1, 2. (a) Faamatala le talafaatusa a Iesu i le tagata e ana le togāvine. (e) Ua faapefea ona faaalia i le talafaatusa ia uiga limafoaʻi ma le agalelei faifua?

I SE tasi taeaopō, na usu ai se tagata e iai sona togāvine i le maketi e suʻe mai ni tamāloloa e galulue i lona togāvine. Sa malilie tamāloloa na ia mauaina i le totogi na ia ofo atu ma galulue ai loa. Peitaʻi, na ia manaʻomia nisi ʻaufaigaluega, o lea na ia toe alu ai i le maketi e suʻe mai nisi tagata faigaluega. Na ia ofo atu se totogi lelei iā i latou uma e oo foʻi i ē na ia faafaigaluegaina i se taimi mulimuli ane i le aoauli. Ina ua oo i le afiafi, ona ia faapotopoto lea o tagata faigaluega ma avatu i ai o latou totogi. E tutusa uma o latou totogi e tusa lava pe na faigaluega mo le tele o itula pe na o le tasi foʻi le itula. Ina ua faalogo i ai i latou na faafaigaluega muamua, ona latou faitio lea. Na faapea atu le tagata e ana le togāvine: ʻPe ta te leʻi malilie faatasi ea i le totogi na ou ofoina atu? Pe e faasā ona ou pule i le mea e fai i aʻu lava mea? Po ua e lotoleaga ea ina ua ou agalelei?’—Mata. 20:1-15.

² Ua faamanatu mai iā i tatou i le talafaatusa a Iesu se tasi o uiga o Ieova e masani ona taʻua i le Tusi Paia, o le “agalelei  faifua.” ^[1] (Faitau le 2 Korinito 6:1.) O tagata faigaluega sa galulue mo na o le itula, sa lē tatau ona latou mauaina le totogi atoa. Ae sa matuā agalelei iā i latou le tagata e ana le togāvine. E tusa ai ma le upu mo le “agalelei faifua” lea ua faaliliuina i le “alofa tunoa” i le tele o faaliliuga o le Tusi Paia, na tusi se tagata faitofā: “O le manatu autū o lenei upu, o le foaʻiina atu lea o se meaalofa po o se mea i se tasi e lē tatau i ai.”

3, 4. Aiseā ma ua faapefea ona faaalia e Ieova le agalelei faifua i tagata uma?

³ O loo taʻua i le Tusi Paia le “mea [foaʻifua] e tusa ma le agalelei faifua o le Atua.” (Efe. 3:7) Aiseā ma ua faapefea ona saunia e Ieova lenei “mea” foaʻifua? Pe ana faapea e tatou te ausia i taimi uma tapulaa uma a Ieova, ua alagatatau la ona tatou maua lona agalelei. Peitaʻi, e lē taulau ona tatou faia faapea. O lea, na tusi ai le tupu poto o Solomona: “Auā e leai se tagata e amiotonu i le lalolagi e na te faia pea le mea lelei ma e lē agasala.” (Fai. 7:20) Na tusi foʻi le aposetolo o Paulo: “Ua agasala tagata uma lava, ma ua lē ausia le mamalu o le Atua,” ma “o le totogi o le agasala o le oti lea.” (Roma 3:23; 6:23a) Ua talafeagai ona tatou maua lenā iʻuga.

⁴ Peitaʻi, ua faaalia e Ieova lona alofa i tagata agasala i se auala lē mafaatusalia o lona agalelei faifua. O lana meaalofa silisili o “lona Atalii e toʻatasi,” na auina mai i le lalolagi e maliu mo i tatou. (Ioa. 3:16) O lea na tusi ai Paulo e faatatau iā Iesu, “na faapaleina i le mamalu ma le viiga ona o le tigā o le oti, ma ona o le agalelei faifua o le Atua, na oo ai le oti iā te ia ona o tagata uma.” (Epe. 2:9) E moni, “o le meaalofa a le Atua o le ola e faavavau lea, e ala iā Keriso Iesu lo tatou Alii.”—Roma 6:23e.

5, 6. O ā iʻuga pe a pulea i tatou e le (a) agasala? (e) agalelei faifua?

⁵ Na faapefea ona tuufaasolo mai i tagata uma le tulaga agasala ma le oti? Ua faamatala mai i le Tusi Paia: “Ua pule le oti e pei o se tupu” i fanau uma a Atamu “ona o le agasala a le tagata e toʻatasi [Atamu].” (Roma 5:12, 14, 17) Ae o se mea e fiafia ai, e mafai ona tatou filifili ia lē toe pulea i tatou e le agasala. O le faaalia o le faatuatua i le taulaga togiola a Keriso, ua tatou filifili ai e ola i lalo o le pule o le agalelei faifua o Ieova. E faapefea ona tupu lenā mea? “Ua silisili lava le agalelei faifua, ina ua faateleina le agasala. O le ā e iʻu i ai? E pei ona pule le agasala ma le oti o ni tupu, e faapea foʻi ona pule le agalelei faifua o se tupu, ona o le amiotonu e oo ai i le ola e faavavau, e ala iā Iesu Keriso.”—Roma 5:20, 21.

⁶ E ui ina tatou agasala pea, ae e lē faapea ai o le a pulea e le agasala o tatou olaga. Pe a tatou faia le agasala, e tatou te ōle atu iā Ieova mo le faamagaloga. Na lapataʻia e Paulo Kerisiano: “E lē tatau ona pule le agasala iā te outou, auā ua outou lē toe nonofo i le tulafono, a o le agalelei faifua.” (Roma 6:14) O lea la, ua tatou ola i lalo o le pule o le agalelei faifua. O le ā le iʻuga? Na faamatala e Paulo: ʻO le agalelei faifua o le Atua, ua faatonuina i tatou ina ia teena amioga faalēmataʻu ma tuʻinanauga o le lalolagi, ma ia ola ma le mafaufau lelei, ma le amiotonu, ma le faamaoni i le Atua i le faiga o mea a lenei lalolagi.’—Tito 2:11, 12.

7, 8. O le ā le uiga o le “faaalia i auala eseese” o le agalelei faifua o Ieova? (Tagaʻi i ata i luga aʻe o le matua.)

⁷ Na tusi le aposetolo o Peteru: “E pei ona maua e tagata taʻitoʻatasi se meaalofa, ia faaaogā e auauna ai le tasi i le isi e pei o auauna  pule lelei o le agalelei faifua o le Atua, lea ua faaalia i auala eseese.” (1 Pete. 4:10) O le ā le uiga o lenā manatu? Po o le ā lava le ituaiga o tofotofoga e tatou te fesagaʻia i le olaga, e mafai ona fesoasoani mai Ieova iā i tatou. (1 Pete. 1:6) E iai lava se faaaliga o le agalelei o le Atua, e talafeagai lelei ma tofotofoga taʻitasi.

⁸ E eseese auala e faaalia ai le agalelei faifua o Ieova. Na tusi le aposetolo o Ioane: “Ua tatou maua pea le tele o lona agalelei faifua.” (Ioa. 1:16) O faaaliga eseese o le agalelei o Ieova, ua tatou maua ai le tele o faamanuiaga. O ā nisi o na faamanuiaga?

9. E faapefea ona tatou maua aogā mai i le agalelei faifua o Ieova, ma e faapefea ona faaalia lo tatou lotofaafetai?

⁹ Faamagaloina a tatou agasala. Talu ai le agalelei faifua o Ieova, ua faamagaloina ai a tatou agasala, pe afai e tatou te salamō ma faaauau ona tauivi malosi e faatoʻilalo o tatou faanaunauga agasala. (Faitau le 1 Ioane 1:8, 9.) E tatau ona tatou lotofaafetai ona o le alofa mutimutivale o le Atua, ma uunaʻia ai i tatou e faamamaluina o ia. Na tusi Paulo i Kerisiano faauuina: “Ua ia [Ieova] laveaʻi iā i tatou mai i le pule a le pōuliuli, ma avatu i tatou i le malo o lona Alo pele, o ia foʻi ua faasaʻolotoina ai i tatou e ala i le togiola, o le faamagaloina lea o a tatou agasala.” (Kolo. 1:13, 14) O le faamagaloina o a tatou agasala, ua tatala ai le avanoa mo isi faamanuiaga matagofie.

10. O le ā ua tatou olioli ai ona o le agalelei faifua o le Atua?

¹⁰ Mauaina o se faiā filemu ma le Atua. O lo tatou tulaga agasala, na avea ai i tatou ma fili o le Atua ina ua tatou fananau mai. Ae na faailoa mai e Paulo lenei mea: “A o fai i tatou ma ona fili, na tatou toe lelei ai ma le Atua e ala i le maliu o lona Alo.” (Roma 5:10) O lenei toe faaleleiga ma le Atua ua mafai ai ona tatou maua le filemu ma ia. Na faafesootaʻi e Paulo lenei faaeaga i le agalelei faifua o le Atua: “O lenei, talu ai ua taʻuamiotonuina i tatou [uso faauuina o Keriso] ona o le faatuatua, inā tatou olioli ia i le filemu ma le Atua e ala i lo tatou Alii o Iesu Keriso, o ia foʻi ua tatou maua ai le faatuatua e ala i le agalelei faifua lea ua tatou iai.” (Roma 5:1, 2) Maʻeu se faamanuiaga!

11. Ua faapefea ona faaliliuina e le ʻaufaauuina “isi mamoe” i le amiotonu?

¹¹ Faaliliuina i le amiotonu. O i tatou uma lava e mafuli atu i le faia o le amiolētonu. Peitaʻi, na valoia e le perofeta o Tanielu, a o faagasolo le taimi o le iʻuga, “o ē ua iai le tofā mamao” po o le vaega totoe o le ʻaufaauuina, ʻe latou te faaliliu tagata e toʻatele i le amiotonu.’ (Faitau le Tanielu 12:3.) E ala i la latou galuega talaʻi ma le aʻoaʻo atu, ua latou fesoasoani i le faitau miliona o “isi mamoe” ina ia maua se tulaga amiotonu i luma o Ieova. (Ioa. 10:16) Peitaʻi, e pau le māfuaaga ua latou maua ai lea tulaga ona o le agalelei faifua o Ieova. Na faamatala e Paulo: ʻO se meaalofa foaʻifua le taʻuamiotonuina o i latou i le agalelei faifua o le Atua, ma ua faasaʻolotoina ai e ala i le togiola a Keriso Iesu.’—Roma 3:23, 24.

12. E faapefea ona fesootaʻi atu le tatalo i le agalelei faifua o le Atua?

¹² Faalatalata atu i le nofoālii o le Atua e ala i le tatalo. O le agalelei faifua o Ieova, ua ia aumaia ai le faamanuiaga o le faalatalata i lona nofoālii i le lagi e ala i le tatalo. Na taʻua e Paulo le nofoālii o Ieova, o le “nofoālii o le agalelei faifua” ma valaaulia i tatou e faalatalata i ai ma le “saʻolotoga e tautatala atu ai.” (Epe. 4:16a) Ua aumaia e Ieova iā i tatou lenei faaeaga e ala i lona Alo, “o ia foʻi ua tatou maua ai lenei saʻolotoga e tautatala atu ai, ma mafai ai foʻi ona tatou  faalatalata atu i le Atua, ona o lo tatou faatuatua iā Keriso.” (Efe. 3:12) O le saʻoloto e faalatalata atu iā Ieova e ala i le tatalo, o se faaaliga matagofie lea o lona agalelei faifua.

13. E faapefea i le agalelei faifua ona ʻfesoasoani mai iā i tatou i le taimi tatau’?

¹³ Mauaina o le fesoasoani i le taimi tatau. Na faalaeiau i tatou e Paulo ina ia saʻoloto e faalatalata atu iā Ieova i le tatalo, “ina ia tatou maua ai le alofa mutimutivale ma le agalelei faifua o le Atua e fesoasoani mai i le taimi e tatau ai.” (Epe. 4:16e) O so o se taimi lava e tatou te mafatia ai i tofotofoga ma faafitauli i le olaga, e mafai ona tatou alaga atu iā Ieova mo lana fesoasoani. E ui lava e lē tatau iā i tatou lana fesoasoani, ae e masani ona ia tali mai e ala i uso Kerisiano, ma tatou lototetele ai ma faapea atu: “O Ieova o loʻu fesoasoani ia; ou te lē fefe lava. O le ā la se mea e mafai ona faia e tagata iā te aʻu?”—Epe. 13:6.

14. Ua faapefea ona aogā i o tatou loto le agalelei faifua o Ieova?

¹⁴ Mauaina o faamāfanafanaga mo o tatou loto. O se faamanuiaga sili e tatou te maua ona o le agalelei faifua o Ieova, o le faamāfanafanaina lea o se loto ua momomo. (Sala. 51:17) Na tusi Paulo i Kerisiano i Tesalonia, o ē na feagai ma sauāga: “O lo tatou Alii o Iesu Keriso ma le Atua lo tatou Tamā, o lē e alofa iā i tatou ma foaʻi mai le faamāfanafanaga e faavavau, ma le faamoemoe matagofie e ala i le agalelei faifua, ia faamāfanafana i o outou loto ma faatumauina outou.” (2 Tesa. 2:16, 17) Maʻeu le faamāfanafanaina o i tatou i le iloaina, ua tatou maua le tausiga alofa a Ieova ona o lona agalelei tele!

15. O le ā le faamoemoe ua tatou maua ona o le agalelei faifua o le Atua?

¹⁵ Mauaina o le faamoemoe o le ola e faavavau. I le avea ai ma tagata agasala, ua leai so tatou faamoemoe. (Faitau le Salamo  49:7, 8.) Peitaʻi, ua saunia e Ieova se faamoemoe matagofie mo i tatou. Na folafola atu e Iesu i ona soo: “O le finagalo lenei o loʻu Tamā, o i latou uma e iloa le Atalii ma faatuatua iā te ia, e ao ona maua le ola e faavavau.” (Ioa. 6:40) Ioe, o le faamoemoe o le ola e faavavau o se meaalofa, ma o se faaaliga matagofie lea o le agalelei faifua o le Atua. Na talisapaia e Paulo lenā meaalofa ina ua faapea mai: “Ua faaali mai le agalelei faifua o le Atua, lea e maua ai e ituaiga uma o tagata le faaolataga.”—Tito 2:11.

16. Na faapefea ona faaaogāsesē e nisi o uluaʻi Kerisiano le agalelei faifua o le Atua?

¹⁶ E ui o le agalelei faifua o Ieova ua tatou maua ai le tele o faamanuiaga, ae e lē tatau ona manatu faamaualuga e na te taliaina so o se amioga. Na iai nisi o uluaʻi Kerisiano na taumafai e ʻliua le agalelei faifua o le Atua, ma māfuaaga e faia ai amioga matagā.’ (Iuta 4) E foliga mai na mafaufau nei Kerisiano lē faamaoni, e mafai ona latou faia le agasala ae faamagalo pea i latou e Ieova. Ae sili atu ona leaga, na latou taumafai e taaʻina o latou uso ina ia mulimuli i o latou ala leaga. E oo foʻi i aso nei, o so o se tasi ua faia lenā tulaga ua ʻfaatigā i le agaga o le agalelei faifua.’—Epe. 10:29.

17. O le ā le fautuaga malosi na aumaia e Peteru?

¹⁷ I aso nei, ua faasesēina e Satani nisi Kerisiano e manatu e mafai ona latou faia le agasala, ae e faamagaloina pea i latou e Ieova. E moni e nofosauni Ieova e faamagalo tagata agasala ua salamō, ae e na te faatalitalia i latou e matuā teena o latou faanaunauga agasala. Na ia faagaeeina Peteru e tusi: “O le mea lea, o outou le ʻaupele e, ona ua outou muaʻi iloa lenei mea, ia outou leoleo ai iā te outou ina neʻi taʻitaʻieseina outou e i latou i le sesē o tagata solitulafono, ma outou paʻuʻū ai mai i lo outou tutū maumauaʻi. Ae ia tuputupu pea i le agalelei faifua ma le poto e faatatau i lo tatou Alii ma le Faaola o Iesu Keriso.”—2 Pete. 3:17, 18.

18. O ā tiute tauave ua tatou maua ona o le agalelei faifua o Ieova?

¹⁸ O lo tatou talisapaia o le agalelei faifua o Ieova, e tatau ai ona faaaogā a tatou meaalofa e faamamaluina ai o Ia ma fesoasoani ai i isi. O mea na e tatau ona tatou faia mo Ieova ma tuaoi. I ā auala? Na tali Paulo: ʻTalu ai e eseese meaalofa ua tatou maua e tusa ma le agalelei faifua ua tuuina mai iā i tatou, po o le auaunaga, seʻi o tatou faia lenei auaunaga; po o lē e aʻoaʻo atu, ia aʻoaʻo atu o ia, po o lē e apoapoaʻi atu, ia apoapoaʻi atu o ia, o lē e alofa mutimutivale, ia faia ma le lotofiafia.’ (Roma 12:6-8) O le agalelei faifua ua faaalia e Ieova iā i tatou, ua aumaia ai le tiute tauave ina ia maelega i le faiva faa-Kerisiano, aʻoaʻo isi i le Tusi Paia, faalaeiau ai uso Kerisiano, ma faamagalo so o se tasi e faatigā mai.

19. O le ā lo tatou tiute tauave o le a iloiloina i le mataupu o loo sosoo mai?

¹⁹ O lo tatou talisapaia o le alofa o le Atua, e tatau ona uunaʻia ai i tatou e faia le mea sili e ʻmolimau māeʻaeʻa ai i le tala lelei o le agalelei faifua o le Atua.’ (Galu. 20:24) O le a iloiloina lenā tiute tauave i le mataupu o loo sosoo mai.