SOBRA 3,000 ka tuig na an naglabay, nasantop han patriarka nga hi Job han kadaan nga panahon nga damu an aton mahibabaroan ha katamsihan mahitungod ha mga linarang han Dios. Kondi an mga kinaiya han katamsihan maopay liwat nga topiko para ha ilustrasyon ngan metapora. Ha Biblia, damu nga pag-unabi ha katamsihan an nagtututdo hin importante nga mga leksyon mahitungod ha kinabuhi ngan ha aton relasyon ha Dios. Tagda an pipira hini.

An mga taga-Jerusalem pamilyar ha balinsasayaw, nga kasagaran nga naghihimo hin salag ha pinakahamubo nga bahin han alkuba. May mga balinsasayaw nga nagsalag ha templo ni Solomon. Posible nga nakita hito nga mga tamsi nga an templo talwas nga lugar basi padakuon an ira mga misa.

An nagkomposo han Salmos 84 nga usa han mga anak ni Kore nga nag-aalagad ha templo ha usa ka semana kada unom ka bulan, nakaobserbar hito nga mga salag ha templo. Naghingyap hiya nga magin pariho ha balinsasayaw nga may permanente nga urukyan ha balay ni Jehova, hiya nagsiring: “Kamaganyag han imo mga tabernakulo, O Jehova han mga kasondalohan! An akon kalag naghihingyap, oo, maluyahon ha mga bungsaran ni Jehova. . . . An maya nakaagi hin balay, ngan an sayaw nakaagi hin salag niya, nga di-in niya ibubutang an iya mga misa, nga amo an imo mga halaran, O Jehova han mga kasondalohan, an akon Hadi ngan akon Dios.” (Salmos 84:1-3) Kita ba ngan an aton mga anak nagpapakita hin sugad nga apresasyon ngan hingyap nga regular nga makig-upod ha katawohan han Dios?—Salmos 26:8, 12.

“An sigueña ha kalangitan maaram han iya itinanda nga mga panahon,” siring ni propeta Jeremias. Sigurado nga maaram hiya han pag-agi han mga sigueña ha Tuna nga Iginsaad. Ha katsaringsing, sobra 300,000 nga busag nga sigueña an naagi ha Walog Jordan ha ira pagbalhin tikang Aprika ngadto ha Norte Europa. An ira natural nga kinaiya ha paghibaro han panahon an nagsusumat ha ira nga sadang na hira bumalik ha mapaso nga lugar diin hira mamumonay. Pariho ha iba han sugad nga katamsihan, nagtutuman hira ha panahon han ira pagbalik.​—Jeremias 8:7.

“An pagbalhin han katamsihan ha iba nga lugar urusahon nga natural nga kinaiya,” siring han Collins Atlas of Bird Migration. Gintagan ni Jehova hin natural nga kahibaro may kalabotan ha panahon an katamsihan nga nabalhin hin lugar, kondi gintagan niya an tawo hin abilidad nga masabtan an mga panahon. (Lucas 12:54-56) Diri pariho ha natural nga kahibaro han sigueña, nasasabtan han tawo an pagkaimportante han panhitabo ha panahon diin kita nabubuhi tungod han kahibaro ha Dios. Ginbalewaray han mga Israelita ha panahon ni Jeremias an sugad nga mga tigaman. Ginsaysay han Dios an hinungdan: “Ira isinalikway  an polong ni Jehova; ngan ano nga kahimtang han kinaadman in aada ha ira?”​—Jeremias 8:9.

Damu yana an aton ebidensya nga nagkikinabuhi na kita ha gintatawag han Biblia nga “kataposan nga mga adlaw.” (2 Timoteo 3:1-5) Susubaron mo ba an sigueña ngan tatagdon ‘an panahon’?

An agila damu ka beses nga gin-uunabi ha Biblia, ngan komon ini ha Tuna nga Iginsaad. Tikang ha salag hito ha hitaas nga pangpang, an agila “nagiinaw han iya panginginaonon; an iya mga mata nakakakita hini ha harayo.” (Job 39:27-29) Maopay gud an pagkita han agila. Mahimo ito makakita hin rabit bisan kon usa ka kilometro an kahirayo hito.

Sugad la nga an agila mahimo ‘makakita ha harayo,’ nakikita ni Jehova an tidaraon. Salit hiya nagsiring: “[Ako] nagaasoy han katapusan tikang ha tinikangan, ngan tikang ha kadaanan nga mga panahon han mga butang nga diri pa nabubuhat.” (Isaias 46:10) Pinaagi ha pagsunod kan Jehova, makakapahimulos kita han iya diri matupngan nga kinaadman ngan abilidad nga makita an tidaraon.—Isaias 48:17, 18.

Iginpariho liwat han Biblia ha agila an mga nasarig ha Dios: “Hira nga naghuhulat kan Jehova magbabag-o han ira kusog; hira masaka pinaagi hin mga pako sugad hin mga agila.” (Isaias 40:31) An agila nakakapabilin nga nalupad pinaagi han mapaso nga hangin nga gintatawag nga thermal. Kon nabibilngan na niya an thermal, ginbubuklad niya an iya mga pako ngan naglilibot-libot ha hangin nga nagdadara ha iya tipaigbaw. An agila diri nadepende ha iya kalugaringon nga kusog basi makalupad hin hirayo. Ha pariho nga paagi, makakalaom an mga nasarig kan Jehova han iya saad ha paghatag hin “diri-ordinaryo nga gahum.”—2 Corinto 4:7, 8.

Diri maiha antes mamatay hi Jesus, umundang hiya basi kitaon an kapital nga syudad han mga Judio. “Jerusalem, Jerusalem, an parapamatay han mga propeta ngan nagbabato han mga ginsugo ngada ha imo,” nanhahayhay nga nagsiring hiya. “Makadamu ako nangalimbasog nga tirukon an imo mga anak, sugad hin ugang nga nagtitirok han iya mga pisô ha ilarom han iya mga pako! Pero diri kamo naruruyag.”—Mateo 23:37.

Usa han natural nga kinaiya han mga tamsi amo an pagpanalipod han ira mga misa. An tamsi nga nagsasalag ha tuna, sugad han manok, sadang magin mabinantayon gud. Kon an ugang may makita nga banog, nag-iinaringasa ito basi pahamangnoan an iya mga pisô, salit nandadadlagan dayon an mga pisô ngadto ha ilarom han iya pako. Didto, napuprotektaran liwat an mga pisô tikang ha sirak ngan uran. Ha pariho nga paagi, karuyag ni Jesus maghatag hin espirituwal nga urukyan ngan proteksyon ha mga naukoy hadto ha Jerusalem. Yana, gin-aaghat kita ni Jesus nga ha iya kumuha hin kapahuwayan ngan proteksyon tikang ha kakurian ngan kabaraka han aton adlaw-adlaw nga pagkinabuhi.—Mateo 11:28, 29.

Oo, damu an aton mahibabaroan tikang ha katamsihan. Samtang gin-oobserbaran mo hira, hunahunaa kon paonan-o hira ginhihisgotan ha Biblia. Hinaot mabuligan ka han balinsasayaw nga apresyaron an balay han pagsingba ni Jehova. Hinaot sumarig ka ha Dios para han paglaom nga mabulig ha imo nga makapabilin nga nalupad, siring pa, pariho han agila. Hinaot umayop ka kan Jesus para hin espirituwal nga kamatuoran nga magpapanalipod ha imo pariho han pagpanalipod han ugang ha iya pisô. Ngan hinaot magpahinumdom ha imo an sigueña nga magpabilin nga alerto yana ha importante nga mga panhitabo ha kalibotan.