1, 2. (a) Chaza umfanekiso waJesu wemnikati wensimu. (b) Lendzaba ibukhombisa njani buntfu bekuphana kanye nemusa?

UMLIMI WEMAGILEBISI waya emakethe ekuseni kakhulu, ayewucasha bantfu lebebatawusebenta ensimini yakhe yemagilebisi. Wavumelana nemadvodza lawatfola ngeliholo lelitsite, ngako avele acala kusebenta. Lomlimi waphindze wadzinga letinye tisebenti, ngako wabuyela emakethe emahlandla latsite ngalelolanga kute acashe tisebenti letengetiwe, wetsembisa liholo lelikahle ngisho nakulabo labacasha emini yantsambama. Ntsambama wabita tisebenti kute atotiholela, tonkhe watinika imali yato futsi wangabuki kutsi tisebente ema-awa lamanyenti nome li-awa linye nje kuphela, wavele watinika imali lelinganako tonkhe. Batsi nabakubona loku labo labacashwe kucala, bakhonona. Umlimi wabaphendvula watsi: ‘Angitsi vele sivumelene ngekutsi ngitaniholela lokutsite? Akukafaneli yini ngente lengikufunako ngetintfo tami? Nobe ninemona ngekutsi mine ngilungile?’​—Mat. 20:1-15.

² Lomfanekiso waJesu usikhumbuta lobunye buntfu baJehova lokuvame kukhulunywa ngabo eBhayibhelini​—“umusa waNkulunkulu.” ^[1] (Fundza 2 Khorinte 6:1.) Kubonakala  shengatsi laba labasebenta li-awa linye nje kuphela bekungakafaneli batfole umholo lophelele, kodvwa lomlimi wabentela umusa lomkhulu. Mayelana neligama lelilisetjentiselwa kusho “umusa waNkulunkulu” lelivame kuhunyushwa ngekutsi “sihawu,” lomunye umfundzi weliBhayibheli wabhala watsi: “Leligama lisho kupha umuntfu sipho ngenhlitiyo yonkhe abe angakenti lutfo futsi ube ungakalindzeli kutsi lutfo kuye.”

3, 4. Jehova ubakhombise njani bantfu umusa futsi leni?

³ ImiBhalo ikhuluma ‘ngesipho semusa waNkulunkulu.’ (Ef. 3:7) Jehova usipha njani ‘lesipho’ lesi futsi ukwentelani loko? Kube besikwenta kahle konkhe loko Jehova lakulindzele kitsi, bekutawufaneleka kutsi siwutfole lomusa wakhe. Kodvwa asikhoni kwenta njalo. Kungako iNkhosi Solomoni leyayihlakaniphile yabhala: “Kute nome munye umuntfu lolungile emhlabeni lowenta lokuhle kuphela, kubete lakonako.” (Shu. 7:20) Nemphostoli Pawula naye watsi: “Bonkhe bonile, futsi abakwati kuveta inkhatimulo yaNkulunkulu,” wachubeka watsi: “Ngobe umvuzo wesono kufa.” (Rom. 3:23; 6:23a) Nako-ke lokusifanele!

⁴ Jehova ukhombise lutsandvo kubantfu labanesono ngendlela lemangalisako yemusa wakhe lomkhulu. Watfumela sipho sakhe lesikhulu kunato tonkhe, ‘iNdvodzana yakhe lekuphela kwayo,’ kute itesifela. (Joh. 3:16) Ngako, mayelana naJesu, Pawula wabhala watsi “sewetfweswe umchele wenkhatimulo neludvumo ngobe wahlupheka wadzimate wafa, kuze kutsi ngemusa waNkulunkulu afele bonkhe bantfu.” (Heb. 2:9) Yebo, “sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.”​—Rom. 6:23b.

5, 6. Imiphumela kutawuba yini nangabe sibuswa (a) sono? (b) ngumusa?

⁵ Satfolakala njani sono kanye nekufa lokuhlasele bantfu lamuhla? LiBhayibheli liyachaza: “Ngesono semuntfu munye [Adamu] kufa kwabusa njengenkhosi” esitukulwaneni sa-Adamu. (Rom. 5:12, 14, 17) Kodvwa, singakhetsa kutsi singachubeki sibuswa sono nobe kutsi sono sibenemandla kitsi. Nangabe sikhombisa kukholwa emhlatjelweni waKhristu, sisuke sikhetsa kubuswa ngumusa waJehova. Kanjani? “UMtsetfo waba khona kuze sono sitewubonakala. Kodvwa kwatsi nasesibonakala, umusa waNkulunkulu nawo wabonakala kakhulu. Ngayiphi injongo? Kuze kutsi njengobe sono kanye nekufa bekubusa njengenkhosi, ngendlela lefanako nemusa waNkulunkulu ubuse njengenkhosi ngenca yekulunga lokuholela ekuphileni lokuphakadze ngaJesu Khristu iNkhosi yetfu.”​—Rom. 5:20, 21.

⁶ Nobe sitoni, akukafaneli bese sivumela sono sibusa kuphila kwetfu. Nangabe kwenteka sona, sitawucela Jehova kutsi asicolele. Pawula wecwayisa emaKhristu watsi: “Ngobe sono akukafaneli sibe yinkhosi etikwenu ngenca yekutsi anisekho ngephansi kweMtsetfo kodvwa nizuza emseni waNkulunkulu.” (Rom. 6:14) Ngako sibese sibuswa ngumusa waNkulunkulu. Kuba namuphi umphumela? Pawula wachaza watsi: “Ngobe umusa waNkulunkulu . . . usicecesha kutsi sikulahle kungamhloniphi Nkulunkulu netifiso talelive, kodvwa siphile ngengcondvo lebhadlile, ngekulunga, nangekwesaba Nkulunkulu kulelive.”​—Thit. 2:11, 12.

7, 8. Kusho kutsini kutsi umusa waJehova ‘uboniswa ngetindlela letehlukahlukene’? (Buka titfombe letisekucaleni kwalesihloko.)

⁷ Umphostoli Phetro wabhala: “Ngekwelizinga  umuntfu ngamunye lemukele ngalo sipho, akasisebentise kuze asite labanye njengemphatsi lomuhle wemusa waNkulunkulu, loboniswa ngetindlela letehlukahlukene.” (1 Phet. 4:10) Lamavi asho kutsini? Kunobe ngusiphi silingo lesibhekana naso ekuphileni, Jehova utasisita kutsi sikhone kumelana naso. (1 Phet. 1:6) Sonkhe sikhatsi sitawubona umusa waNkulunkulu kuye ngesimo lesibhekene naso.

⁸ Yebo, umusa waJehova ubonakala ngetindlela letehlukahlukene. Umphostoli Johane wabhala: “Sonkhe sawemukela ngalokugcwele umusa lomkhulu, ngobe naye ugcwele wona.” (Joh. 1:16) Letindlela letehlukahlukene Jehova lasikhombisa ngato umusa tisisita kutsi sitfole tibusiso letinyenti. Ngutiphi letinye tato?

9. Sisitakala njani ngemusa waJehova futsi singakhombisa njani kubonga ngaloko?

⁹ Kutsetselelwa tono tetfu. Tono tetfu tiyatsetselelwa ngenca yemusa waJehova longakasifaneli, kuye ngekutsi siyaphendvuka yini futsi siyachubeka yini silwisana nebutsakatsaka besono. (Fundza 1 Johane 1:8, 9.) Sihawu saNkulunkulu kufanele sisente simbonge futsi simdvumise. Abhalela lamanye emaKhristu lagcotjiwe, Pawula watsi: “[Jehova] wasikhulula emandleni ebumnyama, futsi wasendlulisela eMbusweni weNdvodzana yakhe layitsandzako, lesitfole ngayo kukhululwa ngenhlawulo, lokukutsetselelwa kwetono tetfu.” (Khol. 1:13, 14) Kutsetselelwa tono tetfu kusiletsela letinye tibusiso.

10. Yini lesiyijabulelako ngenca yemusa waNkulunkulu longakasifaneli?

¹⁰ Kuba nebuhlobo lobunekuthula naNkulunkulu. Njengobe sitalwa sinesono, loko kusenta sibe titsa taNkulunkulu. Pawula wakuvuma loko nakatsi: “Ngesikhatsi sititsa, sabuyisana naNkulunkulu ngekufa kweNdvodzana yakhe.” (Rom. 5:10) Loku kusisita kutsi sibe nekuthula naJehova. Afananisa lelilungelo leli kanye nemusa waJehova longakasifaneli, Pawula watsi: “Njengobe nyalo sekutsiwe [emaKhristu lagcotjiwe] silungile ngenca yekukholwa, asibe nekuthula naNkulunkulu ngeNkhosi yetfu Jesu Khristu, lesitfole ngayo umusa ngekukholwa; ngako asijabule ngenca yelitsemba lenkhatimulo yaNkulunkulu.” (Rom. 5:1, 2) Loko kusibusiso lesikhulu!

11. Labagcotjiwe batisita njani ‘letinye timvu’ kutsi tibe ngulabalungile?

¹¹ Kusitwa kutsi sibe ngulabalungile. Kute lotalwa alungile. Nobe kunjalo, umphrofethi Danyela wabiketela mayelana nemalanga ekugcina kutsi “labo labahlakaniphile,” asho insali yalabagcotjiwe, ‘batawuholela labanyenti ekulungeni.’ (Fundza Danyela 12:3.) Ngemsebenti wekushumayela kanye nekufundzisa, basite tigidzi ‘taletinye timvu’ kutsi tibe nebuhlobo lobuhle naJehova. (Joh. 10:16) Kepha loko sikutfola kuphela ngemusa waJehova lomkhulu. Pawula wachaza watsi: “Kunjengesipho kubo kutsi kutsiwe balungile ngemusa [waNkulunkulu] lomkhulu ngenca yekukhululwa yinhlawulo leyakhokhwa nguKhristu Jesu.”​—Rom. 3:23, 24.

12. Kuthantaza kuhlobana njani nemusa waNkulunkulu?

¹² Kusondzela esihlalweni sebukhosi saNkulunkulu ngemthantazo. Ngemusa wakhe longakasifaneli, Jehova usibusise ngelilungelo lekusondzela esihlalweni sakhe sebukhosi ngemthantazo. Pawula uze abite sihlalo sebukhosi saJehova ngekutsi ‘sihlalo sebukhosi semusa waNkulunkulu’ futsi usimema kutsi sisondzele kuso “ngenkhululeko yekukhuluma.” (Heb. 4:16a) Jehova usinike lelilungelo leli egameni leNdvodzana yakhe, ‘lesitfole ngayo lenkhululeko yekukhuluma neyekuya kuNkulunkulu  ngekuciniseka lesikutfola ngekukholwa kwetfu.’ (Ef. 3:12) Lilungelo lekuthantaza ngenkhululeko kuJehova liyindlela lenhle kakhulu lasibonisa ngayo umusa wakhe.

13. Umusa longakasifaneli ‘ungasisita njani ngesikhatsi lesifanele’?

¹³ Kutfola lusito ngesikhatsi lesifanele. Pawula wakhutsata kutsi sikhululeke sithantaze kuJehova “kuze sitfole sihawu nemusa wakhe lotasisita ngesikhatsi lesifanele.” (Heb. 4:16b) Nomanini lapho sihlaselwa tilingo nome tinkinga ekuphileni, singakhala kuJehova sicele lusito. Nobe singafaneleki kodvwa uyayiphendvula imithantazo yetfu, ngalesinye sikhatsi usebentisa emaKhristu lesikanye nawo, “ngako sinesibindzi futsi sitsi: ‘Jehova ungumsiti wami; ngeke ngesabe. Umuntfu angangentani?’”​—Heb. 13:6.

14. Umusa Jehova lomkhulu utizuzisa njani tinhlitiyo tetfu?

¹⁴ Kutfola indvudvuto etinhlitiyweni tetfu. Sibusiso lesikhulu lesisitfola ngemusa waJehova kudvudvutwa kwetinhlitiyo letikhatsatekile. (Hla. 51:17) Pawula wabhalela emaKhristu aseThesalonika labekahlushwa ngenca yekukholwa kwawo watsi: “Shengatsi iNkhosi yetfu Jesu Khristu naNkulunkulu longuBabe wetfu, lowasitsandza nalowasinika indvudvuto yaphakadze nelitsemba lelihle ngemusa wakhe, bangadvudvuta tinhlitiyo tenu futsi banicinise.” (2 Thes. 2:16, 17) Kuyadvudvuta kwati kutsi Jehova uyasikhatsalalela futsi uyasitsandza njengobe asibonisa umusa wakhe.

15. Ngenca yemusa waNkulunkulu, nguliphi litsemba lesinalo?

¹⁵ Kubanelitsemba lekuphila lokuphakadze. Site litsemba njengobe sitoni. (Fundza Tihlabelelo 49:7, 8.) Kepha Jehova usinike litsemba lelihle kakhulu. Jesu wetsembisa balandzeli bakhe watsi: “Ngobe intsandvo yaBabe ikutsi wonkhe umuntfu lobona  iNdvodzana, akholwe nangiyo, kufanele atfole kuphila lokuphakadze.” (Joh. 6:40) Lelitsemba lekuphila phakadze lisipho, lokuyindlela lenhle Nkulunkulu lasikhombisa ngayo umusa wakhe longakasifaneli. Pawula bekati kutsi loko kuliciniso, kungako atsi: “Ngobe umusa waNkulunkulu sewubonakalisiwe, futsi uletsa insindziso kuto tonkhe tinhlobo tebantfu.”​—Thit. 2:11.

16. Lamanye emaKhristu angelikhulu lekucala awusebentisa njani kabi umusa waNkulunkulu lomkhulu?

¹⁶ Umusa waJehova usiletsela tibusiso letinyenti, kepha loko akukafaneli kusente kutsi sidvwale, sicabange kutsi konkhe kutiphatsa kuyemukeleka kuye. KulamaKhristu angelikhulu lekucala, kukhona labeketama ‘kugucula umusa wakhe awente saba sekutiphatsa lokubi kwekweyisa.’ (Juda 4) Kuyacaca kutsi lamaKhristu labengaketsembeki, abecabanga kutsi angona etsembe kutsi Jehova utawatsetselela. Lokubi kakhulu kutsi, etama kuncenga nalabanye bazalwane kutsi bente letintfo tekwedzelela kanye nawo. Ngisho nalamuhla, umuntfu lowenta loko ‘utfukutselisa umoya wemusa waNkulunkulu ngekuwedzelela.’​—Heb. 10:29.

17. Phetro waniketa muphi umyalo locinile?

¹⁷ Nalamuhla, Sathane udukise lamanye emaKhristu ngekuwenta acabange kutsi atawutfola sihawu saNkulunkulu ngisho nobe one ngemabomu. Nobe Jehova afuna kucolela toni letiphendvukako, ulindzele kutsi sichubeke silwisana nebutsakatsaka betfu bekwenta sono. Waphefumulela Phetro kutsi abhale atsi: “Njengobe seninalolwati bazalwane labatsandzekako, caphelani kutsi ningadukiswa kanye nabo ngemaphutsa ebantfu labephula umtsetfo, bese nehluleka kuhlala nicinile. Kodvwa chubekani nikhula emseni waNkulunkulu naselwatini lweNkhosi neMsindzisi wetfu, Jesu Khristu.”​—2 Phet. 3:17, 18.

18. Ngenca yemusa waJehova, sinamiphi imitfwalo?

¹⁸ Njengobe sijabulela kutfola umusa waJehova, kufanele sitisebentise kahle tipho lesinato kute sidvumise Nkulunkulu siphindze sisite bomakhelwane betfu. Kanjani? Pawula uyaphendvula, utsi: “Njengobe ngemusa waNkulunkulu sinikwe tipho letingafani; . . . nangabe sipho setfu sikwenta umsebenti, asichubeke siwenta; lofundzisako akachubeke afundzisa; lokhutsatako akachubeke akhutsata; . . . naloyo lonemusa akawubonise ngenjabulo.” (Rom. 12:6-8) Lomusa Jehova lasikhombisa wona usinika umtfwalo wekutsi sikhutsale emsebentini wekushumayela, sifundzise labanye liBhayibheli, sikhutsate emaKhristu lesikanye nawo futsi sicolele labo labasonako.

19. Ngumuphi umtfwalo lesinawo lokutawucocwa ngawo esihlokweni lesilandzelako?

¹⁹ Njengobe semukela lutsandvo lwaNkulunkulu ngenjabulo, kufanele sente lokusemandleni kute ‘sifakaze ngetindzaba letimnandzi temusa waNkulunkulu.’ (Imis. 20:24) Kulesihloko lesilandzelako sitawucoca kabanti ngalomtfwalo lesinawo.