1, 2. 1) ¿Kunsa uva yapuni chachajj luräna? 2) Uka uñachtʼäwi liytʼasajja, ¿kunsa suma jaqëñatsa khuyaptʼayasirïñatsa amuytanjja?

UVA yapuni mä chachat parltʼañäni, mä urojj wali alwaw irnaqerinak thaqerejj plazar mistuwayäna, ukhamat uva yapup apthapipjjañapataki. Trabajipjjañapatak jikjjatkäna uka chachanakarojja, ‘wakiski ukha qollqwa churapjjäma’ sasaw säna. Uka chachanakasti ‘walikiwa’ sapjjarakïnwa. Uva apthapipjjañapatakejj waljaniw munasïna, ukatwa yapunejj urun walja kuti trabajirinak thaqer saräna. Taqe trabajirinakaparojja, qawqha qollqetï wakiski uk churañwa amtäna. Niya jaypʼöjjän ukhajja, taqe trabajirinakaruw pagañatak jawsthapïna. Uru jurnäl irnaqerinakarusa, mä hora irnaqerinakarusa, mä kikpakwa qollqe churäna. Uru jurnäl trabajirinakajja, pago katoqasajj quejasipjjänwa. Ukatwa uva yapunejj jupanakar säna: ‘¿Janit mä denario qollqet parlktanjja? Nayaw kunjamarutï qollqejampejj lurañ munkta ukham lurirista. Jan ukajj ¿suma jaqëtajj laykuch envidiasipjjesta?’ sasa (Mat. 20:1-15).

² Jesusan uka uñachtʼäwipajja, Jehová Diosajj kunja ‘khuyapayasirisa’ ukwa uñachtʼayistu (2 Corintios 6:1 liytʼañataki). Uka sarnaqäwi liytʼasajja, inas yaqhepanakajj akham amuyapjjchispa:  “Uru jurnäl trabajirinakaw mayni trabajirinakat sipansa jila qollqe katoqapjjañapäna” sasa. Ukampis uva yapuni chachajj mä qawqha hora trabajirinakat wal khuyaptʼayasïna. Mä yatjjattʼat chachajja, Biblian jikjjataski uka ‘khuyaptʼayasiña’ arut akham siwa: “Uka arojja, jan kun suyasa maynit katoqaña, ina chʼusat katoqaña sañwa muni; mä arunjja, mä chachajj jan kun lurasaw ina chʼusat kuns katoqaspa” sasa.

3, 4. ¿Kunjamsa Diosajj jaqenakat khuyaptʼayasiwayi, ukat kunatsa?

³ Diosan khuyapayasiñap ‘ina chʼusatwa’ katoqtanjja sasaw Bibliajj qhanañchi (Rom. 3:24). Pantjasir jaqenakjamajja, janiw Diosan munañaparjampun sarnaqerjamäktanti. Ukhamajj Jupan khuyapayasiñap katoqañatakejj janiw askïktanti, jiwañasakiw wakisjjaspa. Salomón reyejj akham sänwa: “Aka oraqenjja janiw khitis aski jaqejj utjkiti, janipun juch lurasa aski lurirejja” sasa (Ecl. 7:20). Qhepatjja, apóstol Pablojj akham sarakïnwa: “Taqeni jucha lurapjjatap laykusti Diosampejj janiw katoqatäpkiti” “juchan wajjtʼasiñapasti jiwañawa” sasa (Rom. 3:23; 6:23a).

⁴ Jehová Diosajja, jaqenakar wal munasitap laykuw “mä sapa Yoqapar” khitaniwayi. Ukham lurasaw Diosajj wali khuyaptʼayasirïtap uñachtʼayistu (Juan 3:16). Pablojj akham sänwa: “Diosajj munasiñapatwa [jan ukajj khuyapayasiñapatwa] munäna taqetak [Jesusan] jiwañapa, jichhasti jachʼa kankañapampi ukhamarak jachʼañchäwimpi corontʼatawa jiwañan tʼaqhesitap layku” sasa (Heb. 2:9). Diosajja, ‘Jesusan jiwatap toqew wiñay jakañ churistu’ (Rom. 6:23b).

5, 6. 1) ¿Kunas juchanïtasat pasistu? 2) ¿Kunsa Diosan khuyapayasiñapat katoqañäni?

⁵ ¿Kunatsa juchasa, jiwañas utjpacha? Bibliajj siwa: ‘Mä sapa jaqe toqekiw juchajj aka oraqer mantanejja’ sasa. Ukhamajj Adán chacha toqew juchajj mantaniwayi, ukatwa wawanakapjamajj juchanïtansa jiwaraktansa (Rom. 5:12, 14, 17). Ukhamäkchisa, janiw juchan munañaparjam sarnaqañajj wakiskapuniti. Jiwasatï Jesusan loqtasitapar iyawsañäni ukhajja, Diosan khuyapayasiñapwa katoqañäni. Bibliajj akham siwa: “Kunapachatejj juchajj jukʼampi utjänjja jukʼampirakiw Diosan khuyapayasiñapajj utjarakïna. Taqe akanakasti lurasiwa kunjämtï juchajj jiwayañataki chʼamanïkejja, uka kipkarakiw Diosan khuyapayasiñapajj jiwasatak chʼamaniraki Diosampïtas layku Jesucristo toqe wiñay jakañ churañataki” sasa (Rom. 5:20, 21).

⁶ Juchanïkstansa, janiw juchan munañaparjamajj sarnaqjjañasäkiti. Ukatwa kunapachatï pantjasiñäni ukhajj Jehová Diosaru perdón mayisiñasa. Uka toqet Pablojj akham sasaw ewjjtʼawayi: “Juchasti janiw jumanakjjarojj chʼamanïkjjaniti, janirakiw leyin munañapankjjapjjtati, jan ukasti Diosan khuyapayasiñapankjjapjjtawa” sasa (Rom. 6:14). Ukhamajj ¿kunjamsa Diosan khuyapayasiñapampejj yanaptʼayassna? Pablojj akham saskakiwa: “Diosasti uñachayistuwa khuyapayasiñapjja [...]. Uka khuyapayasiñaparakiw yaticharakistu juchampi, akapachar munañampi apanukjjañasa. Ukatsti aka oraqenjja mä suma amuyumpi, cheqapana Dios chuymaraki sarnaqañasa” sasa (Tito 2:11, 12).

7, 8. ‘Diosan khuyapayasiñap kunayman toqet katoqaña’ siski uka arunakajja, ¿kamsañsa muni? (21 janankir fotonak uñjjattʼam).

⁷ Apóstol Pablojj akham sasaw qellqäna: “Sapa maynis kunjämtejj Diosat chʼam katoqkejj ukhama maynirojj sirvpan, [Diosan khuyapayasiñap kunayman toqet katoqatap layku,  NM]” sasa (1 Ped. 4:10). ‘Diosan khuyapayasiñap kunayman toqet katoqaña’ siski uka arunakajja, ¿kamsañsa muni? Kunapachatï jan waltʼäwinakan uñjasiñäni ukhajja, kunatï wakiskani ukampiw Diosajj yanaptʼistani ukwa uka arunakajj sañ muni (1 Ped. 1:6). Cheqas jan waltʼäwinakar saykatañatakejj kunatï wakiskani ukampiw Diosajj yanaptʼistani.

⁸ Apóstol Juanajj akham sänwa: ‘Taqe jiwasanakaw Diosan khuyapayasiñap katoqtanjja’ sasa (Juan 1:16, NM). Diosan khuyapayasiñapjja kunayman toqetwa uñjtanjja, uka khuyapayasiñapatwa walja bendicionanak katoqaraktanjja. Uka toqet jichhajj mä qawqha uñjañäni.

9. 1) Diosan khuyapayasiñapat ¿kunsa jikjjattanjja? 2) ¿Kunjamsa ukat yuspärsna?

⁹ Jehová Diosajj juchanakasat perdonistuwa. Diosajj khuyapayasiñapatwa juchanakasat perdonistu. Ukampis jiwasaw juchanakasat taqe chuyma arrepentisiñasa, jan wali amtanak jaytañatakis chʼamachasiñasaraki, ukhamatwa perdonatäñäni (1 Juan 1:8, 9 liytʼañataki). Alajjpachar sarañataki ajllit cristiano masinakaparojja, kunjamsa Diosajj juchanak perdoni, uka toqetwa apóstol Pablojj parläna. Jupajj akham sänwa: “Diosaw jiwasarojj chʼamakanakan munañapat qhespiyanistu, Jesucristo Yoqapan apnaqatäñatakiw uchasirakistu. Uka Yoqapasti jiwäwipampiw qhespiyarakistu, juchanakasat pampachasa” sasa (Col. 1:13, 14). Ukham khuyaptʼayasitapat walpun Jehová Diosar yuspärtanjja, ukatwa Jupar jachʼañchañ munaraktanjja. Niyakejjay Diosajj juchanakasat perdonchistojja, Jupajj walja bendicionanakwa churarakistaspa.

10. Diosan khuyapayasiñap uñjasajja, ¿kunjamsa Jupamp apassna?

¹⁰ Diosampejj wali sumaw apassna. Juchani jaqenakjamajja, nasktan ukhatpachaw Diosan uñisiripätanjja. Ukampis Pablon arunakaparjamajja, “Dios kipkaw sumankthapiyistu jupan Wawapan jiwatap toqe” (Rom. 5:10). Ukhamajj Jesusan jiwatap toqew Diosampejj sumankthapsna, mä arunjja, Jesusan jiwatap toqew Diosampejj sum apassna, ukatsti amigoparakïsnawa. Apóstol Pablojj ajllit cristianonakar akham sänwa: “Iyawsäwi layku Dios nayraqatan askit uñtʼatäjjatasatwa Diosampi sumankañajj utjistu Jesucristo Tatitusana. Cristo toqerakiw jiwasanakajj Diosarojj jakʼachastanjja, iyawsäwi layku jupat bendiciona katoqañataki. Uka bendicionansti taqeniw chʼamani saytʼatätanjja” sasa. Ukhamajj Jesusan jiwas layku jiwatapajja, Diosan jachʼa khuyapayasiñapwa uñachtʼayi (Rom. 5:1, 2). Jehová Diosamp sum apasisajja, ¡wali kusisitaw jikjjatastanjja!

11. ‘Yaqha uwijanakjam’ uñtʼatäpki ukanakarojja, ¿kunjamsa ajllitanakajj cheqa thakinjam irpanipjje?

¹¹ Askit uñjatäsnawa. Qhepa urunakanjja, “wali amuytʼani jaqenakasti”, mä arunjja, ajllit cristianonakajj ‘waljaniruw cheqa thakinjam irpanipjjani’ sasaw Daniel profetajj säna (Daniel 12:3 liytʼañataki). ¿Kunjamsa ajllitanakajj ‘waljaniru cheqa thakinjam irpanipjje’? ‘Yaqha uwijanakjam’ uñtʼatäpki ukanakar suma yatiyäwinak yatiyasa ukhamarak Diosan leyinakap yatichasa (Juan 10:16). Dios nayraqatan askit uñjatäpjjañapatakis ‘yaqha uwijanakar’ yanaptʼapjjarakiwa. Cheqas Diosan khuyapayasiñapatwa yaqha uwijanakajj askit uñjatäpjjaspa. Pablojj akham sänwa: “Diosajj jupan jachʼa munasiñapanjja ina chʼusatakwa katoqestu, Jesucristo toqwa jiwasanakarojj qhespiyarakistu” sasa (Rom. 3:23, 24).

12. Diosan khuyapayasiñapaw Jupar jakʼachasiñatakejj yanaptʼistu sasajja, ¿kunatsa sissna?

¹² Oración toqew Diosar jakʼachassna. Diosajj khuyapayasiñapatwa mayisitas istʼistu. Jehová Diosan tronoparojja, khuyapayasir ‘Diosan  tronopa’ sasaw apóstol Pablojj säna. Uka arunakarjamajj jan ajjsarasaw Diosar jakʼachasiñasa (Heb. 4:16a). Ukhamajj kuna horasay Diosampi parltʼasiñ munstan ukhaw Jesusan sutipjjar Jupampi parltʼassna. Ukajj ¡Diosan mä suma bendicionapawa! Pablojj akham saskakïnwa: “Cristo toqewa Diosar jan ajjsarasina jakʼachasiñasajj utji, jupar iyawsktansa uka iyawsañampi” sasa (Efe. 3:12).

13. ¿Kunjamsa Diosajj khuyaptʼayasiñapat horasapar yanaptʼistu?

¹³ Horasaparuw yanaptʼa katoqsna. Pablojj akham sänwa: ‘Yanaptʼa munapkäta ukhaw Diosarojj jakʼachasipjjañama, ukhamat “jiwasat khuyaptʼayasiñapataki, ukhamarak munasiñapata jiwasar yanaptʼañapataki, pʼistʼayasktan uka horasanakana”’ sasa (Heb. 4:16b). Ukhamajj kunapachatï yantʼata, jan ukajj jan waltʼäwinakan uñjasiñäni ukhaw Diosarojj yanaptʼa maysna. Diosajj wali khuyaptʼayasirïtap laykojj mayisitanakas istʼistaspawa. Ukatsti jilat kullakanakas toqew jila partejj yanaptʼistaspa. Diosajj oracionanakas istʼapunistuwa, ukatwa iyawsañampi akham sistanjja: “[Jehová] Tatituw yanaptʼirejjajja; janiw kuntejj jaqejj lurkitaspa ukjj ajjsarkäti” sasa (Heb. 13:6).

14. Diosan khuyapayasiñapat ¿kunjamsa chuymasan jikjjatastanjja?

¹⁴ Chuymachäwi katoqsna. Kuna horasanakatï llakita jikjjatasktan ukhaw Jehová Diosajj chuymachtʼistu, ukajj mä suma bendicionapuniwa (Sal. 51:17). Kunapachatï Tesalónica markankir cristianonakajj uñisirinakapan arknaqata uñjasipkäna ukhajja, Pablojj akham sänwa: “Tatit Jesucristos pachpa, ukhamarak Dios Awkisasa khuyapayasiñapampiw munasistu wiñay chuymachäwi churasa, ukhamarak mä suma suytʼañampi. Jupay chuymanakamjja chʼamachpan, ukhamarak chʼamani saytʼaypan” sasa (2 Tes. 2:16, 17). Jehová Diosajja, khuyapayasiñapat walpun munasistu, jiwasatsa llakisirakiwa, uk yatisajj wali kusisitaw jikjjatastanjja.

15. Jehová Diosan khuyapayasiñapatjja, ¿kuna suytʼäwis utjistu?

 ¹⁵ Wiñay jakañ suytʼäwinïtanwa. Niyakejjay pantjasir jaqenakästanjja, janiw kuna suytʼäwis utjkistaspati. Ukampis Jehová Diosan khuyapayasiñapatwa mä suytʼäwejj utjistu (Salmo 49:7, 8 liytʼañataki). Uka suytʼäwisajj ¿kunasa? Jesusajj akham sänwa: “Khitankitu ukan munañapajja akanakawa: Taqe khitinakatejj Diosan Yoqaparu uñjkejja, ukhamarak jupar iyawskejja ukanakajj wiñay jakañanïñapa” sasa (Juan 6:40). Jehová Diosan khuyapayasiñapatwa wiñay jakañ suytʼäwejj utjistu. Pablojj akham sänwa: “Diosasti uñachayistuwa khuyapayasiñapjja qhespiyasiñap apanisa taqe jaqetaki” sasa (Tito 2:11).

16. Diosan khuyapayasiñap uñjasajja, ¿kunjamsa nayrïr cristianonakat yaqhepajj sarnaqapjjäna?

¹⁶ Diosan khuyapayasiñapatjja, walja bendicionanakwa katoqtanjja. Ukampis khuyapayasiñap uñjasajj janiw juchanak lurañasäkiti. Nayrïr cristianonakat yaqhepajja, “Diosan khuyapayasiñapjja maysaruw uñtaya[pjjäna] jan wali luräwinakapan jakañataki” (Judas 4). ‘Juchanak lurañäni ukhasa, Diosajj perdonaskakistaniwa’ sasaw uka jan wali cristianonakajj amuyapjjäna. Janiw ukakïkänti, uka jan wali cristianonakajja, jupanakjam sarnaqapjjañapatakiw mayni jilat kullakanakaru chʼamañchapjjäna. Jiwasatï uka cristianonakjam jan wali lurañanakan sarnaqsna ukhajja, ‘munasir Diosan ajayuparuw jiskʼachsna’ (Heb. 10:29).

17. ¿Kamsasas Pedrojj jilat kullakanakar ewjjtʼäna?

¹⁷ ‘Juchanak lurä ukhajja, Diosajj perdonaskitaniwa’ sasin amuyapjjañapatakiw Supayajj yaqhep cristianonakar engañjawayi. Cheqas Jehová Diosajja, khitinakatï juchanakapat taqe chuyma arrepentisipki ukanakar perdonañatakejj jankʼakiwa. Ukampis jan wali amuyunakas jaytañatak chʼamachassna ukwa muni. Jehová Diosan amuytʼayatäsajj akham sasaw Pedrojj qellqäna: “Ukatpï munat jilatanaka, niyakitejj jumanakajj akanakjja jichhatpach yatjjapjjstajja, ukatsti amuyasipjjam jan uka sallqjirinakampi apayasiñataki, ukhamata walïkasin jan aynachtʼañataki. Ukampis qhespiyiri Tatit Jesucristosar uñtʼapjjam, munasiñapanraki jiltapjjam” sasa (2 Ped. 3:17, 18).

18. Diosan khuyapayasiñap katoqasajja, ¿kunanaksa lurañasa?

¹⁸ Khuyapayasiñap katoqasajj walpun Jehová Diosar yuspärtanjja. Ukhamajja, kuna kasta yatiñtï Jehová Diosajj churawaykistu ukampejj Jupar jachʼañchapjjañäni, mayninakarus yanaptʼapjjarakiñäni. Uk lurañaw waktʼistu. Pablojj akham sänwa: “Diosajj sapa mayniruw yaqha casta yatiña churistu, kunjämarutejj jupajj munki ukhamarjama, uka yatiñanaksti sum apnaqañasawa. Diosatejj jupan arupat parlañataki yatiña churchistojja, [...] ukhamarjamawa lurañasajja. Jupatejj yaqhanakaru serviritak yatiña churchistojja, wali sumwa serviñasa. Khititejj yatichañ yatchejja, jupajj yatichañaru uskusiñapawa. Maynitejj mayninakaru chʼamachañ yatchejja, ukaruy uchaspan; [...] pistʼatanakar yanaptʼaña yatchejja, kusisit chuymampi churarakpan” sasa (Rom. 12:6-8). Ukhamasti Diosan khuyapayasiñap katoqasajja, Diosan arunakapat mayninakar yatiyañataki, jilat kullakanakar chʼamañchtʼañataki, chuyma ustʼayapkistu ukanakar perdonañatakiw chʼamachasiñasa.

19. ¿Kuna toqetsa jutïr yatichäwin yatjjataskañäni?

¹⁹ Diosan khuyapayasiñap katoqerinakjamajja, ‘Diosan munasiñap utjatapa jaqenakar qhanañchañatakiw’ chʼamachasiñasa (Hech. 20:24). Kunjamsa uk lursna ukwa jutïr yatichäwin yatjjataskañäni.