1, 2. (a) Longosorani ntharika ya mulimi wa mpheska. (b) Kasi ntharika iyi yikuvumbura wuli mukhaliro wakupa na lusungu lukuru?

YESU wakayowoya ntharika ya mulimi wa mpheska uyo wakachelera ku msika kuti wakapenje ŵaganyu ŵakuti ŵakagwire ntchito ku munda wake. Mulimi uyu wakapangana nawo ndalama izo waŵapenge ndipo ŵakazomera. Iyo wakawelerako ku msika kanandi waka kukapenja ŵaganyu ŵanyake chifukwa wakakhumbanga ŵantchito ŵanandi. Ŵaganyu wose awo wakasanga, wakapangana nawo malipiro ghakwenelera. Namise wakawunjika ŵaganyu ŵake wose kuti waŵalipire. Iyo wakapeleka malipiro ghakuyana waka kwa ŵaganyu wose, nangauli ŵanji ŵakagwira ntchito kwa maora ghanandi apo ŵanji ŵakagwira kwa ora limoza pera. Kweni ŵaganyu awo ŵakagwira ntchito kwa maora ghanandi ŵakamba kudandawulira mweneko munda chifukwa ŵakaghanaghananga kuti iwo ŵakwenera kupokera ndalama zinandi. Ndipouli, mulimi yura wakafumba yumoza mwa ŵaganyu ŵara kuti: ‘Asi tangukolerana dinari limoza? Asi nili na wanangwa wakuchita icho nakhumba na vinthu vyane? Panji kasi uli na sanji chifukwa chakuti ndine mwanangwa?’—Mat 20:1-15, mazgu ghamusi.

² Ntharika ya Yesu iyi, yikutikumbuska za “lusungu lukuru” lwa  Yehova. Uwu ngumoza mwa mikhaliro ya Yehova iyo yikuzunulika kanandi waka mu Baibolo. ^[1] (Ŵazgani 2 Ŵakorinte 6:1.) Ŵaganyu awo ŵakagwira ntchito kwa ora limoza, ŵakaŵa ŵambura kwenelera kupokera malipiro ghazuŵa lose. Kweni mweneko wa munda wakaŵalengera lusungu lukuru, lekani wakaŵapa malipiro ghazuŵa lose. Mu Mabaibolo ghanandi, mazgu ghakuti “lusungu lukuru” ghali kung’anamulika kuti “uchizi.” Munthu munyake wakalemba kuti: “Mazgu ghakuti ‘lusungu lukuru’ ghakuyowoya chomene za chawanangwa icho chapelekeka mwalusungu kwa munthu uyo ngwambura kwenelera kuchipokera.”

3, 4. Kasi Yehova walongora wuli lusungu lwake lukuru, ndipo chifukwa wuli?

³ Malemba ghakuyowoya za ‘chawanangwa cha lusungu lukuru lwa Chiuta.’ (Efe. 3:7) Chifukwa wuli Yehova wakutipa “chawanangwa” ichi, ndipo wakutipa wuli? Para nyengo zose tikulondezga ivyo Yehova wakukhumba, tiŵenge ŵakwenelera kupokera lusungu lwake lukuru. Kweni pakuti ndise ŵakwananga, tikutondeka kulondezga ndendende ivyo wakukhumba. Lekani Themba Solomoni likalemba kuti: “Pa charu chapasi palije munthu murunji uyo nyengo zose wakuchita uwemi pera kwambura kunangapo.” (Muph. 7:20) Paulosi nayo wakalemba kuti: “Wose ŵali kwananga ndipo ŵakupeleŵera pa uchindami wa Chiuta,” ndipo “malipiro gha kwananga ni nyifwa.” (Rom. 3:23; 6:23) Pakuti ndise ŵakwananga, malipiro agho ghakutiyana nadi ni nyifwa.

⁴ Nangauli ndise ŵakwananga, kweni Yehova wakutitemwa chomene ndipo wakutilongora lusungu lukuru. Iyo wakatitumira chawanangwa chikuru icho ni “Mwana wake wapadera” kuti wazakatifwire. (Yoh. 3:16) Ntheura pakuyowoya za Yesu, Paulosi wakati: “Sono wavwalikika uchindami na ntchindi chifukwa wakasuzgika m’paka nyifwa, mwakuti na lusungu lukuru lwa Chiuta wachete nyifwa m’malo mwa munthu waliyose.” (Heb. 2:9) Nadi, “chawanangwa icho Chiuta wakupeleka mbumoyo wamuyirayira mwa Khristu Yesu Fumu yithu.”—Rom. 6:23b.

5, 6. Kasi ntchivichi icho chikuchitika para tikulongozgeka na (a) kwananga? (b) lusungu lukuru?

⁵ Kasi ŵanthu ŵakahara wuli kwananga na nyifwa? Baibolo likuti: “Nyifwa yikawusa nga ni themba chifukwa cha kwananga kwa munthu yumoza [Adamu].” Lekani ŵana wose ŵa Adamu mbakwananga ndipo ŵakufwa. (Rom. 5:12, 14, 17) Kweni pasono tili na mwaŵi wakuti tingakana kuwusika panji kulongozgeka na kwananga. Para tili na chipulikano mu sembe ya Yesu, tikulongora kuti tikukhumba kulongozgeka na lusungu lukuru lwa Yehova. Chifukwa wuli tikuyowoya nthena? Baibolo likuti: “Apo kwananga kukawoneka, lusungu lukuru lwa Chiuta lukawonekera chomene. Chifukwa wuli? Kuti nga umo kwananga kukawusira nga ni themba pamoza na nyifwa, mwakuyana waka, lusungu lukuru luwuse nga ni themba kwizira mu urunji, kulongozgera ku umoyo wamuyirayira mwa Yesu Khristu.”—Rom. 5:20, 21.

⁶ Nangauli tichali ŵakwananga, kweni tileke kuzomerezga kuti tambe kuwusika na kwananga. Ndipouli, para tachita kwananga, tikwenera kulomba Yehova kuti watigowokere. Paulosi wakachenjezga Ŵakhristu kuti: “Kwananga kuleke kuŵa na mazaza pa imwe chifukwa chakuti muli pasi pa dango chara, kweni pasi pa lusungu lukuru.” (Rom. 6:14) Ntheura ise tikulongozgeka na lusungu lukuru lwa Chiuta. Kasi lusungu ulu lukutovwira wuli? Paulosi wakalongosora kuti: ‘Chiuta walongora lusungu lwake lukuru ulo lukutisambizga kuti tikane nkharo iyo yikususkana na khumbo la Chiuta kweniso kukana makhumbiro gha charu, kuti tiŵenge ŵamahara, ŵarunji na ŵakujipeleka pakusopa Chiuta mu nyengo iyi.’—Tito 2:11, 12.

7, 8. Kasi fundo yakuti lusungu lukuru ‘lukulongoreka munthowa zakupambanapambana’ yikung’anamurachi? (Wonani vithuzi vyakwamba.)

⁷ Petrosi wakalemba kuti: “Mwakuyana na umo waliyose wali kupokera chawanangwa, muteŵeteranenge nacho pakuŵa ŵateŵeti ŵalara ŵawemi ŵa lusungu lukuru lwa Chiuta, lwakulongoreka munthowa zakupambanapambana.” (1 Pet. 4:10) Kasi fundo iyi yikung’anamurachi? Yikung’anamura kuti Yehova watovwirenge kuti tizizipizge chiyezgo chilichose visuzge viti wuli. (1 Pet. 1:6) Nyengo zose Yehova wakutilongora lusungu lwake lukuru kuyana na chiyezgo icho takumana nacho.

⁸ Lusungu lukuru lwa Yehova lukulongoreka munthowa zinandi. Yohane wakati: “Chifukwa chakuti iyo wali na lusungu lukuru, nase tikulutilira kupokera lusungu lukuru.” (Yoh. 1:16) Tikusanga vitumbiko vinandi chomene chifukwa Yehova wakulongora lusungu lwake lukuru munthowa zakupambanapambana. Kasi vinyake mwa vitumbiko ivi ni vi?

9. Kasi lusungu lukuru lwa Yehova lukutovwira wuli, ndipo tingalongora wuli kuwonga?

⁹ Zakwananga zithu zikugowokereka. Lusungu lukuru lwa Yehova lukutovwira kuti zakwananga zithu zigowokereke, chikuru tikulapa kufumira pasi pa mtima. Kweniso tikwenera kuŵikapo mtima kuti tilutilire kukanizga makhumbiro ghakwananga ghathupi lithu. (Ŵazgani 1 Yohane 1:8, 9.) Lusungu lwa Chiuta lukwenera kutichiska kumuwonga na kumupa uchindami. Paulosi wakalembera Ŵakhristu ŵakuphakazgika kuti: ‘[Yehova] wakatithaska ku mazaza gha chisi na kutitolera ku ufumu wa Mwana wake wakutemweka. Kwizira mwa mwana uyu tili kufwatulika na chiwombolero, ndipo tili kugowokereka kwananga kwithu.’ (Kol. 1:13, 14) Tikusanga vitumbiko vinandi para zakwananga zithu zagowokereka.

10. Kasi tili na mwaŵi wuli chifukwa cha lusungu lukuru lwa Chiuta?

¹⁰ Tili paubwezi na Yehova. Ndise ŵakwananga kufumira waka apo tikababikira. Paulosi wakamanyanga fundo iyi, lekani wakati: ‘Apo tikaŵa ŵalwani, tikaphemana na Chiuta kwizira mu nyifwa ya Mwana wake.’ (Rom. 5:10) Sembe ya Yesu yikutovwira kuti tiphemane na Yehova na kuŵa nayo paubwezi. Paulosi wakalongosora fundo iyi kweniso umo yikukolerana na lusungu lukuru lwa Chiuta. Iyo wakati: “Sono pakuti [ise ŵabali ŵa Khristu] tapimika ŵarunji chifukwa cha chipulikano, tiyeni tiŵe pamtende na Chiuta kwizira mwa Fumu yithu Yesu Khristu. Pakuti tili na chipulikano mwa Yesu, nthowa yatijulikira kuti tipokere lusungu lukuru, ulo sono tikupokera.” (Rom. 5:1, 2) Uwu ni mwaŵi ukuru chomene.

11. Kasi ŵakuphakazgika ŵakovwira wuli ŵamberere zinyake kuti ŵaŵe ŵarunji?

¹¹ Tikupimika ŵarunji. Tose tili kubabika ŵakwananga. Ndipouli, ntchimi Daniyeli yikayowoyerathu kuti mu mazuŵa ghaumaliro, “awo ŵali na mahara” panji kuti ŵakuphakazgika ‘ŵazamwiza na ŵanandi ku urunji.’ (Ŵazgani Daniyeli 12:3.) Kwizira mu ntchito yakupharazga na kusambizga, ŵakuphakazgika ŵawovwira ‘ŵamberere zinyake’ ŵanandi kuti ŵaŵe ŵarunji pamaso pa Yehova. (Yoh. 10:16) Ndipouli, tikupimika ŵarunji chifukwa cha lusungu lukuru lwa Yehova. Paulosi wakati: “Ŵanthu ŵakuŵa ŵarunji pamaso pa Chiuta chifukwa cha sembe iyo Khristu Yesu wali kupeleka kuti waŵawombore. Ndipo ichi ntchawanangwa icho Chiuta wali kupeleka chifukwa cha lusungu lwake lukuru.”—Rom. 3:23, 24.

12. Kasi pali kukolerana wuli pakati pa lurombo na lusungu lukuru lwa Chiuta?

¹² Tikulomba kwa Chiuta mwakufwatuka. Chifukwa cha lusungu lwake lukuru, Yehova watipa mwaŵi wakuti tingafika ku mpando wake kwizira mu lurombo. Nakuti Paulosi wakachema chitengo cha Yehova kuti “chitengo cha uyo  wali na lusungu lukuru,” ndipo wakati tikwenera kusendelera ku chitengo ichi na “wanangwa wa kuyowoya.” (Heb. 4:16a) Yehova watipa mwaŵi wakuyowoya nayo kwizira mwa Mwana wake. Nakuti “kwizira mwa iyo tili na wanangwa uwu wakuyowoya ndipo na chigomezgo chose tikusendelera kwa Chiuta chifukwa tili na chipulikano mwa Yesu.” (Efe. 3:12) Mwaŵi uwo tili nawo wakufika kwa Yehova na kuyowoya nayo mwakufwatuka, ntchilongolero chikuru cha lusungu lukuru lwa Chiuta.

13. Kasi lusungu lukuru lwa Chiuta lukutovwira wuli “pa nyengo yakwenelera”?

¹³ Tikusanga wovwiri pa nyengo yakwenelera. Paulosi wakati tikwenera kulomba mwakufwatuka kwa Yehova, “mwakuti tipokere lusungu na kusanga lusungu lukuru kuti vitovwire pa nyengo yakwenelera.” (Heb. 4:16b) Nyengo yiliyose para takumana na masuzgo panji tikuyezgeka, tingalilira kwa Yehova kuti watovwire na lusungu lwake. Nangauli ndise ŵakwananga kweniso ŵambura kwenelera kulomba kwa iyo, Yehova wakutizgora. Kanandi wakutizgora kwizira mu Ŵakhristu ŵanyithu “mwakuti tiŵenge ŵakukhwima mtima na kuyowoya kuti: ‘Yehova ni movwiri wane, nopenge chara. Kasi munthu wangachitachi kwa ine?’”—Heb. 13:6.

14. Kasi lusungu lukuru lwa Yehova lukutovwiraso wuli?

¹⁴ Tikusanguluskika. Chifukwa cha lusungu lukuru lwa Yehova, tikusanguluskika para mtima withu waphyoka na kuteketeka. (Sal. 51:17) Apo Ŵakhristu ŵa ku Tesalonika ŵakatambuzgikanga, Paulosi wakaŵakhozga na mazgu ghakuti: “Mphanyi Fumu yithu Yesu Khristu na Chiuta, Adada ŵithu, awo ŵakatitemwa na kutipa chisangulusko chamuyirayira na chigomezgo chiwemi kwizira mu lusungu lukuru, ŵasanguluska mitima yinu na kumukhozgani.” (2 Tes. 2:16, 17) Tikukhozgeka kumanya kuti Yehova wakutitemwa na kutipwelelera chomene.

15. Kasi lusungu lukuru lwa Chiuta lukutipa chilindizga wuli?

¹⁵ Tizamusanga umoyo wamuyirayira. Pakuti ndise ŵakwananga, palije icho tingachita patekha kuti tijiwombore. (Ŵazgani Salimo 49:7, 8.) Kweni Yehova watovwira kuti tiŵe  na chilindizga chiwemi chomene chamunthazi. Yesu wakalayizga ŵalondezgi ŵake kuti: “Ili ndilo ni khumbo la Adada, kuti waliyose uyo wakuwona Mwana na kupulikana mwa iyo waŵe na umoyo wamuyirayira.” (Yoh. 6:40) Nadi, umoyo wamuyirayira ntchawanangwa chakuzirwa ndipo chikutovwira kuwona lusungu lukuru lwa Chiuta. Paulosi nayo wakalumba chawanangwa ichi, ndipo wakati: “Chiuta walongora lusungu lwake lukuru kuti ŵanthu ŵa mitundu yose ŵaponoskeke.”—Tito 2:11.

16. Kasi Ŵakhristu ŵanyake ŵakaseŵereska wuli lusungu lukuru lwa Chiuta?

¹⁶ Nangauli lusungu lukuru lwa Yehova lukutovwira kuti tisange vitumbiko vinandi, kweni tileke kwamba kujikuzga na kughanaghana kuti Yehova wakuzomerezga nkharo ziheni. Mu nyengo ya Ŵakhristu ŵakwambilira, ŵanyake ŵakazgora “lusungu lukuru lwa Chiuta . . . kuŵa chifukwa chakuchitira ukwakwa.” (Yuda 4) Ŵakhristu ŵambura kugomezgeka aŵa ŵakaghanaghananga kuti nanga ŵangachita kwananga mwadala, Yehova waŵagowokerenge nyengo zose. Kweniso chinthu chinyake chiheni chomene ntchakuti ŵakanyengangaso ŵanyawo kuti nawo ŵambe kuchita nkharo ziheni. Mazuŵa ghano napo, wose awo ŵakunangira dala, ŵakuchitira “msinjiro mzimu wa lusungu lukuru” lwa Chiuta.—Heb. 10:29.

17. Kasi Petrosi wakapeleka ulongozgi wuli ku Ŵakhristu?

¹⁷ Mazuŵa ghano, Satana wapuluska Ŵakhristu ŵanyake kughanaghana kuti mulimose umo ŵangachitira zakwananga, Chiuta waŵagowokerenge nakale, ndipo waŵalangenge yayi. Nangauli Yehova ngwakunozgeka kugowokera awo ŵalapa nadi, kweni iyo wakukhumba kuti nase tiŵikengepo mtima kukanizga makhumbiro ghakwananga. Yehova wakachiska Petrosi kulemba kuti: “Ntheura, imwe ŵakutemweka, pakuti mukumanyirathu vinthu ivi, chenjerani kuti muleke kupuluskika pamoza nawo mu kwananga kwa ŵanthu ŵaheni ndiposo kuti mulutilire kuŵa ŵakukhora. Kweni lutilirani kukura mu lusungu lukuru kweniso mu kumanya Fumu na Mponoski Yesu Khristu.”—2 Pet. 3:17, 18.

18. Kasi lusungu lukuru lwa Yehova lukutichiska kuchitachi?

¹⁸ Pakuti Yehova wakutichitira lusungu, ipo tili na ngongoli kwa iyo kweniso ku ŵazengezgani ŵithu. Nase tikwenera kugwiliskira ntchito vyawanangwa vinthu pakuteŵetera Yehova na kovwira Ŵakhristu ŵanyithu. Kasi tingachita wuli? Paulosi wakati: “Ntheura pakuti tili na vyawanangwa vyakupambana kuyana na lusungu lukuru ulo lwapika kwa ise, . . . usange tagaŵirika kuchita uteŵeti, tiyeni tilutilire pa uteŵeti uwu. Uyo wakusambizga, mulekani walutilire kusambizga kwake. Uyo wakuchiska, mulekani walutilire kuchiska. . . . Uyo wakulongora lusungu, mulekani walongore lusungu mwakukondwa.” (Rom. 12:6-8) Lusungu lukuru ulo Yehova wakutilongora lukutichiska kuti nase nyengo zose tilimbikirenge chomene kupharazga, kusambizga ŵanthu Baibolo, kukhozga Ŵakhristu ŵanyithu, na kugowokera wose awo ŵatibudira.

19. Kasi tizamusambira vichi mu nkhani yakulondezgapo?

¹⁹ Yehova walongora nadi kuti wakutitemwa. Ntheura nase tikwenera kuchita chilichose icho tingakwaniska kuti tichitire “ukaboni mwakukwana makani ghawemi gha lusungu lukuru lwa Chiuta.” (Mil. 20:24) Nkhani yakulondezgapo yikulongosora makora umo tingachitira ukaboni mwakukwana makani ghawemi gha lusungu lukuru lwa Chiuta.