekesodu 6:3) Nahan yô, orgen môm nana fatyô u pasen se kwagh u ijiir i ken jijingi ne doon er Yehova Aôndo man Yesu Kristu nahan ga. Ve pase se kwagh u tar u ken jijingi ne ken mbampase mba sha mnenge mba kpilighyol mba yange ve tese mbajighjigh mbagenev yô.

Ngeren u a dondo ne time sha ajiir agen ken Bibilo a i er kwagh u mbampase mba yange ior nenge a mi yô. Er u lu timen sha mbampase mban la, umbur wer tar u ken jijingi ne ka tar u se fatyô u nengen a akaa a ker sha ashe bong, shin benden a a, er tar u se tem ker ne nahan ga. Sha nahan yô, Aôndo pase se mlu u tar u ken jijingi la sha asember a i lu ior mba ken jijingi tseegh ve fe la ga, kpa a na mbampase mban sha gbenda u se fatyô u nengen er tar shon u lu la. Mbampase mba sha mnenge mban vea wase u u fan kwagh u ior mba ken jijingi mba ve tem ken “ayou” a ken jijingi, a a lu “kpishi” la.”