1, 2. (a) Iesu ena parabole, vain ia hadoa tauna dekenai mani oi herevalaia. (b) Edena dala ai unai parabole ese hebogahisi bona hariharibada karana ia haheitalaia?

VAIN hadoa tauna be daba momokani maketi dekenai ia lao vain umana ai do idia gaukara taudia ia tahua totona. Ia davaria taudia be ia gwauraia davana dekenai idia lalotamona dainai unai gaukara idia abia dae. To gaukara taudia momo ia tahua be namo unai dainai maketi dekenai ia giroa lou bona unai gaukara idia karaia totona ma haida ia abia bona adorahi idia gaukara taudia bona daba ai idia gaukara taudia edia davana be hegeregere. Adorahi ai, gaukara taudia ia haboua edia davana ia henia totona, idia ibounai dekenai davana hegeregerena ia henia, herevana hora momo o haida sibona idia gaukara. Ia abia gaukara taudia ginigunadia be unai idia diba neganai, idia maumau matamaia. Vain hadoa tauna ia haere, ia gwau: ‘Ita lalotamona oi be denario tamona do oi abia, ani? Lauegu ura hegeregerena egu gaukara taudia ibounai dekenai moni lau henia diba, ani? Kara namo lau hahedinaraia dainai oi mama, a?’​—Mat. 20:1-15.

² Iesu ena parabole amo Baibel ese ia gwauraia Iehova ena kara badana ta ita laloa totona​—unai be ena “hebogahisi hereadaena.” ^[1] (2 Korinto 6:1 duahia.) Toana be hora tamona sibona idia gaukara  taudia ese davana ibounai idia abia be kerere, to vain hadoa tauna be idia dekenai hebogahisi bada ia hahedinaraia. Inai hereva, “hebogahisi hereadaena” be Baibel momo dekenai idia hahanaia neganai, inai hereva “hariharibada” idia gaukaralaia. Diba bada tauna ta ia gwau: “Unai hereva ena anina be, davana lasi harihari gauna badana, ia be kara ta ena davana lasi.”

3, 4. Dahaka dainai bona edena dala ai Iehova ese taunimanima ibounai dekenai hebogahisi hereadaena ia hahedinaraia?

³ Baibel ese “Dirava ena hebogahisi hereadaena, unai davana lasi harihari gauna” ia herevalaia. (Efe. 3:7) Dahaka dainai bona edena dala ai Iehova ese unai “davana lasi harihari gauna” be ita dekenai ia henia? Bema Iehova ena kara maoromaoro taravatudia ita badinaia goevagoeva, ita do ia hebogahisi henia. To ita be goevadae lasi dainai, unai ita karaia diba lasi. Unai dainai, King Solomona ia gwau: “Kara maoromaoro tauna ta tanobada dekenai, be kara namo sibona ia karaia noho, a? Lasi momokani, ibounai ese nega haida kara dika do idia karaia diba.” (Had. 7:20) Aposetolo Paulo danu ia gwau: “Taunimanima ibounai be idia kara dika vadaeni bona Dirava ena hairai idia reaia. Kara dika ena davana be mase.” (Roma 3:23; 6:23a) Unai dainai ita buruka bona ita mase.

⁴ To, Iehova be ena hebogahisi hereadaena amo kara dika taudia dekenai lalokau ia hahedinaraia. Unai davana lasi harihari gauna hereadaena be, “ena natuna korikorina,” tanobada dekenai ia siaia mai ita totona ia mase. (Ioa. 3:16) Unai dainai Paulo be Iesu ia herevalaia neganai, ia gwau: “Ena goada idia hereaia, bona ia be hisihisi ia abia bona ia mase dainai, hairai bona hemataurai ia abia. Dirava ena hebogahisi hereadaena dainai, ia be taunimanima ibounai totona ia mase.” (Heb. 2:9) Oibe, “Dirava ese Keriso Iesu iseda Lohiabada amo ia henia harihari gauna be mauri hanaihanai.”​—Roma 6:23b.

5, 6. Dahaka ia vara diba bema (a) kara dika ese ita ia biagua? (b) hebogahisi hereadaena ese ita ia biagua?

⁵ Edena dala ai taunimanima be kara dika bona mase idia abia hanai? Baibel ia gwau: “Tau tamona [Adamu] ena kara dika dainai, mase be king bamona unai tau amo ia lohia.” Unai dainai mase be Adamu ena bese dekenai ia hanai lao. (Roma 5:12, 14, 17) To, ita moale badina kahirakahira kara dika ese ita do ia biagua lasi. Keriso ena boubou karana ita abidadama henia neganai, ita hahedinaraia ita be Iehova ena hebogahisi hereadaena henunai ita noho. Edena dala ai? “Taunimanima ese kara dika momo idia karaia neganai, Dirava ese idia dekenai hebogahisi hereadaena ia hahedinaraia badabada. Unai ena badina be dahaka? Ena badina be inai, kara dika bona mase be king bamona idia lohia hegeregerena, kara maoromaoro amo, hebogahisi hereadaena be king bamona do ia lohia, bona iseda Lohiabada Iesu Keriso amo mauri hanaihanai do ia mailaia.”​—Roma 5:20, 21.

⁶ Herevana ita be goevadae lasi, to namona be ita hekwarahi kara dika ese iseda mauri lalonai ita ia biagua lasi totona. Bema kara dika ita karaia, Iehova do ita noia iseda dika do ia gwauatao totona. Paulo ese Keristani taudia ia sisiba henia, ia gwau: “Namo lasi kara dika ese umui ia biagua, badina umui be taravatu henunai umui noho lasi, to umui be hebogahisi hereadaena henunai umui noho.” (Roma 6:14) Unai dainai hebogahisi hereadaena henunai ita noho be namo. Edena dala ai? Paulo ia gwau: “Dirava ena hebogahisi hereadaena . . . ese ita ia hadibaia, Dirava ia ura lasi karadia bona tanobada ena ura idauidau do ita dadaraia bona inai nega oromana lalonai do ita noho mai laloa maoromaoro bona kara maoromaoro ida bona Dirava do ita badinaia noho.”​—Tito 2:11, 12.

7, 8. Iehova ese “dala idauidau ai” ena hebogahisi hereadaena ia hahedinaraia ena anina be dahaka? (Laulau ginigunana herevalaia.)

⁷ Aposetolo Petero ia gwau: “Umui ta ta ese harihari gauna umui abia hegeregerena, naria  taudia namodia bamona, Dirava ena amo umui abia hebogahisi hereadaena do umui gaukaralaia ta ta umui hesiai henia totona. Unai hebogahisi hereadaena be dala idauidau ai ia hedinarai.” (1 Pet. 4:10) Unai ena anina be dahaka? Herevana iseda mauri lalonai hekwakwanai idauidau ita davaria, to Iehova ese ita ia durua diba unai hekwakwanai ita haheaukalaia totona. (1 Pet. 1:6) Danu hekwakwanai idauidau ita davaria, to Dirava ena hebogahisi hereadaena be dala idauidau ai ita mamia diba.

⁸ Momokani, Iehova ese ita dekenai dala idauidau ai ena hebogahisi hereadaena ia hahedinaraia. Aposetolo Ioane ia gwau: “Ita ibounai be ia amo hebogahisi hereadaena ita abia guguru, badina ia be hebogahisi hereadaena amo ia honu.” (Ioa. 1:16) Iehova ese dala idauidau ai ena hebogahisi hereadaena ia hahedinaraia dainai hahenamo momo ita davaria. Unai hahenamo haida be dahaka?

9. (a)Edena dala ai Iehova ena hebogahisi hereadaena amo namo ita abia? (b) Edena dala ai ita hahedinaraia diba ita be unai kara ita laloa bada?

⁹ Iseda kara dika ia gwauatao. Iehova be ena hebogahisi hereadaena amo, iseda kara dika ia gwauatao vadaeni, unai dainai namona be ita helalo-kerehai bona ita hekwarahi ita manokalaia gaudia ita dadaraia totona. (1 Ioane 1:8, 9 duahia.) Dirava ena hebogahisi karana dainai ita moale bona iena ladana ita abia isi be namo. Paulo be ena horoa tadikaka ia tore henidia neganai, ia gwau: “[Iehova] ese dibura ena siahu amo ita ia ruhaia bona ena lalokau Natuna ena basileia lalonai ita ia abia vareai. Iena Natuna ese ia henia mauri davana amo ita ia ruhaia, anina be iseda kara dika ia gwauatao.” (Kol. 1:13, 14) Iehova ese iseda kara dika ia gwauatao vadaeni, unai dainai hahenamo momo ita davaria diba.

10. Dirava ena hebogahisi hereadaena dainai, dahaka hahenamo ita moalelaia?

¹⁰ Maino ai Dirava ita tura henia diba. Ita be goevadae lasi dainai, ita vara neganai, ita be Dirava ena inai taudia. Paulo ese unai ia hamomokania, ia gwau: “Guna ita be Dirava ena inai taudia, to iena Natuna ena mase amo ita be ia ida maino ai ita noho.” (Roma 5:10) Unai dainai hari ita be Iehova ida maino ai ita noho. Paulo ese unai hahenamo be Iehova ena hebogahisi hereadaena ida ia herevalaia hebou neganai, ia gwau: “Iseda abidadama dainai Dirava ese ita ia gwauraia maoromaoro. Namona be iseda Lohiabada Iesu Keriso amo Dirava ida maino ai ita noho. Ia ita abidadama henia karana amo, dala ia kehoa ita ese hebogahisi hereadaena ita abia totona, bona unai be hari ita abia noho.” (Roma 5:1, 2) Unai be hahenamo badana, ani?

11. Edena dala ai horoa oreana ese “mamoe ma haida” be dala maorona dekenai ia boiridia mai?

¹¹ Dala maorona ai ita ia hadibaia. Ita be goevadae lasi. To peroveta tauna Daniela ese ia hahedinaraia inai nega dokona lalonai, “Dirava ena aonega taudia,” horoa oreana unai, ese “dala maoromaoro be taunimanima momo dekenai idia hadibaia.” (Daniela 12:3 duahia.) Idia ese haroro bona hahediba gaukarana amo unai idia karaia, “mamoe ma haida” milioni momo idia boiria mai Iehova idia tomadiho henia totona. (Ioa. 10:16) Oibe, unai ibounai idia vara badina Iehova ese ita dekenai ena hebogahisi hereadaena ia hahedinaraia. Paulo ia gwau: “Dirava ese hebogahisi hereadaena be idia dekenai ia hahedinaraia, bona Keriso Iesu ia henia mauri davana amo idia ia ruhaia bona idia ia gwauraia maoromaoro, unai be iena davana lasi harihari gauna.”​—Roma 3:23, 24.

12. Edena dala ai guriguri karana be Dirava ena hebogahisi hereadaena?

¹² Guriguri amo Dirava kahirakahira ita lao. Guriguri amo Iehova ena hebogahisi hereadaena ena terona kahirakahira ita lao neganai, ita do ia hanamoa. Paulo ese Iehova ena terona ia gwauraia, “hebogahisi hereadaena ena terona” bona ita ia hagoadaia namona be “mai gari lasi ida” Dirava ita guriguri henia. (Heb. 4:16) Iehova ese ita dekenai unai hahenamo ia henia dainai, “mai  gari lasi ida ita hereva bona mai lalogoada ida Dirava kahirakahira ita lao diba, badina Iesu ita abidadama henia.” (Efe. 3:12) Guriguri amo Iehova ita hereva henia diba, bona unai be ena hebogahisi hereadaena ia hahedinaraia dalana ta.

13. Edena dala ai hebogahisi hereadaena dainai “heduru be nega maorona ai ita abia diba”?

¹³ Heduru be nega maorona ai do oi abia. Paulo ese ita ia hagoadaia Iehova ita guriguri henia be namo, “unai amo hebogahisi do ita davaria bona iena hebogahisi hereadaena amo, heduru be nega maorona ai do ita abia.” (Heb. 4:16) Iseda mauri lalonai hekwakwanai o hahetoho ita davaria neganai, heduru totona Iehova ita noia diba. Ita ia hebogahisi henia dainai, iseda guriguri ia haerelaia, bona nega momo iseda tadikaka taihu ia gaukaralaia ita ia durua totona, “unai dainai mai lalogoada ida do ita gwau: “Iehova be egu durua tauna, lau be do lau gari lasi. Taunimanima be lau dekenai dahaka idia karaia diba?”​—Heb. 13:6.

14. Edena dala ai Iehova ena hebogahisi hereadaena ese ita ia hagoadaia?

¹⁴ Ita ia hagoadaia diba. Ita lalometau o lalohisihisi neganai Iehova ese ena hebogahisi hereadaena amo ita ia hagoadaia. (Sal. 51:17) Tesalonika ai, tadikaka taihu be dagedage idia davaria neganai Paulo ese idia ia hagoadaia, ia gwau: “Dirava iseda Tamana ese ita ia lalokau henia. Bona iena hebogahisi hereadaena amo ita ia hagoadaia hanaihanai bona ita dekenai helaro namona ia henia. Namona be Ia bona iseda Lohiabada Iesu Keriso ese emui kudouna idia hagoadaia.” (2 Tes. 2:16, 17) Iehova ese ena hebogahisi hereadaena amo mai lalokau ida ita ia durua diba. Unai ese ita ia hagoadaia bada, ani?

15. Dirava ena hebogahisi hereadaena dainai dahaka hahenamo do ita abia?

¹⁵ Mauri hanaihanai ena helaro ita abia. Ita be kara dika taudia dainai, ita be helaro lasi. (Salamo 49:7, 8 duahia.) To, Iehova ese ita dekenai helaro namona ia henia. Iesu ese ena murinai idia raka taudia ia gwauhamata henia, ia gwau: “Lauegu Tamana ena ura be inai, Natuna ia itaia bona abidadama henia tauna be mauri hanaihanai ia abia be namo bona dina dokonai ia do lau hatorea isi lou.” (Ioa. 6:40) Oibe, mauri hanaihanai helarona be Dirava ena hebogahisi hereadaena harihari gauna. Paulo danu ese unai  ia moalelaia, ia gwau: “Dirava ena hebogahisi hereadaena be ia hedinarai vadaeni, bona taunimanima idauidau dekenai hahemauri ia mailaia.”​—Tito 2:11.

16. Edena dala ai Keristani taudia ginigunadia haida ese Dirava ena hebogahisi hereadaena dekenai lalohadai kererena idia abia?

¹⁶ Iehova ese ena hebogahisi hereadaena amo ita dekenai hahenamo momo ia henia karana ita laloa bada be namo, to namo lasi ita hekokoroku bona ita laloa Iehova be iseda kara dikadia ia itaia lasi. Keristani taudia ginigunadia huanai, haida idia laloa “Dirava be mai ena hebogahisi hereadaena dainai, gwau-edeede hemarai karadia idia karaia” diba. (Iuda 4) Unai abidadama lasi Keristani taudia idia laloa kara dika do idia karaia bona Iehova do idia noia edia dika do ia gwauatao totona. Danu edia tadikaka edia lalona idia veria unai kara dika rohoroho lalonai do idia vareai totona. Hari danu, bema ta be Dirava ena hebogahisi hereadaena ia gwauraia dika, “unai tauna ese panisi badana ia abia be maoro.”​—Heb. 10:29.

17. Petero ese ita dekenai dahaka sisiba aukana ia henia?

¹⁷ Hari, Satani ese Keristani taudia haida ia hakaua kerere bona idia laloa Dirava be hebogahisi Diravana dainai kara dika idia karaia neganai Dirava ese do ia panisidia lasi. To Iehova be idia helalo-kerehai momokani taudia edia dika do ia gwauatao dainai, ia ura ita hekwarahi iseda kara dikadia ita rakatania be namo. Ia ese Petero ia hagoadaia inai hereva ia torea totona: “Unai dainai, lalokau taudia e, unai umui diba vadaeni dainai, do umui gima noho, dika unai taravatu utua taudia edia kerere ese umui ia hakaua kerere bena sibona emui gini goada karana umui rakatania. To iseda Lohiabada bona Hamauria Tauna Iesu Keriso ena hebogahisi hereadaena bona ena diba do umui abia noho.”​—2 Pet. 3:17, 18.

18. Iehova ena hebogahisi hereadaena dainai, ita dekenai dahaka maduna idauidau ia henia?

¹⁸ Ita be Iehova ena hebogahisi hereadaena abia taudia dainai, iseda maduna be ia ita hesiai henia bona iseda dekena taudia dekenai iseda harihari gaudia ita gaukaralaia Dirava ena ladana ita abia isi bona idia ita durua. Edena dala ai? Paulo ia haere, ia gwau: “Dirava ese ita dekenai ia henia hebogahisi hereadaena hegeregerena, harihari gaudia idauidau ita abia, bema unai be hesiai gaukara, namona be unai hesiai gaukara ita karaia. Eiava bema ta be ma haida ia hadibaia, namona be ena hadibaia gaukara do ia karaia noho. Eiava bema ta be ma haida ia hagoadaia, namona be ena hagoadaia gaukarana do ia karaia noho. Eiava bema ta be hebogahisi ia hahedinaraia, namona be mai moale ida unai do ia karaia.” (Roma 12:6-8) Iehova ese ita dekenai ia henia hebogahisi hereadaena amo unai maduna ita abia bona ita bisi hesiai gaukara ita karaia, Baibel amo ma haida ita hadibaia, iseda tadikaka taihu ita hagoadaia bona bema ma haida ese edia hereva bona kara amo iseda lalona idia hahisia, edia dika ita gwauatao.

19. Dahaka gaukara be stadi gabena ai do ita herevalaia?

¹⁹ Iehova ese ita dekenai ena lalokau ia hahedinaraia dainai, namona be ita gaukara goada ‘Dirava ena hebogahisi hereadaena ena sivarai namona, do ita gwauraia guguru.’ (Kara 20:24) Unai gaukara be stadi gabena ai do ita herevalaia.