DAULIH sounpar 3,000 samwalahro, ohlen mahs Sohp tehkada me menpihr kan en pahnlahng kak padahkihong kitail soahng tohto duwen wiepen nin limen Koht. Ahpw arail mwekid kan pil inenen mwahuong wia karasaras kan. Pak tohto nan Paipel, ni ahnsou me e kin koasoia duwen menpihr kan en pahnlahng e kin padahkihong kitail mehn kasukuhl kesempwal kan duwen mour oh atail nanpwungmwahu rehn Koht. Kitail pahn tehkpene ekei karasepe kan.

Mehn Serusalem kan kin wehwehki duwen menpihr me adaneki swallow, me kin kalapw wiahda pasarail kan pahnangin keimwen pwelengen ihmw kan. Ekei kin wiahda pasarail kan nan tehnpas sarawi me Solomon wiahda. Mwomwen me menpihr pwukat me kin wiahda pasarail kan nan tehnpaso nan ehuehu sounpar kin wiahki wasaht wasa sohte keper, wasa me re ke kak apwalihada mwahu neirail kisin menpihr kan.

Emen nein Kora pwutak ko me wiahda Melkahka 84. E kin papah ni tehnpas sarawio erein wihk ehu nan sounpwong weneu koaros oh e tehkada pahs pwukat nan tehnpaso. E men duwehte menpihr swallow me kin kousoante nan tehnpas en Siohwa. E koasoia: “Maing KAUN, Wasa Lapalap, ia uwen ei poakohng Tehnpasomwi Sarawio! Ia uwen ei anahne mi wasao! I ngoangkilahr iang mi nan Tehnpas en KAUN-O. Paliwereiet oh ngeni unsek kin kokoulki ei peren ong Koht ieias. Menpihr kan [“swallow,” NW] wiadahr pasarail loale, re pil diaradahr dewerail wasao; re ahpw kin neineitik limwahn sapwellimomwi pei sarawi kan, Maing KAUN, Wasa Lapalap, ei nanmwarki, oh ei Koht.” (Melkahka 84:1-3) Ia duwe, kitail oh neitail kan, kin kasalehda me kitail pil men oh kesempwalki kaukaule patehng mwomwohdisohn sapwellimen Koht aramas akan?​—Melkahka 26:8, 12.

Soukohp Seremaia ntingihedi: “Kowelik kan kin ese ahnsou me re pahn pwuralahng nan dewerail.” E pahn uhdahn wehwehki duwen kowelik kan ar kin keid ni Sapwen Inowo pipihr kohla wasa me re pahn neitik ie. Nan sounpwong kan mwurin eh sohla sinoh, aramas wadekedier kowelik pwetepwet 300,000 ar pihrsang Aperika kohla Paliepeng en Iurop sang arail keid ni Wahu en Sordan. Koasoandi ehu me pid ahnsou me kileldi nan moangarail kin kamwakid irail en men pwurala wasa me re kin wiahda oh apwalihada neirail seri kan. Duwehte menpihr teikan me kin pihrla wasa doh pwehn neitik, re “kin ese ahnsou me re pahn pwuralahng nan dewerail.”​—Seremaia 8:7.

Ehu pwuhk koasoia: “Me kapwuriamwei me pid duwen menpihr kan ar kin pihrla wasa doh iei me e wia mehkot me kileldier nan moangarail.” (Collins Atlas of Bird Migration) Siohwa Koht ketikihongehr soangen menpihr pwukat erpit wet me mi loalarail me pid ahnsoun pihrla wasa doh, ahpw e ketikihong aramas koahiek en kasawihada mwomwen ahnsou kan. (Luk 12:54-56) Weksang erpit me kileldier loalen kowelik men, aramas emen anahne sapwellimen Koht erpit pwe en kak kasawihada wehwehn mwekimwekid en atail ahnsou. Mehn Israel kan ni mwehin Seremaia sohte kak kasawihada soangen kilel pwukat. Koht ketin kawehwehda dahme  kahrehda re apwalki met, ni eh mahsanih: “Re soikalahr ei mahsen kan; ia loalokong me re ahneki met?”​—Seremaia 8:9.

Rahnwet kitail ahneki mehn kadehde kan me kitail wie momour ni ahnsou me Paipel kahdaneki “imwin rahn akan.” (2 Timoty 3:1-5) Ke pahn alasang koweliko oh kasawihada atail ahnsou?

Paipel kin kalapw koasoia duwen ikel, oh mahn lingan menet kin kalapw dierek nan Sapwen Inowo. Sang ni pahsarail kan me kin mi ni kumwen nahna kan, Paipel mahsanih me re kin ‘saikedi kanarail’ oh “kin ireirong wasa keren oh wasa doh kan.” (Sohp 39:27-29) Mesen ikel uhdahn kehlail oh dene e kak kilangada rapit men me dohki elep en mwail (1 km).

Duwehte ikel men eh “kin ireirong wasa keren oh wasa doh kan,” Siohwa uhdahn kak ketin mwahngih dahme pahn wiawi ni ahnsou kohkohdo kan. Kahrehda, Siohwa Koht mahsanih: “Sangete nin tapio I kasalehda dahme pahn wiawi mwuhr, I kohpada mahsie dahme pahn wiawi.” (Aiseia 46:10) Sang ni atail kin peikiong sapwellimen Siohwa kaweid kan, kitail pahn kak paiekihdahsang sapwellime erpit oh sapwellime manaman en mwahngih ahnsou kohkohdo kan me sohte mehkot pahrekiong.​—Aiseia 48:17, 18.

Paipel pil kin kapahrekiong irail kan me kin likih Koht ong ikel: “Ahpw irail kan me kin koapworopworki KAUN-O, pahn onehda sapahl ar kehl. Re pahn kin kehlail, rasehng ikel kan.” (Aiseia 40:31) Ikel men kin pihrda nan wehwe ni eh kin doadoahngki ahng karakar. Ni ahnsou me ikelo kin kehnda ahng wet, e kin kihpeseng eh pehnpihr kan oh kin iang ahng nan wehwe piripirseli kohkohda lao e ileilehdahla. Ikel sohte kin koapworopworkihte pein eh kehl en pihr oh peipeiseli nan wehwe wasa doh kan. Duwehte met, irail kan me kin likih Siohwa kak kilengwohng ih nin duwen emen me inoukihong irail “duwen manaman lapalap.”​—2 Korint 4:7, 8.

Mwohnte eh ketin pwoula, Sises ketin uhdi pwehn mahsanih poasen kaun en mehn Suhs kan. E mahsanih: “Serusalem, Serusalem! Kowe me kemelahr soukohp ako oh kin koasungki takai sapwellimen Koht meninkeder kan me pekederdohng uhk! Pak depe me I kin men pwoalepene noumw aramas akan koaros, rasehng litok emen me kin kompwoalepene nah kisin pwurok kan pahn peh, ke ahpw sohte kin mweidohng ie.”​—Madiu 23:37.

Ehu ineng me keieu kehlail loalen menpihr kan iei arail kin men pere neirail me tikitik kan. Mahn me mie arail pehnpihr me mand kan me duwehte litok kin wiahda pasarail pohn pwehl. Re kin anahne uhdahn tetehk kanahieng soahng keper kan. Ma litok men kilangada menpihr me adaneki hawk pipihr pohnangi, e kin wiahda ngihl laud ehu me kasalehda me mie mehkot keper, eri nah kisin pwurok kan kin mwadang tangala pahn eh pehnpihr kan pwehn rukula. Wasao me kisin pwurok kan pil kak diarada pereparail sang ketipin karakar oh keteu laud kan. Sises pil ketin kupwurki ketikihda ong mehn Serusalem kan wasahn ruk oh pereparail me kohsang rehn Siohwa. Rahnwet, Sises ketin luke kitail en patohla reh pwehn kommoaleikitaildi oh perekitailsang soahng kan me kin katoutou kitail oh soahng kan me kin kapwunodei kitail nan atail mour en ehuehu rahn.​—Madiu 11:28, 29.

Ni mehlel, mie soahng tohto me kitail kak sukuhlkihsang rehn menpihr kan. Ni omw kin kasawih arail mwekid kan, song en medewehda karasaras kan me Paipel kin koasoiahki duwen menpihr pwukat. Menpihr swallow en kin seweseiuk kesempwalki tehnpas en Siohwa. Kilengwohng Koht pwehn ale koapworopwor me pahn seweseiuk en kak pihr duwehte ikel men. Patohla rehn Sises ong padahk mehlel me pahn pereiuk duwehte litok men eh kin pere nah kisin pwurok kan. Oh koweliko en katamankihong uhk en tetehk mwahu wiewiahn sampah wet me kasalehda ahnsou dah me kitail wie momour loale.