1, 2. (a) Ha udje i Jesu kpahen ọghwẹrẹ na phia. (b) Me yẹ udje na o djephia kpahen uruemru ghwologhwolo ọrhẹ ẹghẹlẹ ọphẹ?

ỌGHWẸRẸ owu no riẹ eyi igidi urhiọke ya guọlọ ihworho ri na wian uvuẹn ikebi ọnẹyen. Ihworho rọ mẹrẹnren i kwerhọ osa rọ tare taghene ọnọ kwa harẹn aye, aye ni tuẹn owian rhọ. Ọghwẹrẹ na ọ ji guọlọ ihworho erọrọ, omarana, nọ ghwẹrioma riẹ eyi na ya guọlọ ihworho erọrọ, nọ tare taghene ọnọ ji kwa uchiunu igho owu harẹn aye, tobọ te eri rhe kerhumu. Owuọwọn o te, no koko aye ephian, nọ kwosa harẹn aye, nọ ha uchiunu igho owu harẹn aye ephian, te eri kiki rhe ọrhẹ eri rhe kerhumu. Ihworho ri kiki rhe a mẹrẹn ọnana vwrurhe, aye ne brenu. Ọghwẹrẹ na nọ tare: ‘Orhiẹ uchiunu igho mi tare, yẹ are kwerhọ? Me vwo omẹgbanhon mi na yẹ ihworho ri wian mẹ uchiunu igho mi guọlọre? Are a rioma fọkiẹ uruemru ghwologhwolo mẹ?’—Matt. 20:1-15, ftn.

² Udje i Jesu nọ karorhọ ọwan kpahen owu usuẹn iruemru i Jehova ra hunute ọgbọ buebun uvuẹn i Baibol na, ro rhiẹ ‘ẹghẹlẹ ọphẹ’ ọnẹyen. ^[1] (Se 2 Corinthians 6:1.) Ihworho ri wian owian unọke owu ọvo na, manẹ a vwa yẹ aye osa ọvuọnvu-ọn, ọrẹn, ọghwẹrẹ na o dje uruemru esiri phia.  Sekpahen ẹmro na ‘ẹghẹlẹ ọphẹ,’ ọgba irherhe owu nọ yare: “Ẹmro na o mevirhọ emru ọphẹ yanghene ẹghẹlẹ re vwe fiẹrorhọ bi, ẹghẹlẹ ra vwa wian rhọ yanghene oborẹ ohworho o vwo mwuovwan ye.”

3, 4. Marhẹ ọrhẹ mesoriẹ i Jehova o dje ẹghẹlẹ ọphẹ rẹn ituakpọ ephian?

³ Baibol na ọ tẹmro kpahen ‘ẹghẹlẹ ọphẹ Osolobrugwẹ.’ (Eph. 3:7) Marhẹ ọrhẹ mesoriẹ i Jehova o tiobọnu ‘ẹghẹlẹ ọphẹ’ ọnana? Ọwan i rha nya mwu oborẹ Osolobrugwẹ ọ guọlọre gbagba, ọwan ne mwuovwan ẹghẹlẹ ye. Ọrẹn, ọwan ephian a gba-a. Omarana, Orodje Solomon ro vwo ẹghwanren, nọ tare: ‘O vwo onyakpọ owuorowu ro ru oborẹ orhomurun ọke ephian, ro vwo ru ọdanda-an.’ (Eccl. 7:20) Ọnyikọ Paul nọ jeghwai ta: ‘Ọwan ephian iruedandan, orho jẹ ọwan nyerẹn mwu odidi Osolobrugwẹ-ẹ,’ habaye ‘osa ọdandan ọ kwa yẹ uhwu.’ (Rom. 3:23; 6:23a) Ọrana yẹ osa ra kwa harẹn ọwan.

⁴ Ọrẹn, Jehova o dje ẹguọlọ ọnẹyen phia rẹn ituakpọ ri vwe mwuovwan nyoma ọ tiobọnu ẹghẹlẹ ọphẹ harẹn ọwan. Ẹghẹlẹ rọ maido, ọrẹ ọye o tiobọnu ‘ọmọyen owu ọvo’ no mo hwu fọkiẹ ọwan. (John 3:16) Omarana, Paul nọ ya kpahen i Jesu taghene ‘vwarana, e ku erhu odidi ọrhẹ ọghọ rhọ ye ne, nime, ọ rioja uhwu neneyo nyoma ẹghẹlẹ ọphẹ Osolobrugwẹ nọ sabu hwu rẹn ihworho ephian.’ (Heb. 2:9) Omaran, ‘ẹghẹlẹ Osolobrugwẹ o tiobọnẹ, yẹ arhọ ri bẹmẹdẹ nyoma i Kristi Jesu Ọrovwori ọwan.’—Rom. 6:23b.

5, 6. Mẹ yo nẹ erhumie sa, orhianẹ (a) ọdandan yo sun ọwan? (b) ẹghẹlẹ ọphe yo sun ọwan?

⁵ Marhẹ yẹ ituakpọ i ru ha uhwu ọrhẹ ọdandan riuku? Baibol na ọ tare taghene, nyoma orusọ ohworho owu [Adam], uhwu no suẹn emọ Adam ephian jerẹ orodje. (Rom. 5:12, 14, 17) Ọrẹ omamerhomẹ, ọwan ina sabu djẹ taghene a guọlọ nẹ ọdandan o sun ọwan ghwomara-an. Ọwan i rhe dje esegburhomẹmro kpahen izobo i Kristi, ọwan ne fioma rhẹ obotọre usuon ọrẹ ẹghẹlẹ ọphẹ Osolobrugwẹ. Marhẹ ye ru ọnana lele? ‘Ọdandan orho bun, ẹghẹlẹ ọphẹ nọ jeghwai buẹnrhọ. Me yo nẹ erhumie rhe? Jerẹ oborẹ uhwu ọrhẹ ọdandan i sunrun jerẹ orodje, omaran ẹghẹlẹ ọphẹ ono ji sun jerẹ orodje nyoma ọvwata ro suẹn riẹ arhọ ri bẹmẹdẹ nyoma Jesu Kristi.’—Rom. 5:20, 21.

⁶ Dedevwo, ọwan eruedandan, o fo na lẹrhẹ ọdandan o sun akpenyerẹn ọwa-an. Orhianẹ ọwan i ru ọdandan, ọwan ina rẹ i Jehova nọ harhomu ọwan. Paul nọ ha erhetio rẹn Ilele Kristi: ‘Are we jenẹ ọdandan o sun are-e, nime, orhiẹ urhi yo suẹn are-e, ọrẹn, ẹghẹlẹ ọphẹ.’ (Rom. 6:14) Omarana, ọwan ne fioma rhẹ obotọre usuon ọrẹ ẹghẹlẹ ọphẹ na. Me yo nẹ erhumie rhe? Paul no djerie fiotọre: ‘Ẹghẹlẹ ọphẹ ọrẹ Osolobrugwẹ . . . o yono ọwan na tiẹn iruemru ri vwe rhiẹ ọrẹ ọ ga Osolobrugwẹ ọrhẹ ojemẹ akpọ na, na jeghwai nyerẹn rhẹ osasame ẹhẹn, uruemru ọvwata ọrhẹ uruemru ọ ga Osolobrugwẹ uvuẹn enyerakpọ ọnana.’—Titus 2:11, 12.

7, 8. Me yo mevirhọ ra ta taghene i Jehova o dje ẹghẹlẹ ọphẹ ye phia izede sansan? (Mẹrẹn ifoto rọ ha uvuẹn ọtonrhọ uyono na.)

⁷ Ọnyikọ Peter ọrhọ ya: ‘Jerẹ oborẹ a yẹrẹ are owuowọnwan ẹghẹlẹ na, are gba ha ye gbodibo harẹn owuowuọwan, jerẹ  omamọ idibo ọrẹ ẹghẹlẹ ọphẹ Osolobrugwẹ re djephia izede sansan.’ (1 Pet. 4:10) Me yẹ ọnana o mevirhọ? O mevirhọ taghene o toro ọdamuni ra dẹrughwaroghwu uvuẹn akpenyerẹn ọwa-an, Jehova ọnọ sa ọwan erhumu fi aye kparobọ. (1 Pet. 1:6) Ọwan ina ha ọke ephian mẹrẹn ẹghẹlẹ ọphẹ Osolobrugwẹ rọ nọ sa ọwan erhumu fi aruo ọdamuni ephian kparobọ.

⁸ Itiọrurhomẹmro, Jehova o dje ẹghẹlẹ ọphẹ ye phia izede sansan. Ọnyikọ John ọrhọ ya: ‘Nyoma ẹghẹlẹ ọphẹ ọnẹyen, ọwan i mẹrẹn ebrurhọ buebun.’ (John 1:16) Izede sansan ri Jehova o dje ẹghẹlẹ ọphẹ ye phia ọ lẹrhẹ ọwan mẹrẹn ebrurhọ buebun. Me yẹ ezẹko usuẹn aye?

9. Marhẹ yẹ ọwan e ru mẹrẹn erere nẹ ẹghẹlẹ ọphẹ i Jehova, marhẹ ọwan ine ru sabu dje ọdaremẹro phia?

⁹ Ra ha edandan rhomu ọwan. Fọkiẹ ẹghẹlẹ ọphẹ i Jehova, ọwan i rha ghwẹriẹ jeghwai damoma tiobọnu edandan, na ha edandan ọwan rhomu ọwan. (Se 1 John 1:8, 9.) O fori nẹ arodọmẹ Osolobrugwẹ o mwu ọwan dje ọdaremẹro phia jeghwai ha odidi riẹn. Ọke rọ ya vwe eri ne lele i Jesu sun, Paul nọ tare: ‘[Jehova] o simi ọwan nẹ omẹgbanhon ọrẹ okuku na, jeghwai fi ọwan rhẹ uvie ọrẹ ọmọyen ro vwo ẹguọlọ kpahen, nyoma yen ọwan na sabu vabọ fọkiẹ otan na, ẹharhomu ọdandan ọwan.’ (Col. 1:13, 14) Ra ha ọdandan rhomu ọwan no rhie izede firhọ ra na mẹrẹn ebrurhọ buebun.

10. Me yẹ ọwan i vwori fọkiẹ ẹghẹlẹ ọphẹ Osolobrugwẹ?

¹⁰ Re vwo omamọ onyerẹnkugbe rhẹ Osolobrugwẹ. Nime e vwiẹ rẹ ọwan rhẹ ọdandan, ọwan ni rhiẹ evwreghrẹn Osolobrugwẹ. Paul nọ tare: ‘Ọke rẹ ọwan e rhiẹ evwreghrẹn yen, Osolobrugwẹ no lele ọwan kwaphiẹrhọ nyoma uhwu ọmọyen.’ (Rom. 5:10) Ẹkwaphiẹrhọ ọnana nọ lẹrhẹ ọwan sabu vwo omamọ onyerẹnkugbe rhẹ i Jehova. Paul nọ ha uphẹn ọnana dje ẹghẹlẹ ọphẹ Osolobrugwẹ phia, ọke rọ ta: ‘Vwarana, e se ọwan [eri ne lele i Jesu sun] evwata nyoma esegburhomẹmro ne na, jenẹ ọwan vwo ufuoma rhẹ Osolobrugwẹ nyoma Ọrovwori ọwan Jesu Kristi, nyoma yen ọwan i vwo uphẹn ra na nyoma esegburhomẹmro vwo ẹghẹlẹ ọphẹ ọnana, rẹ ọwan i mevi na.’ (Rom. 5:1, 2) Ọrana ghini ebrurhọ ọduado!

11. Marhẹ ihworho ri ne lele i Jesu sun na, e ru lẹrhẹ ‘igegede ereva’ na rhiẹ evwata?

¹¹ E ru ọwan rhiẹ evwata. Ọwan ephian ihworho ri vwe rhiẹ evwata. Ọrẹn, ọmẹraro Daniel ọ tare taghene ọke oba na, ‘ihworho ri vwo oniso,’ ihworho ri hẹrhẹre usuẹn eri ne lele i Jesu sun, ina ‘lẹrhẹ ihworho buebun rhiẹ evwata.’ (Se Daniel 12:3.) Nyoma owian aghwoghwo na, aye i lẹrhẹ buebun ‘igegede ereva’ rhiẹ evwata obaro i Jehova. (John 10:16) Ọrẹn, a sabu ru enana ephian nyoma ẹghẹlẹ ọphẹ i Jehova. Paul nọ tare: ‘Fọkiẹ ẹghẹlẹ ọphẹ [Osolobrugwẹ] yẹ aye e rhiẹ evwata, nyoma izobo otan i Kristi Jesu ọ kware na.’—Rom. 3:23, 24.

12. Marhẹ ẹrhomo o ru surhobọ mwu ẹghẹlẹ ọphẹ Osolobrugwẹ?

¹² Ra sabu nẹrhomo vwe Osolobrugwẹ. Fọkiẹ ẹghẹlẹ ọphẹ i Jehova ọwan na sabu nẹrhomo vwe yi. Itiọrurhomẹmro, Paul o se aga usun i Jehova ‘aga usun ẹghẹlẹ ọphẹ,’ nọ jeghwai ta rẹn ọwan ne riẹ avwaye rhẹ ‘ugbomọphẹ ra na tẹmro.’ (Heb. 4:16a) Jehova ọ yẹrẹ ọwan uphẹn ọnana nyoma ọmọyen, ‘nyoma yen ọwan i vwo ugbomọphẹ ra na tẹmro rhẹ imwẹro fọkiẹ esegburhomẹmro re vwo kpahiẹn.’ (Eph. 3:12) Uphẹn ra na nẹrhomo vwe i Jehova ghini izede ro dje ẹghẹlẹ ọphẹ ọnẹyen phia.

13. Marhẹ ẹghẹlẹ ọphẹ i Jehova o ru ‘sa ọwan erhumu ọke ra guọliẹ’?

 ¹³ Ra mẹrẹn userhumu ọke ra guọliẹ. Paul ọ ha urhebro rẹn ọwan na nẹrhomo vwe i Jehova, ‘neneyo ọwan i sabu mẹrẹn arodọmẹ ọrhẹ ẹghẹlẹ ọphẹ, nọ sa ọwan erhumu ọke ra guọliẹ.’ (Heb. 4:16b) Ọwan i rha dẹrughwaroghwu erhirhiẹ ọdamuni, ọwan ina sabu nẹrhomo vwe i Jehova nọ sa ọwan erhumu. Dedevwo, ọwan e mwuovwan ye-en, ọ kpahanrhọ harẹn ọwan, ọgbọ buebun nyoma imizu re ha uvuẹn ukoko na, “neneyo ọwan i sabu fiudugbere ta: ‘Jehova yọ sa mẹ erhumu, mi vwa zofẹ-ẹn. Me yẹ onyakpọ ọnọ sabu ru mẹ?’”—Heb. 13:6.

14. Marhẹ ẹghẹlẹ ọphẹ i Jehova o ru rhua erere harẹn ọmudu ọwan?

¹⁴ Ra mẹrẹn urhebro harẹn ọmudu ọwan. Urhebro harẹn ọmudu ọwan ro seriotọre, ebrurhọ ọduado ro tẹ ọwan obọ fọkie ẹghẹlẹ ọphẹ i Jehova. (Ps. 51:17) Ọke ra kparehaso Ilele Kristi re ha uvuẹn Thessalonica, Paul nọ yare: ‘Jenẹ Ọrovwori ọwan Jesu Kristi ọrhẹ Osolobrugwẹ ro rhiẹ Ọsẹ ọwan, ro vwo ẹguọlọ kpahen ọwan, rọ jeghwai yẹ ọwan urhebro i bẹmẹdẹ ọrhẹ obọdẹn ifiẹrorhọ nyoma ẹghẹlẹ ọphẹ ye, ha urhebro rẹn ọmudu are jeghwai ru are gbanhon.’ (2 Thess. 2:16, 17) Marhẹ yo rhiẹ emru urhebro te, re rhe taghene i Jehova ọ hẹrote ọwan rhẹ ẹguọlọ fọkiẹ ẹghẹlẹ ọphẹ ọnẹyen!

15. Ifiẹrorhọ ọgo yẹ ọwan i vwori fọkiẹ ẹghẹlẹ ọphẹ Osolobrugwẹ?

¹⁵ Re vwo ifiẹrorhọ ọrẹ arhọ ri bẹmẹdẹ. Ọwan ri rhiẹ eruedandan e vwo ifiẹrorhọ bi-i. (Se Psalm 49:7, 8.) Ọrẹn, Jehova nọ yẹrẹ ọwan obọdẹn ifiẹrorhọ. Jesu no ve harẹn idibo yi: ‘Ọnana yẹ ọhọre Ọsẹ mẹ, taghene kohworho kohworho rọ mẹrẹn Ọmọ na vwrurhe jeghwai dje esegburhomẹmro kpahiẹn nẹ ono vwo arhọ ri bẹmẹdẹ.’ (John 6:40) Itiọrurhomẹmro, ifiẹrorhọ ọrẹ arhọ ri bẹmẹdẹ na, omamọ izede Osolobrugwẹ o dje ẹghẹlẹ ọphẹ ye phia. Paul, ro vwo ọdaremẹro kpahen ọnana nọ tare: ‘Ẹghẹlẹ ọphẹ Osolobrugwẹ  ọ homaphia, nọ ha usimi rẹn aruo ihworho ephian.’—Titus 2:11.

16. Marhẹ Ilele Kristi erukaro ezẹko a ha ẹghẹlẹ ọphẹ Osolobrugwẹ kpahen obọ ru ọdandan?

¹⁶ Dedevwo, ẹghẹlẹ ọphẹ Osolobrugwẹ ọ ha ebrurhọ buebun rẹn ọwan, ọrẹn, ọwan i vwe roro taghene Osolobrugwẹ nọ ha ogbigbiruo-o. Ezẹko usuẹn Ilele Kristi erukaro, na ‘ha ẹghẹlẹ ọphẹ Osolobrugwẹ . . . kpahen obọ ru ọdandan.’ (Jude 4) Ilele Kristi enana ri vwa fuevwan na, ne roro taghene aye ina sabu rhe ru ọdandan jeghwai hẹroso i Jehova nọ harhomu aye. Ọrọ mai biomu, aye a damoma riẹriẹ imizu erọrọ uvuẹn ukoko na homaba aye uvuẹn erharhere iruemru aye. Omaran ọ ji havwọ inyenana, kohworho kohworho ro ru omaran ‘ọ lẹrhẹ ẹhẹn ẹghẹlẹ ọphẹ na tuekwẹre.’—Heb. 10:29.

17. Urhebro ọgbogbanhon ọgo yi Peter ọ haphia?

¹⁷ Inyenana, Echu o phiẹ Ilele Kristi buebun rhọ nẹ aye i roro taghene aye ina sabu ru edandan fọkiẹ arodọmẹ Osolobrugwẹ, ọrẹn, o vwo oborẹ ọnọ phia harẹn aye. Dedevwo, Jehova o vwo omwemẹ rọ nọ harhomu eruedandan ri ghwẹriẹre, ọ jeghwai guọlọ nẹ ọwan i wọnrọn haso irueru edandan. Jehova ọ ha ẹhẹn ọfuanfon mwu ọnyikọ Peter ya: ‘Eri mi vwo ẹguọlọ kpahen, rẹ are e vwo irherhe ọnana ne na, are gba sẹrorẹ oma are neneyo e je rhe suẹn are vru, nyoma orusọ ihworho ri vwe vwo urhi na, nẹ are je rhe se ne emevigbanhon are. Ọrẹn, are i gba rha dua uvuẹn ẹghẹlẹ ọphẹ ọrhẹ irherhe ọrẹ Ọrovwori ọrhẹ Osimi ọwan Jesu Kristi.’—2 Pet. 3:17, 18.

18. Ewian ego yẹ ọwan i vwori fọkiẹ ẹghẹlẹ ọphẹ i Jehova?

¹⁸ Rẹ ọwan e rhiẹ ihworho re dje ọdaremẹro phia fọkiẹ ẹghẹlẹ ọphẹ i Jehova na, no fori na ha ẹghẹlẹ ọwan ha ọghọ rẹn Osolobrugwẹ jeghwai ha userhumu rẹn ereva ọwan. Izede ego? Paul nọ kpahenrhọ: ‘Ra mẹriẹn taghene ọwan i vwo ẹghẹlẹ sansan fọkiẹ ẹghẹlẹ ọphẹ ra yẹrẹ ọwan na . . . orhianẹ ọrẹ aghwogho, jenẹ ọwan fioma rhẹ aghwoghwo na, yanghene ohworho ro yono; jenẹ o fioma rhẹ e yono ọnẹyen; gbinẹ ohworho rọ ha urhebro phia; jenẹ ọ ha urhebro phia; . . . ohworho ro dje arodọmẹ phia, jenẹ o ruie ghwologhwolo.’ (Rom. 12:6-8) Ẹghẹlẹ ọphẹ ri Jehova o tiobọnu harẹn ọwan, nọ lẹrhẹ ọwan fioma rhẹ owian aghwoghwo uvie na, ne yono awọrọ i Baibol na, ha urhebro rẹn imizu ri ha uvuẹn ukoko na, jeghwai harhomu ihworho ri ruru ọwan sọ.

19. Owian ọgo ya na ta kpahen uvuẹn uyono ọrẹ ọ sa na?

¹⁹ Ọwan e rhiẹ ihworho re dje ọdaremẹro phia fọkiẹ ẹguọlọ Osolobrugwẹ na, o fori no mwu ọwan damoma ‘se oseri ro fiotọre kpahen iyẹnrẹn esiri ọrẹ ẹghẹlẹ ọphẹ Osolobrugwẹ.’ (Acts 20:24) Ana tẹmro kpahen owian ọnana uvuẹn uyono rọ ha kpahen ọnana.