1, 2. 1) Uvas huertayoj runamanta parlariy. 2) Uvas huertayoj runamanta rijch’anachina, ¿imatá yachachiwanchej Diospa khuyakuyninmanta, k’acha yanapayninmanta ima?

UJ RUNA uvas huertayoj karqa. Uj diataj tutamanta huertanpaj llojserqa mercado plazaman peonesta maskʼaj. Peoneswantaj parlarqa mashkhatachus pagananta, peonestaj llankʼayta munarqanku. Peonesta astawan necesitaspataj ujtawan maskʼaj llojserqa. Chay diataj uvas huertayojqa kutin kutita peonesta maskʼaj llojserqa. Tukuyninkuwantaj parlarqa mashkhatachus pagananmanta. Wakin peonesqa diantinta llankʼarqanku, wakintaj uj horallata. Jinapis huertayojqa tukuyninman kikinta pagaporqa. Diantinta llankʼajkunaqa huertayojpaj mayta rimarqanku. Huertayojtajrí paykunata yuyaricherqa mashkhatachus pagananta parlasqankumanta. Nillarqataj qolqenwanqa munasqanta ruwayta atisqanta. Chantá nerqa: “Kʼacha kajtiychu, sajra ñawiwan qhawashawanki[chej]?”, nispa (Mat. 20:1-15).

² Jesusqa uvas huertayoj runamanta parlarqa, Diospa qhasilla k’acha yanapayninmanta uj sumaj imata yachachinawanchejpaj (2 Corintios 6:1 leey). Wakin runasqa ichá yuyankuman diantinta llank’aj peonesman astawan pagakunan kasqanta, pisi  horasllata llankʼajkunamanta nisqaqa. Jinapis uvas huertayoj runaqa khuyakorqa pisi horasllata llank’ajkunamanta. Uj yachayniyoj runa “Diospa qhasilla kʼacha yanapaynin[man]ta” parlaspa, jinata nerqa: “Diospa qhasilla kʼacha yanapaynin uj regalo jina. Chay regalotataj qowanchej mana japʼinanchejpaj jinachu kajtinchejpis”, nispa.

3, 4. 1) ¿Imaraykutaj Jehová qhasilla kʼacha yanapayninta tukuy runasman rikucherqa? 2) ¿Imaynatá chayta ruwarqa?

³ Bibliaqa Diospa k’acha yanapaynin uj regalo kasqanta nin (Efe. 3:7). Jehovata mana tukuy imapipunichu kasukuyta atisqanchejrayku, mana khuyakunawanchejpaj jinachu kanchej. Astawanpis wañuchisqas kananchejpaj jina kanchej. Rey Salomón nerqa: “Kay pachapeqa mana uj runallapis cheqan runaqa kanchu, mana jaykʼaj juchallikuspa cheqantapuni ruwaj”, nispa (Ecl. 7:20). Apóstol Pablopis nerqa: “Tukuy runas juchallikusqankurayku, paykunaqa Diospa jatun kaynimpa kʼanchayninta mana taripayta atinkuchu”, “juchaj pagonqa wañuymin”, nispa (Rom. 3:23; 6:23a).

⁴ Jehovaqa tukuy runasta mayta munakuwanchej. Chayrayku kʼata Wawanta noqanchejrayku wañunanpaj kachamorqa. Chayta ruwasqantaj “qhasilla kʼacha yanapayninta” rikuchin (Juan 3:16). Pabloqa Jesús ñakʼarispa wañusqanrayku jatun kaywan pilluchisqaña, jatunpaj qhawasqataj kasqanta ima nerqa, ajinamantataj “Diospa qhasilla kʼacha yanapayninnejta tukuy runasrayku wañ[orqa]” (Heb. 2:9). Arí, “Diospa regalonrí wiñay kausay Cristo Jesús Señorninchejpi” (Rom. 6:23b).

5, 6. 1) Juchaj atiyninpi kasqanchejrayku, ¿imataj kan? 2) Diospa qhasilla kʼacha yanapayninpi kajtinchej, ¿imataj kanqa?

⁵ ¿Imaraykú juchallikunchej, wañunchej ima? Biblia nin: “Uj runaj juchanraykulla wañuy atiyniyoj karqa”, nispa. Arí, tukuyninchej Adanmanta jamusqanchejrayku juchallikunchej, wañunchej ima (Rom. 5:12, 14, 17). Jinapis mana saqenanchejchu tiyan jucha munayninta noqanchejpi ruwananta. Chaypajqa, Jesucristoj wañuyninpi creenanchej tiyan. Ajinamantataj Diospa k’acha yanapayninwan yanapachikunchej. Biblia nin: “Jucha astawan ashkhayajtinrí, Diospa qhasilla kʼacha yanapaynin astawanrajpuni ashkhayarqa. Imaynatachus jucha atiyniyoj karqa runasta wañuyman [pusananpaj], ajinallatataj Diospa qhasilla kʼacha yanapaynenqa atiyniyoj pusanampaj Diospa cheqan kayninnejta wiñay kausayman pusanawanchejpaj Señorninchej Jesucristonejta”, nispa (Rom. 5:20, 21).

⁶ Juchasapasllapuni kaspapis, mana saqenanchejchu tiyan jucha noqanchejpi munayninta ruwananta. Chayrayku juchallikuspa Jehovamanta perdonanawanchejta mañakunchej. Pablo nerqa: “Juchataqa amaña saqeychejchu qankunapi munayninta ruwajta, imaraykuchus manaña leypa kamachiynimpichu kankichej, astawanqa Diospa qhasilla kʼacha yanapaynimpi kankichej”, nispa (Rom. 6:14). Diospa qhasilla kʼacha yanapayninpi kasunchej chayqa, ¿imastataj japʼisunchej? Pablo nerqa: “Diospa qhasilla kʼacha yanapaynin [...] yachachiwanchej mana cheqan kajman jina kawsaytaqa qhesachananchejta, kay pachaj sajra munapayaynintapis. Yachachillawanchejtaj kay tiempopi kawsananchejta aychanchejpa munayninta atipaspa, cheqanta ruwaspa, Diosta manchachikuspataj”, nispa (Tito 2:11, 12).

7, 8. ¿Ima niyta munan Jehová imaymana kʼacha yanapayninta rikuchiwasqanchej? (21 paginapi dibujota qhawariy).

⁷ Apóstol Pedro qhelqarqa: “Sapa ujniykichejman  Diosqa ruwanapaj uj atiyta qosorqachej, qankunataj chaywan ujkunata sirviychej. Sumaj mayordomos jina Diospa imaymana kʼacha yanapayninwan wajkunata yanapaychej”, nispa (1 Ped. 4:10). ¿Ima niyta munan chay? Ima chʼampaypi kajtinchejpis, Jehová chay chʼampayta aguantanapaj imatachus necesitasqanchejta qowasqanchejta (1 Ped. 1:6). Arí, payqa sapa chʼampayta atipanapaj imatachus necesitasqanchejta qowanchej.

⁸ Rikunchej jina Jehovaqa imaymana kʼacha yanapayninta rikuchiwanchej. Apóstol Juan qhelqarqa: “Paypa jatun qhapaj kʼacha kayninmanta tukuypis japʼinchej qhasilla Diospa kʼacha yanapayninta, mayqentachus kutin kutinta qowanchej, chayta”, nispa (Juan 1:16). Jehová imaymana kʼacha yanapayninta rikuchiwasqanchejrayku, ashkha bendicionesta japʼinchej. Chay bendicionesmanta wakinta qhawarinachej.

9. 1) ¿Imaynatá yanapawanchej Diospa kʼacha yanapaynin? 2) ¿Imaynatá rikuchinchej agradecesqas kasqanchejta?

⁹ Jehová juchasninchejta perdonawanchej. Jehovaqa kʼacha yanapayninrayku perdonawanchej. Jinapis tukuy sonqo pesachikojtillanchej, sajra imasta niña ruwanapaj kallpachakojtillanchej perdonawanchej (1 Juan 1:8, 9 leey). Pabloqa tiemponmanta ajllasqa cristianosman, imaynatachus Jehová perdonasqanta sutʼincharqa. Pay nerqa: “Laqhayaj atiyninmanta orqhospa, [Diosqa] munasqa Churimpa reinonman pusawarqanchej. Chay Churimpi kaspa, preciowan kacharichisqa kanchej, juchasninchejtaj pampachasqa kanku”, nispa (Col. 1:13, 14). Jehovata jatunchayta munanchej, kʼacha yanapayninmanta may agradecesqas kashasqanchejrayku. Juchasninchejta perdonawasqanchejraykutaj, ashkha bendicionesta japʼiyta atinchej.

10. ¿Ima bendicionestataj japʼinchej Diospa kʼacha yanapayninrayku?

¹⁰ Mayta kusikusunman Dioswan allinpi kaspa, amigosnin kaspa ima. Juchasapas kanchej, chayrayku nacekusqanchejmantapacha Diospa enemigosnin kanchej. Chaywanpis Pablo nerqa: “Diospa contrampi kashasparaj, noqanchejqa Churimpa wañuyninnejta Dioswan allinyachisqa karqanchej”, nispa (Rom. 5:10). Jesús kausayninta qosqanrayku, Dioswan allinyakuyta atinchej. Chayrayku Dioswan allinpi, amigosnin ima kayta atinchej. Pablo chaymanta sutʼincharqa, imaynatachus Jehovaj kʼacha yanapayninwan ujchasqas kasqanta, ajllasqa cristianosman kayta nispa: “Creesqanchejnejta cheqan runapaj qhawasqa kaspa, Dioswan allinyachisqa kanchej Señorninchej Jesucristonejta. Paynejta yaykunchej Dioswan allimpi kausayman creesqanchejrayku, chaypitaj sinchʼita sayaspa” (Rom. 5:1, 2). Mayta agradecekunchej, Jehovawan allinpi kasqanchejmanta, amigosnin kasqanchejmanta ima.

11. ¿Imaynatá ajllasqa cristianos waj ovejasmanta kajkunata yanapanku?

¹¹ Diospa ñaupaqenpi cheqan runaspaj qhawasqa kayta atinchej. Profeta Danielqa kay qhepa pʼunchaypi ajllasqa cristianos “ashkha runasman cheqa kajta” yachachinankuta nerqa (Daniel 12:3 leey). Ajllasqa cristianosqa predicaspa, Jesuspa may chhika waj ovejasninmanta kajkunaman yachachispa ima, paykunata yanapanku Diospa ñaupaqenpi cheqan runaspaj qhawasqa kanankupaj (Juan 10:16). Tukuy chayta ruwakun Diospa kʼacha yanapayninraykulla. Pablo nerqa: “Diospa qhasilla kʼacha yanapayninrayku runasqa cheqan runaspaj qhawasqa kanku, Cristo Jesusnejta juchamanta kacharichisqa kasqankurayku”, nispa (Rom. 3:23, 24).

12. ¿Imapitaj Diospa kʼacha yanapaynin, mañakuywan kikinchakun?

 ¹² Diosman mañakuynejta qayllaykuyta atinchej. Diospa kʼacha yanapayninrayku, paymanta mañakuyta atinchej. Pabloqa “Diospa kamachina tiyanan NM” ‘qhasilla kʼacha yanapaynin’ kasqanta nerqa, Jehovataj payman ‘mana manchachikuspa qayllaykunanchejta’ munan (Heb. 4:16a). Jesusnejta ima ratollapis Jehovamanta mañakuyta atinchej. Chaytaj may sumaj. Pablo nerqa: “Creeynejta Diosman qayllaykuyta atinchej tukuy sonqo, mana manchachikuspa”, nispa (Efe. 3:12).

13. ¿Imaynatá Diospa kʼacha yanapaynin maychus tiemponpi yanapawanchej?

¹³ Necesitashajtinchejpuni yanapawasun. Pabloqa yanapata necesitashajtinchej Diosmanta mañakunata yuyaychawarqanchej, Diospa “khuyakuyninta, qhasilla kʼacha yanapayninta[...]” maychus tiemponpi tarinanchejpaj (Heb. 4:16b). Chʼampaykunapi rikukuspa, Jehovaj yanapayninta mañakuyta atinchej. Mañakuyninchejta mana uyarinawanchej kajtinpis, payqa uyariwanchej. Congregacionmanta hermanosnejtataj astawan yanapawanchej. Mañakuykunasninchejta uyariwasqanchejraykutaj, “tukuy sonqo niyta atinchej: Señorqa yanapawajniy, manataj manchachikusajchu. Imanawanqataj runa kasqari?”, nispa (Heb. 13:6).

14. Jehovaj kʼacha yanapayninrayku, ¿imatataj tarillanchejtaj?

¹⁴ Sonqochawanchej. Jehovaqa kʼacha yanapayninrayku llakisqa kashajtinchej sonqochawanchej (Sal. 51:17). Tesalonicamanta cristianos qhatiykachasqas kashajtinku, Pablo paykunaman nerqa: “Kikin Señorninchej Jesucristo, Dios Tatanchej ima munakuwarqanchej, qhasilla kʼacha yanapayninraykutaj wiñay sonqochayninwan kallpachawarqanchej, allin kaj suyakuytapis qollawarqanchejtaj. Payqa sonqosniykichejta oqharichun, kallpachachuntaj”, nispa (2 Tes. 2:16, 17). Jehová kʼacha munakuyninrayku munakuwasqanchejta, noqanchejmanta llakikusqanta ima yachayqa, mayta sonqochawanchej.

15. Jehovaj kʼacha yanapayninrayku, ¿ima suyakuyniyojtaj kayta atinchej?

 ¹⁵ Wiñay kausayta suyakuyta atinchej. Juchasapas kasqanchejrayku, Jehová mana yanapawasunmanchu chayqa, ni ima suyakuyniyoj kasunman (Salmo 49:7-9 leey). Jinapis Jehovaqa uj sumaj suyakuyta qowanchej. Jesús nerqa: “Tataypa munaynenqa kay: Pillapis Churita rikuspa paypi creejqa wiñay kawsayniyoj kanqa”, nispa (Juan 6:40). Chayrayku Diospa kʼacha yanapayninraykulla wiñaypaj kausakuyta atinchej. Pablo nerqa: “Diospa qhasilla kʼacha yanapaynin rikuchikun, runas chayta mana japʼinankupaj jina kashajtinku, paykuna salvasqa kanankupaj”, nispa (Tito 2:11).

16. Diospa kʼacha yanapayninta, ¿imaynatá wakin cristianos tijrarqanku?

¹⁶ Rikunchej jina, Jehovaj kʼacha yanapayninrayku ashkha bendicionesta japʼinchej. Chaywanpis Diospa yanapayninta mana tijranachu, munasqanchejman jina millayta kausanapaj. Ñaupa cristianospa tiemponkupi, wakenqa Diospa kʼacha yanapayninta tijrayta munarqanku munasqankuman jina millayta kausanankupaj (Jud. 4). Jehovata wasanchaj cristianosqa, yuyaj kanku juchallikojtinku Jehová perdonanallanta. Wajkunatapis paykuna jina juchallikunankupaj tanqayta munarqanku. Pillapis kunan chayta ruwajqa, “Diospa qhasilla kʼacha yanapayninta qoj Espiritumanta[...] alqochakun” (Heb. 10:29).

17. ¿Imatataj Pedro yuyaycharqa?

¹⁷ Kunanpis Satanasqa wakin cristianosta yuyachin juchallikuyta atisqallankuta, Jehová perdonanallanta ima. Jehovaqa juchankumanta tukuy sonqo pesachikojkunata perdonananpaj wakichisqa kashan. Jinapis sajra munayninchejwan mana atipachikunapaj kallpachakunata munan. Chayrayku munarqa apóstol Pedro kay yuyaychayta qhelqananta: “Munasqa hermanosníy, chay imasta ñawpajmanta yachaspaña, allinta qhawakuychej. Pajtá chay sajrata ruwajkunawan pantayman apachikuwajchej, ajinamantataj sinchʼi sayasqa kayniykichejmanta urmawajchej. Astawampis wiñaychej Diospa qhasilla kʼacha yanapaynimpi, jinallataj Salvawajninchej Señor Jesucristota rejsiypiwan”, nispa (2 Ped. 3:17, 18).

18. Jehová kʼacha yanapayninta qowasqanchejrayku, ¿imastá ruwananchej tiyan?

¹⁸ Jehová Diospa kʼacha yanapayninmanta agradecesqas kashanchej chayqa, imastachus qowanchej chaykunawan Jehovata jatunchana, wajkunatapis yanapana. ¿Imaynatataj chayta ruwasunman? Pablo nerqa: “Sapa ujman ruwanapaj uj atiyta qhasilla kʼacha yanapayninman jina qowarqanchej [...] sichus pimampis yachachinapaj atiyta qon chayqa, yachachichun. Sichus pimampis sonqota pataman oqharinapaj atiyta qon chayqa, chayta ruwachun. [...] Sichus pimampis khuyanapaj atiyta qon chayqa, kusiywan khuyachun”, nispa (Rom. 12:6-8). ¿Ima ninayantaj chay? Jehová kʼacha yanapayninta qowasqanchejrayku, runasman willamunapaj, Bibliamanta yachachimunapaj, hermanosta kallpachanapaj, perdonanapaj ima kallpachakunanchej tiyan.

19. ¿Imatataj qhepan yachaqanapi yachakusunchej?

¹⁹ Jehová kʼacha yanapayninrayku ashkha bendicionesta qowanchej, chayrayku “Diospa qhasilla kʼacha yanapaynin evangeliomanta” willamunapaj kallpachakunanchej tiyan (Hech. 20:24). Qhepan yachaqanapitaj chaymanta astawan yachakusunchej.