1, 2. (a) Lumbununenu chishimo atele Yesu chamuka-kulima wande wamivinyo. (b) Mujimbu kana wasolola ngachilihi muchima wakuhana nalikoji lyalinene?

MUKA-KULIMA wande wamivinyo ayile mumukwakwa nachimene nakutondatonda vatu vakumukafwa kulima. Omu avawanyine, avalwezele fweto mwavahana, kaha vayile nakuzata. Ayile cheka nakutonda vakwavo, kaha avalwezelenga fweto mwavahana nakuvalweza vazate. Kuheta nachingoloshi avakungulwile vosena mangana avahane fweto yavo. Vosena avahanyine fweto yoyimwe numba vaputukile kuzata chimene, numba musana, numba chingoloshi. Vaze vaputukile kuzata nachimene vayayavalile chikuma. Uze mwenyawande avakumbulwile ngwenyi: ‘Ngwetu mwetavilanga fweto eyi ngunamihane? Ami nguli nangolo jakuhana vaka-kuzata vyeshovyo ngunasake. Uno munakwivwa lwiso mwomwo yamuchima wami walikoji tahi?’—Mateu 20:1-15, kwinyikila chamwishi.

² Chishimo kanechi atele Yesu chatwanukisa “likoji lyalinene” lyaYehova lize vavuluka muMbimbiliya. ^[1] (Tangenu Wavaka-Kolinde 2, 6:1.) Vaka-kuzata vaze kavazachile jiola  jajivuluko kavatelele kuvahana fweto kanako, oloze mwenyawande avasolwelele likoji hakuvahana fweto kana. Lizu “likoji lyalinene” mujiMbimbiliya jimwe valyalumuna ngwavo “keke.” Mutu umwe alinangula chikuma asonekele ngwenyi: “Lizu kana lyalumbununa wana wakanyombo uze mwatambula mutu.”

3, 4. Mwomwo ika Yehova asolwela vatu likoji lyenyi lyalinene? Mujila muka alingilamo ngocho?

³ Visoneka vyahanjika ‘vyawana wakanyombo walikoji lyalinene lyaKalunga.’ (Efwe. 3:7) Mwomwo ika Yehova atuhanyina “wana wakanyombo”? Mujila muka alingilamo ngocho? Nge tweji kukavangizanga vyuma vyosena asaka Yehova, kaha chatutela kutusolwela likoji. Oloze katwalinga ngochoko. Shikaho Mwangana wamangana Solomone asonekele ngwenyi: “Kakweshi mutu wakwoloka hano hamavu uze eji kulinganga lika vyamwaza chakuzeneka kulinga shiliko.” (Kwambu. 7:20) Kaposetolo Paulu nayikiye asonekele ngwenyi: “Vosena vanalingi shili, kaha vanahono kuheta haseteko yaupahu waKalunga,” kaha nawa ngwenyi, “fweto yashili kufwa.” (Loma 3:23; 6:23a) Echi chikiko chatutela.

⁴ Oloze Yehova asolwelele vatu zangi yenyi mujila yakulipwila halikoji lyenyi lyalinene. Wana waunene atuhana shina “Mwanenyi umwe kaha wakulipwila” uze atumine hamavu mangana atufwile. (Yowa. 3:16) Shikaho Paulu asonekele hali Yesu ngwenyi, “vanamuvwiki jino muchama waupahu nakavumbi hakuhita muluyando lwakutwala kukufwa, mangana akahase kufwila vatu vosena halikoji lyalinene lyaKalunga.” (Hepe. 2:9) Enga, “wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.”—Loma 6:23b.

5, 6. Vyuma muka vinahase kufumamo nge navatuyula (a) kushili? (b) kulikoji lyalinene lyaKalunga?

⁵ Uno twaswana ngachilihi shili yize yinatande nakujiha vatu? Mbimbiliya yamba ngwayo: “Kuvilinga vyakuhenga vyayauze mutu umwe [Alama], kufwa chayulile nge mwangana” kuvana vaAlama. (Loma 5:12, 14, 17) Oloze twatokwa chikuma hakuwana nge tunahase jino kukana kutuyula kushili. Kuhichila muwana wandando yaKulishitu, tweji kwitavila likoji lyalinene lyaYehova lituyule. Mujila muka? Mbimbiliya ngwayo: “Kuze yavulilile shili kukiko kwavulilile chikuma nalikoji lyalinene nawa. Mwomwo yaka? Mangana nge muze shili yayulile nge mwangana mukufwa, mukiko nawa nalikoji lyalinene munaliyula nge mwangana kuhichila mukwoloka chakutwala kukuyoya chahaya myaka yosena muli Mwata wetu Yesu Kulishitu.”—Loma 5:20, 21.

⁶ Numba tuhu katwakupukako, oloze katwatela kwitavila shili yitufungululeko. Nge tunavulumuna shili, kaha tunahase kulomba Yehova atukonekele. Paulu ahuhumwine vaka-Kulishitu ngwenyi: “Shili kayatela kupwa nangolo hali enuko, hakuwana nge enu kamweshi mujishimbiko, oloze muli mulikoji lyalinene.” (Loma 6:14) Shikaho likoji lyaYehova lyalinene lyeji kututwaminyinanga. Kaha twanganyala ngachilihi? Paulu alumbunwine ngwenyi: “Likoji lyalinene lyaKalunga . . . lyeji kutunangulanga tukane vilinga vyakuhona kumwivwa Kalunga woma, namuchima wakufwila vyuma vyahakaye, oloze tupwenga tuvaka-kushinganyeka mwamangana, vakwoloka, vakwechi muchima wakuzachila Kalunga mukatwamino kamyaka yino.”—Chitu. 2:11, 12.

7, 8. Uno likoji lyaYehova lyalinene alisolola ngachilihi “mujijila jakulisezaseza”? (Talenu mivwimbimbi yakulivanga.)

⁷ Kaposetolo Petulu asonekele ngwenyi: “Kweseka nomu natambula mutu himutu wana, uzachisenu hakuzachila vakwenu hakupwa mutuselwa vamwenemwene vaze vasolwela likoji lyalinene lyaKalunga lize asolola mujijila jakulisezaseza.” (Petu. 1, 4:10) Uno mazu kana alumbununa ika? Alumbununa nge kala ukalu natumona mukuyoya Yehova nahase kutuhana ngolo jakumika. (Petu. 1, 1:6) Mwatusolwela likoji lyenyi lyakutukafwa mukala cheseko.

⁸ Yehova eji kutusolwelanga likoji lyenyi lyalinene mujijila jakulisezaseza. Kaposetolo Yowano asonekele ngwenyi: “Hakuwana nge azalilila nalikoji lyalinene, ngocho tuvosena twatambwileko likoji kaneli lyalinene.” (Yowa. 1:16) Omu Yehova eji kutusolwelanga likoji lyenyi mujijila jakulisezaseza, tweji kunganyala mwamunene. Uno tweji kunganyalanga ngachilihi?

9. Uno tweji kunganyalanga ngachilihi kulikoji lyaKalunga lyalinene, kaha tweji kusololanga ngachilihi kusakwilila chetu?

⁹ Veji kutukonekela jishili. Yehova eji kutukonekelanga jishili jetu mwomwo yalikoji lyenyi lyalinene, chikalu kaha tunapihilila nakwalumuka nakulihenda kushili. (Tangenu WaYowano 1, 1:8, 9.) Hakumona omu Kalunga atusolwela keke chatela kutulingisa tumwalise. Paulu asonekelele vakwavo vaka-Kulishitu vawavisa ngwenyi: “[Yehova] atupululwile kuwata wamilima nakutunungulwila muwangana waMwanenyi uze azanga, kaha muli ikiye mukiko vatusokola nandando yakusokola, chikiko kutukonekela jishili jetu.” (Kolo. 1:13, 14) Kutukonekela jishili jetu chatunehela vyuma vyamwenemwene.

10. Vyuma muka twanganyala halikoji lyalinene lyaKalunga?

¹⁰ Tweji kupwanga nausoko wamwaza naKalunga. Twasemukile nashili, ngocho twapwile nakole naKalunga. Paulu atachikijile chumechi, kaha asonekele ngwenyi: “Omu twapwilenga tuvaka-kole vatuwanyishile naKalunga kuhichila mukufwa chaMwanenyi.” (Loma 5:10) Echi chatulingishile tupwenga mukuunda naYehova. Paulu avulukile echi kuwanyisa ngwenyi hilikoji lyalinene lyaYehova, kaha asonekele ngwenyi: “Hakuwana nge [etu vandumbu jaKulishitu vawavisa] vanatuvulukila lyehi kwoloka mwomwo yalufwelelo, tutwamenunga mukuunda naKalunga kuhichila muli Mwata wetu Yesu Kulishitu, muli ikiye mukiko vene tunahashila kwingila mulikoji lyalinene eli tulimo jino hakupwa nalufwelelo.” (Loma 5:1, 2) Chikupu vene, echi hikutokwa chachinene.

11. Vawavisa veji kuneha ngachilihi “mikoko veka” mukwoloka?

¹¹ Vatulingisa tupwenga vakwoloka. Vatu vosena kavakupukako. Oloze kapolofweto Ndanyele ahanjikile chimweza ngwenyi, hamakumbi akukuminyina “vaze vanangakana” vawavisa, navakalingisa ‘vatu vavavulu vakapwe vaka-kwoloka.’ (Tangenu Ndanyele 12:3.) Kuhichila mukwambulula nakunangula vatu, vanakafwe mayongomena ‘amikoko veka’ mangana vapwenga vakwoloka kuli Yehova. (Yowa. 10:16) Vyosenevi vinatesamo mwomwo yalikoji lyalinene lyaYehova. Paulu alumbunwine ngwenyi: “Kwoloka chize vali nakuvavulukila chinapu chawana wakanyombo halikoji [lyaKalunga] lyalinene kuhichila mukuvasokola nandando yakusokola yaKulishitu Yesu.”—Loma 3:23, 24.

12. Uno kulomba chapwa ngachilihi likoji lyaKalunga lyalinene?

 ¹² Kupandama kulitanda lyaKalunga kuhichila mukulomba. Likoji lyaYehova lyalinene lyeji kutukafwa tupandame kulitanda lyenyi kuhichila mukulomba. Paulu avulukile vyalitanda lyaYehova ngwenyi, “litanda lyaKalunga lyalikoji lyalinene,” kaha atulweza tupandameko “nakuhanjikanga nakukasunuka.” (Hepe. 4:16a) Yehova atwitavisa kuhichila muli Mwanenyi, “kaha muli ikiye mukiko vene tuli nakuhanjikila nakukasunuka, nakupandama kuli Kalunga nakumika hakumufwelela.” (Efwe. 3:12) Yehova asolola likoji lyenyi lyalinene hakutwitavisa tulombe kuli ikiye mukukasunuka.

13. Likoji lyaYehova lyalinene linahase kutukafwa ngachilihi “halwola lwakutamo”?

¹³ Kutukafwa halwola lwamwaza. Paulu atukolezeza tulombe Yehova namuchima wakukasunuka, “mangana vatutetele nakutusolwela likoji lyalinene lyakutukafwa halwola lwakutamo.” (Hepe. 4:16b) Kala lwola natupwa muukalu, tunahase kulomba nakulyonyinga kuli Yehova mangana atukafwe. Eji kukumbululanga kulomba chetu kuhichila muli vandumbwetu mangana tuhase “kumika chikuma nakwamba ngwetu: ‘Yehova ikiye muka-kungukafwa, kangweshi kwivwa womako. Mutu mwangulinga ikaze?’”—Hepe. 13:6.

14. Tweji kunganyalanga ngachilihi kulikoji lyaYehova lyalinene?

¹⁴ Kutuvendejeka tuunde muchima. Nge tunahombo, Yehova eji kutuvendejekanga kuhichila mulikoji lyenyi lyalinene. (Samu 51:17) Paulu asonekelele vaka-Kulishitu vamuTesolonyika vaze vapwile muluyando ngwenyi: “Mwata wetu Yesu Kulishitu naKalunga Setu ou atuzangile nakutuhana kuvendejeka chahaya myaka yosena nalutalililo lwamwaza kuhichila mulikoji lyalinene, vavendejeke michima yenu nakumijikijisa.” (Teso. 2, 2:16, 17) Ocho kuwaha kana tweji kwivwanga hakutachikiza ngwetu Yehova atuzanga mwomwo yalikoji lyenyi.

15. Lutalililo muka twatwama nalwo mwomwo yalikoji lyaKalunga lyalinene?

 ¹⁵ Kutalilila kukayoya haya myaka yosena. Hakupwa tuvaka-shili katwapwile nalutalililoko. (Tangenu Samu 49:7, 8.) Oloze Yehova atufwelelesa kuyoya chamwaza kulutwe. Yesu ashikile vaka-kumukavangiza ngwenyi: “Omu mukiko vene mwaya muchima waTata, ngwenyi weshowo mwamona Mwana nakumufwelela, atela kupwa nakuyoya chahaya myaka yosena.” (Yowa. 6:40) Enga, kuyoya chahaya myaka yosena chapwa wana wakulipwila atuhana Kalunga hakutusolwela likoji lyenyi lyalinene. Paulu asakwililile ou wana hakwamba ngwenyi: “Likoji lyalinene lyaKalunga vanalisolola lyehi, kaha linanehe ulwilo kuli vatu vosena.”—Chitu. 2:11.

16. Vaka-Kulishitu vamwe kunyima valelesele ngachilihi likoji lyaKalunga lyalinene?

¹⁶ Nge natusaka kutwalaho lika kunganyala kulikoji lyaYehova lyalinene, twatela kupwa navilinga vyamwaza. Vaka-Kulishitu vamwe vakunyima vamwene “likoji lyalinene lyaKalunga . . . kupwa kanyinyilo kakulingilamo vilinga vyakuzunguma.” (Yuta 4) Ava vaka-Kulishitu vashinganyekele ngwavo vanahase kulinga tuhu shili kaha Yehova mwavakonekela. Kaha nawa vapwile nakukunyula vakwavo vazane muvilinga vyavipi vize valingilenga. Namakumbi ano, weshowo mwalinga vyuma vyavipi mwasulakanyisa “shipilitu yalikoji lyalinene.”—Hepe. 10:29.

17. Mazu muka akuhuhumuna ahanjikile Petulu?

¹⁷ Makumbi ano, Satana anakulingisa vaka-Kulishitu vamwe vashinganyeke ngwavo Kalunga nahase kuvevwila keke numba tuhu navalinga vyavipi. Yehova eji kukonekelanga vaze vanapihilila nakwalumuka, oloze asaka tufwile kulihenda kuvilinga vyavipi. Alwezele Petulu asoneke ngwenyi: “Enu ngwazanga, enu hakutachikiza chimweza vyumevi, lilamenunga kuchina namuhungumuka navilinga vyakuhenga vyavatu vaupapwoki, nakulitwamina kuzama. Oloze zovolokenunga lika mulikoji lyalinene namuchinyingi chakutachikiza Mwata wetu, Mulwilo Yesu Kulishitu.”—Petu. 2, 3:17, 18.

18. Mulimo muka twatwama nawo hakuwana nge Yehova atusolwela likoji lyalinene?

¹⁸ Hakuwana nge tweji kunganyala kulikoji lyaYehova lyalinene, ngocho twatwama namulimo wakulwezako vakwetu vyalikoji lyenyi mangana navakiko vanganyale. Mujila muka? Paulu akumbulwile ngwenyi: “Hakuwana nge tuli namawana akulisezaseza kweseka nalikoji lyalinene lize vatusolwelele, . . . kachi nge unapu mulimo, kaha tuzatenu lika mulimo kana. Uze eji kunangulanga, anangulenga lika, uze eji kukolezezanga, akolezezenga lika, . . . uze eji kutetelanga, atetelenga lika namuchima wakuwahilila.” (Loma 12:6-8) Likoji lyalinene lize atusolwela Yehova lyatulingisa tuzate mulimo wakwambulula natwima nakunangula vatu Mbimbiliya, nakukolezeza vakwetu vaka-Kulishitu nakulikonekela umwe namukwavo.

19. Mulimo muka twatwama nawo uze natushimutwila muchihande chinakavangizaho?

¹⁹ Hakuwana nge twasakwilila likoji lyaYehova lyalinene, ngocho twatela kukilikita mangana tuhane “kanawa unjiho wamujimbu wamwaza walikoji lyalinene lyaKalunga.” (Vili. 20:24) Muchihande chinakavangizaho natushimutwila kanawa mulimo kanou.