1, 2. (a) Hokolola eyele laJesus lomulumenhu oo a li e na oshikunino shomiviinyu. (b) Ongahelipi ehokololo olo la yelifa oukwatya wokuyandja nowonghenda?

EFIKU limwe ongula inene, omushamane umwe e na oshikokola shomiviinyu okwa li a ya konhele yomalandifilo a ka konge ovalumenhu ve mu longele moshikunino shaye. Ovalumenhu ovo a mona ko ova dimina ondjabi oyo va udafana ndele tava ka longa. Ashike natango mwene woshikunino ka li a wanifa ovanailonga, nomolwaasho a kala ta shuna konhele yomalandifilo a konge ovanailonga va wedwa po. Okwa li a udafana navo ondjabi i li pauyuki nokuli nonaavo a kuta komatango. Eshi kwa toka, omushamane okwa li a ongela ovanailonga vaye e va pe eendjabi davo, ndele okwa li e va pa eendjabi di fike pamwe, kashi na neembudi kutya ova longa eevili dihapu ile imwe aike. Eshi ovanailonga ovo va longa efiku alishe ve shi mona, ova ngongota. Mwene woshikunino okwe va nyamukula ta ti: ‘Hamba inatu udafana ondjabi oyo handi mu futu? Hamba onda kelelwa okulongifa oinima yange ngaashi ame mwene nda hala? Ile eisho loye olii shaashi aame omuwa?’ — Mat. 20:1-15. 

 ² Eyele laJesus otali tu dimbulukifa oukwatya umwe womomaukwatya aJehova oo wa popiwa lwoikando mOmbiibeli, “efilonghenda” laye. (Lesha 2 Ovakorinto 6:1.) Ovanailonga ovo va longa ovili imwe kava li va wana okupewa ondjabi yefiku alishe, ashike mwene woshikunino okwe va fila onghenda. Shi na sha noutumbulilo “Efilonghenda” olo la tolokwa mEembiibeli dihapu “ouwanghenda,” omuhongwanhu umwe okwa shanga ta ti: “Paulelalela outumbulilo oo otau ulike koshinima we shi pewa oshali ile omaano, oshinima sha pewa omunhu ina wana ngeno oku shi pewa ile ine shi longela sha.”

3, 4. Omolwashike nongahelipi Jehova a ulikila ovanhu aveshe efilonghenda?

³ Omishangwa oda popya kombinga ‘yoshalinghenda yaKalunga.’ (Ef. 3:7) Omolwashike nongahelipi Jehova a ulika ‘oshalinghenda’ ya tya ngaho? Ngeno otwa li hatu wanifa po oiteelelwa yaJehova aishe, ngeno efilonghenda laye otwa fa twe li longela. Ashike otwa dopa okuwanifa po oiteelelwa yaye aishe. Nomolwaasho ohamba Salomo ya shanga tai ti: “Kombada yedu kape na nande omunhu omuyuki, ou ha ningi ngeno ouwa auke, ndee ita nyono.” (Omuud. 7:20) Omuyapostoli Paulus naye okwa ti: “Aveshe ova nyona, novehe noshinge shaKalunga.” Okwa ti vali: “Ondjabi youlunde oyo efyo.” (Rom. 3:23; 6:23a) Osho osho twe lilongela.

⁴ Jehova okwa ulikila ovanhu ohole yaye eshi e va fila onghenda kuhe na vali. Okwa li a tuma oshali yaye ya shiya ko, “Omona waye Ewifa” kombada yedu opo e tu file. (Joh. 3:16) Onghee hano, Paulus okwa li a popya shi na sha naJesus a ti kutya okwa “dikwa oshinge nefimano omolwouyahame wokufya, opo a lole efyo ponhele yaaveshe okefilonghenda laKalunga.” (Heb. 2:9) Osha yela kutya “oshalinghenda yaKalunga oyo omwenyo waalushe muKristus Jesus, Omwene wetu.” — Rom. 6:23b.

5, 6. Oidjemo ilipi tai etifwa kokupangelwa (a) koulunde? (b) kefilonghenda laKalunga?

⁵ Ovanhu ova fyuulula ngahelipi oulunde oo hau etifa efyo movanhu aveshe? Ombiibeli oya popya shi na sha naAdam ya ti: “Okokutauluka kwomunhu umwe efyo la pangelele omolwaau umwe.” (Rom. 5:12, 14, 17) Ashike osho shiwa oshosho kutya ohatu dulu okuhoolola tuha pangelwe vali koulunde. Ngeenge otwa kala tu na eitavelo mekuliloyambo laKristus, ohatu efa tu pangelwe kefilonghenda laJehova. Ngahelipi mbela? Ombiibeli oya ti: “Apa omatimba a ninga mahapu, ouyadi wefilonghenda tau monika. Opo ngaashi oulunde wa pangela mefyo, osho yo efilonghenda tali pangele omolwouyuki li ete omwenyo waalushe molwaJesus Kristus, Omwene wetu.” — Rom. 5:20, 21.

⁶ Nonande otu li ovalunde, katu na okuliefa tu pangelwe koulunde monghalamwenyo yetu. Ngeenge otwa nyono, otu na okupula Jehova e tu dimine po. Ashike Paulus okwa londwela Ovakriste a ti: “Oulunde [inau] mu [pangela] shaashi kamu li koshi yomhango, ndelenee okoshi yefilonghenda.” (Rom. 6:14) Onghee hano, ohatu pangelwa kefilonghenda. Oidjemo ilipi mbela hatu ka mona? Paulus okwa yelifa a ti: “Efilonghenda laKalunga . . . tali tu tekula, fye tu efe okudina Kalunga nouhalu wopaunyuni, fye tu kale tu neendunge nouyuki nokuhola Kalunga fimbo tu li mounyuni ou wopaife.” — Tit. 2:11, 12.

7, 8. Osha hala okutya ngahelipi eshi taku ti Jehova oha ulike efilonghenda laye meenghedi ‘dihapu’? (Tala efano pehovelo loshitukulwa.)

⁷ Omuyapostoli Petrus okwa shanga a ti: “Yakulafaneni keshe tuu noshalinghenda e i pewa ngaashi omalenga mawa efilonghenda lopahapu yaKalunga.” (1 Pet. 4:10) Mbela osho osha hala okutya shike? Osha hala okutya, eyeleko keshe tashi dulika li tu hange monghalamwenyo, Jehova ote ke tu kwafela tu li lididimikile. (1 Pet. 1:6) Jehova ote ke tu kwafela alushe omolwefilonghenda laye kashi na nee mbudi kutya otwa hangwa keyeleko la tya ngahelipi.

⁸ Osha yela kutya efilonghenda laJehova ohe li ulike meenghedi di lili noku lili. Omuyapostoli Johannes okwa shanga ta ti: “Nomouyadi waye ofyeni atusheni twa tambula mo, efilonghenda la wedelwa kefilonghenda.” (Joh. 1:16) Jehova oha ulike efilonghenda laye meenghedi di lili noku lili, naasho ohashi tu etele omanangekonoupuna mahapu. Amwe omomanangekonoupuna oo oelipi?

9. Ongahelipi hatu mono ouwa mefilonghenda laJehova, nongahelipi hatu dulu okuulika olupandu letu?

⁹ Okudiminwa po omatimba etu. Molwaashi Jehova oku na efilonghenda, ohe tu dimine po omatimba etu ngeenge otwe livele ombedi nokutwikila okukondjifa eamo letu loulunde. (Lesha 1 Johannes 1:8, 9.) Onghenda yaKalunga oi na oku tu ningifa tu kale tu na olupandu noku tu linyengifa tu mu tange. Paulus okwa shangela Ovakriste vakwao ovavaekwa shi na sha naJehova a ti: “Ou e tu xupifa mo mepangelo lomulaulu nokwe tu tembulila mouhamba wOmona waye omuholike. Muye otu nekulilo nekufilo lomatimba omohonde yaye.” (Kol. 1:13, 14) Okudiminwa po omatimba etu ohaku tu yeululile omhito yokumona omanangekonoupuna mahapu.

10. Oshike hatu hafele omolwefilonghenda laKalunga?

¹⁰ Okukala nombili naKalunga. Otwa dalwa ovatondi vaKalunga omolwoulunde. Paulus naye okwa li a didilika oshinima osho eshi a ti: “Fimbo twa li ovatondi vaKalunga [otwa] kwatakanifwa naye molwefyo lOmona waye.” (Rom. 5:10) Okuhanganifwa naKalunga kwa tya ngaho okwe tu kwafela tu kale nombili naye. Paulus okwa kwatakanifa oufembanghenda oo nefilonghenda laJehova, eshi a ti: “Eshi twa yukipalifwa keitavelo, otu nombili naKalunga molwOmwene wetu Jesus Kristus, molwaau twa mona yo meitavelo omhito yokufikila mefilonghenda eli omo hatu kala.” (Rom. 5:1, 2) Osho kashi fi tuu enangeko noupuna!

11. Ongahelipi ovavaekwa va kwafela “eedi dimwe” di ninge diyuki?

¹¹ Ohatu dulu okukala ovayuki koshipala shaKalunga. Atusheni okudja kedalo, katu fi ovayuki. Ashike omuprofeti Daniel okwa xunganeka kutya pefimbo lexulilo, “ovanaendunge,” ovo ve li oshixupe shovavaekwa, otava “twala vahapu kouyuki.” (Lesha Daniel 12:3.) Omolwoilonga yavo yokuudifa noyokuhonga, ova kwafela [“eedi dimwe, NW”] omamiliyona di ninge diyuki koshipala shaJehova. (Joh. 10:16) Ashike osho osha ningifwa tashi shiiva kefilonghenda laKalunga alike. Paulus okwa ti: “Otava yukipalifwa oshali okefilonghenda laye omolwekulilo eli lomuJesus Kristus.” — Rom. 3:23, 24.

12. Eilikano ola pambafana ngahelipi nefilonghenda laKalunga?

¹² Okuya koshipangelapundi shaKalunga okupitila meilikano. Omolwefilonghenda  laye, Jehova okwe tu nangeka noupuna eshi e tu pitika tu ye koshipangelapundi shaye okupitila meilikano. Paulus okwa ifana oshipangelapundi shaJehova ‘olukalwa lefilonghenda’ note tu shivi tu ye ko “tu neyombamo.” (Heb. 4:16a) Jehova okwe tu pa oufembanghenda oo okupitila momona waye, nomolwomona oo otu “na ouladi nomhito pamwe nelineekelo okeitavelo okufika kuKalunga.” (Ef. 3:12) Okukala tu na emanguluko lokupopya naJehova meilikano oshi li efilonghenda laye.

13. Ongahelipi efilonghenda laJehova tali tu kwafele “pefimbo liwa” ile tu tye tali wapalele?

¹³ Okumona ekwafo pefimbo la wapala. Paulus okwe tu ladipika tu ye kuJehova okupitila meilikano, “tu talwe nonghenda fye tu mone efilonghenda loku tu kwafa pefimbo liwa.” (Heb. 4:16b) Pefimbo keshe tu li moupyakadi ile tu na oshisho monghalamwenyo yetu, ohatu dulu okwiindila Jehova e tu kwafele omolwefilonghenda laye. Nonande inatu wana, oha nyamukula omailikano etu unene tu okupitila mOvakriste vakwetu, opo tu dule “okutya nelineekelo: Omwene Oye omukwafi wange, ame ihandi tila; omunhu ota dulu okuninga nge shike?” — Heb. 13:6.

14. Ongahelipi efilonghenda laJehova tali etele omitima detu ouwa?

¹⁴ Okumona ehekeleko lokomitima detu. Enangekonoupuna linene olo hatu mono omolwefilonghenda laJehova olo ehekeleko lomutima wa teyauka. (Eps. 51:19) Paulus okwa shangela Ovakriste vomuTessalonika ovo va li momapataneko, a ti: “NOmwene wetu Jesus Kristus Oye mwene naKalunga Tate yetu ou a kala e tu hole nokwe tu pa monghenda ehekeleko laalushe neteelelo liwa, Oye na hekeleke omitima deni, Ye ne mu pameke.” (2 Tes. 2:16, 17) Itashi hekeleke tuu okukala tu shii kutya Jehova ohe tu file oshisho pahole omolwefilonghenda laye!

15. Eteelelo lilipi tu na omolwefilonghenda laKalunga?

 ¹⁵ Okukala neteelelo lomwenyo waalushe. Ngeno otwa li ovalunde inava kulilwa ngeno ka tu na eteelelo lasha. (Lesha Epsalme 49:8, 9.) Ashike Jehova okwe tu pa eteelelo liwa. Jesus okwa udanekela ovashikuli vaye a ti: “Osheshi ehalo laTate oleli: Keshe tuu ou ta mono Omona ndele te mu itavele, oye e nomwenyo waalushe.” (Joh. 6:40) Oshoshili kutya eteelelo lomwenyo waalushe olo oshali, efilonghenda lopahole laKalunga. Paulus oo a li a pandula oushili oo okwa ti: “Efilonghenda laKalunga ola holoka li etele ovanhu aveshe exupifo.” — Tit. 2:11.

16. Ongahelipi Ovakriste vopefimbo lonale va li va kwata okahetengi efilonghenda laKalunga?

¹⁶ Nonande efilonghenda laJehova ohali tu etele omanangekonoupuna mahapu, inatu diladila nande kutya oha hokwa elihumbato keshe. Mokati kOvakriste vonale, omwa li vamwe ovo va li va kwata okahetengi ‘efilonghenda laKalunga tave li pilike pailonga yavo youhalu.’ (Jud. 4) Ovakriste ovo vehe fi ovadiinini ova li hava diladila kutya otava dulu okunyona, ndele tava pula Jehova e va dimine po. Shinyikifa oluhodi, ova li va kendabala okunwefa mo ovamwaxe ve va waimine meenghedi davo dii. Nokunena, keshe oo ta ningi ngaho ota ‘sheke Omhepo yefilonghenda.’ — Heb. 10:29.

17. Omayele a kwata moiti elipi Petrus a yandja?

¹⁷ Kunena, Satana okwa pukifa Ovakriste vamwe va diladile kutya otava dulu ashike okunyona, ndele itava handukilwa. Nonande Jehova okwa hala okudimina po ovo tave livele ombedi, okwa teelela tu kondjife eamo letu loulunde. Okwa nwefa mo Petrus a shange ta ti: “Hano nye ovaholike, eshi mwe shi shiiva fimbo inashi uya, kaleni mwa londoka, mu ha twalwaatwalwe komapukifo eembwada, nye mu ha we mo mekanghameno leni la pama. Kaleni nokukula mefilonghenda nomokushiiva Omwene Omukulili wetu Jesus Kristus” — 2 Pet. 3:17, 18.

18. Omolwefilonghenda laJehova, oinakuwanifwa ilipi tu na?

¹⁸ Molwaashi Jehova ohe tu file onghenda, otu na oshikolo kuye nosho yo kovanhu vakwetu shokulongifa okudula kwetu mokufimaneka Jehova nosho yo okukwafela ovanhu vakwetu va mone ouwa. Omeenghedi dilipi mbela? Paulus okwa nyamukula ta ti: “Ndele otu na eeshalinghenda di lili na di lili pafilonghenda olo twe li pewa: . . . ngenge e na oshilongayakulo, ne shi diinine; ou ta longo ovanhu, na kale omudiinini mokulonga; ngenge omukumaidi, na kumaide; . . . ou ta longo eyakulo longhenda, na yakule nehafo.” (Rom. 12:6-8) Efilonghenda olo Jehova e tu ulikila ole tu ningifa tu kale tu na oshinakuwanifwa shokukala twe lipyakidila moukalele wopaKriste, tu honge vamwe Ombiibeli, tu twe Ovakriste vakwetu omukumo nosho yo okudimina po keshe umwe oo tashi dulika e tu udifa nai.

19. Oshinakuwanifwa shilipi tu na tashi ka kundafanwa moshitukulwa tashi landula?

¹⁹ Molwaashi otwa ulikilwa ohole kuKalunga, otu na okulinyengifwa tu ninge ngaashi hatu dulu tu “hepaulule evangeli longhenda yaKalunga.” (Oil. 20:24) Oshinakuwanifwa osho otashi ka kundafanwa moule moshitukulwa tashi landula.