1, 2. (a) Fakamatala mai a te tala fakatusa a Iesu e uiga ki te matai o te tagavine. (e) E fakaasi mai pefea i te tala a te uiga kaimalie mo te alofa tauanoa?

NE FANATU te pule o te togavine ki te maketi i te vaveao e tasi o ‵sala ne tino ke ga‵lue i tena togavine. Ne lotoma‵lie a tino kolā ne maua ne ia ki te ‵togi o latou, telā olo atu ei o ga‵lue. Kae ne manako te matai ki tino ga‵lue e tai tokouke atu, toe foki atu ei ki te maketi i te aso kātoa o ‵sala a tagata e tai tokouke, kae ofo atu ne ia te lotou ‵togi telā e ‵pau eiloa mo te ‵togi o latou kolā ne ‵sala ne ia i te fakatutonu. I te okoatuga ki te afiafi, ne fakamaopoopo ne ia a tino ga‵lue ke tuku atu olotou peofuga, kae ne ‵pau eiloa te aofaki ne tuku atu ne ia ki a latou kolā ne uke olotou itula ga‵lue mo latou kolā ne ga‵lue fua mō se itula e tasi. I te taimi ne ‵logo ei a latou kolā ne ga‵lue muamua i te mea tenei, ne kamata latou o mui‵mui. Kae ne fai atu te pule o te togavine, penei: ‘E mata, ne seki lotomalie koe ki te peofuga telā ne tuku atu ne au? E mata, e se maua ne au te saolotoga ke fai te mea e manako au o fai ki aku tino ga‵lue? E a, e loto masei koe ona ko au e kaimalie?’—Mata. 20:1-15, ftn.

² E fakamasaua mai i te tala fakatusa tenei a Iesu, a te uiga e tasi o Ieova telā e fakaasi mai faeloa i te Tusi Tapu—ko tena “alofa  tauanoa.” ^[1] (Faitau te 2 Kolinito 6:1.) Ne seki fai pelā me ne maua ne tino kolā ne ga‵lue i se itula fua e tasi a te peofuga kātoa ona ko te ‵lei o olotou galuega, kae ne manako eiloa te matai o fakaasi atu te lasi o tena alofa atafai ki a latou. E uiga ki te pati “alofa tauanoa” telā e ‵fuli sale ki te pati “atafai” i ‵fuliga e uke o te Tusi Tapu, ne tusi mai se tino poto e tokotasi, penei: “A te uiga tonu o te pati tenā, se meaalofa faivasaga kae seai se ‵togi telā e tuku atu ki se tino e aunoa mo se taui.”

3, 4. Kaia kae i te auala fea ne fakaasi mai ei ne Ieova tena alofa tauanoa ki tino katoa?

³ E faipati eiloa te Tusi Tapu e uiga ki te “meaalofa faivasaga o te alofa tauanoa o te Atua.” (Efe. 3:7) Kaia kae i te auala fea e tuku mai ei ne Ieova te “meaalofa faivasaga” tenei? Ona ko te mea e se katoatoa ‵tou faka‵logo ki a Ieova, e se maua foki ne tatou a te alofa atafai o te Atua. A te tonuga loa, e ‵tau eiloa o ‵mate tatou. Kae, ne tusi mai te tupu ko Solomona, penei: “E seai se tino i te lalolagi e fai faeloa ne ia te mea tonu kae se mafai o ‵se.” (Fai. 7:20) I se auala tai ‵pau, ne fai mai te apositolo ko Paulo, penei: “Ko oti ne agasala a tino katoa kae ko ‵mao mai te ‵malu o te Atua,” kae ko te “togi o te agasala ko te mate.” (Loma 3:23; 6:23a) Tenā eiloa te ikuga o tatou.

⁴ E tiga eiloa te feitu tenā, ne fakaasi mai ne Ieova tena alofa ki tino agasala katoa i se auala sē fakanafagina o tena alofa tauanoa. Ne tuku mai ne ia tena meaalofa sili, ko “tena Tama fagasele e tokotasi,” ki te lalolagi nei ke mate mō tatou. (Ioa. 3:16) Tela la, ne tusi mai a Paulo e uiga ki a Iesu e pelā me ko “oti nei ne fakaeke ki te ‵malu mo te fakaaloalo me ko oti ne logo‵mae a ia i te mate, ko te mea ke tami a ia ki te mate mō tino katoa e auala i te alofa tauanoa o te Atua.” (Epe. 2:9) Ao, a te “meaalofa telā e tuku mai ne te Atua ko te ola se-gata-mai i a Keliso Iesu te ‵tou Aliki.”—Loma 6:23e.

5, 6. Ne a ikuga e maua ne tatou māfai e pule tatou ne te (a) agasala? (e) alofa tauanoa?

⁵ Ne maua pefea ne tino te agasala, kae ‵mate atu katoa? E fakamatala mai te Tusi Tapu, penei: “Ne pule mai te mate e pelā me se tupu ona ko te solitulafono o te tagata e tokotasi [ko Atamu]” ki ana fanau katoa. (Loma 5:12, 14, 17) Kae se mea fakafiafia, me e mafai o filifili ne tatou ke mo a e pule tatou ne te agasala. Mai te fakatuanaki ki taulaga togiola a Keliso, ko ‵nofo ei tatou mai lalo i te pulega o te alofa tauanoa o Ieova. E pefea la? “Me e pelā eiloa mo te pule mai o te agasala e pelā me se tupu fakatasi mo te mate, e penā foki a te pule mai o te alofa tauanoa e pelā me se tupu e auala i te amiotonu mō te ola se-gata-mai e auala i a Iesu Keliso te ‵tou Aliki.”—Loma 5:20, 21.

⁶ E tiga eiloa koi agasala tatou, e se ‵tau o talia ne tatou a te agasala ke pule mai ki ‵tou olaga. Kafai e agasala tatou, ka fakamolemole atu eiloa tatou ki te fakamagaloga a Ieova. Ne fakailoa atu ne Paulo ki Kelisiano: “E se ‵tau o fai te agasala mo fai te matai ki luga i a koutou, ona ko koutou ko se ‵nofo mai lalo i te tulafono kae mai lalo i te alofa tauanoa o te Atua.” (Loma 6:14) Tela la, ko ‵nofo tatou mai lalo o te pulega a te alofa tauanoa. Se a te ikuga? Ne fakamatala mai a Paulo, penei: “Te alofa tauanoa o te Atua . . . e akoako mai ke ‵teke atu tatou ki amioga sē amioatua mo manakoga faka-te-lalolagi, kae ke ola tatou i te mafaufau ‵lei mo te amiotonu mo te fakamaoni ki te Atua i loto i te olaga tenei.”—Tito 2:11, 12.

7, 8. Se a te uiga me i te alofa tauanoa o Ieova ne “fakaasi mai i auala kese‵kese”? (Ke onoono ki te ata i te kamataga.)

⁷ Ne tusi mai te apositolo ko Petelu, penei: “Ke fakaaoga a meaalofa kolā e maua ne tino taki tokotasi ke tavini atu ei te suā tino ki te suā tino e pelā me ne situati ‵lei o te alofa tauanoa  o te Atua telā e fakaasi mai i auala kese‵kese.” (1 Pe. 4:10) Se a te uiga o te mea tenā? Me e pefea te tulaga o fakalavelave e fe‵paki mo tatou i te olaga, e mafai eiloa o fesoasoani mai a Ieova ke fakafesagai atu tatou ki ei. (1 Pe. 1:6) Ka isi faeloa se fakaasiga o te alofa atafai o te Atua telā ka fesoasoani mai ke manumalo tatou i fakalavelave faiga‵ta.

⁸ E tonu, ne fakaasi mai ne Ieova tena alofa tauanoa i auala kese‵kese. Ne tusi mai te apositolo ko Ioane: “Ne maua ne tatou katoa mai i a ia te alofa tauanoa, me e ‵fonu a ia i te alofa tauanoa.” (Ioa. 1:16) E lavea atu a fakaasiga kese‵kese o te atafai o Ieova e auala i fakamanuiaga e uke e maua ne tatou. Ne a nisi mea e aofia i ei?

9. E aoga pefea ki a tatou a te alofa tauanoa o Ieova, kae e mafai pefea o fakaasi atu ‵tou loto fakafetai?

⁹ Fakamagalogina ‵tou agasala. Ona ko te alofa tauanoa o Ieova, e fakamagalogina ‵tou agasala, māfai e salamō tatou kae taua atu faeloa ki ‵tou vāivāiga faka-te-foitino. (Faitau te 1 Ioane 1:8, 9.) E ‵tau o ‵fonu ‵tou loto fakafetai ona ko te alofa fakamagalo o te Atua, kae fai ei ke faka‵malu ne tatou a ia. I tena tusi ki Kelisiano fakaekegina, ne fai atu a Paulo: “Ne faka‵sao ne [Ieova] tatou mai te malosi o te pouliga kae avatu ne ia tatou ki loto i te Malo o tena Tama fagasele, e auala i a ia ko fakasaoloto ei tatou e alatu i te togiola, ko te fakamagaloga tenā o ‵tou agasala.” (Ko. 1:13, 14) Ona ko te mea ne fakamagalo ne Ieova ‵tou agasala, ko mafai foki o maua ne tatou a fakamanuiaga ‵gali e uke.

10. Se a te fakamanuiaga e maua ne tatou ona ko te alofa tauanoa o te Atua?

¹⁰ Te mauaga o se fesokotakiga filemu mo te Atua. Ona ko te ‵tou tulaga agasala talu mai ‵tou fanaumaiga, ne fai tatou mo fili o te Atua. Ne fai ‵tonu mai ne Paulo a te mea tenei: “Kafai ne toe faka‵lei tatou mo te Atua, a koi fai tatou mo ana fili, e auala i te mate o tena Tama.” (Loma 5:10) Ne fai ne te faka‵leiga tenei ke mafai o maua ne tatou se vā filemu mo Ieova. Ne fakafetaui aka ne Paulo a te tauliaga tenei ki te alofa tauanoa o Ieova, i ana muna: “Tela la, me ko oti ne takuamiotonugina tatou [taina fakaekegina o Keliso] ona ko te fakatuanaki, ke na fakatumau la ne tatou te ‵tou va filemu mo te Atua e auala i te ‵tou Aliki ko Iesu Keliso. Ko ia foki e mafai ei o maua ne tatou a te fakatuanaki e auala i te alofa tauanoa telā ko ‵mautakitaki i ei tatou.” (Loma 5:1, 2) A te mea tenei se fakamanuiaga eiloa!

11. Ne mafai pefea o aumai ne te kau fakaekegina a “nisi mamoe” ki te amiotonu?

¹¹ Ne aumai ki te amiotonu. A tatou ne tino sē amiotonu mai te kamataga. Kae ne ‵valo mai te pelofeta ko Tanielu me i te taimi o te gataga, a “latou kolā e ‵loto te lotou malamalama,” te ‵toega o te kau fakaekegina, ka “aumai ne latou a tino e tokouke ki te amiotonu.” (Faitau te Tanielu 12:3.) Mai i te talai mo te akoako atu, ne aumai ei ne latou a te fia miliona o “nisi mamoe” ki te tulaga amiotonu i mua o Ieova. (Ioa. 10:16) E ui i ei, ne mafai a fai a mea konei e auala i te alofa tauanoa o Ieova. Ne fakamatala mai a Paulo: “Me e taku amiotonugina latou e pelā me se meaalofa, ona ko tena alofa tauanoa e auala i te fakasaolotoga telā ne ‵togi ki te togiola a Keliso Iesu.”—Loma 3:23, 24.

12. E pefea te sokoga o te ‵talo ki te alofa tauanoa o te Atua?

¹² Olo atu ki mua o te nofogaaliki o te Atua e auala i ‵talo. Ona ko tena alofa tauanoa, ne tuku mai ei ne Ieova se fakamanuiaga ke olo atu tatou ki tena nofogaaliki i te lagi e auala i ‵talo. E tonu, ne taku ne Paulo a te nofogaaliki o Ieova ki te “nofogaaliki o te alofa tauanoa” kae ‵kami ne ia tatou ke fakapili‵pili atu ki a ia e auala i te “saolotoga o fai‵pati atu.” (Epe. 4:16a) Ne tuku mai ne Ieova ki a tatou a te tauliaga e auala i tena Tama, “ko maua ei ne tatou a te saolotoga o fai‵pati atu e auala i a ia kae ke olo atu foki tatou ki mua o te Atua mo te loto tali‵tonu ona ko te ‵tou fakatuanaki ki a ia.” (Efe. 3:12) A te saolotoga ke faipati atu  ki a Ieova e auala i ‵talo se fakaasiga tonu eiloa o tena alofa tauanoa.

13. E mafai pefea ne te alofa tauanoa “fesoasoani mai ki a tatou i te taimi tonu”?

¹³ ‵Sala atu ki te fesoasoani i taimi tonu. Ne fakamalosi mai a Paulo ke olo atu tatou ki a Ieova i ‵talo, “ko te mea ke maua ne tatou te alofa fakamagalo, kae maua foki te alofa tauanoa ke fesoasoani mai ki a tatou i te taimi tonu.” (Epe. 4:16e) I so se taimi e fe‵paki ei tatou mo fakalavelave io me ko te manavase, e mafai o fakatagi atu tatou ki a Ieova mō se fesoasoani. E tali mai ne ia ‵tou ‵talo faitalia me e se ‵tau o fai a ia penā. E fakaaoga faeloa ne ia ‵tou taina Kelisiano, “Ko te mea ke loto ‵toa tatou o fai aka penei: ‘A Ieova ko toku fesoasoani, ka se mataku lele au. Se a te mea e mafai o fai ne te tagata ki a au.’”—Epe. 13:6.

14. E aoga pefea ki ‵tou loto a te alofa tauanoa o Ieova?

¹⁴ Mauaga o fakamafanafanaga i ‵tou loto. Se fakamanuiaga lasi eiloa ke fakamafanafana tatou ne Ieova faitalia ‵tou loto mafatia. (Sala. 51:17) Ne tusi atu a Paulo ki Kelisiano i Tesalonia kolā e fe‵paki mo fakasauaga, penei: “Ke i luga i a koutou te ‵tou Aliki ko Iesu Keliso mo te Atua te ‵tou Tamana, kolā e a‵lofa mai ki a tatou kae tuku mai foki ne lāua a fakamafanafanaga se-gata-mai mo te fakamoemoega gali e auala i te alofa tauanoa, ke fakamafanafana atu ki otou loto kae fakama‵losi atu foki ki a koutou.” (2 Tesa. 2:16, 17) Se mea fakamafanafana loto ke lavea atu a te tausiga alofa telā e maua ne tatou mai i a Ieova ona ko tena alofa kaimalie!

15. Se a te fakamoemoega e maua ne tatou ke fakaasi atu te loto fakafetai ki te Atua?

¹⁵ E maua te fakamoemoega ko te ola se-gata-mai. E pelā me ne tino agasala, e seai se ‵tou fakamoemoega e maua ne tatou ia tatou eiloa. (Faitau te Salamo 49:7, 8.) Kae ne tuku mai ne Ieova se fakamoemoega gali mō tatou. Ne tauto atu a Iesu ki ana soko: “Tenei te loto o toku Tamana, ko tino katoa kolā e lavea ne latou te Tama kae fakatuanaki ki a ia ka maua eiloa ne latou te ola se-gata-mai.” (Ioa. 6:40)  Ao, a te fakamoemoega e uiga ki te ola se-gata-mai se meaalofa, se fakaasiga gali o te alofa tauanoa o te Atua. A Paulo, telā ne talia ne ia te manatu tenā, ne fai mai: “Me ko oti ne fakaasi mai te alofa tauanoa o te Atua, e avatu ei te fakaolataga ki tino katoa.”—Tito 2:11.

16. Ne fakaseaoga pefea ne nisi Kelisiano i aso mua a te alofa tauanoa o te Atua?

¹⁶ E tiga eiloa e maua ne tatou a fakamanuiaga e uke mai te alofa tauanoa o Ieova, e mafau‵fau tatou me ka sē saga mai a ia ki amioga a tino katoa. I tafa o Kelisiano i aso mua, e isi ne tino kolā ne taumafai o “‵fuli ne latou a te alofa tauanoa o te ‵tou Atua mo fai se fakamasakoga ke fai ne latou a amioga matafatu mo te sē āva.” (Iuta 4) Ne mafau‵fau eiloa a Kelisiano sē fakamaoni konei me e mafai o fai ne latou a agasala kae fakamagalo faeloa ne Ieova latou. Kae e sili atu i te masei, me ne taumafai latou o fakakolekole ne latou a olotou taina ke ‵kau atu ki a latou i olotou auala sē āva. Ke oko foki ki aso nei, so se tino e fai ne ia te mea tenā e “fai ne ia te agaga o te alofa tauanoa ke kaitaua.”—Epe. 10:29.

17. Se a te polopolokiga ‵mafa ne tuku mai ne Petelu?

¹⁷ I aso nei, ko oti ne takitaki ‵se ne Satani a nisi Kelisiano ke mafau‵fau me e mafai o maua faeloa ne latou te fakamagaloga a te Atua māfai latou e fai ne latou se agasala. Kae e tiga eiloa e loto fiafia a Ieova o fakamagalo a tino agasala kolā ko sala‵mo, e fakamoemoe a ia ke taua malosi atu tatou ki ‵tou manakoga agasala. Ne fakaosofia ne ia Petelu ke tusi mai, penei: “Tela la, e aku fagasele, ona ko te mea ko iloa ne koutou a te mea tenei, ke fakaeteete la ke mo a e takitaki‵segina koutou fakatasi mo latou ona ko mea ‵se a tino solitulafono kae galo atu ei te otou tulaga ‵mautakitaki. Ikai, kae ke ola faeloa koutou i te alofa tauanoa mo te poto e uiga ki te ‵tou Aliki mo te ‵tou Fakaola ko Iesu Keliso.”—2 Pe. 3:17, 18.

18. Ona ko te alofa tauanoa o Ieova, ne a tiute e maua ne tatou?

¹⁸ E pelā me ne tino kolā e loto fakafetai o talia te alofa atafai o Ieova, e ‵tau o fakaaoga ne tatou a ‵tou meaalofa ke faka‵malu ei a te Atua kae ke maua ne tino katoa a mea aoga. E fakaaoga la pefea ne tatou a meaalofa konā? Ne tali mai a Paulo: “Tela la, ona ko te kese‵kese o meaalofa ne maua ne tatou e ‵tusa mo te alofa tauanoa ne tuku mai ki a tatou . . . me kafai ko te galuega talai, ke na ga‵lue tatou i ei, io me ko te tino telā e akoako, ke na akoako atu eiloa a ia; io me ko te tino telā e fakamalosi ke na fakamalosi atu eiloa a ia; a ko te tino telā e tufa atu ana mea, ke na fai ne ia te mea tenā mo te kaimalie; a ko te tino telā e takitaki, ke na takitaki atu faka‵lei; a ko te tino telā e fakaasi atu te alofa fakamagalo, ke na fai eiloa ne ia te mea tenā mo te fiafia.” (Loma 12:6-8) Ona ko te alofa tauanoa o Ieova, ko maua ne tatou a te tiute ke ga‵lue malosi i te galuega talai faka-Kelisiano, ke akoako atu a tino ki te Tusi Tapu, ke fakamalosi aka a taina Kelisiano, kae ke fakamagalo ne tatou so se tino telā e ‵se mai ki a tatou.

19. Se a te tiute telā ka sau‵tala tatou ki ei i te suā mataupu?

¹⁹ E pelā me ne tino kolā e loto fakafetai ki te alofa kaimalie o te Atua, e ‵tau mo tatou o na gasue‵sue o fai te ‵toe mea e mafai o fai “ke tuku atu se molimau katoatoa e uiga ki te tala ‵lei o te alofa tauanoa o te Atua.” (Galu. 20:24) Ka suke‵suke faka‵lei tatou ki te tiute tenei i te suā mataupu.