Te ʼu Ako ʼe Tou Maʼu Mai Te ʼu Manulele ʼo Te Lagi
“Ke ke fehui . . . ki te u manulele o te lagi, pea e natou fakaha atu anai kia koe; ko ai ia natou e mole ina iloi te fakamooni ko te nima o [Sehova] ae nee ina fai te u mea fuli?”—Sopo 12:7, 9.
KUA hili ki ai taʼu ʼe 3 000 ki muʼa atu, neʼe fakaha e te pateliaka ko Sopo ʼe lahi te ʼu ako ʼe tou maʼu mai te ʼu manulele ʼo te lagi ʼo ʼuhiga mo te ʼu gaue ʼa te ʼAtua. Kaʼe, ʼe toe fakaʼaogaʼi foki ʼonatou agaaga ki he ʼu lea fakatata. ʼI te Tohi-Tapu, ʼe lahi ai te ʼu manatu ʼo ʼuhiga mo te ʼu manulele ʼo te lagi. ʼE feala ke tou taʼofi ai he ʼu ako maʼuhiga ʼo ʼuhiga mo te maʼuli pea mo ʼatatou felogoʼi mo te ʼAtua. Tou vakaʼi ʼihi faʼifaʼitaki.
KOFEA ʼAE ʼE FAI AI E TE ʼU KIʼI MISI ʼONATOU FATAʼI?
Neʼe iloʼi e te hahaʼi ʼo Selusalemi te ʼu misi, ʼae ko tanatou agamahani ko te faifataʼi ʼi te tuʼa patu ʼo he fale. Ko ʼihi misi ʼe natou faifataʼi ʼi te fale lotu ʼo Salomone. ʼE lagi, neʼe natou maʼu honatou nofoʼaga ʼe mole hoko ai he meʼa kia natou ʼi tanatou olo ʼo faifataʼi ʼi te fale lotu ʼi te taʼu fuli. Pea ʼe feala ke natou taupau ai ʼonatou kiʼi ʼuhi.
Neʼe tokagaʼi e he tahi ʼo te ʼu foha ʼo Kole, ʼae neʼe ina tohi te Pesalemo 84, te ʼu fataʼi ʼaia ʼi te fale lotu. Neʼe ina iloʼi te faʼahi ʼaia koteʼuhi neʼe gaue ʼi te fale lotu ʼi te vahaʼa pe e tahi ʼi te ʼu mahina ono fuli. Neʼe fia hage ko te ʼu kiʼi misi ʼaia ʼae neʼe nonofo tuʼumaʼu ʼi te fale ʼo Sehova. Neʼe ina ui fenei: “ ʼI matalelei leva ʼo tou tapenakulo lahi, E Sehova ʼo te ʼu kautau! Neʼe fakaʼamu toku maʼuli, pea neʼe holi ki te ʼu malaʼe ʼo Sehova. . . . Maʼia mo te manulele neʼe ina maʼu tona ʼapi, pea mo te kiʼi misi tona fataʼi, ʼae neʼe ina ʼai ki ai ʼona kiʼi ʼuhi, tou ʼaletale lahi, E Sehova ʼo te ʼu kautau, toku Hau pea mo toku ʼAtua.” (Pesalemo 84:1-3, MN) ʼE tou toe fakaha koa mo tatou tatatou leleiʼia te fakatahi tuʼumaʼu mo te hahaʼi ʼa te ʼAtua, fakatahi mo ʼatatou fanau?—Pesalemo 26:8, 12.
KO TE MOTUKU ʼE INA ILOʼI TE TEMI
Neʼe tohi fenei e te polofeta ko Selemia: “E iloi foki e te motuku i te lagi tona temi ae e tonu ke alu ai.” Neʼe mahino kia Selemia ia te feʼaluʼaki ʼa te motuku ʼi tana fakalaka ʼi te Kele ʼo Te Fakapapau. Ka hoko te temi ʼae ʼe matala ai te ʼu fisiʼi ʼakau, ʼe lau pe ko motuku hina ʼe 300 000 ʼe natou ʼomai mai Afelika ki te Potu Noleto ʼo Eulopa ʼi te Mafa ʼo Solotane. ʼE kua natou iloʼi pe te temi ʼae ke natou toe liliu ai ki ʼonatou nofoʼaga ʼae neʼe natou faifataʼi ai. Ohage pe ko ʼihi manulele faifolau, ʼe natou “iloi foki . . . te temi ae e tonu ke natou toe liliu ai.”—Selemia 8:7.
ʼE ui fenei ʼi te Collins Atlas of Bird Migration (Collins atlas de la migration des oiseaux): “ ʼE fakaofoofo te faifolau ʼa te ʼu manulele ʼuhi pe ko te poto ʼae ʼe natou maʼu.” Koia, neʼe foaki e Sehova ki te ʼu manulele te poto ke feala hanatou iloʼi te ʼu fasiga taʼu. Kaʼe neʼe ina foaki ki te tagata te fealagia ʼae ke mahino ki te ʼu temi mo te ʼu fasiga taʼu. (Luka 12:54-56) Ko te ʼatamai malama ʼo te ʼAtua ʼe tokoni ki te tagata ke mahino ki te fakaʼuhiga ʼo te ʼu aluʼaga ʼo te temi ʼae ʼe tou maʼuʼuli ai. ʼE kehekehe leva ia mo te poto ʼae ʼe maʼu e te motuku. Neʼe mole mahino ia te kau Iselaele ʼo te temi ʼo Selemia ki te ʼu fakailoga ʼaia. Kaʼe, neʼe fakamahino fenei e te ʼAtua ʼo ʼuhiga mo te aluʼaga ʼaia: “Nee natou siaki te folafola a [Sehova], pea ko te poto fea ae e natou mau?”—Selemia 8:9.
ʼe tou fakamoʼoni ʼe tou maʼuʼuli ʼi “te u aho fakamuli,” ohage ko tona ui ʼi te Tohi-Tapu. (2 Timoteo 3:1-5) ʼE kotou faʼifaʼitakiʼi anai koa te motuku pea mo mahino ki ‘te temi’?
Ia ʼaho nei,KO TE AKUILA ʼE SIO KI MAMAʼO
ʼE tuʼa lahi te talanoa ʼi te Tohi-Tapu ki te akuila. Pea ʼe ko he agamahani te sisio ki te ʼu manulele ʼaia ʼi te Kele ʼo Te Fakapapau. Ko te akuila ʼe ina kumi “tana meakai” mai te koga meʼa maʼoluga ʼae neʼe ina fakatuʼu ai tona fataʼi mo “sio ia ia ki mamao.” (Sopo 39:30-32) ʼE sio lelei te akuila koteʼuhi ʼe lava sio mai he kilometa ʼe tahi ki he lapino.
Ohage pe ko te lava “sio . . . ki mamao” ʼa te akuila, ʼe toe feala mo Sehova ke sio ki te ka haʼu. Koia ʼae neʼe ui fenei ai e Sehova ʼAtua: “E au fakaha mai te kamataaga te mea ae e tonu ke hoko, pea mai mamao te mea ae e heeki hoko.” (Esaia 46:10) Koia, ʼe feala ke tou maʼu te poto ʼo Sehova pea mo te fakasiosio poto mo kapau ʼe tou tokagaʼi ʼana tokoni.—Esaia 48:17, 18.
ʼI te Tohi-Tapu, ʼe toe fakatatau ai ia natou ʼae ʼe falala ki te ʼAtua ki te akuila. ʼE ui fenei: “Ko natou ae e falala [kia Sehova] e natou fakafoou tonatou malohi. E natou toe malaga ki oluga o lele o hage ko ni akuila.” (Esaia 40:31) ʼE fakaʼaogaʼi e te akuila te ʼaele vela. Ko te ʼaele vela ʼe fakapulipuli, kaʼe ʼe poto lelei te akuila ʼi tona maʼu. ʼI te temi ʼae kua ina maʼu ai te ʼaele, ʼe ina folahi tona ʼu kapakau pea mo tona hiku ʼo ulu ki te ʼaele vela ʼo ina tuku leva ia ia ke hiki e te ʼaele ʼaia ʼo aʼu ki ʼoluga. ʼI te faʼahi ʼaia, ʼe feala ke nofo te akuila ʼi ʼoluga ʼi he ʼu hola, ʼo ina fakaʼaogaʼi pe he kiʼi koga veliveli ʼo tona malohi. ʼO toe feia pe, ʼe feala ke kumi e natou ʼae falala kia Sehova ia ia ʼae ʼe ina fakapapauʼi age “te malohi ʼae ʼe fakalaka ʼi te malohi mahani.”—2 Kolonito 4:7, 8, MN.
“O HAGE KO HE MATUA MOA E INA FAKATAHII ONA UHI”
ʼI muʼa ʼo tana mate, neʼe tuʼu muʼa ia Sesu ʼo sio ki te kolo taulaga ʼo te kau Sutea. Neʼe ina ui fenei: “Selusalemi, Selusalemi, ia koe e ke tamatei te kau polofeta pea mo ke tuki makai natou ae nee fekaui atu kia koe, kua tua fia toku loto ke au fakatahii au fanau o hage ko he matua moa e ina fakatahii ona uhi i ona lalo pakakau, pea nee mole koutou loto ki ai!”—Mateo 23:37.
Ko te tahi faʼahi ʼae ʼe toe maʼu ai e te ʼu manulele te poto, ʼe ko tanatou fia puipui ʼonatou kiʼi ʼuhi. Ko te ʼu manulele ʼae ʼe faifataʼi ʼi te kele, ohage la ko te ʼu moa, ʼe tonu ke natou tokakaga ki te ʼu tuʼutamaki ʼe feala ke hoko. Kapau ʼe sio te matuʼa moa ʼe lele he akuila ʼi te lagi, ʼe ʼuʼua ke logo ki ai ʼona kiʼi ʼuhi. Pea ʼi tanatou logo ki tana ʼuʼua, ʼe feleleʼi te ʼu kiʼi ʼuhi ʼo fenonoʼi ʼi ʼona lalo kapakau. ʼE toe feala foki ke natou fenonoʼi ai moka temi vevela pea mo ʼua lalahi. ʼO toe feia pe, neʼe fia foaki e Sesu ki te hahaʼi ʼo Selusalemi ia he fakalotofimalie mo he puipui ʼi te faʼahi fakalaumalie. Ia ʼaho nei, ʼe fakaafe tatou e Sesu ke tou ʼomai kia ia ke tou maʼu ai he fakalotofimalie mo he puipui ʼuhi ko te ʼu hoha mo te ʼu tuʼania ʼo te maʼuli ʼae ʼi te ʼaho fuli.—Mateo 11:28, 29.
ʼE mahino ia, ʼe lahi te ʼu ako ʼe feala ke tou taʼofi mai te ʼu manulele ʼaia. ʼI takotou fakatokagaʼi ʼonatou agaaga, kotou faiga ke kotou manatuʼi te ʼu faʼifaʼitaki ʼe talanoa ai ʼi te Tohi-Tapu ʼo ʼuhiga mo natou. ʼE lagi feala ke tokoni atu te faʼifaʼitaki ʼo te misi ke kotou leleiʼia tuʼumaʼu te tauhi ʼae ʼe fai ʼi te fale ʼo Sehova. ʼE lagi feala ke kotou kumi ki te ʼAtua te ʼamanaki ke feala hakotou maʼu te malohi ohage ko te akuila. ʼE feala ke kotou ʼomai kia Sesu ke kotou iloʼi ai te moʼoni pea mo maʼu ai hokotou puipuiʼaga ohage pe ko he matuʼa moa ʼe ina puipui ʼona kiʼi ʼuhi ʼi ʼona lalo kapakau. Pea ʼe feala ke kotou manatuʼi te motuku ʼo kotou tokakaga ki te fakaʼuhiga ʼo te ʼu aluʼaga ʼae ʼe hoko ʼi te malama ʼaeni.