1, 2. (a) Taarĩria ngerekano ya Jesu ĩgiĩ mwene mũgũnda wa mĩthabibũ. (b) Rũgano rũu ruonanagia atĩa ngumo ya ũtaana na ũtugi mũnene?

MŨNDŨ ũmwe warĩ na mũgũnda wa mĩthabibũ nĩ aathire kĩroko tene gwetha andũ moke marute wĩra mũgũnda-inĩ wake. Arĩa onire nĩ meetĩkĩrire mbeca iria angĩamarĩhire na magĩthiĩ kũruta wĩra mũgũnda-inĩ wake. Ĩndĩ no aabataraga aruti a wĩra makĩria, nĩ ũndũ ũcio agĩthiĩ maita maigana ũna mũthenya ũcio gwetha andũ angĩ, na mũcara ũrĩa angĩarĩhire a mbere noguo erĩire o na aya, na arĩa mokire wĩra hwaĩ-inĩ. Gwakinya hwaĩ-inĩ, agĩta aruti a wĩra nĩguo amarĩhe mũcara wao, na othe aamarĩhire mũcara ũiganaine gũtekũmakania kana amwe maarutĩte wĩra mathaa maingĩ kana angĩ o ithaa rĩmwe tu. Arĩa maahetwo wĩra kĩroko maamenya ũguo, makĩambĩrĩria kũnuguna. Mwene mũgũnda akĩmeera ũũ: ‘Githĩ tũtiguithanĩirie mũcara? Githĩ ndiagĩrĩirũo gwĩka ũrĩa ngwenda na indo ciakwa? Kana nĩ waigua ũiru tondũ nĩ ndeka wega?’​—Mat. 20:1-15.

² Ngerekano ĩyo ya Jesu, ĩtũririkanagia ngumo ĩmwe ya Jehova ĩgwetagwo maita maingĩ Bibilia-inĩ, na nĩyo “ũtugi wake  mũnene.” ^[1] (Thoma 2 Akorintho 6:1.) Arĩa maarutĩte wĩra o ithaa rĩmwe tu mationagwo magĩrĩire kũrĩhwo mũcara wa mũthenya mũgima, no mwene mũgũnda nĩ aamonirie ũtugi mũnene. Mũthomi ũmwe akĩaria ũhoro wĩgiĩ ũtugi mũnene ũrĩa ũgwetetwo Bibilia-inĩ oigire ũũ: “Kiugo kĩu kĩonanagia mũndũ kũheo kĩndũ atanogeire kana atagĩrĩire kũheo.”

3, 4. Jehova onanagia ũtugi mũnene kũrĩ andũ othe nĩkĩ, na amonetie na njĩra ĩrĩkũ?

³ Maandĩko nĩ maragia ũhoro wa “kĩheo kĩa ũtugi mũnene wa Ngai.” (Ef. 3:7) Jehova aheanaga “kĩheo” kĩu na njĩra ĩrĩkũ na aheanaga nĩkĩ? Korũo nĩ tũhingagia ithimi cia Jehova na njĩra nginyanĩru, tũngĩkoragwo twagĩrĩire kuonio ũtugi wake. No tũtihotaga gwĩka ũguo. Nĩkĩo Mũthamaki Suleimani aandĩkire ũũ: “Ti-itherũ hatirĩ mũndũ mũthingu gũkũ thĩ wĩkaga o wega mũtheri, na ndehagia.” (Koh. 7:20) Nake mũtũmwo Paulo aandĩkire ũũ: “Nĩ gũkorũo andũ othe nĩ mehĩtie na makanyihĩrũo nĩ riri wa Ngai” na “mũcara wa mehia nĩ gĩkuũ.”—Rom. 3:23; 6:23a.

⁴ No Jehova nĩ onanirie wendo wake kũrĩ andũ ehia na njĩra ya kũmonia ũtugi mũnene. Nĩ aatũmire “Mũrũ wake wa mũmwe” gũkũ thĩ arĩ we kĩheo kĩrĩa kĩnene mũno nĩguo akue nĩ ũndũ witũ. (Joh. 3:16) Kwoguo nĩkĩo Paulo aandĩkire ũũ akĩaria ũhoro wa Jesu: “Aheetwo riri na gĩtĩo nĩ ũndũ wa kũnyamarĩka nginya agakua, nĩ getha kũgerera ũtugi mũnene wa Ngai acame gĩkuũ nĩ ũndũ wa andũ othe.” (Ahib. 2:9) “Kĩheo kĩrĩa Ngai aheanaga nĩ muoyo wa tene na tene kũgerera Kristo Jesu Mwathani witũ.”​—Rom. 6:23b.

5, 6. Moimĩrĩro nĩ marĩkũ rĩrĩa twatongorio nĩ (a) mehia? (b) ũtugi mũnene?

⁵ Nĩ kĩĩ gĩtũmaga twĩhie na tũkue? Bibilia yugaga ũũ: “Nĩ ũndũ wa kwĩhia kwa mũndũ ũmwe [Adamu] gĩkuũ gĩaathanire o ta mũthamaki” harĩ njiarũa cia Adamu. (Rom. 5:12, 14, 17) No ũndũ ũrĩa mwega nĩ atĩ rĩu no tũthuure kwaga gũthamakĩrũo nĩ mehia. Rĩrĩa tuonania wĩtĩkio harĩ igongona rĩa ũkũũri rĩa Kristo, nĩ tũgunĩkaga nĩ ũtugi mũnene wa Jehova. Na njĩra ĩrĩkũ? Bibilia yugaga ũũ: “Mehia maingĩha, ũtugi mũnene ũkĩingĩha o na makĩria. Nĩkĩ? Nĩguo o ta ũrĩa mehia na gĩkuũ ciathanire ta mũthamaki, ũtugi mũnene o naguo wathane ta mũthamaki kũgerera ũthingu, nĩguo andũ makaagĩa muoyo wa tene na tene kũgerera harĩ Jesu Kristo.”​—Rom. 5:20, 21.

⁶ O na gũtuĩka tũrĩ o ehia, tũtiagĩrĩirũo gwĩtĩkĩria mehia matũtongoragie. Nĩ ũndũ ũcio rĩrĩa twahĩtia, twagĩrĩirũo kũhoya Jehova atuohere. Paulo aaheire Akristiano mũkaana ũyũ: “No mũhaka mehia matige kũmwathaga, tondũ mũtirĩ rungu rwa watho no mũrĩ rungu rwa ũtugi mũnene.” (Rom. 6:14) Kwoguo, tũtongoragio nĩ ũtugi mũnene. Moimĩrĩro makoragwo marĩ marĩkũ? Paulo aatarĩirie ũũ: “Ũtugi mũnene wa Ngai nĩ . . . ũtũrutaga kũrega maũndũ marĩa matakenagia Ngai, na kũrega merirĩria ma thĩ, na gũtũũra tũrĩ na meciria mega na ũthingu na wĩyamũrĩri Ngai mũtabarĩre-inĩ ũyũ wa maũndũ.”—Tit. 2:11, 12.

7, 8. Gũkorũo ũtugi mũnene wa Jehova “wonanagio na njĩra itiganĩte” nĩ kuuga atĩa? (Rora mbica kĩambĩrĩria-inĩ gĩa gĩcunjĩ gĩkĩ.)

⁷ Mũtũmwo Petero aandĩkire ũũ: “O ũrĩa o mũndũ amũkĩire kĩheo, kĩhũthĩrei gũtungatanĩra  mũrĩ aramati ega a ũtugi mũnene wa Ngai ũrĩa wonanagio na njĩra itiganĩte.” (1 Pet. 4:10) Ũguo nĩ kuuga atĩa? Nĩ kuuga atĩ o na tũngĩcemania na magerio mahaana atĩa ũtũũro-inĩ, Jehova nĩ arĩtũteithagia kũhiũrania namo. (1 Pet. 1:6) Nĩ arĩtũheaga kĩrĩa tũrabatara nĩguo tũhote gũtooria magerio mothe.

⁸ Jehova atuonagia ũtugi wake mũnene na njĩra itiganĩte. Mũtũmwo Johana aandĩkire ũũ: “Ithuothe nĩ twaamũkĩrire ũtugi mũnene kuuma kũrĩ we tondũ we aiyũirũo nĩ ũtugi.” (Joh. 1:16) Njĩra itiganĩte iria Jehova atuonagia ũtugi wake mũnene nacio, itũmaga tũgĩe na irathimo nyingĩ. Imwe ciacio nĩ irĩkũ?

9. Tũgunĩkaga atĩa nĩ ũndũ wa ũtugi mũnene wa Jehova, na tũngĩonania ngatho citũ nĩ ũndũ waguo atĩa?

⁹ Kuoherũo mehia maitũ. Nĩ ũndũ wa ũtugi mũnene wa Jehova nĩ tuohagĩrũo mehia maitũ, tũngĩĩrira na twĩrutanĩrie biũ kũrũa na mĩerekera itũ mĩũru. (Thoma 1 Johana 1:8, 9.) Nĩ tũbatiĩ gũcokagia ngatho nĩ ũndũ wa tha cia Ngai na tũkamũgoocaga. Paulo aandĩkĩire Akristiano aitĩrĩrie maguta ũũ: “We [Jehova] nĩ aatũhonokirie kuuma wathani-inĩ wa nduma na agĩtũingĩria ũthamaki-inĩ wa Mũrũwe ũrĩa endete, ũrĩa kũgerera harĩ we twohorirũo na ũkũũri, tũkĩoherũo mehia maitũ.” (Kol. 1:13, 14) Kuoherũo mehia gũtũmaga tũgĩe na irathimo ingĩ nyingĩ.

10. Nĩ ũndũ ũrĩkũ tũkenagĩra nĩ ũndũ wa ũtugi mũnene wa Jehova?

¹⁰ Gũkorũo na ũkuruhanu mwega na Ngai. Nĩ ũndũ wa gũkorũo tũrĩ ehia, tũkoragwo tũrĩ thũ cia Ngai kuuma twaciarũo. No Paulo oigire ũũ: “Rĩrĩa twarĩ thũ nĩ twaiguithanirio na Ngai kũgerera gĩkuũ kĩa Mũrũ wake.” (Rom. 5:10) Kũiguithanio kũu gũtũteithagia gũkorũo na ũrata hamwe na Jehova. Paulo aakuruhithanirie mweke ũcio na ũtugi mũnene wa Jehova rĩrĩa eerire Akristiano aitĩrĩrie maguta ũũ: “Tondũ nĩ tũtuĩtwo athingu nĩ ũndũ wa wĩtĩkio, nĩ tũkenagĩrei thayũ hamwe na Ngai kũgerera harĩ Mwathani witũ Jesu Kristo, kũgerera wĩtĩkio harĩ we nĩ twamũkĩrĩte ũtugi mũnene ũrĩa tũrĩ naguo rĩu.” (Rom. 5:1, 2) Na githĩ kĩu ti kĩrathimo kĩnene mũno?

11. Nĩ na njĩra ĩrĩkũ Akristiano aitĩrĩrie maguta mateithĩtie arĩa a “ng’ondu ingĩ” gũkorũo marĩ athingu?

¹¹ Gũkorũo tũrĩ athingu. Ithuothe tũkoragwo tũtarĩ athingu tondũ tũtirĩ akinyanĩru. No mũnabii Danieli aarathire atĩ matukũ-inĩ ma mũico, ‘arĩa ogĩ,’ nĩo Akristiano aitĩrĩrie maguta arĩa matigarĩte gũkũ thĩ, nĩ ‘mangĩgacokia andũ arĩa aingĩ njĩra-inĩ ya ũthingu.’ (Thoma Danieli 12:3.) Kũgerera wĩra wao wa kũhunjia na kũrutana nĩ mateithĩtie andũ milioni nyingĩ a “ng’ondu ingĩ” gũkorũo marĩ athingu mbere ya Jehova. (Joh. 10:16) No ũndũ ũcio ũhotekete tu nĩ ũndũ wa ũtugi mũnene wa Jehova. Paulo aataarĩirie ũũ: “Amatuaga athingu nĩ ũndũ wa thogora ũrĩa Kristo Jesu aarĩhire nĩguo amahonokie. Kĩu nĩ kĩheo Ngai aamaheire nĩ ũndũ wa ũtugi wake mũnene.”—Rom. 3:23, 24.

12. Mahoya mahutanĩtie atĩa na ũtugi mũnene wa Ngai?

¹² Gũkuhĩrĩria gĩtĩ kĩa ũnene kĩa Ngai kũgerera mahoya. Nĩ ũndũ wa ũtugi wake mũnene, Jehova nĩ atũrathimĩte na njĩra ya gũtwĩtĩkĩria tũmũkuhagĩrĩrie kũgerera mahoya. Paulo akĩaria ũhoro wa gĩtĩ kĩu oigire ũũ: “Nĩ tũgĩkuhĩrĩriei gĩtĩ kĩa ũnene kĩa Ngai o ũcio ũheanaga ũtugi mũnene tũrĩ na wĩyathi wa kwaria.”  (Ahib. 4:16a) Jehova atũheete mweke ũcio kũgerera Mũriũ wake “ũrĩa kũgerera harĩ we tũkoragwo na wĩyathi ũyũ wa kwaria na tũkahota kũhoya Ngai tũrĩ na ũmĩrĩru nĩ ũndũ wa wĩtĩkio witũ harĩ we.” (Ef. 3:12) Jehova gũtwĩtĩkĩria tũmũkuhĩrĩrie kũgerera mahoya, nĩ ũtugi mũnene.

13. Nĩ na njĩra ĩrĩkũ tũngĩona “ũteithio hĩndĩ ĩrĩa tũrabatara” nĩ ũndũ wa ũtugi mũnene wa Jehova?

¹³ Kuona ũteithio rĩrĩa tũraũbatara. Paulo aatwĩkĩrire ngoro tũkuhagĩrĩrie Jehova tũrĩ na wĩyathi kũgerera mahoya, “nĩguo tũiguĩrũo tha na tuonio ũtugi mũnene ũrĩ ũteithio hĩndĩ ĩrĩa tũrabatara.” (Ahib. 4:16b) Rĩrĩa rĩothe tũracemania na magerio kana moritũ ũtũũro-inĩ witũ, no tũrĩrĩre Jehova atũteithie. O na gũtuĩka tũtiagĩrĩire, Jehova nĩ acokagia mahoya maitũ, na kaingĩ ahũthagĩra Akristiano arĩa angĩ “nĩ getha tũkoragwo na ũmĩrĩru mũnene wa kuuga: ‘Jehova nĩwe mũndeithia; ndigwĩtigĩra. Mũndũ angĩnjĩka atĩa?’”—Ahib. 13:6.

14. Nĩ na njĩra ĩrĩkũ ũtugi mũnene wa Jehova ũgunaga ngoro citũ?

¹⁴ Nĩ tũmagĩrĩrio ngoro-inĩ citũ. Kĩrathimo kĩngĩ tuonaga nĩ ũndũ wa ũtugi mũnene wa Jehova nĩ kũũmĩrĩria ngoro ĩtarĩ na hinya. (Thab. 51:17) Paulo aandĩkĩire Akristiano a Thesalonike arĩa maageragĩra mĩnyamaro ũũ: “Mwathani witũ Jesu Kristo we mwene o na Ngai Ithe witũ, o we watwendire na ũtũũraga atũũmagĩrĩria na agatũhe kĩĩrĩgĩrĩro kĩega kũgerera ũtugi mũnene, aromũũmĩrĩria na atũme mwĩhande.” (2 Thes. 2:16, 17) Kũmenya atĩ Jehova nĩ atwendete na nĩ atũrũmbũyagia nĩ gũtũũmagĩrĩria.

15. Nĩ kĩĩrĩgĩrĩro kĩrĩkũ tũkoragwo nakĩo nĩ ũndũ wa ũtugi mũnene wa Jehova?

¹⁵ Kũgĩa na kĩĩrĩgĩrĩro kĩa muoyo wa tene na tene. Tondũ tũrĩ ehia, tũtikoragwo na mwĩhoko. (Thoma Thaburi 49:7, 8.) Ĩndĩ Jehova nĩ atũheaga mwĩhoko wa magegania. Jesu eerire arũmĩrĩri ake ũũ: “Nĩ gũkorũo  ũyũ nĩguo wendi wa Awa, atĩ mũndũ o wothe ũkũũranaga Mũriũ na akonania wĩtĩkio harĩ we agĩe na muoyo wa tene na tene.” (Joh. 6:40) Kĩĩrĩgĩrĩro kĩa muoyo wa tene na tene nĩ kĩheo kuuma kũrĩ Jehova nĩ ũndũ wa ũtugi wake mũnene. Paulo oigire ũũ: “Nĩ gũkorũo ũtugi mũnene wa Ngai nĩ ũguũrĩtio, ũkarehera andũ a mĩthemba yothe ũhonokio.”​—Tit. 2:11.

16. Akristiano amwe a karine ya mbere maahũthagĩra ũũru atĩa ũtugi mũnene wa Jehova?

¹⁶ O na gũtuĩka nĩ tuonaga irathimo nyingĩ nĩ ũndũ wa ũtugi mũnene wa Jehova, tũtiagĩrĩire gwĩciria atĩ ndatindanagĩra na mĩthiĩre itũ. Hĩndĩ ya karine ya mbere, harĩ Akristiano maageragia ‘kũhũthĩra ũtugi mũnene wa Jehova ũrĩ kĩĩgwatio gĩa gwĩka mĩtugo ya rũtũrĩko.’ (Jud. 4) Akristiano acio mataarĩ ehokeku meeciragia atĩ no mehie macoke mahoe Jehova amohere. O na ũndũ ũrĩa warĩ mũru makĩria nĩ atĩ nĩ maageragia kũhenereria Akristiano arĩa angĩ makorũo na mĩthiĩre ta yao. O na ũmũthĩ, mũndũ ũrĩa wĩkaga ta Akristiano acio nĩ ‘atuurithagia roho ũrĩa ũrehaga ũtugi mũnene.’—Ahib. 10:29.

17. Nĩ ũtaaro ũrĩkũ Petero aaheanire?

¹⁷ O na mahinda-inĩ maya, Shaitani nĩ ahĩtithĩtie Akristiano amwe agatũma mecirie atĩ no mehie makĩendaga na Jehova amohere. O na gũtuĩka Jehova nĩ akoragwo eharĩirie kuohera arĩa merirĩte, nĩ erĩgagĩrĩra twĩrutanĩrie biũ kũrũa na mĩerekera mĩũru ya mehia. Jehova aatongoririe Petero kwandĩka ũũ: “Nĩ ũndũ ũcio inyuĩ endwa akwa-rĩ, tondũ mũrĩ na ũmenyo ũyũ kabere, mwĩhũgagei nĩguo mũtikanahĩtithio hamwe nao mahĩtia-inĩ ma andũ arĩa matarũmagĩrĩra watho, mũthenge wĩkindĩru-inĩ wanyu. No thiagai mũgĩkũraga ũhoro-inĩ wĩgiĩ ũtugi na ũmenyo wa Mwathani na Mũhonokia witũ Jesu Kristo.”—2 Pet. 3:17, 18.

18. Nĩ mawĩra marĩkũ tũkoragwo namo nĩ ũndũ wa ũtugi mũnene ũrĩa Jehova atuonetie?

¹⁸ Nĩ ũndũ wa ũtugi ũrĩa Jehova atuonetie nĩ twagĩrĩirũo kũhũthĩra iheo ciitũ kũmũtĩa na gũteithia andũ arĩa angĩ. Na njĩra irĩkũ? Paulo aandĩkire ũũ: “Nĩ ũndũ ũcio, tondũ tũrĩ na iheo mwanya mwanya kũringana na ũtugi mũnene ũrĩa tũheetwo-rĩ, . . . angĩkorũo nĩ ũtungata-rĩ, nĩ tũrutagei ũtungata ũcio; kana mũndũ ũrĩa ũrutanaga, nĩ athiĩ na mbere kũrutana; kana ũrĩa ũmanagĩrĩria, nĩ omanagĩrĩrie; . . . ũrĩa ũiguanagĩra tha, nĩ ekage ũguo akenete.” (Rom. 12:6-8) Ũtugi mũnene ũrĩa Jehova atuonetie ũtũmaga tũkorũo na kĩyo ũtungata-inĩ, tũrute arĩa angĩ Bibilia, tũmĩrĩrie Akristiano arĩa angĩ na tuohere arĩa matũhĩtĩria.

19. Nĩ ũndũ ũrĩkũ ũkwarĩrĩrio gĩcunjĩ-inĩ kĩrĩa kĩrũmĩrĩire?

¹⁹ Twagĩrĩirũo kwĩrutanĩria “kũruta ũira kĩhinyio wĩgiĩ ũhoro ũrĩa mwega wa ũtugi mũnene wa Ngai,” nĩguo tuonanie ngatho nĩ ũndũ wa wendo ũcio Jehova atuonetie. (Atũm. 20:24) Ũndũ ũcio nĩ ũkwarĩrĩrio makĩria gĩcunjĩ-inĩ kĩrĩa kĩrũmĩrĩire.