1, 2. (a) Kañete’e nkana Yésus a nga kan ô kobô’ô ajô miene afup. (b) Aval avé nkana te wo ngôné fulu anyep a fulu mvam?

MIENE afup éziñ a nga kune ke makit na, a ke jeñe bôt be ne nye ke saé afup. Ba be bôt a nga yen, be nga mane kôme tañe moné a yiane ya’ane be. Miene afup a mbe a yi bebo bisaé befe, nde a nga beta bulane makit e zañe môs na a ke jeñe bôte befe. Bôt a nga yen éyoñ te, a ba a nga su’ulane yene mame ngô’é, be nga mane fe kôme tañe ya abime moné a yiane ya’ane be. Éyoñe ngô’é é mbe é nto abui, nde a nga loone bôte bese vôme wua a ve môt ase moné wé. Ba be nga saé abui mewolo, a ba be nga saé fo’o ve awolo da, bese be nga bi abime moné da. Éyoñ bôte be nga taté ésaé mame tyé be nga yene nalé, nde be nga wô’ô ôlun. Ane miene afup a nga yalane be na: “Ke a ne zôsô me abo biôm biam ane me anye’e me bo’ok? Ye ô lô abé amu me ne mvaé?”​—Mt. 20:1-15.

² Nkana Yésus wo liti bia fulu jia ya mefulu Yéhôva a bili, nje te Kalate Zambe a kobô je abui biyoñ. Fulu te é ne “mvam.” ^[1] (Lañe 2 Becorinthien 6:1.) E bôte be nga  saé fo’o ve awolo nkolo da, be mbe be yene ane be nji yiane ma’ane mete. Ve jame da, miene afup a nga mvamane be angôndô ya abui. Be wô’ô kôñelane bifia “mvam é ne te yiane bia” abui Bekalate be Zambe na, “mvam.” Ajô te, beta ñyeme mam a nga tili na: “Éfia ji ja dañe ve ôsimesane ya ve môte jôm, nge dasé môte jôm a nji yiane je, a jôm a nji wu nju’u ya bi.”

3, 4. Amu jé a aval avé Yéhôva a nga mvamane bôte bese?

³ Kalate Zambe a kobô ajô ya “mveane ya mvame Zambe.” (Beép. 3:7) Amu jé a aval avé Yéhôva a ve “mveane” te? Nge bia bo mam mese Yéhôva a jô bia na bi bo, yeme na bi nji yiane mvame jé. Ve nya ajô a ne na, bi ne bebo mam abé. Ajô te, mfefe’e njô bôt Salomon a nga tili na: “Zôsôa môt a nji bo si nyô, a bo mvaé, te bo abé.” (Ec. 7:20) Nlômane Paul fe ô nga jô na: “Bese be nga bo abé, te kui duma Zambe,” a na “ma’ane ya abé me ne awu.” (Bero. 3:23; 6:23a) Jame da yiane bia nde le.

⁴ Ve Yéhôva a nga liti na a nye’e bebo mam abé, éyoñ a nga bo beta jame na a mvamane be. Beta das a nga bo bôte bese a ne na, a nga lôm “atyi’i Mone dé” e si na, a zu wu a butane bia. (Jean 3:16) Nde mfa’a Yésus, Paul a nga tili na, a “be’e couronne étôto’o a duma, nde, amu mvame Zambe, a ye tyé’awu mfa’a ya môt ase.” (Beh. 2:9) Yaa, “mveane zesé ya Zambe ô ne ényiñ ya melu mese be Krist Yésus Tate wongan.”​—Bero. 6:23b.

5, 6. Jé ja kui bia éyoñ bi ne éjôé (a) abé si? (b) mvame si?

⁵ Aval avé abé a awu, bi nga mane yametan be bia bese? Kalate Zambe a liti na amu abé ya môte wua, Adam, awu é nga dañe jôé mvoñe bôt Adam. (Bero. 5:12, 14, 17) Mbamba jam a ne na, bi ne tobe na abé é bo te beta jôé bia. Nge bia liti a mimboane na, bi to ndi a ntañ Krist a nga ve, bia toé biabebien éjôé ya mvame Zambe si. Aval avé? Kalate Zambe a jô na: “Vôm abé é nga bo abui, vôm ate mvam é nga dañedañe bo: nde, aval ane abé é nga jôô awu été, aval éte fe mvam je aye jôô amu zôsô, a ve ényiñ ya melu mese, be Yésus Krist Tate wongan.”​—Bero. 5:20, 21.

⁶ To’o bi ngenan bebo mam abé, bi nji yiane jô’é na abé é jôé binyiñe biangan. Éyoñ bia bo abé, bia ye’elane Yéhôva na a jamé bia. Paul a nga bemene Bekristen na: “Abé de aye bo te jôô mia: amu mi nji fe tabe metiñe si, ve mvame si.” (Bero. 6:14) Nde ñhe, bi nto éjôé ya mvame si. Nalé a ve bia jé? Paul a nga liti na: “Mvame Zambe . . . je aye’ele bia mfa’a ya jame dina na, vôm bi akate mam me ne te mame ya Zambe a mbia minkômbane ya si nyô, bi aye tabe ntaban ya jôô minlem a zôsô a ane Zambe si nyô ya éyoñe ji.”​—Tite 2:11, 12.

7, 8. Éyoñe Kalate Zambe a jô na mvame Yéhôva ja litiban abui meval, nalé a tinan aya? (Fombô’ô fôtô ya atata’a ya ayé’é di.)

⁷ Nlômane Pierre ô nga tili na: “Aval ane môt ase a nyoñeya mvean éziñ, mi vola’ane wô miabebien, aval ane mbamba beba’ale ya mevale me mvam  abui ya Zambe.” (1 P. 4:10) Nalé a tinan aya? Nalé a tinane na, avale mbia jam ése bi ne tôbane de ényiñ, Yéhôva a ne volô bia na bi dañe de. (1 P. 1:6) Zambe a ye liti bia mbamba nlem éyoñ ése, ndemben bia ye bo ngule ya dañ avale njuk ése bia ye tôbane wô.

⁸ É ne fo’o été na, mvame Yéhôva ja litiban abui mezen. Nlômane Jean ô nga tili na: “E jôm é ne nye njalan nje bia bese bi nga nyoñ, mvam é bete mvame yôp.” (Jean 1:16, Mfefé Nkôñelan) Bi bili abui bibotan amu mvame Yéhôva ja litiban abui meval. Bibotane biziñe ya été bi ne bivé?

9. Aval avé bia yene mfi ya mvame Yéhôva, a aval avé bi ne liti na bia ve nye akéva amu jame te?

⁹ E bi njamane ya mbia be mam bia bo. Yéhôva a jamé mbia be mam bia bo amu mvame jé. Yéhôva a bo de éyoñ bia kôñelane minlem, a ke ôsu a juan a mbia minyamete miangan. (Lañe 1 Jean 1:8, 9.) Mvame Zambe ja yiane tindi bia na bi ve nye akéva a duma. Nlômane Paul ô nga tili miñwo’an mivo’o na: “Nnye ate a nga va bia vôme ya ngule ya dibi, a a nga nyiñili bia ayoñ ya Mone ya nye’ane wé; be nye bi bili nkôtane wongan, njamane ya mam abé mangan.” (Beco. 1:13, 14) Njamane Zambe a jamé bia, wo yoé bia mimbé ya beta bibotan.

10. Mbamba jam mbé bi bili amu mvame Zambe?

¹⁰ E late ñbwa a Zambe. Abé é ne bia metyi da bo na bi bo besiñ be Zambe ataté môs bia bialé. Paul a mbe a yeme na: “Éyoñ bi mbe besiñ, bi nga lateban ñbwa be Zambe, amu awu ya Mone wé.” (Bero. 5:10) Nlatane ñbwa te ô nga bo na, mvo’é é bo zañe bia be Yéhôva. Paul a nga timine na, jame te é nga boban amu mvame Yéhôva, éyoñ a nga jô bobenyañ bé be ne miñwo’ane na: “Amu bi kabeya a mbunan, bia be Zambe bi nto mvo’é, amu Tate wongan; amu nnye ate fe bi maneya nyi mvame nyô été amu mbunan, nje éte bi to été.” (Bero. 5:1, 2) Ngo’o avale mbamba jame te!

11. Aval avé miñwo’an mia dutu “mintômba mife” e zôsô été?

¹¹ E dutu bôt e zôsô été. Bia bese bi ne ékotekot a so abialé. Ve nkulu mejô Daniel a nga jô na melu ya asu’ulan, “ba be ne fek,” mebuka’a miñwo’an, ba ye ‘kôñelane bôt abui’ e zôsô été. (Lañe Daniel 12:3.) A zene ya ésaé nkañete a ésaé ñye’elane jap, miñwo’an mi boya na bizu’u “mimtômba mife” mi yené zôsô e mise me Yéhôva. (Jean 10:16) Ve nalé a boban fo’o ve amu Yéhôva a ne mvam. Paul a nga timine na: “Be akabe zesé a mvame jé [Zambe], amu nkôtan ô ne be Krist Yésus.”​—Bero. 3:23, 24.

12. Aval avé meye’elan me tii a mvame Zambe?

¹² E subu éto njôane Zambe bebé a zene ya meye’elan. Amu Yéhôva a ne mvam, nde a nga bo bia beta jame na, bi bo ngule ya subu éto njôane jé bebé a zene ya meye’elan. Ajô te, Paul a loon éto njôane Yéhôva na, “éto njôane ya mvam,” a jô fe bia na bi subu je bebé “a ngule minlem.” (Beh. 4:16a) Yéhôva a nga bo bia beta jam ate a zene ya Mone wé, “be nye ate bi bili minleme ya beti [minleme ya kobô bebela] a ngule ya nyin a mbunan, amu mbunan wongan ya be  nye.” (Beép. 3:12) E bo ngule ya laan a Yéhôva éyoñ ése, a ne fo’o beta jam bi bili amu mvame Yéhôva.

13. Aval avé mvame Zambe é ne volô bia mbamba éyoñ?

¹³ E bi mvolan mbamba éyoñ. Paul a nga jô bia na bi ye’elane Yéhôva éyoñ ése, “ndemben bi aye koban éngôñgô, a yen mvame ya volô bia éyoñ bi ayiane nyoñ.” (Beh. 4:16b) Éyoñ ése minjuk mia tya’a bia minlem, nge na mia bo bia ényiñ jo’ojo’o, bi ne ke yône Yéhôva mise na, a volô bia. Yéhôva a belane bobenyañe bangan ya nsisim na a yalane bia, to’o a nji bo ntindan ya bo de, “nalé ate bi ajô a mbamba ayo’o minleme na, [Yéhôva] a ne mvolô wom; me aye ke ko woñ: môt a ye bo me jé?”​—Beh. 13:6.

14. Aval avé bia bi mvolan minlem amu mvame Yéhôva?

¹⁴ E bi mvolan minlem. Mbamba jam bi bili amu mvame Yéhôva a ne na, a volô bia minlem éyoñ bia tôban minjuk. (Bs. 51:17) Paul a nga tili Bekristen ya Thessalonique be nga tôban étibela’a na: “Tate Yésus Krist wongan émien, a Zambe Ésa wongan, nnye a nga nye’e bia a ve bia mvolane minlem a mbamba ntaban ndi ya nnôm éto amu mvam, a volô’ô minlem mienan a yemete mia.” (2 Bet. 2:16, 17) Ngo’o abim meva’a bia wôk éyoñ bia yeme na, Yéhôva émien a ba’ale bia nye’an été, amu a ne mbamba nlem a anyep!

15. Amu mvame Zambe, ndi nleme fé bi bili?

¹⁵ E bi ndi nleme ya nyiñ nnôm éto. Amu bi ne bebo mam abé, bi nji be bi bili ndi nlem éziñ. (Lañe Besam 49:7, 8.) Ve Yéhôva a ve bia mbamba ndi nlem. Yésus a nga ka’ale beyé’é bé na: “Amu jam Ésa wom a nye’e é ne na, môt ase a yene Mon, a buni nye, a ye tabe ényiñ ya melu mese.” (Jean  6:40) Yaa, Yéhôva a liti bia beta mvame jé a zene ya ndi nlem a ve bia na, bi nyiñ nnôm éto. Paul, nnye ate a mbe a yiane nye’e jame te a nga jô na: “Mvame Zambe é maneya yené a zu nyian be bôte bese.”​—Tite 2:11.

16. Aval avé Bekristen béziñ ya ntete mimbu ôsu, be nga biasé mvame Zambe?

¹⁶ Yéhôva a botane bia amu mvame jé. Akusa bo nalé, bi nji yiane biasé mvam éte a buni na a ye jamé mbia ntabane wongan ase. Bekristen béziñ ya ntete mimbu ôsu, be nga jeñe na ‘be kôñelan mvame ya Zambe bisôk.’ (Jude 4) Bekristen bete be mbe be yiane simesane na, be ne ngule ya bo abé be nto ndi na, Yéhôva a ye jamé be. Jam é mbe é dañ abé été é mbe na, be mbe be tindi’i bobenyañ bap na, be fe be fubu mbia mboan ate été. To’o melu ma, môt ase a bo nalé a ‘biasé nsisime ya mvam.’​—Beh. 10:29.

17. Beta melebe mevé Pierre a nga ve bia?

¹⁷ Satan a du’u Bekristen béziñ ya melu ma na be simesane na, be ne ngule ya bo abé teke bi fonos amu Yéhôva a ne mvam abui. Yéhôva a ne nkômesane ya jamé bebo mam abé ba kôñelan minlem. Ve nté a bo de, a yange fe na bi juane mbia minyamete miangan a ngule jangan ése. A nga tindi Pierre a tili na: “Ajô te, a bôt me anye’e, amu mi tatéya yeme mam mete, mi momba’an, a za bo na, vôm mi avas amu nkobane ya mbia be bôt, mi aye ku a li’i nteban ngule wônan. Ve na, yaéan mvam a ñyemane ya yeme Tate a Nyi bôt Yésus Krist wongan été.”​—2 P. 3:17, 18.

18. Jé bi ne ntindane ya bo amu mvame Yéhôva?

¹⁸ Bia ve Yéhôva akéva amu mvame jé. Ajô te, bi ne ntindane ya belane mbamba mefulu bi nga bialé me na, bi ve Zambe duma a na, bôte bevok be yene mfi ya été. A zene fé? Paul a yalane bia: “A vôm bi bili mimvean mevale meva, aval ane mvam é nga vebane be bia . . . mva’ane biabebien mfa’a ya ésaé jangan; nge nyô a ye’ele, a va’a émien mfa’a ya ñye’elane wé; nge nyô a volô bôte minlem, a va’a émien mfa’a ya mvolane minleme wé: nyô a mvamane bôt, a bo’k a mevak.” (Bero. 12:6-8) Mvame Yéhôva a liti bia, ja tindi bia na bi bo ésaé nkañete nya mboane, bi ye’ele bôte bevok Mejô me Zambe, bi ve Bekristen bevok ngule nyôl, a bi jamé môt ase a bo bia abé.

19. Ésaé jangan évé bia ye fas ayé’é da tôñe di?

¹⁹ Bia bi ne bôte Zambe a botan amu beta nye’ane wé. Ajô te, bia yiane jeñ a ngul ése na, bi “kate mbamba foé ya mvame Zambe.” (Mam. 20:24) Bia ye tu’a fas ajô ya ésaé te ayé’é da tôñe di.